السلام عليكم ،
كيف الحال جميعاً ، ؟
أشكر كل من كان له دور في اتاحة الفرصة للـ "فضفضة" في هذه المساحة
من المنتدى الذي كان له الأثر من بعد الله أن أكون "موظفة" والحمدلله على كل حال،
قصتي بدأت منذ شهرين تقريباً ، توظفت في قطاع خاص وفي منشأة غير معروفة
جيداً يعني أشبه بالجديدة التي لم يوفق صاحبها بالتسويق عنها جيداً ، وهذه أولى
سلبياتها التي تدفعني لتقديم استقالتي ، ويعقبها الكثير !!!
لم أشعر بالسعادة ولا بالإطمئنان منذ اليوم الذي وقعت فيه عرض العمل الذي كان
يتضمن بنوداً مبهمة تسلب حق الموظف قبل أن يدرك ذلك ومن ضمنها مسمى الوظيفة ألا وهو :
" موظفة إدارية " ، والذي قد يبدو لأول وهلة " انه كشخة وحركتات " ولكن الصدمة
بعد اكتشافي لما يحمله هذا المسمى من معنى "للكرف على أصوله و اشتغل شغلي وشغل غيري من (مديرة) لـ (مستخدمة) " !!!
وقعت على عرض العمل فقط لأثبت نفسي ، ولأنمي قدراتي وأكون عضوة فعالة في المجتمع
ولكي لا أعلق شهادتي الجامعية في" مطبخ بيتنا " !
مضت الأيام وزادت معرفتي الحقيقية لطبيعة عملي التي هي بعيدة أشد البعد لما أطمح إليه
أقنعت نفسي أنها البداية فقط ، ولابد من الصبر " فما انقادت الآمال إلى لصابر " ،
صبرت على عملي "وبلعته" بس الداهية "المديرة" ذات الخبث والنفس الكريهة ( اللهم لاشماتة ) !!
" شفتوا كيف الأجانب لاخذوا مناصب ينفخون ريشهم ويرفعون خشومهم وأنو مامثلي أحد على وجه الكرة الأرضية ، وكل اللي اقوله صح وانتوا الغلط " !!!
ماعمرها ابتسمت ، "اوكيه مومشكلة لاتبتسمين بس " لاتكشرين " ، !! لأن كشرتها هذي
تأثر على الكل وربي !! يعني الانسان إذا صار كئيب ، اللي حوله يتأثرون سلباً وهذا شيء واقعي لايحتمل أدنى شك !!!
المختصر المفيد من موضوعي ،
لا أشعر براحة نفسية لامن حيث طبيعة العمل ولا بيئة العمل !!
" يعني ماقد داومت وأنا متحمسة لشغلي ومبسوطة فيه "
هل أستمر بعملي هذه إلى أن تأتيني أقرب فرصة عمل آخر * على حساب راحتي النفسية " و أن لا أكون بمسمى "عاطلة" ؟
أم ، أقدم استقالتي واكشت في بيتي إلى مايفرجها ربي ويرزقني بوظيفة أفضل في مكان أفضل ؟
آرائكم تهمني ، شاكرة ومقدرة للجميع (:

يا قلبي انتي استخيري اول وشوفي وش يصير عليك .... وما دام مديرتك اجنبيه الله يكون بالعون

اممممممممممممممم

والله اصبري كم اسبوع
وشوفي اذا استمر الوضع او لأ

طيب انتي حاولي تبنين للممستقبل

لأن الاغلبيه بيقولون لك نبي خبره؟؟عاد من وين بتجيبين لهم؟؟؟؟؟؟؟؟؟؟


انتي حاولي تتحملين عشان الخبره وبس
؟؟؟
فاهمه زين؟

طيب حاولي تتحملين شوي

اذا ماقدرتي خلاص استقيلي

والله حاسه فيك كثير

حياك الله اختي


بقولك شي وحطيه بعين الاعتبار قدامك


والله اللي تواجهينه بكل مكان يواجهونه الشباب ترا يكون بعلمك

مثلا الطالب الجامعي مقهور من تعامل وترفع الدكتور عليه وخفس بالدرجات وكذا < هل يفصل من الجامعه عشانه ؟

الموظف يعاني من تعامل مديره ولايرتاح للدوام ولا شي وكذا < هل يفصل ويصير عاطل ؟

اللاعب كوره يعاني من ضغط الجماهير والاداره ضده < هل يترك الكوره ؟

يعني قصدي أنه بكل المجالات بالحياه نواجهه هالضغوطات صدقيني < مو كلام مثالي هذا ولا شي لا والله انه واقع

يعني لو جلستي عاطله من الفراغ راح تجيك تفكيرات لاسمح الله بالانتحار ولا أمور سيئه للغايه

