السلام عليكم

فيه وظايف في شركة زين واللي هي حالياً و حسب اللي قاله لي اللي سوا معي المقابله الشخصيه هي بائع اتصالات (شرائح وأجهزه...)

التقديم كان عن طريق برنامج عبداللطيف جميل للتوظيف اللي في السويدي مدري ظهرة البديعه مخرج أتوقع 25! (أتكلم عن الريـاض)
أرقام هواتفهم هي: 2679461 - 2679468
أو لمزيد من المعلومات عن برنامج عبداللطيف جميل على الرابط التالي:
http://www.aljprog.org/ar/contact_us.asp
هم اللي اتصلو علي وعطوني كافة المعلومات والموعد والمكان..

أو ممكن تجرب تطلع للفندق مباشرةً بكره بعد الساعه 12 اذا ما زالو موجودين بدل ما تدقون مشوار لبرنامج عبداللطيف جميل وبدل الانتظار الخ..

برنامج عبداللطيف جميل ما ياخذون رسوم بالمره ولا ياخذون أي شي راتبك.. انت بس روح لهم مع سيرتك الذاتيه.. راح يعطونك أوراق تعبيها.. و راح يتصلون عليك بعد أيام الى اسبوع بالوظايف المتوفره وراح يعطونك معلومات عن الموعد والمكان الخ..
الشهادات المطلوبه من المتوسطه وما فوق.. والوظايف الموجوده حالياً عن طريقهم هي في شركة زين والثانيه رواتبها أقل وفيها كرف أكثر من الاولى!

طبعاً كان فيه موعد أمس(الثلاثاء) للمقابلات الشخصيه اللي هي من الساعه 12 الى 7 المساء في فندق المطلق (السليمانيه - طريق الملك عبدالعزيز) في قاعة المرجان.. واللي يطلع للفندق راح ياخذ معاه:
1- السيره الذاتيه (نصيحه انها تكون بالانقليزي وانا كنت جايب مع الاثنين لكني يوم شفت الوضع سلمت لهم بس اللي بالانقليزي)
2- صور من الشهادات الخ
3- صوره من بطاقة الأحوال أو من الجواز بالنسبه للأجانب (عدد واحد بس) واللي مثلاً بخيل يقدر يستخدم الآله اللي عندهم في القاعه ;)
4- صوره شخصيه (عدد واحد بس)

وراح تعبي ورقه عندهم عن بس:
- رقم بطاقة الهويه الوطنيه (العشر أرقام)
- اسمك الكامل
- الجنسيه
- المؤهل الدراسي (ثانويه والا دبلوم والا ايش؟)
- سنوات الخبره
- رقم موبايلك
- وضعك الحالي (يعني موظف والا ايش؟) اذا موظف اكتب وش هي وظيفتك الحاليه واذا انت عاطل اكتب عاطل

(نصيحه انك تعبيها بالانقليزي أو انك تحضر لها قبل لا تروح هناك في ورقه خارجيه وتنسخها اذا وصلت لهم
لانه الكتابه راح تكون بالانقليزي مافي قدامها خيار عربي الا اذا تبي تعبي معلوماتك بالعربي يمديك لكن راح يضرك في مسألة الأفضليه للمتقدمين)

الورقه الثانيه اللي راح تكون مدبسه بالمعلومات اللي راح تعبيها عندهم راح تكون خاصه باللي راح يسوي معاك المقابله (يعني المظهر, الثقه بالنفس, الخبرات... الخ والموقع اللي يناسبك والملاحظات والراتب الأساسي الخ)

طبعاً الوظايف الموجوده حالياً في شركة زين هي بس البائع! وهم بدأو يستقبلون المتقدمين لهالوظيفه (واللي أعدادهم بالعشرات) على سبيل المثال اليوم استقبلو مو أقل من مية متقدم حسب توقعاتي وأما عدد اللي كانو موجودين يوم وصلت كان 20 - 25 متقدم

ملاحظات:
- راح يكون فيه مقابلتين بس حسب كلام أحد الموظفين اللي في شركة زين.. واحد اللحين والثاني بعد العيد اذا نجحت في هالمقابله الأولى..
- في حال انك نجحت في المقابله الثانيه اللي بعد العيد راح يدخلونك في دورة تدريب ليومين أو ثلاث..
- المقابله راح تكون بالانقليزي..
- وانت راح للفندق أو للمقابله في شركة زين اكشخ + لا تخاف من المقابله ولا تقلق + لا تتكلم ولا تكتب بالعربي يعني استخدم الانقليزي - خليك واثق من نفسك + الابتسامه + اذكر لهم الأشياء الايجابيه اللي تخليك الأنسب لهالوظيفه اللي انت متقدم لها سواء من الصفات الشخصيه والمهارات واللغات اللي تتقنها والخبرات الخ + القدره على الاقناع وعدم التردد أو اظهار انك متردد في قبول الموظيفه.. أما بالنسبه لبرنامج عبداللطيف جميل ما راح يدققون ولا حتى راح يختبرونك في أي شي..
- أحد الموظفين اللي في برنامج عبداللطيف عبدالجميل يقول انه الرواتب المبدئيه راح تكون 3000 و 200 (أو 200 وتفاريق).. لكنها راح تزيد بعد الشهور الأولى بعد ما يشوفون مدى شغلك الخ..
- لا أحد يخاف منالمقابله الشخصيه أو يتوتر أو أي شي لانها راح تكون خفيفه وسهله ان شاء الله..
- راح يمكن تنتظرون لأكثر من ساعه اذا كان فيه متقدمين واجد معاكم..
- ساعات الدوام المتوقعه راح تكون على فترتين في اليوم (في النهار والمساء) ولست أيام في الأسبوع..

الأسئله والحديث المتوقع في المقابله الشخصيه راح يكون:
+ وش هو مستواك في اللغه؟ يعني لغتك الانقليزيه كيف؟
اذا قلت له انه مستواك جيد جداً او زين راح يكمل معاك المقابله بالانقليزي الين الأخير.. الني لما تطلع من القاعه
+ وش وضعك الحالي؟ يعني موظف والا عاطل والا ايش؟
+ وش مؤهلك العلمي؟
+ وين تشوف نفسك في السنوات المقبله؟
+ ايش هو المكان المناسب اللي تشوف نفسك تصلح فيه؟ الوظيفه المناسبه يعني
+ هل انت تقدر تستلم الوظيفه اللي انت متقدم فيها وتنجح فيها أو لا؟
+ وش هو طموحك؟
+ ليش ما كملت دراستك الثانويه (على سبيل المثال) ودورت على وظيفه؟
+ ليش تركت وظيفتك الحاليه أو ليش تبي تتركها؟

الأسئله راح تكون في هذي الدايره ما راح تبعد عنها..

و أي استفسارات ثانيه أنا موجود : )

لمزيد من المعلومات عن شركة زين ادخلو على الرابط التالي:
http://careers.zain.com/careers/zain...spx?PageId=220

مدة المقابله ممكن تكون دقايق وممكن تطول الى ربع ساعه والنص الساعه.. يعني واحد من الأول شافو انه ما عنده سالفه والا مو مرتب والا ما عنده أي اهتمام بالوظيفه والا كانت أجوبته وكلامه مختصر والا صامت راح تنتهي المقابله في خمس الى عشر دقايق.. و واحد داخل جو في المقابله وسواليف مع الرجال راح تطول المقابله لـ 15 الى نص ساعه..

البعض راح يطفش من الانتظار اللي ممكن يطول لأكثر من ساعه على حسب عدد المتقدمين الموجودين والبعض أول ما راح يشوف انه الدعوه فيها انقليزي راح يترك الورقه على الطاوله ويطلع!

و لا تنسوني من صالح دعائكم

و بالتوفيق ان شاء الله

أخوكم تركي

المشاركة الأصلية كتبت بواسطة فضل (المشاركة 369396) ينقل للقسم المخصص شكرا لك