|
حاسه أني راح أنفجــر ,,
حاسه أني راح انفجر من القهر
ضغط وقرف ورواتب متاخره و ناقصه ودوام إجباري في الإجازات الرسميه ( الأعياد واليوم الوطني ) دوام 8 ساعات في اليوم ولمده اسبوع ولنا يوم واحد فقط إجازه احياناً ما نأخذ هذا اليوم إلا بعد دوام 10 او 11 يوم يعني مثلاً أخذت يوم الأوف يوم الأحد من اول اسبوع .. يعطوني يوم الاوف في الاسبوع الثاني يوم الاربعاء أو الخميس يعني 10 أيام دوام والمشكله أنه هالكلام ما يعمم على الجميع يعني على ناس وناس .. ومنزلين قرار أنه أي وحده تغيب في أيام العيد راح يكون هناك عقاب صارم ( ما حددو وش راح يعملون بالضبط بس يمكن يوصل للفصل ) :( واللي تداوم يحسبون لها اليوم بيوم ونص طيب واللي عندها ظروف وأهلها بيسافرون وما عندها أحد تقعد عنده وش تسوي ... ؟؟ !! والله العظيم احس أني مو عايشه مع العالم من توظفت وأنا في عالم ثاني بس من العمل للنوم ومن النوم للعمل عمل متواصل حتى اوقات الراحه نحاسب عليها وياويلنا لو حطينا روسنا على الطاوله وأخذنا لنا غفوه وارتحنا ... حتى لو كان وقت البريك .. !! والإنذرات جاهزه .. بمجرد ما يشوفون وحده حاطه راسها على الطاوله يفاجأونها بالورقه فوق راسها ويطلبون منها التوقيع على الانذار يا ويلك لو حطيتي مرايه على مكتبك .. !! :eek: بالله عليكم وش رأيكم .. ؟؟ وكأننا والله في مدرسه والله العظيم أنه أسلوبهم أسلوب تطفيش وما أعرف ليه مع أننا والله قايمين بعملنا بأكمل وجه ودائما توصلنا إيميلات شكر من الإداره والمسئولين في القسم الرجالي والله العظيم مو عارفه وش اسوي نفسي اتركهم واشتري راحتي واخاف اني ما ألاقي وظيفه ثانيه بعدين وأندم واخاف أني ابقى اكثر معهم وانهبل لإني ما عاد اتحمل انا تقريباً الآن انهيت فتره التدريب وما معي أي شي يثبت أني موظفه عندهم يعني ممكن يشوتوني في أي لحظه ويقولون مالك عندنا شي طلبنا نسخه من عقد العمل ولكن للإسف ما عطونا ودائما يصرفون لدرجه انه فيه بنات موظفات قبلنا بشهور ما عطوهم نسخه من العقود حتى التأمين الطبي ما فيه المشكله هذي مو انا لوحدي أشتكي منها كل زميلاتي تعقدو وكرهو أنفسهم من هالاسلوب وهالتعامل وهالقرارات وش نسوي بالله عليكم :( قسم بالله بموت من القهر والطفش والقرررررررررررف حتى العيد والله العالم يتحمسون حولي ويتقضون له وأنا مالي خلق لإني بعيّد في العمل :( واصلأً وين الوقت اللي بلاقيه علشان اروح للسوق واتقضى وأضبط نفسي مثل العالم .. ؟؟ !! أبغى رأي شخص فاهم يقول لنا وش نسوي في هالحاله .. ؟؟ !! وهل يحق لهم يجبرونا أنه نعمل في العيد ..؟؟ !! وعيدكم مبارك وكل عام وانتم بخير قبل الزحمه والدوام :( |
الله يكون في عونك
|
آه ياقهر.. نصيحه لوجه الله استخير الله مره واثنين وثلاث انك تتركين الوظيفة..
انا ما ابي اخوفك بس والله اعرف وحده جاها الضغط من وره الوظيفة.. واعرف وحده ضغط العمل والبيت سبب لها كهرباء زايد بجسمها وهذا خطر جدا ما تقدر تمشى الا على كرسي متحرك وهي بعدها بنت مامتزوجه .. حزنتني وهو تقولي انا فقدت صحتي.. وفعلا فقدت صحتها... والله يشافيهم.. |
لاتتركينها نصيحه تبين كل تعبك يروح ماعليك ياحبيبتي انشبي لهم كل يوم اسألي عن العقد دامك متاكده ان شغلك تمام ومانتي مقصره واعذريني لو قلت لك خليك قشرا شوي معهم وصيري علله ابلشيهم الين يجيبون عقدك انتي على الاقل,هذا تعب مو خرابيط شوفي مسألة انهم يخلونكمم تدامون بالعيد معليش لكن تطلّعين الدوام هذا من عيونهم يعني يسلمونكم رواتبكم على داير مليم ,,,ياربي مادري شلون قبلتوا بشغله زي كذا انا صراحه استغربت من وصفك بالله انتي وين تشتغلين؟؟ الله يسخرلك من عنده وتفرج عنك وتتوفقين فيها والا باللي احسن منها:rolleyes: |
اقتباس:
