مشروع اغنام كل ما يحتاجه منك 1000 ريال كل شهر
 

:q

الي يعيب كثير من الشباب والبنات ان الواحد يفكر بمشروع ثم يتحمس له ويرفع تكاليفه لعنان السماء ثم ما يطبقه :b

يقول المثل مد رجولك على قد لحافك ( لأن هذا القدر الي قدرت تجيبه )

أغلب الموجودين عاطلين وما يهم الي راس ماله عالي فما عنده مشكله المهم والاهم هم الي ما عندهم مبالغ كبيره ويحلمون بفوائد لكن مشكلتهم ان ما عندهم راس مال ولا عندهم خبره وفي العاده تكون الخبره اهم من راس المال الي من المحتمل يضيع بدون خبره

معليش بطول معاكم

لان ودي توصل الفكره الي مجربها بنفس الطريقه كنت اتمنا ان يكون معاي 200 الى 300 راس غنم لكن ما معاي راس مال الا 500 ريال الى عن طريقها بديت المشروع والي استمر 14 شهر بالتمام والكمال ارتفع فيه العدد الى 34 راس بعت منه وذبحت وبادلت ثم توالد وفي نهاية 14 شهر بعته

فراح اشرح طريقتي ولكل واحد طريقته والفرص الي متاحه له

في البدايه شريت 2 نعاج كل وحده معاها طلي يرضع بـ 1500 ريال قدمت 500 ريال وتركت الباقي على دفعتين وكلما جمعت فلوس استدنت او اشتريت ( اناثي صغار ) لان حاط في بالي ان هي الي راح تجيب طليان واناثي وكنت اتمنا انها تجيب اناثي وما تجيب طليان دام في البدايه ومحتاج ان الغنم تتوالد فافرح بوجود الاناثي واذا كانت طليان فمصيرها الثلاجه او السوق واشري اناثي او اجيب رودس وحب لها من قيمتها

في البدايه سويت لها بيت اي كلام في زاوية الحوش لمدة شهرين او ثلاثه ثم جبت لها شبك باربع مية ريال ولما زاد العدد زودت شبك اضافي وكنت حريص ان ما اشتري من اغنام فيها مرض ولا تطلع من الحوش اذا فيه اغنام برى عشان ما تصاب بالعدوى والحمد لله مر 14 شهر بدون اصابات تذكر عاملها بركه حق ترويش وتجي الوحده معصقله واوفر لها العلف والحب لين تمتلي وحاط لها خروف وموحد الون ابيض وزي ما قلت الطليان للثلاجه او الضيوف او المجلبه والاناثي حق انتاج كل وحده اذا ما دفعت باثنين ومرتين في السنه على الاقل تدفع مرتين في السنه

البعض بيجي ويقول صعب ومعذور الي في مدينه وما معاه حوش او مو قادر يستاجر او ماله رغبه لكن الي عاطل ومعاه مساحه ويبي يبدى براس مال صغير فما يصعبها على نفسه يبدى شوي شوي

وهذي قصة واحد من الشباب قبل ست شهور كان متردد يشري غنم واقنعته انه يبدى بنعجه او ثنتين حتى تحمسه مع الوقت انه يزيد عليها حتى وصلت معاه مع الوقت الى 25 وباع منها والحين معاه 19 اناثي وخروف والطليان والاناثي الي انولدت عنده 11 بعضها شراها مع امها والباقيات جابت من واحد او اثنين

فجربت انا وجرب صديقي وافكر ابدى بنفس الطريقه بدل ما افكر في راس مال كبير يمكن لو تجمع في نهاية السنه ما راح يجيب لو نصف الي تجيبها الاناثي لما تتوالد مرتين في السنه اما من واحد او اثنين

والله مشروع عالمي ..

حتى انا عندي غنم .. وبالعكس لآ جآتك طليآن عيد الآضحى قريب بآقي 5 اشهر .. وسعرها وقت العيد دبل ..

بالتوفيق

يعني الغنم اللي عندك لاتأكل ولا تشرب
ماشـوفكـ جبت سيرة للمصاريفـــــــــــ

صحيح الغنم غنيمه
لكن لا بد من وجود ميزانية بالبدايه

لو كان 1000 فقط بدون تكاليف اكل وشرب
كان البشر كلها حطت غتم وغتنت


ياليت توضح اكثر بالتفصيل عن مشروعك


’’ تحياتي ياعسل،،

شاري الطيب الله يوفقك وكلامك صحيح من بداية الصيف الى الحج هي ذروة الاسعار

ويا سيف جهينه الطلي مصاريفه شهريا يوصل عشر الاف فما انصح تاخذ غنم الا وانت مقتنع في الشغله لان الي مو مقتنع في الشغله ماتصلح له

اخوي غريب الاوطان انا راح ابدا بهالمشروع من الاسبوع الجاي باذن الله اذا الله يسر لكن الف ريال ماأظنها تجيب راسين وش رايك الماعز افضل ولا النعيمي.