لكن بالعمل والصبر ع وظيفتك واحتسبي الاجر ويفرجها عليك ربي


أتذكر مقوله حلوه : السعاده هي ان تحب ماتعمل ليس ان تعمل ماتحب


بالتوفيق للجميع يارب

ضوىالكون :
ماخاب من استشار ولاندم من استخار ، بستخير وبستشير وربي يكتب اللي فيه الخير ، شكراً ضوى على
مرورك وردك ،
بنان لأموره :
والله صبرت ودايم اسأل نفسي الى متى بصبر ؟ الين مايمل الصبر من صبري :"(
والخبرة اللي دايم يطلبونها مو أقل من سنة ، =|
الله يكون بعون الجميع ، مرآ شكراً على ردك وتفاعلك ،
بوبدر الحميد :
كلامك سليم ، بس بنفس الوقت ليش الانسان يجبر نفسه على شي متضايق منه !
يعني وربي ماراح يكون حتى اخلاص في العمل اذا كان عملك صعب تلقى فيه ايجابية وحدة!!!
بجلس مع نفسي أكثر وأفكر زين قبل ما تخذ قرار الاستقالة وعسى ربي يكتب اللي في الخير
"اللهم ارني الحق حقا وارزقني اتباعه ، وارني الباطل باطلا وارزقني اجتنابه "
شاكرة لك أخي الكريم ردك الثري ،
تباشيرالصباح :
شاكرة مرورك (:

أهلاً ..
انا مارحت عنك بعيد او قصتي مشابهه لقصتك باختلاف ان مديرتي "سعوديه" للاسف !!!
وللاسف ان مسمى وظيفتي " سكرتيرة " والله وكيلك لو تشوفين الشغل اللي اسويه !
والله ما ابالغ اذا قلت كل شيء لدرجة اني ايام كثيره مسحت مكتبي بنفسي ! ورتبت و شلت و حطيت
لأني ببساطه ماتعودت اني اعيش في بيئه سيئه و غير مرتبه
المهم يا عزيزتي ..
ان لي الآن 3 سنوات بالمكان هذا ! و لا اخفيك سر ان كل يوم اسحب رجولي تسحب للدوام مالي خلق ابداً
ومو قادره اعطي زياده بهالمكان اللي بدايتي و انا اعطي و اعطي و اعطي
انواع الاستغلال الله وكيلك !!
انواع الناس اللي ماتقدر
حتى زياده مافيه
ولا بدل مواصلات
والله اني ما اغيب الا في الشديد القوي و اشتغل بذمه و ضمير كأن المكان هذا مكاني
ومن اقل شيء يتم التشكيك فيني
و مافيه مهام و استقلاليه لا انتي المفروض كل شيء تسوينه
لدرجة ان اذا جيت اتناقش ان هالشيء مو منطقي ابداً تقول ليش خايفه يرفعون عليك عصا!
متخيله الاسلوب انتي بالحديث !!

رغم ذلك قعدت مو عشان شيء
عشان بالاخير انا باخذ شهادة خبره بتفيدني بالمستقبل اكيد
و الصبر مفتاح الفرج
ومتأكده و واثقه بالله سبحانه وتعالى راح يعوضني بكرا بالشيء الافضل ..

الصبر .. الصبر ,, انتي انظري لبعدين وش راح تحصدين اقلها شهادة خبره تفيدك
ما احب شغلي و حاولت كثيررررر اني احبه .. الين جاني تبلد بالاحساس ورغم التبلد مازلت اشتغل بذمه و ضمير و اخاف الله بالناس اللي اشتغل معهم ..
لا امان وظيفي ولا هم يحزنون ولا رواتب فيها بركه ولا شيء .. لكن ان شاء الله بكرا بيكون افضل


مشكلة الاداراة عندنا يستغلون حاجة الوحده لأثبات نفسها و قدراتها ..
ولا يعطونها حقها لا معنوياً و لا مادياً ..
حتى تطووووير مافيه !!
لا يقدمون لك كورسات و لا هم يحزنون لا ادفعي الكورس على حسابك و اذا طلعتي و ماكملتي سنه مابيعطونك الشهاده !!!
حتى سويت كذا اعلان للمنشأة المديرة تقول لا تجيني بعدين تطلبين افاده انك صممتي !! انتي ماسويتي شيء انتي بس ترجمتي افكاري !!!

لكن الله حسيبهم
انا اقول اصبري .. صدقيني هم يبونك تطلعين باسلوب التطفيش هذا عشان يجيبون ربعهم خاصه الادارات الاجنبيه
لكن يبطون


أدري طولتها والله ..
بس الله يوفقنا وايااااك يارب و المسلمين اجمع
اكثري من الاستغفار

الحال من بعضه اختي
يعلم الله حتى الشباب يقابلون نفس التصرفات و التعامل الخبيث
و كل القصد تريد فرض نفسها و شخصيتها عليكم
حتى اذا ابتسمت بعد التكشيرة يصير فضل منها
او تجلب بني جنسيتها و هي لو جالسة في بلدها ما حصلت فراشة
خلك في حالك و لا تعطيها اهتمام مع انها صعبة دام النفسية غير مرتاحة لو راتبك 10 الاف
لكن هذا هو الوضع لدى الكثير و مثلك بنات اشتكوا من نفس مشكلتك
موظفات و متحملين تدني الراتب و نوعية الوظيفة
و فجأة تأتي أجنبية و تترأسها و هي تنتقل لأقل منها