متعسره من كل الاتجاهات .. بدايه فشل مشروعي الصغير

[وجع قلبي]

السلام عليكم
مبارك عليكم ما تبقى من الشهر
انا عاطله عن العمل ادري مافي شي جديد لان اكيد
اللي يقرا او اللي مسجلين اللي هنا كلهم نفس
و مافي جديد لو اقول اني طموحه و رغم كل ذا
جالسه اخذ دورات و شهادات سواء عن بعد او الحضور المباشر
و مافيه جديد لو قلت ان صارلي ثلاث سنوات احاول اكمل تعليمي و مو متاحه لي الفرصه بالمجال اللي انا ابيه ..
و مو موضوعنا عن بطالتي و شح الفرص و صار التعليم
حلم بالنسبه لي و اكبر امنياتي!
مشكلتي ... لما قرررت اتحرك و ليه انتظر
سراب الوظيفه و اجلس حاطه يدي على خدي
و اعيش بسلبيه و انتظر السماء تمطر ذهب
مع اني مو كذا ! مافي فرصه وظيفيه الا ما قدمت عليها حتى خارج مدينتي مع اني بنت !
المهم قررت افتح مشروعي الصغير بعد ما قرأت مواضيع
كثيره هنا بالمنتدى و تشجيع الردود بموضوع احد الاخوان
لمعت الفكره براسي
مشروعي فساتين افراح جاهزه من غير تفاصيل زياده
بعد ما تسلفت مبلغ من احداهن تم المشروع اللي حسبته مغارة علي بابا و للاسف خاب ظني
طبعا بعد اطلاعي ع الموضه الحاليه و بعد ما حسبت حساب
ان كل فستان يكونوا اشكال مختلفه اللي بكم طويل
و اللي نص كم و اللي من غير كم و اللي منفوش و اللي ع شكل حورية البحر و اللي عادي
و اقمشه غير
ان مراعيه اختلاف الاذواق و حاطه هالنقطه بعيني
و التصوير بمتجري تصوير المعمل بعد ما خلصوا اللي طلبته
سجلت ب موقع معروف حتى اكون شخص ثقه
لكن الى الان الحال واقف!!!!!
سويت اعلانات ب حسابات اللي تدعم المتاجر بمنطقتي
و اعلان كمان لدعم المتاجر
يوميا انزل كومنت المشاهير عشان العالم تقرا
مع ان هالشي داخليا غير راضيه عنه احس عزة نفسي تنداس و بخجل كبير لما اكتب كومنت كأني جالسه اشحت
و طلبت من احد الاعلامات الخليجيات الدعم و هي مشهوره جدا
و اكتب كومنتات ارد ع الناس بحسابات الاستفسارات
و الاسعار رخيصه ما تتعدا الاربعه آلاف ريال
بس فعليا الحال واااااقف , و الله العظيم متعسر بشكل كبير!!!!!!
بينما اللهم لا حسد و لا حول و لا قوه الا بالله
اشوف حسابات حاطين صور من النت مو شغلهم
و ماشاء الله شغلهم ماشي زي الحلاوه! ان متحسفه
لو ادري كذا
جمعت صور من النت و كتبت تحتهم اسويلكم زيهم
مو اتعنى و انتظر و ادفع و و و الخ
المشكله وين؟؟؟؟؟؟
ابيكم تعطوني حلول كيف امشي البضاعه!!!!!؟
مخي وقف عن التفكير
اعرف فيه فيس بوك و اعلانات اقدر اسويها و اعلانات الانستقرام الخاصه بالموقع نفسه
لكن يبيله ميزانييييه
عطوني افكار مايبيلها ميزانيه ؟ و افكار من غير ما اطلب صديقاتي يشتروا مني او يعرضوا على قرايبهم
لان كمان عزة نفسي ما تسمح لي اصر عليهم يشتروا
او يشوفولي زباين
طيب ايش المطلوب منكم
موضوعي هدفه ابي تنوروني ب افكار
تساعدني ابيع اللي عندي
رغم ان عندي متابعين بحدود ال ٣٠٠
ف اكتشفت ان عدد المتابعين مو شرط ان كلهم يفكروا يشتروا
ف هاتولي افكااااااار

شكرا مقدما و عذرا ع الهذره الطويله

[سعودي مرجوج]

الله يتمم عليك بالخير والرزق الوفير فيما يحبه الله ويرضاه

التجاره أولا تحتاج صبر وبال طويل وهي وتسعه اعشار الرزق من التجاره
التجاره من الانترنت مو مكلفه ولا تحتااج محلات او سجلات تجاريه

وعلشان كذا بتحصلين ناس كثير تبحر في تجاره الانترنت
وماراح تكونين لحالك وتحتاجين انك تثبتين نفسك بينهم
ومن خلال كلامك مبين معك طموح ماشاء الله
لكن حذاري من عزة النفس الي فيك تمر في تفكيرك
حاولي تغيرين الكلمه وخليها في عقلك انك تبين مساعده منهم وينشرون حسابك او متجرك الصغير