اكيد مربحه وبها بركة لانها صنعت نبي الامة الكريم محمد صلى اللة عليه وسلم كان يرعى الغنم

فيه طريقة سوتها وحدة اعرغها اشترت اثنين وخلتها بلحوش عند الراعي بمقابل مادي وبعد ماجابتلها كم راس باعتها لكن الطريقة محتاجة امانة

يالحبيب يعتمد على المنطقه الي انت فيها فهل انت في منطقة رعي او في منطقة زراعيه او لا وهل سعر الحب والرودس مرتفع او لا وهل انت مستاجر او في حلالك او تجيب راعي او لا

يعتمد على المكان الي انت فيه ويعتمد على النوع الي بتاخذه ويمشي سوقه معاك وكم ارباحه الي بتجيك والوقت الي تشتري فيه والسن الي تختاره واكثر الموجودين عارفين الشي هذا وبدل ما احط قائمه طويله عريضه بالي اعرف والي ما اعرف حطيت شرح موجز ان هذي تجربتي وهذي الطريقه وهذي النتائج

عاد اذا واحد يشتري غالي ومستعجل وياخذ مريض او شي مو مرغوب ويحط عامل ومصاريف اجار ويحط نعجه وخروف فاحسن له يرقد او يدخل بمبلغ وعدد يشوف انه بيكسب فيه

انا قلت ان حتى الشبك ما اخذته في الحوش الا بعد ثاني شهر او ثالث شهر لان هذا راس المال الي معي وابي اربط نفسي ان ابدا دام تحمست للغنم وما معاي الا خمسمية ريال

بالنسبه للمصاريف فاذكر اكثر شي وصل في الشهر 200 ريال ولا تقول مو معقوله لان البعض يقدر يوصل المصاريف الى صفر ريال والبعض بيوصل المصاريف اضعاف على حسب منطقته وامكانياته حتى لو حاول يقلل المصاريف

إذا انت مو متحمس من نفسك للشغله وتشوف انها مو مربحه فافضل لك ان ما تاخذ غنم حتى ما تكون قناعتك السلبيه مسيطره عليك لانك منت واثق في شغلك الي بتشتغله

في ناس يفضلون ان يشترون من نفس الوقت ويبيعون في نفس الوقت بمكاسب ولو تأخر يوم او يومين راح يبيعون فأفضل لهم نفس الطريقه الي مقتنعين فيها لانهم واثقين في شغلهم وراح يكسبون وإذا جا غيره وما كسب فهذي قناعته هو وما تنطبق على الي يسكب

كل واحد وطريقته يالحبيب ففي ناس دخلها وبنيانها وسياراتها تجبها من شغلها في الغنم وفي ناس ما تعرف تشتري خروف فلا تستغرب لو قال احد مشروغ خسران او ربحان لان لو شرى بغالي وباع برخيص فخسران ولو عمل مصاريف اكثر من الارباح فخسران

والطريقه الي قلت هي ان تعمل لك على الاقل راس مال الشهر هذا تشتري والي بعده والي بعده وتتوالد معاك وتنمي شغلك احسن من يمر عليك الوقت وانت ما سويت شي دام راس مالك صغير

المشروع ناجح مع اخذ احتياطك هناك تكاليف اعلاف ومويه وعلاجات ووو
لاكن المشروع ناجح بكل المقاييس انا اخبر شخص كان موظف راتبه 4000 ريال قبل 8 سنوات بدا يجمع
اول بدايته شريت انا وياه غنم 100 راس من شخص نعرفه من 700 حتى راس السنه قسمناها من النص
50 لي و50 له بعد كذا بعت انا حلالي لين مابقي غير 10 وهو ماشاءلله قام يجمع من ذاك الحين قبل سبوع التواجه انا وياه لقيته تارك الوظيف وحلاله يم الفويلق يم القصيم يقول معي 850 راس ومعي وايت جنط 24 جديد ومعي جنط 24 للعلاف جديد وهو مشاءلله على جيب تايوتاء اخر مديل شاص

لا الماعز افضل ولا النعيمي افضل الي يحدد الافضليه المنطقه الي انت فيها ورغبة الناس هل هي في ماعز او نعيمي لان في منطقه مرغوب وفي منطقه مو مرغوب وفي منطقه الاثنين مو مرغوبين وفي منطقه الاثنين مرغوبين

يعني اعرف منطقتك وش تبي واختر الافضل والي يمشكي بكثره واسعاره افضل ومكاسبه افضل

لان ما ابي انصحك بشي ماشي في ديرتي ويمكن في ديرتك ما له سوق

خذلك فره على اقرب مجلبه واستشر افضل من استشارتي في النوع وإذا عندك مكان بدون اجار ولا تحتاج راعي فلا تهتم بالمصاريف حتى لو ما تبدى الا براس لانه راح يكون دافع لك انك تزيد مع الوقت بدل ما تحلم في مجلبه ابد على قدر الي معاك وخذ لك صغار او اناثي ولدت مره بمولودها وابعد عن الكبار لان راح تحتاجها تولد لسنوات وابعد عن المصابه بامراض او انتقال العدوى لها وابعد عن النقل من منطقه حاره لبارده او العكس ولا تشتري من المنتقله الا بشرط تكون مولوده وتعودت على الجو عشان ما تكون عرضه للمرض