استفسار بخصوص موقع جامعة الملك عبد العزيز ضروري

الهاموره · #1 (**permalink**) 18-04-2011, 08:58 PM

انا انقبلت لدخول الاختبار التحريري على وظيفة مراقب طلبه شطر الطالبات في جامعة الملك عبد العزيز مبنى 29 وانا من مكه وابغى اعرف عنوان الجامعه بالتفصيل فين موقعها في جده وفي اي حي واي شارع ارجو الاجابه بسرعه لان موعدي 29/5 هذا الشهر

~Rima~ · #2 (**permalink**) 18-04-2011, 09:27 PM

حتى انا انقبلت لكن مو مشكله موقع الجامعه انا خايفه انهم قبلوا كل الي قدموا ونروح ونتعب وبعدين ماننقبل
وكمان يمكن يطلبوا عل البنات بطاقه احوال وانا ماعندي ياليت الى عنده خلفيه يفيدنا ضرووووووووووري

[منتهى الذوق] · #3 (**permalink**) 18-04-2011, 10:20 PM

اقتباس:

المشاركة الأصلية كتبت بواسطة الهاموره

انا انقبلت لدخول الاختبار التحريري على وظيفة مراقب طلبه شطر الطالبات في جامعة الملك عبد العزيز مبنى 29 وانا من مكه وابغى اعرف عنوان الجامعه بالتفصيل فين موقعها في جده وفي اي حي واي شارع ارجو الاجابه بسرعه لان موعدي 29/5 هذا الشهر

مبروك القبول المبدئي الله يبلغك القبول النهائي

جامعة الملك عبدالعزيز في حي الجآمعة - يمين شارع عبدالله السليمان

شوفي انتي أول ماتدخلي جدة أمسكي طريق الحرمين كأنك رايحه المدينة أوك
وخليكي ماااااشيه حتعدي حي المنتزهات وحي الروابي بعدها بمسافة بسيطة
تشوفي كوبري الجامعة على يدك اليمين طبعاً تآخذي الكوبري اجباري يسار بينزلك على شارع عبدالله السليمان و بتشوفي سور الجامعة لونه ابيض على يمينك برضو..

اذا اختبارك في مبنى 29 ترآ المبنى هذا في قسم البنين مش في شطر الطالبات
وبإمكانك تدخلي للجامعة من البوابة الرئيسية اللي عند البنين تقريباً هي بعد كلية الهندسة المهم انتي خليكي منتبهة على الجهة اليمين بتشوفي البوابة رقمها 7
تدخلي هناك ودوروا على المبنى في الزحمة هذيك .. وكمان أسألوا وبيدلونكم الطلاب ..

<<<أنا أدخل الجامعة من بوابة بالبيد شمالية أو غربية 2 عشان كذا مني عارفه أوصف لك كيف توصلي للمبنى عن طريق البوابة الرئيسية ..

المهم بعد اللف والدوران بين المباني ..بتلاقي المبنى جنب الأستاد الرياضي بالزبط - جهة بوابة بالبيد (شمالية)
وهو دور واحد لونه بني فاتح وتلاقي مكتوب عليه مبنى 29 بخط كبيررر

ان شاء الله وصفي مفهوم وتوصلي بالسلامة وبالتوفيق يآرب

الهاموره · #4 (**permalink**) 18-04-2011, 11:35 PM

طيب اذا المبنى في قسم البنين يعني هذا المبنى في جامعة الملك عبد العزيز حقت الاولاد وعادي حنا المقدمات من النساء روح نختبر هناك ولا لازم يكون الاختبار في جامعة البنات ماني فاهمه شي ارجو احد يفيدني ويفهمني لاني مكتوب عندي الموعد 29/5 في مبنى 29 ومو مكتوب في اي قاعه
وشكرا للاخ منتهى الذوق على الوصف والله يجزاك خير

الهاموره · #5 (**permalink**) 19-04-2011, 03:38 AM

ياناس 88 مشاهده ولا احد رد عليه يعني مبنى 29 يكون في جامعة الاولاد ام هو مبنى فى جامعة البنات لاني من مكه ولا اعرف شي عن جامعة جده

العميد الصبحي · #6 (**permalink**) 19-04-2011, 05:20 AM

انتي أول ماتدخلي جدةطبعآ بعد نقطة التفتيش أمسكي طريق الحرمين اول مفرق يمين أوك
وخليكي ماااااشيه حتعدي حي المنتزهات وحي الروابي بعدها بمسافة بسيطة
تشوفي كوبري الجامعة على يدك اليمين طبعاً تآخذي الكوبري اجباري يسار بينزلك على شارع عبدالله السليمان و بتشوفي سور الجامعة لونه ابيض على يمينك برضو.. امسكي الفرعي الين بوبه 6 ادخلي الجامعه وبعدها طولي يجيك الدوار الاول والثاني والثالث بعده يسار طولي برضوا يجيك دوار كمان طولي تشوفي الملعب بعده هو المبنى يجي في يمينك مره سهل الوصف
وفالك التوفيق

الهاموره · #7 (**permalink**) 19-04-2011, 06:01 AM

شكرا" ياعميد على الرد لكن هل مبنى 29 في قسم الطلاب واذا كان كذلك هل عادي حنا البنات نروح نختبر هناك ام ان هناك مبنى يحمل نفس الرقم في قسم الطالبات لاني من جد مااعرف شي عن جامعة جده ومابغى يجي يوم الاختبار وانا متوهقه معرف فين اختبر هل في جامعة الاولاد ام البنات ارجو مساعدتي انا صار عندي اشكال فقط في موقع الامتحان لان كل الي وصفولي المبنى بيقولو يقع بقسم الطلاب وليس الطالبات ارجو مساعدتي وشكرا لكم

الهاموره · #8 (**permalink**) 19-04-2011, 08:09 AM

ياناس 129 مشاهده ولا احد رد هل مبنى 29 المقصود به الي بقسم الطلاب ام انه مجرد تشابه اسماء ويوجد مبنى يحمل نفس الاسم بشطر الطالبات لاني انا مقدمه اختبار مراقبة طالبات بشطر الطالبات واختباري يوم 29 /5 مبنى29 ارجو من اهل جده اومن البنات الي قد مر عليهم اختبار في هذا المبنى يجاوبوني وشكرا"

سنين عمري توالت · #9 (**permalink**) 19-04-2011, 08:25 AM

مبنى 29 للبنات ... عااادي مبنى لونه عسلي .. مدري بني.. ويختبرووونك هناااك الله يوفقك ويفقني .. موعدي نفس اليوم نتقااابل ان شاء الله .... اختبااري الساعه 10 -12.30 الظهر..