استيراد السيارات من دبي ؟ او اي دولة ؟
 

مرحبا اخواني الاعزاء
انا معي مبلغ 140 الف ريال له شهرين وغثني بصراحة ودي اشغله .. المهم اليوم قابلت لي شاب حليوه زهراني وكنا نسولف عادي وتكلمنا بالمشاريع وقال التالي //
افضل واضمن مشروع هو استراد السيارات المستعملة من دبي واستراليا وامريكا\
قلت له كيف الطريقة مو مسموح لك غير سيارة كل 6 اشهر وفي السنه سيارتين ؟
المهم رد علي وقال لا تطلع سجل تجاري استيراد وتصدير ما يأخذ له يوم ويطلع .. وتجي اي كمية من السيارات الا تبي اهم شئ مديلها يكون مو اقدم من 5 سنوات ..
سالته من وين لك كل ذي الملعومات ؟ قال لي انه كان شغال بذي الشغلة قبل سنتين المهم طلع منها نصف مليون ريال ودخلها بسوق الاسهم وخسر ... وهالحين بيحاول يرجع من جديد للاستيراد ..
عرضت عليه اني اموله برأس المال وهو يشتري السيارات من دبي ونبيعها في السعودية طبعا كل شئ بإسمي انا السجل التجاري والسيارات وكل شئ هو عليه بس يروح ويشتري السيارات وينهي الاجراءت من خلال خبراته بذا المجال .. طلب مني نسبة 15 % من صافي الربح وكل تكاليف السفر ع حسابي
وقال تكلفت السفر الى دبي مع تذاكر السفر تكلف ما بين 3000 الف ريال الى 4000 ريال لشخص الواحد

مدري وش رائكم بذا المشروع ؟
انا ما اعرف الرجال معرفة شخصية بس الا يطمن ان كل شئ بإسمي وماراح اسلمه اي فلوس ولا شئ ..
هل هذا المشروع في مجازفة ؟ علما بإن اخبرني بإن المكسب المتوقع في كل سيارة يتراوح ما بين 10000 الف ريال الى 20000 الف ريال وانت ورزقك ؟ وش رائكم يا اهله الخبرات
انتظر ردكم ؟
:h

اخوي انا استورد سيارات من امريكا ومن اليابان

بالنسبة لأستراليا درسكون يمين وماتقدر تستورد منها

على العموم انا تركت مجال أستيراد السيارات للقلة الرزق فيها وهذي نصحيتي لك

[QUOTE=أحساس راقي;3906939]اخوي انا استورد سيارات من امريكا ومن اليابان

بالنسبة لأستراليا درسكون يمين وماتقدر تستورد منها

على العموم انا تركت مجال أستيراد السيارات للقلة الرزق فيها وهذي نصحيتي لك[/QUO
شكرا لك اخوي ع التواصل لك رسالة ع الخاص

هلا بك يالغالي

والله خويك هذا ماارتحت لكلامة معك مدري ليش حاس ان فية صرفية شوي

لكن ترى اغلب السيارات اللي تجي من الامارت وامريكا تجيك مصدومة ولا مصدية ولاغرقانة وتلقاه مرقعها الشريطي وراشها وتشوف الشكل مغري وكذلك السعر وتقول اجيبها للسعودية واتكسب من وراها اقل شي 20 الف واخر شي تجيبها تكتشف انها ملعوب فيها وتنشب بحلقك

بعدين خويك يبي يسافر لدبي ويبيك تدفع المصاريف ولا بعد 4000 الاف ! <شكله يبي يفلها :wa

انا رايح لدبي قبل 6شهور بطيران العربية من الدمام للشارقة بــ200 ريال <<ولد فقر:c


الله يوفقك ويرزقك ماقصدي احطمك بس للأسف هذا الواقع وبيني وبينك انا جربت البيع والشراء بالسيارت لكن بالسعودية وخسرت خسارة مايعلم بها الا الله اول مرة شريت شبح ولقيتها مخبطة ونشبت بحلقي والمرة الثانية شريت كامري بسعر مغري شوي لكن اكتشفت انها مرشوشة ومدقدقة لين قالت بس وبعتها بعد بخسارة وتوبت عقبها قلت وجهي مو وجه تجارة

:y:y شكرا ع المداخله مدري رابطها بالخيرة والله يكتب الا فيه الخير

شووف يالغالي اذا اتفقت معه انك ما تعطيه ولا ريال الين ما تبيع السياره وتعرف وش لك ووش عليك هذي فيها كلام ثاني

اما مسآلة انك تصرف عليه في السفر وبعد 15% هذي ما تنبلع

وانا يالغالي سبق وسافرت للشارقه ودبي وقطر كلها علشان هالشغله بس للآسف ما لقيت اللي على بالي وسعرها مناسب خصوصا الامارات السوريين والعراقيين من يوم يعرفون انك سعودي يدبلون عليك السعر من زود الحب خخخخ

على العموم عسى ربي يوفقك

موفق بإذن الله ... لك مني أجمل تحية .

تعرف جاني فكرة مدري فكرة اجيب بسيارات التى لا يوجد عليها اقبال بذي الدول
مثل اليارس من تويوتا وكذلك الترا من هواندايا وبعد فان توزيع البضائع من تويوتا وكذلك الدينات من ايسوزو وكذل دينات من ميستوبيشي ..

نصيحه ابعد عن السيارات وتجارتها إلا .......... أذا كنت ماتخاف الله وتبي تغش المسلمين

ترا اغلب شريطية السيارات ( مايخافون الله والحلف بالله عندهم زي شربة المويه )
هذا غير مشاكل السيارات وخراباتها
الله يرزقك بمشروع افضل من مشروع السيارات

خلك في دبي بس استورد بضاعة وصرفها هنا والارباح دبل وزيادة

السيارات من دبي الربح فيها حسب كلام البعض مايتعدى 5 الاف وممكن اقل غير عن سلامة السيارة

والسجل التجاري ماتقدر عليه ابد له شروط تعجيزية اقصد سجل التجاري حق استيراد سيارات او معرض سيارات

اللهم اكفنا بحلالك عن حرامك واغننا بفضلك عن من سواك ... لو اعرف اني بكسب من تجارة السيارة ملايين وفيها هلله وحدة حرام ما دخلت هذا المجال ..
وش فائدة الانسان بدون دين وخوف من رب العالمين ... تعرف يالغالي برجع افكر بالموضوع مرة اخرى وبستشيري اكثر ..
طبعا انا سمعت كثير عن النصب في السيارات بس النصب فقط بالحراج على المكرفون اما سيارة بداخل المعرض ويحق للزبون التشييك عليها وعرضها ع مهندس وشرائه السيارة على الحالة الا يراها ما اتوقع فيها نصب وانا طبعا بعيد كل البعد ع الحراج اشكرك من كل قلبي يا غالي

الاخ الا يقول السجل التجاري صعب ؟ اقول له

ابشرك فيه واوووو :g

السلام عليكم وحمة الله
اسال الله لك التوفيق والسداد
انا مثلك هاوي الشغلة هذي وسبق ان طرحت موضوع مثل موضوعك بالضبط اللي هو استيراد السيارات
وبيعها بالسعودية وسالت الين دخت سواء اسالة شخصية مباشرة من المعارف او بالمنتديات المعروفة
والحصيلة من المشاورات انها بها نصب واااااااااااااااااجد يعني يبيلها واحد عندة خبرة قوية ومتابعة اسعار السيارات بالخارج وهنا من اهل الثقة ولازم انت تروح بنفسك وتاسس علاقات وتشوف كل شي بعينك
ولاتشري من الاجانب المقيمين بالخليج كالعراقي والسوري وغيرة يعني لو تشري من اهل البلد افضل هذي من بعض النصائح اللتي وجهت لي من بعض الاخوة
وان عندي اكثر من مشروع ومحتار بينهن ومن بينهن استيراد السيارات وماغير ابيت استخارات واشاور بيني وبينك ماعندي خبرة بالسيارات وخايف من النصب

على العموم حبيت ادلي بدلوي واسال الله التوفيق لك مرة اخرى
وشكرا

وانا لسان حالي عاجز عن الشكر ع مرورك وكلماتك
مدري انا لسا في طور الفكرة بعد ما صار شئ حبيت استفسر منكم لانه بصراحة يهمني كثير رأي اخواني بمنتدى البطالة ومن التجارب السابقة لهم ..
مع ايماني الشديد بإن الرزق بيد الله وليس معنى انا فلان شخص لم يوفق بهذا المشروع اني سوف اخسر في هذا المشروع
بصراحة لو اشتغلت بذا المشروع استيراد السيارات بحاول ابعد عن السيارات الا عليها اقبال من الناس مثل الجيوب والفور وكذلك الكامري لانها مطلوبة من الشعب السعودي واكيد سعرها بالامارات بيكون عالي لان الا سمعته ان اغلب الشراطيه والمسيطرون ع المعارض بدبي والامارات بشكل عام هم سعوديين حتى لو حصلت بهذه السيارات فائدة بتكون ولا حقت التعب ويمكن تخسر فيها لا سمح الله
انا فقط لو بدأيت بالمشروع استيراد السيارات بركز ع السيارات الصغيرة اليارس وكرولا وكذلك الترا واكسنت من هوانداي وكذلك سيارات نقل البضائع الفانات من تويوتا وكذلك دينات اليسوزوا والمستوبيشي
والله يكتب الا فيه الخير وانا بعد انتظر اراء اكثر وتجارب اكثر من الاعضاء