اول وظيفه في حياتي
 

السلام عليكم

صبحكم الله بالخير يالربع

الحمد لله اول شي على النعمه وعلى العقل وعلى لقمة العيش اللي نسترزقها بالحلال والشكر لله

انا طالب جامعي والحمد لله على كل حال
مكافاة الجامعه الحمد لله ماشيه 990 ريال ! < قاهرتني ال10 ابي اسحب 1000 :Thumbs_down:

تفكيري للمستقبل واختلاطي بالناس بشكل كبير دعاني اني افكر بشغل مسائي حتى اني اقدر ادخر او اصرف على نفسي في الوقت اللي انزنق فيه بدل مدت اليد والسلفيات اللي بيطلع المسيح الدجال وحنا ما سددناها :court:

قدمت على شركه بمدينه قريبه من مدينتا على اساس اني سمعت عنها دوامها بدون ضغط ورواتبها جيده في حدود 1200 تقريبا < الحمد لله 1000 ولا 990 :b

وصاني واحد من الربع اقدم عندهم والله واغسل الموتر والبس واتجهز والملف العلاق الاخضر اللي والله الى يومكم صار أصفر من ضرب الشموس < يفكر يفتح مؤسسة "ملف علاقي" :do5h:

واتوكل على الله قلت ان شاء الله الله يرزقنا .. وبعد طقت المشوار وبعد التعب وبعد ما جلدني ساهر الين قلت "اول راتب لك" :court: وصلت للشركه

ادخل والقى موظف الاستقبال "سعودي" على الابتوب وحاط السماعات طربان في شات ! < امووت في السعوده :i

السلام عليكم >> صامت >> السلام عليكم >> يضحك >> يالطييييييييب "P"P
اخيرا رد لا بارك الله في اللي فتحلك شبكه

وين المدير قال والله مدري رح للمكتب والله وأقفي عرفت انه يقرب للمدير من حركاته > ضامن وظيفته ابن اللذين :g

رحت للمدير وادخل عليه والرجال منسجم مع سوق الاسهم .. السلام عليكم قال عليكم السلام

قلتله طال عمرك انا رجال جاي بقدم على وظيفه ان حصل الشرف اشتغل في شركتكم
رد وبكل عنف > الشركه بنقفلها ماني موظفين :Looking:

ياحبنيلك يال990 خلني اديور والله وارجع للمدينه منقهر على صرفية الروحه والجيه اللي انمسحت بكلمة :Thumbs_down:

والسواة يبو عبّاد ؟! قلت خلني أتمرن اليوم في الملعب بس بلا وظيفه بلا كلام فاضي
طلعت المغرب واسحب من الصراف كالعاده < ضروري قطة الملعب :(

التاريخ توه بداية الشهر > الرصيد 320 ريال :m
يالله خلني افلها اليوم ومن بكره مابصرف زي اول < مواااال يومي

رحت الملعب واقابل ربعنا والتقسيمه ولعب وضحك .. عدة الليله زي كل ليله لكن .......

لكن اليوم في الملعب قابلت شباب اعرفهم معرفة سطيحه واللي خلاني اخش معهم اننا جينا متأخرين ومحوطنا احتياط :mad:

سوالف وضحك واسال عن وضعهم دراستهم و..و.. الين واحد منهم قال والله جلسه معك تنشرى ونستنا وش عندك انت من بعد العصر ؟! < لا والله اللي بيقولون تعال فريقنا خخخخ

قلت ابد ماعندي غير سلامتك صياعه كوره وصرفيات استراحه وانت سيد العارفين !!!
قال طيب انا وخويي مقدمين على مطعم يطلبون سعوديين وشرايك تجي معنا

قلت والله قدااااااام < ماصدق خبر :wa

ومن ثاني يوم والله اشتري ملف علاق جديد < كره اللي امس
وارتب اوراقي واصور البطاقه والشهاده على اساس اني ابي اقدم كاشير

واروح للمطعم لحالي اليوم الثاني < امااا سحب على اخويااااااه :y

لا والله اخوياي مقدمين وخالصين بس اعطوني الشور وقالوا جرب حظك المدير حبيب ومن ذا العلم
مالكم بالطويله قدمت ولله الحمد قبلوني مبدئي وقالوا الاسبوع الجاي بتجي اوراقك من مقر الشركه راجعنا

اسبوع اسبوعين وكيف الحاال من تمرين في تمرين الين جاء يوم مداوم للجامعة الساعه 10 تقريبا ومتردد احضر المحاظره والا اشوفلي شغله الا ابو كشاف يرن "جوالي طبعا" رقم ثابت وغريب !! رديت

السلام عليكم .. عليكم السلام
معك مطعم "..." انت مقدم اوراقك و..و..
ردة فعلي لا شعوريا > ارررررررحبوووو :k
الا المصري يقول بتئول ايه يابني !! ..................................... :do5h:

راحت المكالمه والحمد لله قال راجعنا وفعلا توجهت مباشرة للمطعم ووقعت عالعقد ومن ثاني يوم مداوم ..
8 ساعات مسائي وبراتب 2500 شهريا < ياااارب لك الحمد

بديت معهم اول 10 ايام زي الشغاله في المطبخ والله ياصار حرق دجاج ياصار قلي روس مو تيوس والله قلبت المطبخ عليهم فوق تحت لا طبخ زي الناس ولا اعرف استخدم الادوات علموني العمال لكن سعودي وطب في تقنيه حديثه :q

مدير المطعم بعد مرور اسبوع قال تعال المكتب >>> يالله سترررك قلت اكيد قرار نفي من الوجود
سم ياسعادة الريس !! قال انت ما تنفع داخل المطبخ ابد ولا راح احطك كاشير لانك مطفوق :S
طيب والحل ؟ قال انت بنحطك سواااق < ياااخبر اسود

قلت ابد وين المفتاح وأشرلي عالموتر هالمدينه حافظها شارع شارع بيت بيت زنقه زنقه
قال الحين روح اركب مع السواقين بس واعرف كيف تتعامل مع الزباين لمدة شهر < ياليييييييل يعني مافيه سواقه

والحمد لله بديت اروح معهم وعاد كلهم مصاريه بس حبايب يحبون السواليف ويعطونك من الرخيص :p

بعد مرور شهر سلموني مفتاح سياره وقالوا هذا انت لك شهر مع السواقين تتعلم وبنعتمد عليك في التوصيل ومعرفة البيوت واشياء كثير .. قلت ابد طحتوا في نشمي :Thumbs:

اخذت مفتاح السياره على اساس اني بوصل لوحدي بتعلم وبتعرف على ناس جدد في حياتي الشخصيه يمكن نلقى واسطه تودينا فوق شوي :wa .. بأمر من المدير قال انت ما تروح لوحدك تكون انت و "وائل" مع بعض ..

وائل هذا قصته قصه انسان مطفوق أسلاك مخه شائكه الله يذكره بالخير يحب يضحك ويستانس 24 ساعه .. يعني دقيقه نكد والا ضيق مافيه ومن ثاني يوم زبرق الموتر وجاب كاسيتات طربان الرجال وتوكلنا على الله اول يوم نوصل فيه ..

اول يوم طلعنا نوصل ياطويلين العمر سوينا فيها ابو العبط اننا فاهمين المدينه وحافظينها .. ومن اول طلب جلسنا 3 ساعات على بال ما لقينا البيت .. الطلب برد والمدير ما بقى زر في جواله ما ضغطه انواع الاتصالات انواع الرسايل تمشت فينا شماته ما يعلمها الا الله ..

وعاد الله رزقك بمدير مصري له 16 سنه في السعوديه وفي الشركه هذي بالتحديد يعني بيسوي عليك " عنتر " .. رجعنا المطعم وانواع التهزيئء قلنا يالله خلنا ساكتين على بال ما نقبض اول راتب وعلى هالحال ...

استمريت تقريبا 5 شهور واجهت مشاكل عدة مع المدير .. مع السياره .. مع الزبائن ..........الخ

الحمد لله تعرفت على رجال شرواكم وعرفت انواع ناس واجناس واجهتهم في التوصيل
عرفت ان الابتسامه وحدها تصنع منك انسان محبوب لدرجة بعض الطلبات يدقون علي ما يدقون على المطعم ولو اني اتاخر عليهم في التوصيل ...... الحمد لله على كل حال قدرت في ظرف 5 شهور اشتري سياره واصرف على نفسي وأهلي وتعلمت ان الصبر نعمه من الله سبحانه وتعالى كنت اكد 8 ساعات وشايل هم البيت هم الدراسه هم المستقبل همووووووووم كثير بهذلتني

الين جاء اليوم اللي قررت اني افصل من الشركه لسبب " الدراسه " قصرت فيها بشكل كبير وتأثر جدولي من ناحية النوم ما اقدر انام من التعب والخطوط والمشاكل والتفكير

رجعت لبيتنا مبسوط رميت ملابس الشركه في الدولاب ورقة التسويه معي ما عندي شغل ولا مشغله الحين .. غطيت عدة امور في حياتي عرفت اشياء كثيره من التعامل مع الناس التعامل مع الشركات والحمد لله على كل حال

بعدها تقريبا باسبوعين مليت من الجلسه قدمت على مستوصف خاص والحمد لله قبلوني براتب جيد وبساعات اقل ومكان مناسب ووظيفه مناسبه برضو والحمد لله الآن ممشي اموري مع ادارتي الجديده "سعوديه" ورجالن ما عليهم قصور وافين وانا الحمد لله ركدت وقدرت اني ابدا حياه من جديد ..................

طبعا رواتب المطعم ما بقى منها غير 23 ريال ما قدرت اسحبها وراحت علي فكرة الادخار !!!!!

الان حياه جديده وان شاء الله الله يوفقني لما يحبه ويرضاه واكون شخص جديد في وظفيه جديده واني اكمل دراستي باللي كاتبه ربي

_______

اللي استفدته من اول تجربه :
الصبر والتحمل والعيش مع البيئه حسب ما تتناسب معها بظروفها باللي فيها لازم تجبر نفسك على " التعايش معها "

مشاكل واجهتها :
التعارض مع وقت دراستي وسبب في اهمالي للدراسه في وقت سابق
المشاكل مع الاجانب وخاصه الاخوان العرب لا صاروا في مرتبه اعلى منك !
مشاكل مع الزباين .. يعني من بين 10 زباين تلقى واحد محترم والباقي اللي يجحدك حقك واللي يحب الهواش وتقابل كل من هب ودب في هالدنيا
مشاكل خاصه في تاخري عن البيت وقلة شوفي للاهل ومشاكل النوم وحضوري للجامعه
مشكلة حقوق الناس .. تصير بعض الاحيان لخبطه الحسابات مع الزحمه والهواجيس والتفكير وتروح كلها " خصميات "
اول شهر توظفت فيه من 2500 استلمت 1600 ريال !!
مشكلة السهر وقلة النوم ومشكلة السواقه 8 ساعات صرت اعامل دكاترة العظام اكثر من دكاترة الجامعه



والمعذره عالاطاله .. فمااان الله

ماشاء الله تبارك الله

فعلا واضح عليك صابر ومجتهد

وماقصرت في سرد قصتك باسلوب رووعه

الله يوفقك ويوظفك بس وش تخصصك بالجامعه

ماشاء الله تبارك الله .. الشباب يقدرون يسوون المستحيل وربي الولد اذا صار حق مسؤوليه يعرف يدبر نفسه الله يرزقكم اكثر واكثر

يالله حييهم نورتوا الموضوع

تخصصي " رياضيات " :D

والله انك شنب
ماشاء الله عليك جامعي واشتغلك كاشير
عيل حنا اهل الثانوية مستكبرين ومانتنزال عن الادارية
الله يوفقك في الدارين

حياا الله احساس
والله اكسر خشم اللي يعيب الشغل والعمل باي شكل من اشكاله

واهنيك طالب ثانويه ومهتم في منتديات زي هذي ! الله يوفقك ويكتبلك ولنا اللي فيه الخير

مآششآءالله تبآرك الله . .


قصتك حلوة إصرآرك على آنك تتوظف ويكون لك دخل مع الدراسة

وتكسب خبره قبل تتخرج . . بيسهل عليك تحصل على وظيفة آحلى بعد التخرج آن شآءالله


الله يوفقك ويرزقك كل خير . . .

الله يحييك يا نغم والله يوفق الجميع

موفق بإذن الله ... لك مني أجمل تحية .

الله يوفقك يارب
وصدقني دامك مجتهد كلها كم سنه وبتعيش فوووق السحاب وقداااااااااااااااااااااام كمل دراستك بس
الشغل يروح ويجي والدراسة والشهادة هي الباقية
هههههههههههههههههههههههه عجبني سردك ماشاء الله وكل واحد يخبص باول شغلة ويبدا من تحت الصفر وبعدين يمشي قدااااااااااااااااام