المساعد الشخصي الرقمي

مشاهدة النسخة كاملة : معلومات غير معروفة عن البنوك .. يجهلها ( كثير من العملاء ) ..!!!‎‎


الغازي
17-07-2010, 11:03 PM
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته


1
كم مرة رحت للبنك عشان تفتح حساب ، وقال لك الموظف / ما أقدر افتح لك حساب إلا لازم تحط مبلغ معين ؟! بعض الموظفين يقولك 10 الاف وبعضهم يقولك خمسة الآف وبعضهم الف وبعضهم يقولك أي مبلغ تقدر عليه ..!!
خذ النصيحة هذي مني ..
إذا قالك الموظف مثل ذا الكلام .. أضحك في وجه .. وخذ الامر ببساطة ، وقل له .. ممكن اعرف اسمك .. إذا كان مو حاط اسمه ، والا فالمفترض يكون الموظف اسمه مكتوب او حاط بطاقة على صدره فيها معلوماته .
إذا قال ليه ؟!
قل بس ابغاه ، وإذا انت ما تبغى تقول لي اسمك .. برضوا أنت حر .. وبرضوا ابتسم في وجهه ..!! عادة اذا طلبت اسمه يعرف الموظف انك راح تشتكيه وراح يتدارك الموضوع وراح يقولك اوكي .. راح يصرف الموضوع بأي طريقة وراح يفتح لك بأي طريقة بدون اي مبلغ .
إذا مسكت مع الموظف عناد وبدأ يسوق عليك العبط ... وأصر على المبلغ لفتح الحساب ..
أطلع لمدير الفرع ، وبلغه باللي حصل من الموظف ، وقله بكل بساطة انا جاي افتح حساب والموظف طلب مني مبلغ عشان افتح الحساب ..!!
وشف المدير .. وش راح يسوي في الموظف ..!!
بس لحظة ..؟!
ممكن يكون المدير صديق للموظف ولا يبغى يحرجه وممكن يتعاون مع الموظف .؟!
اذا وقف المدير مع الموظف ... برضوا اضحك .. وابتسم ... وخذ الامور ببساطة ...!!
لكن قبل ما تطلع من مكتب المدير قل ذا الجملة .. وشف كيف تكون ردة فعل المدير
قل له / اوكي ، إذا انتم مصرين على أني افتح حساب ولازم احط مبلغ ..
انا راح اتصل الآن على إدارة البنك ، وراح أكلم مؤسسة النقد .. بالكلام اللي قلته لي أنت و موظفك ...
وقتها ... شف مدير الفرع وش راح يسوي ..!!
راح يتغير لون وجهه ... ويختبص ... ويرتبك ... وراح يترجاك ان الموضوع ما يكبر ...!! لأن مدير الفرع اكثر واحد يعرف وش معنى العميل يشتكي على ذا الموضوع ( بالذات ) وهو موضوع فتح العميل لحساب ب مبلغ مالي ..!!
النظام يقول ، واللي موظفين البنك واحد واحد يعرفونه ، وهو من ( ابجديات العمل المصرفي ) ...
إن ( شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب ) .
اذا اشتكي العميل لمؤسسة النقد ، ممكن يغرم البنك بمبلغ كبير ، وإذا اشتكى العميل لإدارة البنك عن طريق الرقم المجاني شكاوى العملاء ، راح تلعن الإدارة ابو خامس مدير الفرع والموظف ، والموضوع ابداً مافيه اي تساهل من اي ادارة بنك . لكن اكثر الناس ... ما يعرفون .

...........................
2
إذا رحت تلغي الفيزا ..
لا تكتفي بـــ الإجراء اللي يسويه الموظف .... وهي انه يأخذ البطاقة ويقصها او يخرمها قدامك ... وتوقع على نموذج الغاء البطاقة ...
بل .. يجب أن تطلب ( مخالصة نهائية ) من البنك ..
وهذي عادة تتأخر شوي لأنها تصدر من ( إدارة البنك ) مش من ( الفرع ) ... لكن مو مشكلة ..
لأنها في احيان كثيرة ... النموذج هذا اللي تعبية في ( الفرع ) ، غير كاف لإلغاء البطاقة ، وراح تكتشف بعد شهور إن البطاقة لازالت محسوبة عليك .. ويمكن يصدرون لك بطاقة جديدة ( مجددة ) بدون علمك ..!!
المخالصة تضمن عدم احتساب أي مبالغ على البطاقة وتضمن عدم تجديد البنك للبطاقة .

................
3
البرامج اللي تقدمها بعض البنوك ..
برامج ... للزواج .. برامج للابناء ... برامج أدخارية ومستقبليه و ما ادري إيش .. !!!
مهما حاول الموظف انه يقنعك فيها ... طنش ...!!
كلام فاضي ... والفائدة من ورائها ... شبه معدومة .. إن ما خسرت فيها .. ما راح يجيك الا راس مالك ... وإذا جاك ربح .. فهذا الربح .. مايسوى .. انك تتعلق مع البنك ... لسنوات وهم يخصمون من راتبك ..!! العملية كلها ببساطة ( هي ربط العميل مع رقبته ليكون اسير للبنك ( عملية تسويقيه بحته ) ، والفائدة الكبرى للبنك .
لكن الموظف مجبور انه يسوقها عليك كعميل ... لأنها محسوبة عليه ، فالتقييم الربع سنوي للموظف واللي ممكن تساعده في الترقية غير البونس ... فيه جزء كبير منه العمليات التسويقية اللي يقوم فيها الموظف ..!!!
إذا ما حقق الأهداف المطلوبة منه .. مثل تسويق هالبرامج او بطاقات الائتمان او القروض الشخصية ..او العقارية ... راح ينعدم في التقييم .. وبالتالي يأثر هالشيء على ترقياته ... وهذي من لعانة ادارة البنك اللي تجبر الموظفين على الكذب على العملاء وتزيين هالبرامج الخربوطية وزحلقتها على العملاء
******

نقلته كما وصلني

متسبب عاطل
17-07-2010, 11:49 PM
الله يجزاك خير

فعلا معلومات اول مره اعرفها

AMOUR
18-07-2010, 12:08 AM
كله اعرفه بس سالفة المبلغ عشان افتح حساب انصدمت صراحة

faisSsal
18-07-2010, 12:56 AM
الله يعطيك العافيه

وبصراحه معلومات أول مره أسمع فيها

وعندي قصه صارت لي لما رحت أفتح حساب بالبنك

أول مرة في حياتي أروح للبنك وأفتح حساب ........تقريبآ قبل 4 سنوات....:b

رحت للبنك قبل نهاية الدوام بساعه وكان البنك شبه فاضي دخلت على الموظف قلتله أبغى أفتح حساب عندكم ......
قالي اكتب بياناتك
بعد ماكتبت البيانات.... وسلمته الدفتر
قالي باقيلك خطوه أخيرة أنك تودع بالحساب 10 ألف ريال

لما قالي المبلغ هذا وتطلع عيوني من راسي ...:yaa:...الاوأطنش
الموظف وبحسن نيه مني روحت للمدير وعلمته بالسالفه....:mad:
وكلمه المدير على جنب...:r

وقالي الموظف خلاص مايحتاج تودع بالحساب أي شىء

وأعطاني بطاقة الصراف وطلعت من عنده .......:d

طموحي بكالوريوس
18-07-2010, 02:10 AM
حكاية المبلغ فعلا هذي حركاتهم وطبعا قانون من راسهم مطلعينه
حسبي الله عليهم

هموم عذرى
18-07-2010, 03:05 AM
بسم الله الرحمن الرحيم
انا رحت لبنك الاهلي ابغى اطلع بدل فاقد صراف === قالولي لازم تدفعين 150 وكل امة محمد يقلون انهم يقصون عليك خصوصا ان اختي قبل فتره طلعت بدل فاقد بخمسين ريال فقط لاغير---وانا بحكم اني وحده فقرانه ماطلعت قلت بعدين لين يفرجها الله=== بنفس الوقت قلت يمكن الانظمه تتغير بين ضحية وعشاها ---وبالله يرحم ولدينكم هذا صدق ولا شافوني وقالو خلنا نلعب عليها:sاوخص يالمديونيره== هاه اطلع ولا مااطلع والعلم صدق ولا كذب :mad:اخاف اروح اتميلح يعني ان عندي هرجه وبالاخير يطلع نظام:eek:واخزياه عاد هاك اللحظه يدوروني :eek:مايلقوني:ash:

ياجماعة الخير وجهوني:d


سبحانك اللهم اني كنت من الظالمين:c:m:cry:

الغازي
18-07-2010, 01:45 PM
الله يعطيكم العافية
و مشكورين على المشاركة ربنا يوفقنا وإياكم لكل خير إن شاء الله
.
.
.
هموم عذرى
المشكلة مو في البنك نفسه المشكلة في بعض الموظفين اللي ما يخافون الله
على فكرة أنا أنصحك يوم تدخلين البنك تروحين للمديرة ( مديرة البنك - مديرة الفرع ) و تتأكدين من هالكلام و صدقيني اللي يسأل و يستفسر راح يتعلم من هالدنيا و اللي يكون مغمض مجرد إنه فقط يعمل أي شيء من دون إستفسار راح تفوته أشياء كثيره في الحياة و الله يوفقك و يحفظك و يرعاك .... مشكلتنا إن النظام معنا لكننا ما نعرف عنه شيء و لا حنا اللي نسأل و نستعلم وش اللي لنا و ش اللي علينا ؟؟؟؟ !!!!!!

الغازي
18-07-2010, 01:46 PM
احذروا من اللذين يتعاملون مع الراجحي في تسديد القروووض
سبحان الله وبحمده سبحان الله العظيم
لا اله الا الله وحده لا شريك له الملك وله الحمد وهو على كل شيئ قدير

لقد شهدتم في الآونة الأخيرة ازدياد الإعلانات التي تدعي تسديد القروض بطريقه شرعيه وملصقاتهم قد لاتخلو منها صرافات المنطقة بل قد تجد أكثر من إعلان على صرافه واحده مستغلين حاجة المجتمع لتسديد مديونياتهم خاصة إن الفترة الصيفية تشهد إقبالا كبيرا غير مسبوق لحاجة الناس للزواجات والسفر والبناء....

*ولعلمهم انه توجد طبقه كبيره من أبناء المنطقة مسالمين أو على نياتهم كما يقولون .....
*فهل تعلمون شيئا عن الموضوع وتفاصيل سرقة اموال الناس بالباطل مستغلين خدمة احد المصارف باستخراج تمويل في نصف ساعة وفبركوها لصالحهم حتى أن احدهم يقول إن دخله اليومي يصل الى 40000 أربعون إلفا في اليوم الواحد !!!!!!!!!!!!!!!!!!!!!!

من أين ؟؟؟ من جيوبكم وبطريقه ربويه عينك عينك شئت أم ابيت


*والأدهى إن هذه العملية تدخل في مايسمى تبييض وغسيل الأموال على مرأى و مسمع جميع الاجهزه الحكومية بل إن البعض منهم قد تعامل معهم

*تعلمون ماذا يفعلون ,,,,, يقوم العميل بالاتصال عليهم معتقدا إنهم
موظفين أو متعاونين مع البنوك لكن للأسف يوجد طبقه من موظفي البنوك تتعاون معهم ...

ولكن تعالوا نعلمكم بالقصة والطريقة الذكية بعد اتصال العميل عليهم يطلبون منه طباعة مديونيته من البنك وإعطائهم بياناته وان المطلوب منه مبلغ وقدره بعد الخصم ويخبروه إن لديهم سيارة بالمبلغ هذا (علما أنهم يتعاونون مع معرض سيارات لتسهل الخدعة ) وانه سوف يبيعها منه ثم يشتريها هو منه باقل من سعرها بربح يصل الى 10% أحيانا في خلا نصف ساعة تقريبا يعني يبيع سيارته (قد بيعت تقريبا لألف عميل سابق ) بأعلى من سعرها ثم يشتريها
هو أو صديقه مره أخرى .لتسهيل أللعبه ثم يذهبون الى البنك وهنا العملية الحقيقية يقوم بالتحويل من حسابه مبلغ المديونية الى حساب العميل و الاتصال بالهاتف المصرفي لتسديد القرض وبعدها يقومون باستخراج قرض أخر للعميل من البنك لمدة 5 سنوات جديدة ويقوم العميل برد المبلغ المحول الى حساب المسدد ولكن بفائدة ربويه ( لأن كل العملية كانت تحويل من حساب الى حساب ) تصل الى10 % في خلال نصف ساعة تقريبا والعميل لايدري انه اوقع نفسه في الفخ فالبنك اخذ نسبته و المسدد اخذ نسبه ورجع القرض على العميل 5 سنوات من جديد بل الأدهى من ذلك إن بعض العملاء لم يستفد من هذه العملية كلها غير مبلغ بسيط يصل الى 5 أو10
الاف ريال فقط ودخل في الربا وقد يكون قسطه السابق اقل وألان زادت المدة وزاد الربح الى 15% بدل 5% حق البنك واهم شي هو فك زنقته كما يقول ولايدري المسكين انه تعرض لعملية نصب واحتيال خلال نصف ساعة ....... *

* *
*يا أخي ابحث عن من يسدد لك بدون فوائد خلال نصف ساعة من قريب لك اخذ تمويل أو ارضي بما يعطيك البنك تكميلي آو سدد نفسك بنفسك إذا كان البنك يعطيك مبلغ بسيط خذه وسدد احد إقساطك واستخرج قرضا اكبر منه ولاتجعل الناس تأكل رزقك وأنت تشوف
.*
ختاماً نرجو من كل مسؤول يقرأ الخبر سواء من مؤسسة النقد أو المباحث العامة أو الشرطة الجنائية الأخذ على الموضوع بجديه فعمليات تبييض الأموال هذه و زيادتها أو مايسمى الثراء السريع على أكتاف فئة تم استغفالهم يعتبر جريمة دون عمليه إنتاجيه أو نشاط معروف يدر للمجتمع بخير فعلا تعتبر من عمليات تبييض الأموال والدليل على ذلك انتشارهم السريع

م / ن
على حسب ما جائني

مشيعل
18-07-2010, 03:31 PM
روعة الموضوع
ياليت تكمل

بدرااا
18-07-2010, 04:06 PM
بسم الله الرحمن الرحيم
انا رحت لبنك الاهلي ابغى اطلع بدل فاقد صراف === قالولي لازم تدفعين 150 وكل امة محمد يقلون انهم يقصون عليك خصوصا ان اختي قبل فتره طلعت بدل فاقد بخمسين ريال فقط لاغير---وانا بحكم اني وحده فقرانه ماطلعت قلت بعدين لين يفرجها الله=== بنفس الوقت قلت يمكن الانظمه تتغير بين ضحية وعشاها ---وبالله يرحم ولدينكم هذا صدق ولا شافوني وقالو خلنا نلعب عليها:sاوخص يالمديونيره== هاه اطلع ولا مااطلع والعلم صدق ولا كذب :mad:اخاف اروح اتميلح يعني ان عندي هرجه وبالاخير يطلع نظام:eek:واخزياه عاد هاك اللحظه يدوروني :eek:مايلقوني:ash:

ياجماعة الخير وجهوني:d


سبحانك اللهم اني كنت من الظالمين:c:m:cry:



اختي اي بطاقه صراف سواء بدل فاقد او بدل تالف او تجديد يخيرونك بين خيارين

يااما تاخذين البطاقه فوريه يعني بنفس الوقت وهذي ياخذون 50 ريال

او تطلبينها على البريد وهذي مجانا لكن تاخذ لها اسبوع تقريبا الى اسبوعين عشان توصل

انتبهي منهم بعضهم حراميه

انا قبل شهر كان عندي مشكله بالحساب بالبنك الاهلي وطلعت بطاقه بديله مجانا على البريد بدون ماادفع ريال

موفقه اختي

ويعطيك العافيه اخوي صاحب الموضوع على المعلومات بصراحه معلومه المبلغ هذي جديده

القاموس
18-07-2010, 04:30 PM
الله يعطيك العافية

اخوي بنسبة لرقم 1

يمكن يقصدون الذين وضعو النظام ان لاياخذو رسوم فتح حساب لان ليس واضح هذا الشرط

شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب )

ولك التحية

احب الجمال
20-07-2010, 01:46 PM
نورت علينا الله ينور عليك / ومنكم نستفيد

ClassicValues
20-07-2010, 02:35 PM
والراجحي طالب 75 ريال قيمة فتح الحساب والبطاقة

بلا في شكلهم

شكرا لك على النقل

ضجيج الامل
23-07-2010, 01:31 AM
الله يعيطك عافيه ع المعلومات
نفس حالاتك بطاله طلبوا مني 75 ريال ع فتح الحساب والصرافه
وربي نصبابين

زيزووووو
23-07-2010, 05:35 AM
طيب الراجحي يشمله النظام ولا فوقه

هادي الحياة
24-07-2010, 02:13 AM
الله يعطيك العافية

كلام مهم جدا

المندوب
24-07-2010, 02:56 AM
يعطيك العافية

شموع الأمل2010
24-07-2010, 07:10 AM
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته


1
كم مرة رحت للبنك عشان تفتح حساب ، وقال لك الموظف / ما أقدر افتح لك حساب إلا لازم تحط مبلغ معين ؟! بعض الموظفين يقولك 10 الاف وبعضهم يقولك خمسة الآف وبعضهم الف وبعضهم يقولك أي مبلغ تقدر عليه ..!!
خذ النصيحة هذي مني ..
إذا قالك الموظف مثل ذا الكلام .. أضحك في وجه .. وخذ الامر ببساطة ، وقل له .. ممكن اعرف اسمك .. إذا كان مو حاط اسمه ، والا فالمفترض يكون الموظف اسمه مكتوب او حاط بطاقة على صدره فيها معلوماته .
إذا قال ليه ؟!
قل بس ابغاه ، وإذا انت ما تبغى تقول لي اسمك .. برضوا أنت حر .. وبرضوا ابتسم في وجهه ..!! عادة اذا طلبت اسمه يعرف الموظف انك راح تشتكيه وراح يتدارك الموضوع وراح يقولك اوكي .. راح يصرف الموضوع بأي طريقة وراح يفتح لك بأي طريقة بدون اي مبلغ .
إذا مسكت مع الموظف عناد وبدأ يسوق عليك العبط ... وأصر على المبلغ لفتح الحساب ..
أطلع لمدير الفرع ، وبلغه باللي حصل من الموظف ، وقله بكل بساطة انا جاي افتح حساب والموظف طلب مني مبلغ عشان افتح الحساب ..!!
وشف المدير .. وش راح يسوي في الموظف ..!!
بس لحظة ..؟!
ممكن يكون المدير صديق للموظف ولا يبغى يحرجه وممكن يتعاون مع الموظف .؟!
اذا وقف المدير مع الموظف ... برضوا اضحك .. وابتسم ... وخذ الامور ببساطة ...!!
لكن قبل ما تطلع من مكتب المدير قل ذا الجملة .. وشف كيف تكون ردة فعل المدير
قل له / اوكي ، إذا انتم مصرين على أني افتح حساب ولازم احط مبلغ ..
انا راح اتصل الآن على إدارة البنك ، وراح أكلم مؤسسة النقد .. بالكلام اللي قلته لي أنت و موظفك ...
وقتها ... شف مدير الفرع وش راح يسوي ..!!
راح يتغير لون وجهه ... ويختبص ... ويرتبك ... وراح يترجاك ان الموضوع ما يكبر ...!! لأن مدير الفرع اكثر واحد يعرف وش معنى العميل يشتكي على ذا الموضوع ( بالذات ) وهو موضوع فتح العميل لحساب ب مبلغ مالي ..!!
النظام يقول ، واللي موظفين البنك واحد واحد يعرفونه ، وهو من ( ابجديات العمل المصرفي ) ...
إن ( شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب ) .
اذا اشتكي العميل لمؤسسة النقد ، ممكن يغرم البنك بمبلغ كبير ، وإذا اشتكى العميل لإدارة البنك عن طريق الرقم المجاني شكاوى العملاء ، راح تلعن الإدارة ابو خامس مدير الفرع والموظف ، والموضوع ابداً مافيه اي تساهل من اي ادارة بنك . لكن اكثر الناس ... ما يعرفون .


للاسف دفعنا وخلصنا

طلبو مني 5000 ولمن اتحججت قالو لازم لان الفرع هذا مزحوم تقدري تروحي فرع ثاني واضطريت ادفع طبعا نزل بحسابي <<هالكلام قبل 3 سنوات

واحسهم نصبو علي البنك لا زحمه ولا شيء وحتى بحارة على باب الله

الله المستعان

ويعطيك العافيه ع التنبيه واستفدت كثير <<<تعجبها سؤالف المشاكل من نتائج البطاله

طموحة بلا حدود
24-07-2010, 10:02 AM
عجيب والله

عليهم شغل مسوقين صدق

نواف العزام
04-08-2010, 02:13 AM
ياخي الكريم تسمحلي عالمداخله معلومات جدا مغلوطه


ياخي انا اشتغلت بالبنك السعودي الفرنسي قبل تعيني بالتدريس سنتين
اشتغلت بالباك اوفس وبعد كذا اشتغلت Q.A وبعد كذا اشتغلت فدباك

