السلام عليكم ورحمة الله وبركاته
اسعد الله اوقاتكم بكل خير
طبعاً مالكم بالطويلة راح اقولكم وش صار معاي بالحرف الواحد
امس كنت جالسة اقرأ جرايد ع وقت المغرب رن هاتف الوالد ربي يعطيه طولة العمر وشوي ويطلع صوت ناعم شفته يجيب الجوال لي استغربت قال يابنتي وحدة تبيك كلمتها قالت انتي فلانة قلت ايه وصلتي قالت بكرة مقابلتك الساعة 4 ونص قلت وين وقعدت توصف ماتركت كوبري الا قالته وبعد ماخلصت قلت عيدي >>>ماانعطى وجه ابد
المهم ونخرج من البيت اليوم ع الساعة اربعة الا ربع بحكم مسافة الطريق وقسم كأننا نلعب نطلع كوبري وننزل من على الثاني والمشكلة ابوي يقول احفظي ذا الطريق وانا كلي نوم واذا شفت كوبري قال من هنا قلت ايه وهو يدري اني ماني بأرضه المهم جلسنا نحوس اكثر من ساعة وكل شوي اتصل ع البنت وتقول تعرفين ستار بوكس قلت ايه قالت هناك >>>بالله كم فيه ستاربوكس بجدة
المهم ويوم وصلنا بعد تعب قلت تريني عند المكان بالضبط انتي بأية عمارة قالت ادخلي من هناك وامشي ويمشي معاي الوالد تقولون مضيعين لنا بعير وشوي الا وحدة تناديني بأسمي وانا ذاك الوقت قلت مافيه يابنت الا تنحاشين على بالهم الوضع ايزي كل من هب ودب لازم يعرف اسمي مادروا ان فيها ارقاب
قلت لابوي تكفى نرجع قال وصلتي لها خلينا نشوف وش عندهم والا ذيك الثنتين المزبرقات وحدة حاطة اي شدو الين اذانيها والثانية تلق بالفصوص انا ماعجبني الوضع بنوب لانه شيء غير عن عاداتي والله لو اني ادري انو المقابلة بكوفي مااروح ليه خلصت الاماكن >>>كان رقدت اصرف لي
وبعد ذا الشحططة قالت وش حلمك بغيت اقولها اقطع ذا المسافة عشان تسألين ذا السؤال جعل جبهتس الفقع تبيني اقول رائدة فضاء اكيد ابي وظيفة واكون ربة منزل فاضلة >>>ركزوا حيل
المهم اللي اكتشفته ماعندهم مقر يعني تحت التأسيس مالهم مكان يداومون فيه ويبوني زي اللي ادور على الاحياء لحالي واكتشف ناس فقراء في النهاية يطلعون اصحاب نفوذ اول مرة اسمع بذا الشيء********فيس ينتف شعره ويفكر بالموضوع
وذي لو عطوني فيها ملايين الدنيا مابوافق عليها لان اولا مااحد يضمن يكون سالم وغير كذا انا بنية ومااحب بالعربي هالشغل وش كلفني المهم جلست تغريني بحكم شهاداتي قلت يصير خير وغير كذا اغلب الوقت اناظر عيون ابويا بالطاولة اللي جنبنا كككككككككككككككككككاأنه يقول يصير خير والله لامعط شعرتس بس نرجع البيت تدرون تخيلت اني اقوله توبة بس بصوت فايز المالكي في مسلسل العولمة ...



طبعا انا ماادرجت قصتي الا لعدة اسباب:
عشان قبل تقدمون على اي مكان لازم تتاكدون ان فيه مقر رسمي الكل يعرفه تلافي للمشاكل والخداع وغير كذا انا ولله الحمد مااعطيتهم الا رقم ولي امري وهذي خطوة تحسب لي يعني ارجو منكم تتأكدوا ولاتنخدعون بأي اعلان يعني انا ماحبيت مكان المقابلة لانه اختلاط وغير كذا اذا النفس عافت شيء وكان مناقض لمبادئها مافيه مجال انك ترتاح وغير كذا واهم سبب بنظري انا ماابي اغضب ربي ع شيء مايسوى ورزقي بيجيني واللي كاتبه ربي لي رآح اخذه وان ماخذيته يأخذونه عيالي
وسلامتك ادري اني قرقرت واجد بس قلت اقولكم وش صار معاي

مافيه تفاعل ابد ):

لا مافيـــــــــــــــــه تفاعل

عادي جدا جدا

انا ما الومهم الوم الى منزل اعلان لهم وللاسف حالات النصب تبدا من نفس الموقف الى انتي عشتيه

علعموم الحمد على السلامه .

بداية احمد الله تعالى انك لم ترسلي لهم رقم التواصل الخاص بك

والوظيفة بأذن الله تعالى معوضة بأفضل وخير منها

لاتستعجلي رزقك

وكما قال احد الحكماء (( علمت ان رزقي لن ياخذه غيري فطمئن قلبي ))

الحمد لله على السلامة
وشكرا على النصيحة وعرض التجربة للعظة

عالم فاضيه