كل شي في موضوعك عجبني الا عزة النفس الخوف هي الي تخليك تتراجعين لورى

اما طرق وافكار لنشر المحتوى اللي معك
غالبا الناس واللي عندهم القدرهم يشترون من اسواق الانترنت والان حنا في فتره الاجازه ومن بعد رمضان بتبدأ
الافراح والاعراس


حاليا اكثر الناس اهتمامهم في ملابس العيد يعني راح يكون الاقبال على الفساتين اقل نوعا ما هذي خليها في بالك

ثانيا سوي بحث في تويتر انستقرام فيس بوك
عن كلمه فساتين او اعراس وبتحصلين تغريدات لبنات تسولف فيها وابداي منشنيهم بكم صوره لفساتينك

ثالثا استخدمي هاشتاقات المختصه بالبنات واعلني فيها عن فساتينك ولا تختارين هاشتاقات اجتماعيه او رياضيه
حتى مايضيع وقتك

رابعآ فيه بعض الحسابات في مواقع التواصل الاجتماعي
لمن تمنشنينهم ينشرون تغريدتك بدون مقابل ومساعده لك

هذي الطرق بتساعدك بنشر متجرك للفساتيين وتاكدي راح يكون لك منافسيين مابتكونين لحالك

لذلك تحتاحين تسويق لفساتينك وهنا يبدا اول شيء بانه
اسلوبك يكون واحد واستايل متجرك واحد ولو تجيبين صور لفساتينك بشكل احترافي يكون افضل حتى تجذب النظر
وانتم بنات وتعرفون ادق التفاصيل مايحتاج

العروض وما ادراك ما العروض
كلمه تخفيضات او عرض خاص او 30% خصم
هذي تدغدغ مشاعر الواحد

مثلا عرض خاص اشتري فستان وأحصلي على خصم 20% على الفستان الثاني
عاد انتي احسبي ميزانيتك والمكسب

واخيرا حسابك لازم يكون اسمه مايتغير دايم
رقم للتواصل معك مايتغير
اسم متجرك ومايتغير

وبكذا باذن الله راح تشتهريين بس الصبر ثم الصبر
التجاره يحتاج لها صبر وبال طووويل
وفي خلال هالوقت ابحثي عن مقالات التسويق و مندوب المبيعات وبتتعلمين منها اكثر وانتي تقرأين فيها

واخيرا العذر والسموحه على الاطاله واتمنى وبالخدمة باي وقت . .

[وخر عني]

وعليكم السلام ورحمة الله وبركاته
اختي بإذن الله ما بنقصر معك
وفيه تجربه مريت فيها بخصوص موضوعك>> بعد التراويح لي رجعه بإذن الله
وودي اعرف انتي بأي منطقه لأنه فستان العروس بيختلف من منطقه لأخرى

[عذاب الجرح]

اعرضها في محل مشهور مقابل نسبة لك بسيطة على الاقل تعوضين نصف اللي خسرتيه

وبعدها قومي على رجولك وابحث عن فكرة جديدة افضل ونصيحة حاولي تدخلين

الشيء اللي يستهلكه الناس يومياً مثل الحلا او الاكل او الخدمات اللي تقدم ويحتاجونها الناس

ركزي على كلمة يومياً والله يوفقك وييسر امرك

[بصيص أمل مقتول]

والله مدري وش اقولك الحال من بعضه

الله يرزقك من حيث لا تحتسبين

[Mudzxp]

الله يوفقك وييسر امرك طبعا انا ولد ومالي خبره بهذا المشروع ولكن مجرد نصيحه شوفي لك مشروع تسوقي لشي استهلاكي
عندك مثلا ( الاكل , الاجهزة [ اكسسوارات] , ملابس ) من ناحية الفساتين اتوقع لها مواسم تدور عنها اما اللي ذكرتهم مستمرين

قبل اسبوع تقريبا رحت لمحل حلى وجلست مع البائع اسولف معاه سألته عن الدخل اليومي قال يوصل ل 13 الف ريال
طبعا فكرة المحل يبيع الحلى و بعض مستحضرات الحلى (( ومتفق مع اُسر منتجه ))
يعني لو ممتازه بالطبخ تقدري تسوقي لنفسك بحساب في الانستقرام وتتفقي مع محل او اكثر من محل اللي يروجون للأسر المنتجه ويصير لك إن شاء الله دخل طيب من هذه الشغله

فكرة ثانيه !!
لو عندك أخ مترغ للتوصيل او تتفقي مع شخص سواء مندوب اي شخص متفرغ لهذي الفكره , تسوي حساب خاص في أغراض (إيكيا) وتصيري تاخذي نسبة على قيمة المشتريات
كثير مطبقين هذي الطريقه ومحدثك من ضمنهم
فيه بعض الايام اوصل بعض الاغراض توصل عمولتي 450 ريال في يوم واحد !! علماً اني اوصل بالشي البسيييط و الحمدلله راضي وربي رازقني
الى يومك هذا كل شوي تجي وحده تكلمني وقبل اقل من ساعه اخر وحده يبغون توصيل وللاسف الان متوقف عشان العيد
شوفي حسابات اللي يعرضون اغراض ايكيا فيه ناس واصله 170 الف متابع !!

