المقبولين بالكليات العسكريه - هام -

[محتار طيار]

سلام عليكم

اخواني انا جاني قبول مبدئي بالجويه وحجزت موعد للمقابله الشخصيه والكشف الطبي
سؤالي هو الله يجزاكم خير
هل الكشف الطبي يكون مع المقابله بالكليه الحربيه على طريق العيينه
او ان الكشف طبي قبل المقابله الشخصيه
لانه التقيت بالشرطه العسكريه الي بالكليه وقالو لازم تكشف قبل بحي المروج
اللي عنده اي معلومه يفيدني الله يجزاكم خير ولايحرمكم الجنه

[فورتي]

أخوي أنا مثلك صارلي فترة أكتب موضوع ولا أحد يرد .. ما أدري وش السبب يعني لازم شيء يخصهم ..

ما أدري ليش ما يساعدون أخوانهم ويعطونا معلومات كأننا بناكل الكليات العسكرية عليهم
وربي ما أحد ياخذ غير اللي ربي كاتب له غير كذا لا

[محتار طيار]

والله اني محتار لاكن بنتظر للصباح وبتصل على رقم سنترال الوزاره واتاكد لانه سبق وكلمتهم ، المشكله موعدي اليوم .. دعواتك لي واسأل الله ان يكتب لي ولك وجميع المسلمين القبول ان شاء الله

[ممدوح خالد]

وعليكم السلام

انا جاني قبول مبدئي في الحربيه وحجزت موعد كشف ومقابلة في وزارة الدفاع امام اسواق الشعلة

وكانو معي طلاب من الجويه والبحرية والدفاع الجوي

ولحظة الفحص الطبي ماكانو موجدين الا طلاب الحربيه والبحريه والدفاع الجوي منب متاكد هم معنا ولالا " اما الجوية فحصهم قسم غيرنا

واختبار اللياقة كان في كلية الملك عبدالعزيز في العيينة ومعي طلاب الدفاع الجوي

[محتار طيار]

المشاركة الأصلية كتبت بواسطة ممدوح خالد

وعليكم السلام

انا جاني قبول مبدئي في الحربيه وحجزت موعد كشف ومقابلة في وزارة الدفاع امام اسواق الشعلة

وكانو معي طلاب من الجويه والبحرية والدفاع الجوي

واختبار اللياقة كان في كلية الملك عبدالعزيز في العيينة ومعي طلاب الدفاع الجوي

اخوي اولا الله يبيض وجهك على ردك ثانيا
موقع الوزاره بالقرب من اسكان القوات المسلحه و مركز طب الاسره للقوات المسلحه
والمعذره على كثرة الاسئله والسبب وانا اخوك الجهل بهالموضوع

[ممدوح خالد]

المشاركة الأصلية كتبت بواسطة محتار طيار

اخوي اولا الله يبيض وجهك على ردك ثانيا
موقع الوزاره بالقرب من اسكان القوات المسلحه و مركز طب الاسره للقوات المسلحه
والمعذره على كثرة الاسئله والسبب وانا اخوك الجهل بهالموضوع

وجهك ابيض يالغالي


هو قريب من مستشفى العسكري وعلى مأظن انه في حي الضباط مقابل لاسواق الشعله انا والله ماني من سكان الرياض ولا كان عطيتك الوصف

[نسأل الله]

اخوي يالغالي المقابله الشخصية تجيك بعد الفحص


اول شي تروح لم كلية الملك عبدالعزيز الحربيه سابقا امام اسواق الشعله
زين
ثاني شي لما تروح تخش مقرهم وتختم اوراقك وبعده تروح تركب باص ويودونكم لم وزارة الدفاع وهناك يجيك الفحص ويجيك بعد الفحص المقابله الشخصية دايركت اول ما تخلص منهم تروح للمقابله
واذا خلصتوا يرجعونكم وينزلونكم قدام اسواق الشعله


المهم المكان اللي تبيه اللي هو اسواق الشعله
المقر بيكون امام اسواق الشعله طبعا مبنى وفيه مجسم ع شكل شعله نار وسذا
انت دايركت رح للمكان المقابل من مركز الشعله وتشوف العالم قدامك تقدم


الموقع ببساطه وقف اقرب تكسي وقوله ابي وزارة الدفاع واذا وداك هناك المكان اللي تبيه ع نفس الشارع طبعا اذا صارت وزارة الدفاع يمينك تاخذ فوق تحت ولما تجيك وزارة الدفاع يسار طبعا امش شوي وتشوف المقر يسارك تقريبا بعد مبنيين ولا تنسى اسواق الشعله تحصلهم يمينك


ادري الوصف يلحس


وفالك التوفيق يارب وتكفى دعواتك ان ربي يحقق اللي ببالي

[كابتن بالمستقبل]

الامور سهالات وانا اخوك الموقع امام اسواق الشعلة بحي الضباط انصحك تجي 7حكم في المساء تمسك سره مع الشعب الجوال ممنوع ياخذك باص يدققون بالاوراق خلي الورقه المراجعه اول وحدة ثبت الصورة على الاوراق ومن ثم يقيسون حرارتك ويعطونك كمام طبي وبعدين تركب الباص وتذهب معاهم مكان الكشف الطبي بالنسبه لكلية الملك فيصل الجويه لهم مكان مخصص يعطونك استبيان عادي تملأ الاستبيان ومن ثم ينادونك وتمسك طابور مع الشعب تدخل عيادة الطول والوزن والدنيا سهالات ومن ثم باقي العيادات واذا امورك مزبوطه تروح عيادة مخصصة لتحليل البول ومن ثم تجلس بالكراسي لين الادارة تشوف اوراقك اذا اوراقك كويسه تروح للمقابله الشخصية والضباط هناك اخلاقهم عسل لاتخاف الدنيا سهالات وتختار عند الضابط ثلاثة تخصصات ومن ثم تروح المسرح تأخذ موعد للاختبار القدرات 1و2 واختبار اللياقه البدنيه وبعدين ترجع في باص واليوم الثاني تروح للاختبار القدرات الساعة7ونص المغرب واليوم الثالث اختبار اللياقه البدنيه وهذه القصة كاملة واسف على التأخير اخوك ينتظر القبول النهائي

[كابتن بالمستقبل]

اختبار القدرات واللياقه البدنيه في مقر كلية الملك فيصل الجوية القاعدة الجوية

[فورتي]

طيب شباب وش صار على كلية الملك عبدالله للدفاع الجوي أبي أعرف التفاصيل من الأول للأخير من أدخل وزارة الدفاع حتى أطلع