معاناتي وتحطيمي مع الموارد البشرية
 

السلام عليكم ورحمة الله وبركاته

شخباركم يا أعزائي العاطلين والعاطلات .

بحكي لكم معاناتي امس واليوم مع الموارد البشــريـة وانتظر ارائكم بالموضوع الشيق الصراحه


وصلتني رساله من صندوق الموارد البشرية ان علي الحضور الساعه 8 الصبح يوم الاثنيـن

وشديت الرحال طبعاً موقعهم في طريق الملك فهد بجنب اسواق التميمي , وانا ساكن في شرق الرياض.

وهاتك مشوار مع صباح الله خيـر الساعه 7 ونص طالع من البيت متوجه لهم وطبعاً الكل عارف

الزحمه والقرف بالرياض بالصبح الشوارع كلها زحمه ونحاول نختصر والحظ مايساعد ،

والله المستعان , ما وصلتهم الا الساعه 9:45 ص < هع <طبعاً بالتأخير اني ماسك الخدمه وكل

اشارة توقفن ما ادل المكان بالضبط بس كلامهم جاني بالمسج بجنب اسواق التميمي وش عرفني

اسواق التميمي ؟ لا احد يقول معروفه انا ماعرفها اول مره اشوفها وانا مب من الرياض المهم

وجيتهم رررركض شماغي ياتطير وتطيح على راسي تعرف طريقها مايحتاج انا قلت وش هالوظائف

الي عندهم اسابق خطواتي < المهم مالكم بالطويله وصلت لهم فووق .

الا السكيورتي قال والله يا أبن الحلال فارق بيتكم الارقام خلصت ياولد عدل بدل قال تجي بكرهـ

واخذ ملفي وعلى البيت مع هالزحمه والقرف والسيارة متسلفه والحاله صعبه

والساعه 6:50 دقيقه وانا طالع من البيت

واطيح بهالزحمه لاعادت من زحمه مرره ثانيه ... ويالله اتخارج واخترع طريق والحظ ردي

ماوصلتهم الا الساعه 9 :(

وابشركم لقيت ررقم .. 47 ومحد استقبلوه للحين يعني للحين صفررر الارقام بالشاشة

ويزرعووني بالاستراااااااااحه ما نادوني الا الساعه 11

واخيراً ادخل ويسألني عن شهاداتي ومواهلاتي واعطيه الشهادات وكلش ويجلس يدور لي وظائف

خلونا بالوظائف

اول وظيفه كاشير في بنده الراتب 3000 وقبله تدريب 3 شهور

الثانيه كاشير في اسواق الجزيرة مدري وين مكانها 3000 ريال

الثالثه سواق في الفحص الدوري

الرابعه الي طلعها لي كاشير في ساكوو

والخامسه مشرف صاله في شركة ساكو وطبعاً كلها الرواتب 3000

وكلها طلباتهم ثانوي والباقي مايناظرون فيه

وفاجئني بسؤال . الشهادة المتوسطه معك ؟ :y

قلت لا :z

مب معي قال تقدر تجيبها ؟ :y << الرجال مصررر

قلت خير ليش وش الفائده منها ؟

قال الفائده فيه وظيفه في باسكن روبنز :r

والراتب 3500 ريال هع < كشخه بالمتوسط

واخيراً اختررت مشرف صاله في ساكو والدوام جزئين

بس اني ماراح اخذها وما ابيها ولا تناسبني

اتعب بشهاداتي واخر شي وظيفه ب3000 لا احد يقول اخذها لين يجيك غيرها

ياخي فيه تدرريب 3 شهور ب2000 ريال وبعدين تتوظف ياخي ماراح اتوظف فيها والرزق على الله

السالفه مب على اني اقبل ولا ماقبل هذا شي راجع لي اتدلع والراتب بيجي وبنفلها :k

السالفه ان الموارد البشريه ماتشوف مواهلاتك ولا تدور لك وظيفه تناسب مؤاهلاتك تبي توظفك اي وظيفه والسلام اهم شي تنقلع وتشتغل اي شغله مع العلم ان الوظائف بعيد عن الموارد البشريه احسن مليووووون مرره من هالوظائف الي يعرضونها علينا اجل اضحي بالدبلوم الي تغربلت عشانه واضحي بالثانويه عشان باسكن روبنز ياارب تغنينا من فضلك

وهاذي معاناتي .. مربط الفرس جبته لكم ..

وارائكم هذا مانطمح له ندرس ونتعب ؟ واخر شي يوظفونا وظيفه ماتناسبنا ولا تناسب مؤاهلاتنا ؟

يعني وظيفه والسلام وظيفه والسلام نحصلها بكل مكان

وآآسف على الاطاله بس اشفي غليلي عندكم

سلطان العتيبي

!!

يا ابن الحلال اساسا اول ما تبدأ الاعانة راح يرمون الشباب على وظايف عامل وغيره
تردها فصلو عنك الاعانة

هذا توقعاتي

موارد البشرية ترميك على اي وظيفه لكن شوف اي وحده منهم تناسبك وقريبه للسكن وتوكل على الله

[align=center]

الله يعينك ويعوضك بأفضل منها ...

ويرزقنا واياك بالرزق الحلال ومن حيث لا نحتسب ...
[/align]