واسف على الإطاله وموفقه إن شاء الله

[eroor]

الله يوفقك
اسمعي مالك الا الاكل
شعبنا هنا ماغير يرم ماشاء الله
شوفي لي خدامه ايجار او تستقدمي وهو الافضل
ويسوي الاكلات المعروفه والشعبيه وخليك بالمنتزهات او الاماكن العامه وخلي الخدامه تبيع وانتي جالسه
وبتشوفي الدخل

[ملك الهوكي]

عليكم السلام ورحمة الله وبركاته...

التجارة الالكترونية ممتازة جدا ومفيدة خصوصا للبنات.

تحتاجي الآتي:

تصوير ممتاز.. وعرض للبضاعة بشكل مميز

أهم شيء التصوير يكون واضح ويوضح الخياطة ويوضح تفاصيل الفستان

ضعي تفاصيل الفستان طول وعرض وباقي الأشياء كل ما كنتي دقيقة كل ما كسبتي "مصداقية" أكبر
وهي أهم مافي التجارة الإلكترونية.


التصوير لا بد أن يكون لنفس القطعة ومن عندك وليس تعرضين صورة الموقع نفسها!



ما أدري عن أصل الفساتين ولكن من أسعارها أظن أنها لماركات مشهورة وان كان ظني صحيح

فحاولي تثبتي للناس إن البضاعة (أصلية) مثل الفواتير وغيرها.

أما إن كانت ليست لماركات مشهورة فحاولي تضعي سعر معقول.

إنتي في أي مدينة اذا كنتي خارج المدن الكبيرة فحاولي ترسلي القطع لقريبة لك في منطقة كبيرة ويكون الدفع عند التوصيل!

..

أشياء كثيرة تقدري تحسني من وضعك وتذكري إن الوقت الان مو لك بل لملابس العيد

وانتظري بعد العيد واستعدي له!

[شادي الوادي]

أختي أحيي فيك عزة النفس و هذا شيء يحسب لك لا عليك ....
و الشيء الي فهمته من كلامك إنك صبورة جدا و طموحة و هذا من أساسيات النجاح

بنسبة لمشروعك بصراحة ما عندي فكرة عنه أو ممكن ما قدرت أفهم فكرته
يمكن لأني ولد .

لكن كل ما عليك الآن هو إنك تجنبي العاطفة شويتين و تفكري بمنطق و عقل 1 + 1 = 2
لو شفتي بعد تفكير و دراسة إن المشروع بيمشي مثلا سوقتي له بشكل أفضل أو تعلني بشكل مكثف
أو تغيري شويتين في النشاط الأساسي لمشروعك فـــــ ثقي بأن التوفيق حليفك .
و لولا العكس شفتي ما فيه بصيص نور أوقفي النشاط بالكامل و حولي لمشروع آخر

لك ودي

[لعل وعسى]

المشاركة الأصلية كتبت بواسطة Mudzxp

الله يوفقك وييسر امرك طبعا انا ولد ومالي خبره بهذا المشروع ولكن مجرد نصيحه شوفي لك مشروع تسوقي لشي استهلاكي
عندك مثلا ( الاكل , الاجهزة [ اكسسوارات] , ملابس ) من ناحية الفساتين اتوقع لها مواسم تدور عنها اما اللي ذكرتهم مستمرين

قبل اسبوع تقريبا رحت لمحل حلى وجلست مع البائع اسولف معاه سألته عن الدخل اليومي قال يوصل ل 13 الف ريال
طبعا فكرة المحل يبيع الحلى و بعض مستحضرات الحلى (( ومتفق مع اُسر منتجه ))
يعني لو ممتازه بالطبخ تقدري تسوقي لنفسك بحساب في الانستقرام وتتفقي مع محل او اكثر من محل اللي يروجون للأسر المنتجه ويصير لك إن شاء الله دخل طيب من هذه الشغله

فكرة ثانيه !!
لو عندك أخ مترغ للتوصيل او تتفقي مع شخص سواء مندوب اي شخص متفرغ لهذي الفكره , تسوي حساب خاص في أغراض (إيكيا) وتصيري تاخذي نسبة على قيمة المشتريات
كثير مطبقين هذي الطريقه ومحدثك من ضمنهم
فيه بعض الايام اوصل بعض الاغراض توصل عمولتي 450 ريال في يوم واحد !! علماً اني اوصل بالشي البسيييط و الحمدلله راضي وربي رازقني
الى يومك هذا كل شوي تجي وحده تكلمني وقبل اقل من ساعه اخر وحده يبغون توصيل وللاسف الان متوقف عشان العيد
شوفي حسابات اللي يعرضون اغراض ايكيا فيه ناس واصله 170 الف متابع !!

واسف على الإطاله وموفقه إن شاء الله

بغيت اسألك بالنسبة لتوصيل اغراض ايكيا هل احتاج دينه ولا توصل بسيارتك الخاصة هل الاغراض كبيرة الحجم ولا صغيرة وهل التحميل والتنزيل عليك ولا بس توصل والتنزيل على اصحابها وكيف تحسب التكلفه بارك الله فيك