تأسس الموقع عام 2006
Site was established in 2006


ديوان حلول البطالة

موقعنا والإعلام

حلول البطالة الإمارات

هل أنت مسؤول توظيف ؟

تسجيل الدخول
العودة   حلول البطالة Unemployment Solutions > الحياة العلمية والعملية > قسم مشاريع وأفكار

الملاحظات

قسم مشاريع وأفكار ممنوع مواضيع المساهمات او المشاركة

سنة أولى خضار ..من الصفر إلى المليون

قسم مشاريع وأفكار

بسم الله الرحمن الرحيم السلام عليكم ورحمة الله وبركاته كيفكم ان شاء الله بخير ؟ المهم لي أسبوعين أفكر أدخل سوق الخضار نسميه سوق الحلقة عندنا...

موضوع مغلق
 
LinkBack أدوات الموضوع انواع عرض الموضوع
  #1 (permalink)  
قديم 22-05-2013, 02:55 AM
الصورة الرمزية آجمل حكآيه
عضو متواصل
 
تاريخ التسجيل: Sep 2012
المشاركات: 107
معدل تقييم المستوى: 24
آجمل حكآيه يستحق التميز
Post سنة أولى خضار ..من الصفر إلى المليون



بسم الله الرحمن الرحيم

السلام عليكم ورحمة الله وبركاته

كيفكم ان شاء الله بخير ؟ المهم لي أسبوعين أفكر أدخل سوق الخضار نسميه سوق الحلقة
عندنا بالمدينة .. وبما أن بكرة الأربعاء وما عندي فيه اختبار "فراغ" قلت خلني انقز الحلقة العصر
وفعلاً نقزت السوق واخذت ألف يمين ويسار وفوق وتحت طبعاً أنا كنت أشتغل في السوق
لمدة 5 سنوات هذا الكلام زمان ايام كنت في خامس ابتدائي حتى نهاية المتوسط .. واليوم
رجعت من جديد في منتصف الجامعة والله الوضع كان صعب فعلاً لأن أشياء كثيرة تغيرت
كنت أتوقع إني راح أألف السوق بسرعه لأني قضيت طفولتي فيه لكن شعرت بخيبة أمل كبيرة
ومن كانوا بالأمس كلهم سعوديين إلا اثنين أو ثلاثة اختفوا .. اليوم كلهم يمنين إلا اثنين أو ثلاثة
طبعاً ما عندي راس مال لذلك فكرت أشتري عربية وأشتغل مثل أول .. وكالعادة اشتغل الشريطي
الذي بداخلي بعد محاولات لإقناعه بالخروج وعدم الخجل وأنقز على يماني واقوله العربية للبيع ؟
لا .. اللي بعده .. يالحبيب العربية للبيع ؟ لا .. اللي بعده .. العربية للبيع ؟ ايوه بـ 250 ريال
حشا لو أنت معها هدية ما أخذتها .. ويمين يسار يمين يسار ما فيه أمل ؟؟طبعاً سماحتي
مسوي أكاسر مع الخلق وأنا ما معي ريال .. لكن صبركم ناوي على نية .. المهم حتى بعد
المغرب وانا أدور عربية ولا لقيت .. واحد بكل بجاحة وجرأةة يقول تبغى رخصية فيه بس مسروقة!
اعوذ بالله من الشيطان الرجيم شوف وين وصلنا؟ المهم لقيت يمنين ما عليهم طيبين واخلاقهم
حلوة .. قالوا فيه خوينا يبغى يبيع عربيته عشان يسافر خلاص الفتى ضبحان يشتي يرجع ..
قلت نادوه .. والله يجي وعربيته ما عليها خلاف لأن عندي خبرة بالعربيات (امحق خبرة)
المهم العربية يابانية ومن السهل الممتنع ( لا يشيخ ) اعجبتني وقلت بكم قال عشانك 220
يا هوه جديدة ب 400 قال روح خذ جديدة ( بنص الجبهة ) المهم اشغل الشريطي اللي معي
واقوله صلي على محمد .. اللهم صلي وسلم عليه .. هذا جوالي خذه وبيعه واللي يكتبه الله
لك نصيبك .. ( بلاك بيري ) قال لا .. قلت يا مسلم يجيب لك قيمة يمكن أكثر من اللي أنت تبي!!
قال ابداً ما أشتيه .. قلت طيب انتظرني اروح ابيعه وأجي .. قال خلاص .. وأنقز لأقرب محل
جوالات وأبيع الجوال بتراب الفلوس ( 180 ريال ) وأجي راجع له .. وآخذ العربية على أذان العشا
الوضع حتى الآن صعب جداً والله يا اخوان شعور غريب جداً وأنا أدف العربية بغيت أصيح هههههه
لأني على طول تذكرت أيام كنت أشتغل وانا صغير وكنت أطامر في وجيه الناس وشقي حيل
كانت العربية أطول مني والحين أنا أطول منها .. المهم بعد صلاة العشا طبعاً رفض اليماني
المبلغ وقال اعطيك بـ 200 من الآخر .. حاولت فيه لين وافق إن أعطيه الباقي 20 ريال بعدين ..
توكلنا على الله .. بعد العشا أنقز الحراج وانتظر ويمين يسار حتى طمرت بوجه واحد سعودي
تبي عربية ؟ قال تعال .. ويلف فيني السوق كله وفي النهاية 5 ريال .. الحمد لله ..
اللي بعدو .. وألف يمين ويسار واليمناء ما تركوا شي حتى في العربيات اشتغلوا وفي الموية
اشتغلوا الله يرزق الجميع .. لكن قهرتني نظراتهم لي .. نظرات استغراب مع إني ما لبست
الثوب .. حتى لا أحد يعرفني ينتبه لي .. المهم بعد ساعة بديت أتعوّد وأسترجع الإحداثيات
القديمة ههههههه ويبدأ الإحراج يذهب شيئاً فشيئاً .. حتى جاني ذاك الموقف المخزي اللي
بغيت أرتكب فيه جريمة الحمد لله اني تمالكت نفسي .. المشكلة انه سعودي.. طلب عربية
وجيت معه وشلت اغراضة يمكن قعد يلفلف ربع ساعة المهم رحنا للسيارة وبعد ما نزلت
اغراضة في الشنطة يمد وجهه يسار ويمد يده عليّ يمين وضام اصابعه ع الفلوس ويقول
الله يعطيك العافية .. قلت اش فيك أنت ؟ أنا ماني قاعد أشحدك أنا أشتغل وهذا حقي ..
قال والله ما تسوى ثلاثة ريال قلت اقول قفل فمك لو إنه ريال يعتبر حقي وغصبن عليك تجيبه
أنا ما أشحدك ولاني بحاجتك.. شلت أغراضك وآخذ حقي أما تحوطر يدك كنها صدقة احترم
نفسك .. قال اش فيك مسوي زعلان أنا متعوّد مع العربيات دايم اعطيهم كذا ..
قلت لا بالله .. خذها هدية مني انقلع.. ويحاول فيني ولا أخذتها ويزيد فيها قلت والله ما آخذ منك
شي لو تطير .. مشى وهو يضحك .. الموقف جديد عليّ كنت متوتر ولا اللي مثله حلال فيه
الذبح خصوصاً مع الضحكة الأخيرة وهو ماشي .. استغفر الله العظيم .. المهم صارلي موقفين
ثانية كل واحد أخس من الثاني .. الأول عجوز نادتني من بعيد وأجيها وهي واقفة تاخذ خيار
المهم ساعدتها واخذت الكيس وأربطه وآخذ الثاني .. المهم بعدها اخذت الكيس من يدي
واعطته ولدها الصغير ومشت .. واليمناء يضحكون علي ضحكة شماتة .. لا بارك فيك يالعجوز
على ايش ناديتني طيب ؟ الموقف الثاني محرج حد النخاع عائلة سعودية نادتني الأم
وأجي مستانس وتقول كم تاخذ قلت اللي يجي منك نقبله .. إلا بنتها تطامر عند أخوها
تقول سعودي والله سعودي .. قله ما نبي .. قله ما نبي .. أناظرها مصدوم ومنقهر
وش فيه السعودي ؟ الأم قالت تعال امش معي .. انا قفلت معي مشيت وتركتهم كله من ذا
البنت الله يخليها تتزوج هندي .. المهم ما لكم بالطويلة بالأخيربعد ساعتين كر وفر طلعت
بـ 20 ريال .. اللي هي حقت مين ؟ الباقي من فلوس اليماني
ههههههههههه

عطيته ورحت أسلسل العربية بمكان سري ومشيت يا خوفي والله ألقاها بكره مسروقة !!
لكن قلت اللهم اني استودعك اياها ..



اللي بوصله لكم
أنا دخلت السوق ..أدري إنها شينة أرجع أشتغل بالعربية بعد ما فارقتها وتغيرت نظرة الناس
لكن هذي حيلتي وطلوع الدرج حبة حبة .. أنا ما جيت سبهللة وأرجع سبهللة مثل أول ..
أول كنت ماني محتاج شي ولا أخطط لشيء بس أشتغل وألعب بالفلوس لكن الحين تغيرت
الأمور وتطورت العقول وكبرنا .. انا قدام عيني هدف واحد وراح أركز عليه حتى أعرف أسراره
وكل ما يختص به من صغيرة وكبيرة بإذن الله وهو ..( الذهب الأحمر )..
أغلب اللي في السوق محتاسين فيه ولا أعرف السبب لكن أعرف شي واحد وهو إنه فيه
طريقة أفضل بمليون مرة من بيعه في السوق وعشان كذا بواصل المسيرة.. اليوم كبداية
بغض النظر عن الحالة الصعبة .. والمواقف المحرجة وبعضها ما ذكرتها لكم بغض النظر عنها
بدأت بإيجابية .. اشتريت العربية وأكملت ثمنها من العمل عليها .. والمهم أني تعرفت على
4 أشخاص ووجدت أشخاص أعرفهم لم يتركوا السوق يعني ما شاء الله أكثر من 7 سنوات
وهم مستمرين في السوق .. وهذي اعتبرها خطوة ايجابية في اليوم الأول لي ..
ولكم باك .. أفضل ولكم باك حقيقي .. خرابيط بلاك بيري ما تنفع معي.. هنا الولكم باك صح
لأن أهم شي في السوق هو تكوين العلاقات .. اليمناء ينظرون إلي بإحتقار وبعضهم
بتعجب لكن لا يعرفون أنني مخطط على ذلك اليوم الذي أصبح فيه المورد الرئيسي
للذهب الأحمر في المدينة المنورة وإن لم أكن كذلك فأسخسف بأسعارهم الأرض كما
يحلو لي .. وأتحكم بنصف ما يصلهم منه .. بإذن اللي ما تنام عينه ..
ليس حقداً أو حسداً لكنها لعبة الكباااار .. هي خطوة خطوة
..
عربية ثم بسطة .. ثم .. ثم
.. خطوة خطوة ..


واليوم .. الخطوة الأولى .. دخلت السوووووق









11 رجب 1434 هـ - 2013/05/21 م

  #2 (permalink)  
قديم 22-05-2013, 03:07 AM
عضو متواصل
 
تاريخ التسجيل: Mar 2013
الدولة: الجبيل - الدمام
المشاركات: 59
معدل تقييم المستوى: 7242
حالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداعحالم كبير محترف الإبداع

[align=center][/align]ما شاء الله الله يوفقك ما دهورنا الا العيب والخجل وحنا مو لاقين ناكل
وان شاء الله اني مثلك قررت اني اشتغل في الحب حب ( جح ، بطيخ )

الا سوال وشو الذهب الي تتكلم عنه

  #3 (permalink)  
قديم 22-05-2013, 03:14 AM
الصورة الرمزية علي الفهد
عضو مهم
 
تاريخ التسجيل: Jan 2012
المشاركات: 251
معدل تقييم المستوى: 25
علي الفهد يستحق التميز

الله يوفقك ويرزقك ولايهمك احد !!! واصل يابطل راح يجي يوم من ينظر لك على قولتك باستغراب واحتقار وهما غرباء وانت ابن البلد راح يعودون لك ويطلبون مساعدتك ويمكن يشتغلون عندك وصدقني خذ خطة اخرى اشرك معك من ربعك واصحابك لو فقط يشتغلون ساعة حتى يربكون العمالة المسيطرة ترى الاجانب الان في السعودية في حالة ارباك وعدم اتزان ومامر عليهم تهديد حقيقي وانظمة اصعب من الان

  #4 (permalink)  
قديم 22-05-2013, 03:54 AM
عضو مهم جداً
 
تاريخ التسجيل: May 2013
المشاركات: 526
معدل تقييم المستوى: 429583
أحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداعأحلام للتسويق محترف الإبداع

حلو الاصرار والعزيمه بإذن الله اخرها الوصول للقمه

موفق يارب

  #5 (permalink)  
قديم 22-05-2013, 04:54 AM
عضو جديد
 
تاريخ التسجيل: May 2013
المشاركات: 39
معدل تقييم المستوى: 23
هندستك يستحق التميز

الله يوفقك يارب بساطة في الطرح وكلامك يحمس جدا جدا جدا

انشاءالله بتحقق هدفك بتفكيرك

  #6 (permalink)  
قديم 22-05-2013, 06:55 AM
عضو جديد
 
تاريخ التسجيل: May 2013
الدولة: الرياض
المشاركات: 4
معدل تقييم المستوى: 0
ديم فهد يستحق التميز

ماشاء الله الله يوفقك

  #7 (permalink)  
قديم 22-05-2013, 10:47 AM
عضو جديد
 
تاريخ التسجيل: Jan 2011
المشاركات: 38
معدل تقييم المستوى: 27
تباً للواسطة يستحق التميز

الله يوفقك و يرزقك من واسع فضله

  #8 (permalink)  
قديم 22-05-2013, 10:57 AM
عضو سوبر
 
تاريخ التسجيل: Jun 2011
المشاركات: 406
معدل تقييم المستوى: 2175
سليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداعسليمان الجهني محترف الإبداع

إستمر ..............................................

  #9 (permalink)  
قديم 22-05-2013, 11:52 AM
عضو جديد
 
تاريخ التسجيل: Apr 2008
المشاركات: 27
معدل تقييم المستوى: 33
حاتم 2009 يستحق التميز

والله تعجبني ارفع لك عقالي اجلال وأحترام الله يوفقك محد جاء من الصفر للقمه اعرف شخص تخرج من الثانوي نسبته ماهي زينه وكان يبسط بسيارته اول ستة شهور استئجر محل بعد سنه تقريباً وسع المحل من فتحة لفتحتين بعدها استئجر المحالات كامله وموظف سعوي وسوق ويحلف لي ان المحل يدخل صافي اليوم ٥٠٠٠ ريال بعد فترة وظف ناس بالمحل وصار مهمته بس يجي يشرف وتطوور وضعه وصار مايركب الا اخر مديل وتزوج وفتح كذا مشروع ويقوول لو احصل وظيفه براتب ١٥ ماشتغلت الكلام هذا من ٢٠٠٢ واعرف الولد معرفه شخصيه شويت صبر بس

  #10 (permalink)  
قديم 22-05-2013, 03:26 PM
عضو سوبر
 
تاريخ التسجيل: Jan 2012
المشاركات: 335
معدل تقييم المستوى: 25
فكيتور يستحق التميز

التوكل على الله
ثم الصبر وبذل الجهد
مفتاح النجاح
الله يوفقك لكل خير

موضوع مغلق

(( لا تنسى ذكر الله ))


مواضيع ذات صله قسم مشاريع وأفكار

مواقع النشر (المفضلة) وتحتوي على WhatsApp لإرسال الموضوع إلى صديقك


أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة





الساعة الآن 11:46 AM


Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة

استضافة، تصميم مواقع، برمجة تطبيقات، من توب لاين