همي أحمي نفسي وأختي .
 

همي أتمنى أن أحمي نفسي وأختي من الطرد خارج البيت مشكلتي راح اذكرها بطريقة مختصرهـ :

أ - أبوي مسحور ساحرته زوجته الثانية عننا كل ما يصير مشاكل بيني وبين أمي تتصل عليه تقول خذها يقول لها ما أبيها ( أنا وأحياناً أختي ) المعامله هذي مطبقه علينا .

ب - أمي ما تبينا علشان أخوانها اللي هم خوالي ظالمينا وشايفين الويلات منهم من صغرنا الين اليوم عمري الحين 32 سنه وأختي 22 سنه وبقية أخواتي وأخوي متزوجين عايشين في بيوتهم .

خوالي ما يحبوننا لأنهم شايفين أنفسهم متكبرين مرررهـ على إنهم :
1 - ما يصلون .
2 - مدخنين .
3 - في منهم مدمن مخدرات .
4 - في منهم وإبنه يفضلون الخلوه الغير شرعية مع نساء أخريات .
5 - هم كبار عندهم تقاعد وفي منهم عنده ضمان اجتماعي وحالهم ماشي .
6 - ما يصومون يمثلون علينا وأكثر من مرهـ أكشفهم وأمي معذبتنا تخلينا نطبخ لهم وترسله لهم .

أمي تكرهنا أنا وأختي لأنها شافت أبوي ما يبينا تبي تسوي مثله أنا وأختي هذي أخلاقنا:
1 - محافظين على الصلوات في وقتها من دخولها .
2 - محافظين على قراءة قراءان الفجر .
3 - ما نغلط على أحد متعودين الغير يذلنا ونسكت ما نقدر ناخذ حقنا منهم .
4 - محافظين على قراءة وسماع الرقية الشرعية وملازمة الأذكار .
5 - نطبخ وننظف ونجهز لها ملابس الدوام أمي موظفه ونمسجها كل هذا ولا شي .
6 - البيت ملك لأمي وعندنا سواق فلبيني حتى هو غريب ماله 7 شهور ما عجبه الوضع شايف اللي يصير تعرفون هم يعرفون المحترم والغير محترم .
7 - أنا إختبرت أمي قلت لها خليني أتوظف خارج الرياض أي مدينه وأرسل راتبي عن طريق الصراف ((( ولكن للأسف رفضت تبي تستذلنا في العيش عندها ))) .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــ
مشكلتنا :

أنا وأختي موافقين على الطرد بس مالنا مكان نروح له .
عارفة الحل المناسب لمشكلتنا هو الحصول على الوظيفه بالراتب راح أتمكن من شراء بيت بالتقسيط + أخذ من البنك قسط أول وأدفعه وأسدد البنك وأجار البيت .
[ خسارة عاطله ما عندي وظيفه ولا واسطه والضمان ما يساعدون الا اللي عمرها فوق 35 سنة ] .

علشان أمي إذا قالت اطلعوا برهـ ما نخاف من وين نروح .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ
ملاحظه :

فكرنا في خواتي المتزوجات الثنتين وأخوي المشكلة :

1 - وحدهـ تغار على زوجها مننا .
2- والثانية زوجها ضعيف على قد حاله و مسكن 2 من أخوانه .
3 - أخوي زوجته قاسية على الجميع تكرهنا مقاطعتنا من 3 سنوات .

أتقبل اقتراحاتكم وأرئكم وش الحل المناسب وش نسوي . الله يفرجها .

الله يفرجها لكم
 

ماادري والله اصدقك والا لا يعني معقووووووووووووووولة فيه ام تسوي كذا بعيالها

توقعناها غضبانه علينا أثاريها قاصدته كله علشان أخوانها تحبهم وتعزهم لو يسون فينا اللي يسون عادي عندها ما يهمها مثلاً يظلموننا تقول ما ظلموكم .

ونتضايق من وجودهم لأننا في الحارة معروف بيتنا إن اللي يعيش فيه بنات وأمهم بس خوالي وفعايلهم الشينة ووجودهم محرجنا خصوصاً انهم مزعجين وأصواتهم عالية .

( نكرهـ خوالي لأنهم يجيـبون معهم أصحابهم غرب 1 ولا 2 وتحب تستضيفهم تقول لهم تفضلوا حياكم ) . ((إذا إعترضنا تقول لنا بيتي وأنا حرهـ فيه وإذا مو عاجبكم اطلعوا برهـ بيتي روحوا لأبوكم )) .

مثال خالي مطلق زوجته ومعه ولدهـ هو وولده له سوابق في كل شي كما ذكرت مسبقاً أخلاقهم عدم الحين ناوية تسكنهم معنا هذا اللي مضايقني الحين .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ

صدق وأكثر من صدمتي إحترت وش أسوي .

شكراً لك يا أخوي .

الشكوى لله سبحانه وتعالى
وماتضيق والا تفرج
الله يعينكم يارب
الصبر وما غيره شي

لاحول ولا قوة إلا بالله العظيم
الله يفرجها عليكم ولاتنسين اللجوء لله دائما بالدعاء
وخاصة في الليل فهي سهام الليل لاتخطيء..والله احن على عبادة من الأم بابنها
والله يحميكم انت واختك ويخليكم لبعض
صدقيني عجزت ما ادري وش اقول..غير الدعاء

الله يساعدكم ويوفقكم


بس معليش اخوي وش شهادتك والموهلات وهل عندك دورات ؟؟؟؟؟

حسبي الله ونعم الوكيل أنا أشوف الأم والأب لهم رسالة ربي بيسألهم عنها ولا مااكان تزوجوا

الأم خلقت الصدر الحنون لإولادها والله شي غريب جداً هذي أمك!!!

والله إني دائم أبكي على المجهول لإولادي مالهم إلا الدعاء من الله كل يوم وأستودعهم عند الله

************************************************** *
أختي خليكِ إنتي الصدر الحنون لاختكِ والله مارح يضيعكم

وكوني على ثقة بربك انه راح يعوضك خير إنتي وأختك

اللهم عوض صبرهم خير وأرزقهم من حيث لايحتسبوا

وأرزقهم بالازواج الصالحين آمين

ــــــــــــــــــــــــــــــــ
شهاداتي :
1 - سكرتارية تنفيذية من معهد الإدارة العامة الفرع النسوي بالرياض .
2 - خبرة من مستشفى عبيد التخصصي - قسم السجلات الطبية .
3 - دورة أعمال الإستقبال .
4 - شهادة حضور ورشة العمل الثالثة للقطاع الصحي من وزارة الصحة بعنوان ( أساسيات العمل في السجلات الطبية ) .
5 - دورة إدخال بيانات ومعالجة النصوص 6 شهور .

الله يعز الإسلام والمسلمين أجمعين آمين والله يحفظك وما يحدك لأحد آمين .

شكراً لك يا أخوي .