لا انا ماني معاك البنت تقول ماعندها شي يثبت انها اشتغلت عندهم يعني لاصارت قشرا معهم بيقضبونها الباب ومرح يعطونها شي لانه مافي شي يثبت وبدال البنت عشررررررررررررررررهـ .......... انا اقولك انا كنت اشتغل في شركة خاصه وكان دوامي 9 ساعات في اليوم يعني من 8 الين 5 العصر حتى وقت الغدا مافيه اللهم بس وقت صلاة الظهر تصلي وترجع المكتب وماكنت اعرف الا العمل والنوم يعني ارجع قرب المغرب يالله اكل لقمتين واحط راسي واقوم اليوم الثاني .... استمريت معهم شهر بس وبعد الشهر من كثر الظغط اللي جاني من المصاريه والمدير مسكت المصري <<اللي كان مدير علي وافرشه في المكتب واطلع من الشركة ورجعت بعد كم يوم واخذت راتب الشهر والاسبوعين اللي قضيتها ... وطلعت من الشركة .. انا اقول الشركات الخاصه ملاعين يلعبون على العالم .. وزي ماقالت لك الاخت ام الوظائف استخيري انك تتركين العمل واشتري راحتك .. ولاتيئسين واصبري ان الله مع الصابرين .. وادعي لربك اللي ماتنام عينه انه يستجيب دعوتك وينصرك على من ظلمك ... والله ييسر امورك اخيرا اسال الله لي ولكم التوفيق وكل عام وانتم بالف خير وتقبل الله منا ومنكم صالح الاعمال اخوكم/ناصرالزهراني |
8 8 8 8 أنا اقصد بقولة قشرا انها يعني ماتصير حليله ينلعب عليها وتسكت إنما تسألهم عن العقد باليوم مرتين او ثلاثه:d لأني انا بعد اشتغلت قطاع خاص وكنا 2نفر انا وصديقتي انا وقعوا معي عقد ولكن صديقتي لأ لانها ماجازت لهم لكن كان عندهم نقص ومضطرين فصارت كل ما تسألهم عن العقد صرفوها جلست اسبوع وتركت وهي لها حقوق مادية للأسبوع اللي اشتغلته لكن بكل بساطه زلبوها والبنت "حليلة" ماتدري ان لها حقوق ولما بلغتها ماهتمت :eek: لكن فعلاً إذا كان فيه فرص ثانيه استخيري وشوفي وش الله يوفقك فيه :rolleyes: |
الله يكون في عونك |
... فكرة جلوسك أو تركك للعمل هذا أمر عائد لك أختي ... ... لكن لا يوجد أي عمل :: سواء قطاع حكومي أو خاص:: مافيه مشاكل ... ... وصدقيني حلاوة العمل بمشاكله ... :d ... والأحلى حلك لمشاكلك بنفسك ... <<< وليس الهرب منها ;) ... وحكاية الإجازة والدوم الطويل ... شي عادي :eek: ... دوامك لم يتجاوز الـ 8 ساعات <<< على حسب نظام العمل ;) ... ودوام العيد <<< كثير يداومون في العيد ... ... مو انتي الوحيدة اللي دوامك كذا ...:Looking: ... فقط هدئ أعصابك ... ... وتعوذي من ابليس ... ... وامسكي قردك لا يجيك اللي أقرد منه ... <<< ودوري على عمل أفضل من عملك الحالي ... في حال وجدتي الفرصه ... ... أتركيهم غير مأسوف عليهم ... :d ... والقرار الأول والأخير لك يا قمر ... ... وكل سنة وانتِ بخير وصحة وسلامة ... :) |
مرحبا آه يالقهر .. وكل عام وأنتِ بخير .. أنا مع الغاليه تام في رأيها .. صدقيني .. حتى لو ما أعطوك حقوقك الماديه .. على الأقل الخبره .. اصبري إلى أن تجدي الأفضل .. بقولك نصيحة حلوووووووووووه .. بدل ما تكوني أنتِ والبنات متضايقات .. أقلبوها لصالحكم .. بمعنى .. لا تضغطوا أنفسكم وكل ما صار شي تكهربتوا وتضايقتوا !! خلوا وقت تطفيشهم لكم هو وقت وناستكم .. لما تشوفوهم كذا .. اضحكوا علقوا .. انبسطوا .. وبنفس الوقت العمل لازم يكون على أكمل وجه .. وبدل ما يطفشوكم طفشوهم أنتوا .. وكل هذا .. بإبتسامه جميله ترتسم على محياكم <<< متعوب عليها هالجمله .. من تجربه .. اشتغلت فترة 3 أسابيع في عمل نفس أسلوبهم ولظرف أسري طارئ تركتهم .. بس والله مهما كان يجيني منهم .. كنت أبتسم .. أنا واللي معاي .. وكنا مرتاحين .. بعد ما أتبعنا الأسلوب هذا .. لأننا كنا نضغط أنفسنا .. وننقهر .. ونتعب وتتعب نفسياتنا .. وهم مرتاحين .. قلبناها عليهم .. وعشنا حياتنا .. وصُرفت الرواتب .. وأخذنا الخبره .. وبعدين .. إذا على العيد خلاص .. ما صار فيه عيد مثل زمـــــــــان .. عشان الواحد ينقهر ولا يحس أنه أنحرم .. أخيرا .. الله يعوض عليك بأفضل منها .. عاجلا غير آجل .. اللهم آمـــــــــــين .. |
ياعمري لا تنفجري ولا حاجة
دوري غيرهم وإذا لقيتي روحي واتركيهم واستخيري قبل كل شيء والله يوفقك |
| الساعة الآن 01:47 PM |
Powered by vBulletin Version 3.8.9
Copyright ©2000 - 2026, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين