السلام عليكم ورحمة الله وبركاته
كيف حااالكم طيبووون
مادري موضوعي في المكان الصحيح اعذروني ماعرفت وين انزله لكن وضعي محيرني واكرر اسفي لكم

اللي حصل باختصار قبل امس سويت مقابلة شخصية في شركة كول سنتر ووقفت عند الانجليزي ولكن الموظف عداه لي ووقعت العقد بنفس اليوم ولكن قالي مارح نخليك تستقبل الا مكالمات بالعربي وامس كان تدريب والمدرب نص شرحه انجليزي يعني فاهم جزء من الكلام لكن بعض المصطلحات ماعرفتها ومو حلوه كل شويه اسال ايش معنى كذا وكذا ماهي حصة انجليزي المهم ياشباب اليوم نزلت العمل وانصدمت في الجهاز كله انجليزي وفوق هذا خلوني استقبل اتصالات العملاء وانا باقي مافهمت الجهاز عشان اخدمهم وفعلا ماقدرت اخدم احد لاني ماني عارف الشي اللي قدامي واستحيت كل دقيقه اسال المدرب محد يسال غيري خفت ينفذ صبره ويقولي ايش جايبك هنا وفعلا طفشت العملاء بعضهم طفش من الانتظار وقفل الخط وبعضهم حسيت انه ماسك نفسه ووبعضهم اعطيه معلومات خطا واكتبها خطا لين نفذ صبري ورحت للموظف قلت يا ابن الحلال انا مستحيل اتعلم قالي حاول وخذ الموضوع بسلاسه بس ياشباب اللي قاهرني اني الوحيد اللي اسال لو لقيت احد غشيم زيي كان كملت بس وحدي صعبه وهذا اللي خلاني اسحب نفسي و اخذ اغراضي وارجع البيت وفيني شي يقول احسن شي انك طلعت من غير ما تخبصها اكثر على الاقل طلعت بإحترامي وشي يقول لو انك صبرت يمكن كان مشيت الامور وماني عارف سحبتي صح ولا خطا؟؟
يا شباب هل ردت فعلي استعجال ولا ماعندي ثقة بنفسي؟؟ وايش الحل حاسس اني مارح اتقن شي في حياتي وهذا شي محبط جداا ياليت ياشباب تساعدوني وتعطوني حل لو تكرمتوووا واسف على الاطاله
عفوا عندي اضافة حتى الوالد عنده تاكسي قالي اشتغل عليه ومره اشتغلت عليه ووصلت واحد وكل شويه اساله من وين اروح لين طفش ورصني بكم كلمه لين وصلته مشواره والفلوس اللي عطاني من القهر رميتها من الشباك ومن بعدها حررمت اشتغل عليه يااهووو والله طفشت وغيرها من الوظائف ماقدرت اكمل فيها ووخلاااص نفسي القالي حل للشي هذااااااا
بنتظاركم

الله يكون في العون
بس الحياة يبيلها صبر ومعاناه
ولقد خلقنا الانسان في كبد يعني محد مرتاح
وبكذا وجعلنا لكم الارض ذلولا
من وجهة نظري....
مادري انا عن نفسي يمكن تجي منك تشوف وضعك مناسب مو مناسب وانت تحدد
لابد تشوف وين مكانك انت بالضبط وانت تحدد وهاشي مايجي الا بتجارب كثيره بالحياة

لاحظت انك ع طول تستعجل في الامور في الوظفتين يعني لازم تحط بالك هاشي لازم تأني فكر حاول مو ع طول تستسلم
ترى الواحد اذا صار الي حوله لغة ثانيه يحاول يتأقلم معهم
وبما انك عرفت نفسك مو كل كذا بالانجليزي حاول طور نفسك افضل
اسئل الله ان يسخر لنا وظايف من حيث لانعلم
اسفة اني طولت بالرد

انت سحبت بس مو حل انك سحبت

طيب يمكن اذا مالقيت حل بامكانك تخاطب مسؤولك ويحطك مكان غير

ما كان لازم إنكـ تسئل المدرب كل شوي ....كان تعرفت ع واحد ابن حلال من اللي توظفوا معاك وتساعدت إنت وياه......................وأي شغل مهما كان سهل بيكون في البدايه صعب,,,,المفروض إنكـ صبرت وشوي شوي مع الممارسه بيعجبك وبتمشي فيه
بس خل ثقتك بالله وربي يوفقكـ

اخوي ليه هذي الانهزاميه ؟

طيب انا اسئلك الهنود والبنقال الي يجون عندنا اول مايجون يعرفون يتكلمون عربي ؟؟؟؟؟؟؟

وشوف في النهار بشركاتهم واليل غسالين سيارات .. ماقال احد يهزئني ولا قال الي انت قلته الان ..
اخوي ان استمريت كذا ماراح تقدر تعيش ولا تستمر باي وظيفه ...

لازم يكون عندك ثقه بنفسك والي ماتعرفه اسئل عنه ماهي عيب واتمنى انك تراجع نفسك كثير ..ماراح تحصل شغله سهله كل الاعمال تكون صعبه في البدايه ومع الوقت تتقنها وترتاح فيها ..

والله يوفقك ويسهل امورك اخي الكريم ..

سحبتك غلط ولا تهرب من كل مشكلة تواجهك !!
أي وظيفة بالبداية راح تكون صعبة و يبيلها صبر وجهد كبير منك ولازم تتعب ،
وبالنسبة للشغل أسال المدرب ( هذي شغلته ) ولا تستحي منه لان واضح انك حساااااس زيادة عن اللزوم
وشغلة الجهاز انه كله بالانجليزي صدقني راح تتعود عليه وتحفظه مثل اسمك مع الوقت وعندي لك اقتراح اذا ماتبي تسأل احد عن معاني الكلمات سجل كل الكلمات الي ماتعرف معناها بورقه واذا جيت لـ بيتكم ترجمهم و احفظهم .
ترى كل الناس زيك بالبداية محد انولد يعرف كل شي .
بس اصبر انت وخل عندك ثقة بنفسك والله يوفقك ،،

السلام عليكم و رحمة الله وبركاته

الاخ الكريم اسمح لي انت غلطان

ليس من العيب انك تسأل وليس من العيب ان تقول لا اعلم
ولكن العيب ان تكون انهزامي ولا تبذل جهداً وتحاول تحدي نفسك لتخرج طاقاتك و قدراتك الداخلية

اللغة الانجليزية من دون ممارسة تفقد مع الوقت ولكن انت في مجال تختلط مع مجتمع مختلف ستتعلم منهم مع الوقت .
كون صداقات وتعلم منهم ولاحظ يالغالي ان الانسان لم يولد عالم ولم يولد رجلاً او امرأه

طفل رضيع ====> طفل يحبو =====> طفل يمشي ====> طفل يتعلم ليصنع نفسه ====> رجل او امرأه

يجب ان تتدرج في علمك وتصبر وتكافح لتصل الى اهدافك ولا تكن انهزامي فمن جد وجد ومن زرع حصد .


اتمنى ان يوفقك الله في طريق السداد و يرزقك بالرزقة الصالحة

اخوك عماد الدوسري

لن أكر من سبقني
اذا فيه مجال ترجع أرجع
و أستمر كم يوم و وضح للمدير
انك مستجد و لا تستوعب العمل صح
حتى لو يجلس معك أخر او تكون في وظيفة غير الاستقبال
و ليس ضروري انجليزي كل واحد
على فكرة كول سنتر اللى في الخبر بين الظهران و الخبر
مقابل بتروليوم صح
طول بالك و هدئ كل شئ يحتاج تتعلم و خير ما عرفت انجلش انطبقت الدنيا
درسنا و تخرجنا من جنبها و عرفنا انجلش من الفراغ و العبث و الكلام مع هذا و ذاك
و لا نزال في البداية