النفسية & والعسكرية
السلام عليكم ورحمة الله وبركاته أسعد الله أوقاتكم بكل خير وسرور لم اسجل في هذا الموقع إلا لسببين السبب الأول : الشكر لله تعالى ثم القائمين على هذا الموقع العملاق الذي خفض وسوف يخفض بمشيئة الله تعالى من حالات البطالة السبب الثاني : مشاركتي في حالتي النفسية ونظام العسكرية. الإسم : آه يادنيا العمر : اغفرلي يارب الوظيفة : عسكري الرتبة : جندي المسمى الوظيفي : مراسل الراتب : 3600 القرض : 1500 المتبقى : 2100 البدلات : مواصلات فقط العلاوات : لا يوجد لاني مراسل (ملاحظة اشق عمل في القطاع العسكري بمسمى مراسل ) الخدمة العسكرية : سنتان القطاع : الجوية حالتي النفسية صعبة جدا بغض النظر عن حالتي المادية ، أعيش في حالات هم وغم من أول يوم في خدمتي العسكرية الكثير منكم راح يرد على هذا الموضوع بالردود المعروفة ليه تفصل حرام عليك غيرك مالقاها انت منت كفو عسكرية اعطينا نص راتبك انا على أتم الاستعداد بالتنازل عن كل شي يخص العسكرية راح اشرح طبيعة العمل الدوام الساعة السابعة والنصف صباحا ياعسكري روح شوف السيارات ( زيت ، ماء ، تشتغل ولا لا ) <== مادري وش دخلها بالمراسل بس العسكرية أمر الساعة التاسعة صباحا ياعسكري قوم ودلنا هالمعاملات في الاقسام الفلانية (15 قسم طبعا في سيارة بانوراما بدون مكيف) الساعة الحادي عشر تررن ترررن سم اطلعلي فوق ابشر طال عمرك بالله روح البقالة اشتري طماط وبصل ووده بيتي <== ماتقدر تقول لا ولو قلت لا ماراح يسويلك شي لكن راح يكرهك في الدوام وعلى هذا الروتين حتى نهاية الدوام ياناس والله دموعي في عيني من القهر اللي احس فيه متخرج ثانوية علوم طبيعية بتقدير جيدجدا وخبراات عملية في خدمة العملاء والمبيعات شهادات كمبيوتر ولغة انجليزية مهارات فيي الحاسب الالي تصميم مواقع استايلات خلفيات بسيطة في البرمجة وتعريب البرامج والاختراق وللأسف موجودة في شنطة والغبار عليها كل شهرين انظف فيها مادخلت هالمجال الا لاني ابي ارضي الوالد الله يحفظه ليش لأني احبه ومابيه يزعل مني تخيلوا ياعالم ماني قادر اقول هالكلام اللي انا قلته لكم لأي شخص في البيت او اصدقاء او اي شي ليش لاني اعرف جوابهم لانهم مب حاسين وش فيني ماهم حاسين بهمومي واللي في داخلي تخيلوا محد يعرف وش هو نظام وظيفتي وعملي غير اهلي وابين لهم اني مبسووط لان التفكير اللي يفكر يفصل من العسكرية هذا يا انه يتعاطى او انه مب كفو عسكرية ومابي احد يقول للوالد ولدك فصل ليه حرام والله انه مب كفوو اااااااه يا دنياا صرت كل يوم ادور على وظيفة واشتري نفسي ولا يجيني واحد حط على كتفه كم نجمة بالواسطة ويقول جيب لي طماط ولا باذنجان انا وش دخل ام امي من ضحك على ابوك وقال اني شغال في حلقة تدرون وش اللي رادني من الفصل بدون ما حصل وظيفة مو الطفرة لا لان الوالد شغال في نفس المكتب ومنصبه حساس جدا ولا فكرت انه يتوسط لي عند فلان ولا علان لاني عارف الواحد فيهم مايسوى ..... وعلى فكرة يحسبني مبسووط ولا فكرت بيوم انه اقوله ابي افصل بس حاس ان راتبي قليل ولكن ما قد شكيت له من وظيفتي وطريقة عملي لانه يحسبني مبسووط وانا النااااااااار تاااااااااكلني من داخل عارفين تجيني ملابس عسكرية ارميها في السيارة ياناااس البس البدلة العسكرية احس دموعي تبي تنزل قهررررر والله ادري عن ردودكم وحاس فيكم وما الومكم لو قلتوا انت خبل لا تفصل انت وانت وانت وانت ثلاث اورااق موجهة للوالد والوالدة كل اربع شهور اكتبها في داخلها اني رايح وسامحوني واسف يا ابوي اني مابيضت وجهك ولكن اشوف الوالد اقطعها ماني قادر اواجهه مب خايف منه خايف عليه لان القلب عنده مريض شوي يعني بأي صدمة يطيح علينا وراح اموت لو صارله شي بسببي لكن اناا نفسيتي حياتي ابي اتزوج ابي عيال اللهم اني عبدك ابن عبدك ناصيتي بيدك ماض في حكم عدل في قضاءك اللهم اني اسألك بكل اسم سميت به نفسك أو انزلته في كتابك او علمته لأحد من خلقك ان تجعل القران ربيع قلبي ونور صدري وجلاء همي يارب العالمين والله اني بغيتكم تخففو علي شوي لاني ماني طايق هالعسكرية ودوامي حفاظا على وجه الوالد الله يطول بعمره ولكن اتمنى من خلال بحثي عن وظايف ان احصل وظيفة ترضي الوالد بالفصل وادعولي بالتوفيق وشكرا لإدارة الموقع والاعضاء اخوكم اه يادنيا |
والله حالتــــــــــك تكسر الخاطر
ومقدر أنفعك إلا أني أقول الله يوفقك ويرزقك بوظيفه أفضل من العسكريه والله يزوجك ويسر أمورررك أخوي اذا تقدر تكمل جامعه مسائي أدرررس وإن شاء الله تزين أمورك ...!!! وأذا أمرك النقيب تجيب طماط (( طبعا هذا النقيب مـافيه رجوله )) خذ الشي بروح رياضيه ولا تأخذه بأنه مذله وصدقني داوم الحال من المحااااااااااااال ‘ن شاء الله بتجيك أيااام راحه وكل ما تعسرت الأمور معناها الفرج قريب |
اصبر..عليك بالصبر
مابعد عسر إلا يسر إن شاء الله وعليك بالإستغفار فإنه سبب للرزق وخروج للضيق والهم |
ياخوووي الله يعينك ويصبرررك ويرزقك بالي تبيه ..
والله حرام هذا الظلم بعينه ..لكن مدام انك بار بوالديك صدقني انه ربي بيرزقك .... وعليك بكثرة الاستغفاررررر |
السلام عليكم ورحمة الله وبركاته أخي الغالي : آه يا دنيا..... أول شيء كل عام وأنت بخير ، ومبارك عليك الشهر وعلى الجميع أنت فيك خير عظيم ، تعرف ليش خل الوظيفة على جنب وكل مشاكل وهموم الحياة إنك: شريت رضا والدك وصبرت على ظروف الحياة حتى لا تزعل أبوك أو تكون سبب في مرضه لا سمح الله.. هذا موقف بطولي ، والله يالغالي إن في برّهم الجنة وكلنا رآحلين من الدنيا ولا يبقى لك إلا عملك الصالح .. ياما ناس كانوا سبب في موت أبآئهم ، والآن يبكون الدم من شدة الندم ------------------------------------------------------------------- نرجع لأصل الموضوع: مافي أحد في الدنيا مرتاح في عمله ، لآزم يطلع لك ظالم وهذا إختبار من الله حتى يمحص من ذنوبك ويزيد في حسناتك ويختبر صبرك وهل ستلجأ إليه ( الله يغضب إن تركت سؤاله ...وبني آدم حين يُسأل يغضب ) يجيب دعوة المضطر .. يا أخي الغالي : أنت مضطر ادع ربك في سجودك يفرج همك وييسر أمرك وصدقني رآح تفرج عليك بإذن الله قريب جدًا .. تقرب إلى الله بالنوافل ----------------------------------------------------------------- أسأل الله أن يوفقك وييسر أمرك ويرزقك بوظيفة ومنصب ترتاح فيها وزوجة تسعدك في حياتك ويرزقنا الفردوس الأعلى اجمعين يارب ولن ننساك من الدعاء بظهر الغيب ... أخوك :) تقبل مروري |
اقتباس:
والله ياخوي حاولت اني اخذها بروح رياضية بس ما اظن هالشي راح ينفع الحين الله يسعدك اخوي اقتباس:
ونعم بالله العظيم جزاك الله خير اخوي اقتباس:
جزاك الله خير اخوي حوت والله يرزقنا جميعا اقتباس:
هلا اخوي وكل سنة وانت بصحة وسلامة ... الله يبارك في حياتك جزاك الله خير اخوي على الاطراء الجميل واعلم اخوي ان لو احصل وظيفة تشيلني من هالاهانة ماراح اتردد ع القليل احس براحة اللي انحرمت منها من يوم دخولي لهالعسكرية والله اضحك للناس وابكي من داخل واشكركم اخواني علىى ردودكم واطرائكم ودعواتكم والله يوفقكم ويرزقكم |
أخوي الله يوفقك إن شاء الله ويساعدك
لكن بعطيك نصيحه وحده كمل الجامعة إنتساب بس إدخل قسم حلو وصدقني ما تحس نفسك إلا إنك متخرج وراح تلقى الوظيفة الحلوة إن شاء الله أهم شيء لا تقول اربع سنوات مشوار والله الحين السنوات تعدي وإحنا ما نحس فيها توكل على الله وكمل دراسة |
مثل ما قال اخوي (خلف الكواليس)
اذا قدرت تكمل دراسه حاول انك تكمل دراسه ..لانها بتفتح لك امور صعبه تفتحها الحين والله يعينك ويوفقك ان شاء الله |
الله يوفقكم ويزرقكم ويحميكم ويبعد عنكم الهموم
اخوان لم تلدهم امي ونعم الاخوان |
الله يعينك
لا حول ولاقوة الا بالله |
الساعة الآن 06:01 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين