وظايف شاغره في مدينة الملك عبدالعزيز الطبيه للحرس الوطني بالرياض
السلام عليكم
اليوم انا طلعت لمدينة الملك عبدالعزيز الطبيه للحرس الوطني بالرياض للتقديم على وظيفه عندهم... ف طلبو مني: 1- السيره الذاتيه (يشترط انها تكون باللغه الانقليزيه) 2- نسخه من أوراقك يعني من شهاداتك الخ 3- نسخه من بطاقة الأحوال 4- إجادة اللغه الانقليزيه 5- المؤهل المطلوب من الثانويه و ما فوق فسلمت لهم كل الأوراق المطلوبه... موقع التقديم: طبعا في الأول تبون تعرفون موقع ي مدينة الملك عبدالعزيز الطبيه للحرس الوطني بالرياض؟ امسكو طريق خريص الدمام كأنكم طالعين ل إستاد الملك فهد... امسكو خط الين تشوفون مركز ماكس على اليمين... خذو المخرج اللي بعدها مباشرة اللي راح يكون مكتوب عليه استاد الملك فهد بوابه 1 - 6... اذا أخذتو المخرج راح تقابلون اشاره؟ خذو من عندها يمين وتعدو نقطة التفتيش... خلو أول اشاره و مع ثاني اشاره اذا انا مو غلطان سوو U تيرن و بوابه رقم 1 اذا لفيتو من عندها راح تشوفون بالوجه على اليمين اشوي "قسم التوظيف المحلي"... انتم وصلتم بعد ما أنا سلمت لهم الأوراق المطلوبه من السيره الذاتيه الخ سلموني ورقة اختبار عباره عن صفحه وحده و كم سؤال يمكن كانو 10 أسئله... والأسئله كلها عباره عن جمل ناقصه... و الفراغ راح تكمله من الاحتمالات اللي موجوده عندك يعني تحط علامة صح قدام الجواب الصحيح! الأسئله جدا جدا خفيفه و سهله لله الحمد والاختبار راح يكون قدام الموظف ما راح ياخذ غير دقايق ان شاء الله والتصحيح راح يكون مباشر هو اللي راح يصحح لك الورقه! انا الحمد لله نجحت في الاختبار و عطاني موعد ليوم السبت ان شاء الله الساعه 1 الظهر... و كان فيه واحد جنبي يختبر عطاه موعد بعد شهر!!! المهم,,, الاختبار حق يوم السبت راح يكون اختبار تحريري لتحديد المستوى واللي لازم تجيب فيه مو أقل من 25% ! و طبعا كل ما جبت فيه نسبه أكبر كان هذا من صالحك من ناحية المكان اللي راح يحطونك فيه و من ناحية التفضيل بين المتقدمين... الاختبار التحريري راح يكون لمدة ساعه او ساعه و 45 دقيقه نسيت! الاختبار هل راح يكون اختبار toefl يعني امريكي أو اختبار IELTS (يعني بريطاني) مادري! لانه الموظف ما عطاني الجواب الأكيد!! هل راح يكون فيه تعبير أو مجرد خيارات! مادري!! على العموم هذي المعلومات راح أتأكد منها بكره ان شاء الله أو بعد ما أسوي الاختبار التحريري ان شاء الله و لمزيد من المعلومات هذا رقم "مكتب التوظيف المحلي": 012520088 تحويله: 12300 عنوان موقعهم: www.ngha.med.sa طبعا عطونا خريطه للموقع اللي راح نسوي في الاختبار ولازم نجيب معانا بطاقة الأحوال علشان ندخل لقاعة الاختبار دعواتكم لي أخوكم/ تركي |
و بعد النجاح في الاحتبار التحريري ان شاء الله راح يعطونك موعد لعمل كشف شامل لتحديد أهليتك للعمل من عدمه
واجراءات التوظيف بصفه عام من تاريخ انهاء الاختبار التحريري تستغرق 3 أسابيع بالنسبه للي يتوفق معاهم لا يضيع الفرصه لاسباب كثيره من اسم و سمعة المستشفى الى الرواتب والبدلات وميزات العمل والفوايد والمنافع والخدمات الطبيه و غيره... والا وش رايكم؟ |
جزاكم الله خير
|
بالتوفيق أخوي بس بصراحه هالمستشفى موعارف وش يبون انا اختبرت انجليزي عندهم وجبت 62من100وقالولي خلال اسبوعين نتصل عليك عشان المقابله على كلامهم انا نجحت ولي الحين اكثر من شهرين وارسلت واسطه بعد قالو الحين ماعندنا شواغر خله ينتظر يعني ومن الآخر يبون واسطه محترمه وبالتوفيق للجميع انت اعمل الاختبار وانا خوك والله يوفقك
|
اقتباس:
|
انا من اول قدمت عليهم
والتوظيف مفتوح بأي وقت بس اني ما عديت لانه فاجئني بالاختبار على طووول والثانوي لازم شهاده انجليزي 6 شهور وبنسبه لرواتب اذا ما خانتني الذاكره 5500 وعسى ربي يوفقك .., |
اقتباس:
و إيش نوع الاختبار؟ toefl والا IELTS؟ الله يوفقك معاهم ان شاء الله و يمكن هم يبونك في مكان معين لانه الأماكن الشاغره الحاليه ما تناسبك! |
اقتباس:
و بالتوفيق لك ان شاء الله |
الاختبار التحريري كان اليوم الساعه 1 الظهر في مبنى الاداره اللي تقدر تطلع له من ورا مكتب التوظيف المحلي أو من بوابه رقم 1
كانت مدة الاختبار لساعه و 40 دقيقه الاختبار كان على الكمبيوتر و علشان أطمأنكم ترو الاختبار و لله الحمد جداً سهل بعد ما خلصت من الاختبار طلعت مباشرةً لمكتب التوظيف المحلي علشان آخذ نتيجة الاختبار اللي نجحت فيها و لله الحمد ثمن قال لي الموظف انهم راح يتصلون علي تقريباً من اسبوع الى ثلاث! |
لكن كان عندي ملاحظه عليهم:
"ما كان فيه أي رقابه في غرفة الاختبار!!!" أول ما دخلنا غرفة الاختبار و بعد ما شرح لنا طريقة الاختبار صار يطلع بره الغرفه و يرجع كل دقيقتين او دقايق... بعد تقريباً نص ساعه الى ساعه اختفى!!! يعني صار الاختبار ما فيه أي رقابه على اللي جالسين يختبرون اللي كان عددهم ما يقل عن 10 أشخاص!!! يعني كان ممكن الواحد انه يستخدم مثلاً جواله أو يستخدم أي وسيله ثانيه للغش بكل بساطه!!! و هو اللي قال قبل لا نبدأ الاختبار انه ممنوع علينا استخدام الجوال الخ.....!!! و يوم خلصت الاختبار بعد تقريباً ساعه و طلعت ما حصلت أحد بره الغرفه! انتظرت لدقايق الى عشر دقايق بعدها مشيت!!! |
بارك الله فيك اخوي
|
انا اتصلو علي بس الصراحه نسيت وش الي قالي الموظف
المهم قالي عندك اختبار الساعه 8 يوم الاثنين كان اتصل يوم الاحد وانا من الشرقية وصعبة اروح اليوم الثاني المهم قلتله مافي وقت ثاني قالي احنا نعمل الاختبار كل يوم اثنين وانا الصراحه بحثت في المنتدى وكلن يقول الاختبار صعب اتصل علي من هذا الرقم 012520601 سئلة عن الوظيفة المتاحة لي قال مساعد اداري مدري هم نفسهم الي اختبرت انت عندهم ام يختلف ياليت تخبرني |
اقتباس:
|
اقتباس:
و حتى الوظيفه أو الوظايف المتوفره عندهم للآن ما عندي أي خلفيه عنها لانه الموظفين اللي في المكتب ما عطوني الجواب! و المسؤوله عن الامتحانات ما كانت موجوده في مكتبها والا كان طلعت لها واستفسرت منها بخصوص ذا الموضوع أما بالنسبه للاختبار اذا جاك نفس اللي جاني فالاختبار جداً سهل ولا ياخذ وقت منك ان شاء الله! |
لو تقدر تستفسرلي عن هذا الموضوع اكون لك من الشاكرين
اذا كان الاختبار سهل ابروح هذا الاثنين |
ماسمعت احد توظف في الحرس الوطني رغم ان التقديم مفتوح
|
تركي القادم احلى احلى
شوي تعقيد شد حيلك اذا كنت جيد بالنقليزي راح تتجتاز كل الخطوات والمقابلات |
اقتباس:
|
اقتباس:
|
اقتباس:
و من ردك شكلك إما قد قدمت عليهم واجتزت كل الخطوات! أو انك تشتغل هناك؟ |
تركي السلام عليكم
ياريت ترسل لي ايميلك رسالة خاصة لاني ماقدرت ارسل لك ماعندي صلاحية بليز ضروري بكلمك في موضوع وشكرا |
اقتباس:
أرسلت لك ايميلي على الخاص! |
زمن العجايب
اختبارات متنوعة ومقابلات مملة وكانك ما بتتوظف الا باحدى محطات ناسا لعلوم الفضاء !!
وفي الاخير وظيفة في قسم المواعيد (ارعص) زر (اسحب الموعد) عطه للمريض المراجع(على فكرة المراجع يتكلم العربية ) طيب وين الانقليزي اللي عذبونا فيه اختبارات × اختبارات |
اقتباس:
واذا فيه مراجعين يتكلمون عربي فـ في مراجعين ما يتكلمون عربي أو العربيه عندهم ضعيفه! غير انه كل شغلك بغض النظر عن وش هي وظيفتك هناك يفترض انها تكون بالانقليزي... المستشفيات من الأماكن اللي تتطلب الانقليزي... إلا انت كم استغرقت رحلتك معاهم من أول ما قدمت عليهم الين بديت معاهم؟ ايش كانت المحطات اللي مريت عليها معاهم؟ يعني الخطوات |
السلام عليكم
شكرا يا اخوان على المعلومات بس حبيت اعرف انه بعد ما تجتاز الامتحان في مقابلة مبدية اذا عديت منها في مقابلة ثانية هي اهم بكثير من الاولى هل في هذه رسوب فيها او ببمعنى يمكن ما يقبلونك او نجاحك في الامتحان يكيفي؟ |
اقتباس:
حتى وان نجحت في الاختبارات الأولى لكنك ما نجحت في المقابله الشخصيه النهائيه ما راح يتم قبلوك! |
كان عندي مقابله شخصيه في المستشفى أمس الثلاثاء مع الأستاذ ابراهيم في مكتب التوظيف المحلي . . . الرجل كان جنتل و حبيب . . . المقابله كانت مدتها 15 - 20 دقيقه . . . عباره عن دردشه مع بعض الأسئله الروتينيه اللي كان من بينها:
- ايش هو مستواك التعليمي؟ - تكلم عن نفسك بالانقليزي؟ - تكلم عن الجامعه اللي كنت فيها؟ وش هي؟ - هل انت موظف حالياً؟ ايش تشتغل؟ - هل قد سبق واشتغلت سابقاً؟ هل عندك أي خبرات ثانيه؟ - هل انت راضي عن نفسك؟ - وش الانجازات اللي حققتها؟ - هل انت تشوف نفسك متميز عن بقية المتقدمين علشان نوظفك عندنا؟ - كم تتوقع راح يكون الراتب؟ - ايش الوظيفه اللي تبيها؟ و ليش؟ كم راتبك في وظيفتك الحاليه؟ - هل انت حق طلعات بر؟ - هل في مره كنت انت اللي رتبت لـ طلعة بر من كل شي يعني صاحب القرار؟ أو بس تطلع تستانس و تاكل و بس!!! - اذكر لي مثال انت كنت فيه صاحب القرار؟ - كم تعطي رحلة التقديم على المستشفى من البدايه للحين كـ تقييم من 10؟ - كم تعطيني كـ تقييم من 10؟ هذي الأسئله اللي تحضرني الآن! ايه واهتمو في مظهركم من كل النواحي لانه كان فيه سؤال يقول "ليش أظافرك طويله؟" و "شكلك ما بعد تعودت على الثوب والشماغ؟" و كان فيه وظايف شاغره ممكن أباشر العمل فيها مباشرةً بعد ما أخلص الأوراق اللازمه الروتينيه مثل كاتب جناح و من هالوظايف أو اني أختار وظايف معينه أرتاح فيها واذا كان فيه شاغر لواحد منها يرشحوني لها يعني ممكن يطول الانتظار من أسابيع ألى سنوات! لكن العمل في مستشفى الحرس الوطني ما يناسبني بعد ما قال لي انه اللي يبي يشتغل في المستشفى ما راح يقدر مثلاً ياخذ أي فرصه كـ عطله لتكملة دراسته الا في حالات قليله جداً مثل اذا كان التخصص اللي يبي يكمله مطلوب جداً هنا! |
يعطيك العافية اخوي تركي ...
انا الان في اخر خطوة ماقبل التوظيف ... بديت باختبار اللغة الاساسي و جبت درجة 78 من 100 على ماعتقد , بعدها مقابلة مع مسئول في مكتب التوظيف , و المقابلة روتينية لتحديد الوظائف المناسبة لك .. و اعتمادا على درجتك و المقابلة يرشحونك لوظيفة .. رشحوني لوظيفة مساعد وحدة طبية , و سويت مقابلة هي الاهم مع رئيس القسم للوظيفة المرشح لها و كان فية رئيس القسم و موظف من قسم التظيف و شخص ثالث ما اعرفة كانت المقابلة باللغة الانجليزية و اسئلة تتعلق مبدى مناسبتك للوظيفة .. بعدها ردو على بموافقة القسم على , و قالوا الان تتم اجراءت التوظيف برفع اوراقك للادارة و من بعد موافقتها نتصل عليك عشان تسوي الفحص الطبي .. و انا سويت كل شئ و نتيجة الفحص يوم السبت و من بعدها المباشرة ان شاء لله .... بس للحظة هذا ماني عارف راتب كم بالضبط , كل شوي يقول لي شئ .. لكن بعد ما حاولت ان ابحث عن وظيفة اقدر اطور نفسي من خلالها في مجال القطاع الخاص او المستشفيات , حسيت بالياس و مالي الا التعليم , مدرس و نوم و راحة , ابرك من كرف بدون طموح او هدف تسعى له . |
سبحان الله وحدة من صاحباتي قبلوها من دون امتحانات على طول سووا لها المقابلة الشخصية.......... أهم شئ الواسطة.............. والتوفيق بيد الله قبل كل شئ ....... الله يوفقكم جميعا.... إن شاء بخبركم بلي راح يصير معي بعد شهرين إذا خلصت دورة الحاسب واستلمت الوثيقة... دعواتكم
|
اقتباس:
بالنسبه للوظيفه اللي راح يرشحونك لها تعتمد على برضو شهاداتك العلميه و الخبرات . . . انا الوظايف اللي طلبتها كانت غير شاغره ما عدا وظايف ثانيه مثل كاتب جناح و ما شابهها كنت أقدر أباشر العمل فيها بعد ما أخلص من الأوراق اللازمه من دون الحاجه لمقابله شخصيه مدير قسم أو غيره. . . اقتباس:
اقتباس:
اقتباس:
اقتباس:
|
اقتباس:
وبالتوفيق لك في الدوره ان شاء الله |
الساعة الآن 11:15 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين