وظائف بمستشفى الحبيب , فيد وستفيد :)

[مسارات التميز]

السلام عليكم ..

كيف حالكم ان شاء الله بخير .

حبايبنا بمنتدى البطاله المنتدى الي مااستغني عنه وياما استفدت منه كثير واتمنى ارد لكم الجميل والله يقدرني

ندخل بالموضوع علطول انا قدمت قبل سنه تقريبا بمستشفى الحبيب وتصلو علي وسويت المقابله وعقب اتصلو علي وقالو خلاص نبيك معنا بالكول سنتر داومت اول يوم وكان يوم جميل قابلت فيه المشرف بالبدايه رحب فيني وكان استقباله جيد
ثم عطاني اوراق فيها اسماء الاطباء والعيادات وكذا طبعا بالانقلش عشان احفظها لان التدريب تقريبا بيستمر اسبوع الى اسبوعين , المهم يوم ورا يوم ونا اشوف الشباب مكروفين بالاتصالات تقريبا يستقبلون من 200 الى 400 اتصال لكل موظف لان كانو تقريبا 5 بس . الوظيفه دوامها 8 ساعات مع ساعه او نص ساعه بريك وراتبها للثانوي 5500 ومافوق الثانوي تقريبا 6000 وفيه بونص على حسب مكالماتك , المهم انا ماكملت فتره التدريب وطلعت من الكرف الي شفتهه

بعد فتره جاني ندم مدري ليه يعني على اني ضيعت وظيفه بالحبيب على شهرته هذي ومن هالكلام فرحت اقدم مره ثانيه الاسبوع الي راح وعلطول سوو لي مقابله ودقو علي عقبها بيومين بالمناسبه الي حاب يقدم ترى فاتحين التقديم حاليا جب اوراقك بس ودخل عليهم بقسم التوظيف بفرعهم الي بالعليا وعلطول يسوون معك مقابله وأي سؤال انا حاظر ي شباب .

المهم دقو علي وسويت مقابله ثانيه وكانت تمام المهم قال لي المشرف انهم بيحطوني بستقبال الطواريء وقال لي الدوام 9 ساعات ونص , وراتب من 5 الى 6 الاف حسب العرض الوظيفي وتأمين ومن هالكلام .

الحين انا محتار ومتخوف منها صراحة لان 9 ساعات ونص طويله مره وراتبهها تقريبا 5500 او حتى 6000 احسها شوي لان يقول لي المشرف ترى ظغغغغط بالطواريء وحالات حرجه تجيك وكذا

بودي اذا احد يشتغل بالحبيب او له اقارب هناك يفديني كيف بتكون طبيعة العمل وهل اقبل فيه ولاالا .. ادري تحمست بس ماعليه تحملوني

اي سؤال للي حاب يقدم عليهم ممكن افيده

[حفيد الفهد]

والله وانا اخوك اللي اعرفه انهم مكروفين وكل شوي يتغيرون الموظفين يجون جدد

لان محاتسيك دايم يروح مستشفى الحبيب فرع الريان

كل 3 شهور مراجعات للوالد الله يحفظة وصرف ادوية سكر وظغط

كل بعد فترة وفترة اشوف موظفين جدد ع الاستقبال والطوارى والمواعيد واستغرب

يمكن الدوام فترتين باليوم سبب من اسباب استقالاتهم والله اعلم

وفقك الله اخوي ..

[جريح الخبر]

انت عاطل الحين صح
اجل تبي نصيحتي
داوم معهم
اذا ارتحت معهم بالدوام كمل
اذا ما ارتحت لاتفصل ممكن فيه نقل لقسم ثاني او دور وضيفة ثانية بنفس المجال مثل استقبال فندق او غيرة
واذا وقعت مع الشركة الثانية قدم استقالتك اهم شي انك ما تقعد عاطل

[وناسه بوناسه]

اخوي لو محت هل التوظيف عنردهم مباشر
لني رح اجي مسافة 1000 كيلو لجل اقدم عندهم
هل انت متاكد ان فيه تقديم للوظايف
والله يرزقنا وياك ان شاء الله

[shatha41]

المشاركة الأصلية كتبت بواسطة وناسه بوناسه

اخوي لو محت هل التوظيف عنردهم مباشر
لني رح اجي مسافة 1000 كيلو لجل اقدم عندهم
هل انت متاكد ان فيه تقديم للوظايف
والله يرزقنا وياك ان شاء الله

ايوه فيه انا بعد كنت هناك لكن واضح انه ماقبلوني طلب مني أتكلم بشكل مفصل عن تخصصي بالانقلش لكن انا دارسته عربي ولا هو ذاك الزُّود الله معي جهز نفسك وتومل علي الله
الموقع العليا الدخله قبل برج العنود ثاني مبني ع اليمين