العملاء يختارون بكل عنايه والعميل الي البنك مو بلاقي وراه مصلحه ويفتح له حساب يحاسب الموظف الي فتح له بس للمعلوميه متغاضين عن هالشي هالايام


بعدين لو تضحك من هنا لبكره بوجه الموضف والله متهز فيه شعره تحرج نفسك معاهم وبس

العملاء درجات في عميل نخبه وفي تميز وفي افراد وفي اصحاب الثروات الافراد هنا مو المطفرين هذيلا الي مشين منتجات البنك القروض والفيز وووووو الخ

بعدين الفيز ميلغيها الفرع ولاراح احد يعطيك مخالصه الا لين ترفع اوراقك للتحصيل ويستوفي البنك الهللات الي عليك

اسف على الاطالة تقبل مروري للتوضيح فقط

أمواج البحر
04-08-2010, 03:39 PM
جزاااااااك الله خييير

أفدتني جداا

دكتوراسنان
06-08-2010, 04:01 AM
الله يعطيك العافيه
والله ماكان عندي علم

النترا
06-08-2010, 11:19 PM
جزاك الله الجنة وماتتمنى

تاجرة نت
06-08-2010, 11:25 PM
معلومات جديده علي

والبنك الاهلي فتحت فيه حساب منذ مبطي ولا ادري قفلوه ولا خلوه

هل هناك مدة لبقاء الحساب مفتوح وهو مافيه رصيد؟

القط الضائع
07-08-2010, 10:34 AM
موفق بإذن الله ... لك مني أجمل تحية .

كافي قهر
08-08-2010, 03:23 AM
شكرا اا اا اا

الدنيا غدارة
08-08-2010, 04:44 AM
بنك الراجحي حتى بتجديد البطاقه لازم ادفع 75 ريال


واختي راحت تحرك حسابها قالوا لازم توديعين اقل شي 4 الالاف ريال

وش من النصب

ولازم كل سنتين ببنك الراجحي تدفع 75 ريال مقابل انك تجدد بطاقاتك والا ماتشتغل لك البطاقه

افع والا نعطل البطاقه

عاطل ومعطل
10-08-2010, 09:07 AM
الله يجزاك الف خير ويوفقك دنيا واخرة
والله لي اسبوعين ابي افتح حساب قلت اخاف امسك سرى واوصل لخدمه العملاء واقوله ابي افتح حساب يقول لازم تودع في الحساب مبلغ وقدره
لكن من بعد ماعرفت منك اليوم بروح لهم
تحياتي لك اخوي

فديت المبآحث
11-08-2010, 10:22 AM
الحين لاصار حسابك فاضي مافيه فلوس يتقفل؟
انا مرة ماحطيت شي بحسابي ورحت لهم يمكن بعد سنة قالو حسابك تجمد لازم تحدثه حدثته
وعطوني بطاقة جديدة وقالي الموظف مرة ثانية لاتجمد مانفتحه لك
وانا حسابي الحين برضو فاضي لكن عندي اسهم فيه ممكن تفيدوني

دموعي حزينه
20-08-2010, 10:19 AM
والله سامبا لو تحب اذنك عندهم مايفتحون الا بتعريف من العمل لو تودع مليون اخر مره حاولت افتح عندهم جيت الموظف بجيبي مبلغ يزود عن الخمسين الف وقلت ابي افتح حساب قال الموظف يحتاج تجيب تعريف من جهة العمل قلت انا معي دراهم ابي اودعها بالحساب قال مانقدر نفتح رحت للمدير وقلت هذي فلوسي ابي افتح حساب والموظف رفض قال معه حق حنا مانفتح الا بتعريف من جهة العمل.

ودي واحترامي,,,,,,,,,

لحن الحب
20-08-2010, 03:40 PM
شـكرا لك وبارك الله فيك...
تعاملت مع البنوك كرهتها من المشاكل وخذوهات وشغلة طويلة ماندرى الحق والصدق وينه لله اعلم خلى دراهمك عندك احسن من البنوك وشروطهممالت عليهم وشكراااااااااااااااااااااااااا

بندر ب
22-08-2010, 05:51 AM
طيب يا اخوان
هم ما راح يتفيدون من المبلغ
بالعكس راح ينزل بحسابك

انا ابغى اعرف وش فايدتهم من طلب المبلغ