|
جتني فرصة استيراد من أمريكا على التصريف
السلام عليكم ..
شباب .. أنا موجود بأمريكا .. و قابلت لي واحد من الأمريكان .. عنده معدات صناعية و كذا .. المهم من السوالف قمنا نتكلم عن التجارة .. الرجال قال لي لو بغيت أعمل في السعودية و أصدر لها الموجود عندي و يكون ع التصريف هل ودك تعمل؟ قلت له أكيــد .. المهم قلت له خل بيني و بينك تواصل بعد اسبوعين من الآن لأن اختباراتي بتنتهي إن شـاء الله .. قال لي الرجال أوكي بيننا تواصل .. شباب .. ودي أعرف وش السالفة بالضبط؟ أقصد الرجال قال لي بعطيك السلع و انت اشتغل على التصريف .. المشكلة ما اعرف شي عن الإستيراد و التصدير و غير كذا ما أدري كم التكلفة حقت التصدير و الاستيراد .. فيه نصائح؟ أتمنى الإجابة على هالأسئلة :- 1- هل يجب أن يكون عندي سجل تجاري؟ أي سجل؟ 2- هل لازم يكون لها مقر المؤسسة مثلا؟ أنا ما أدري يا شباب وش السالفة و صرفت الموضوع عشان أجمع معلومات و أبين له تراني معك في الخط و فاهم السالفة ... يا ليت تعطوني نصايح وش مفترض يكون عندي عشان استورد بالله؟ وش تتوقعون يسـألني ؟ يعني أخاف يخمني بسؤال بديهي لشخص يعمل في الاعمال الحرة و الاستيراد و التصدير و يبين ان ما عندي سالفة و يخاف من انه يتعامل معي يا ليت تساعدوني |
الله يوفقك ايه لازم يكون عندك موسسة استيراد وتصدير وخرابيط كثيرة الله يعينك
ويفيدونك الاخواااان |
اخوي اول شي لازم تكون مميز بالحاجات اللي تبي تجبها يعني يا تكون ارخص من الموجود هنا او تكون سلعه غير متوفره بالسوق هالحاجتين هي اللي تنجح مشروعك بعد توفيق الله
بالنسبه للسجل التجاري يفيدونك الاخوان ان شاء الله |
ايش نوعها المعدات الصناعية
|
بارك الله فيكم يا أخوان ..
و الله يا شباب أني ما أدري .. قال بس أنها مواد بناء يعني لمح لي على أفياش كهرب و مواصير بلاستيك و هالأشيـاء .. و قال عندي أشيـاء ثانية أقدر أدعمك فيها على التصريف !! أنا طبعـًا ما بغيت أتكلم واجد قلت له ما فيه مشكلة و خذ البزنس كارد حقي و يكون بيني و بينك تواصل لما أنتي من اختباراتي .. قال لي تمام بالعكس أبي ذنك فاضي عشان نتفاهم على امور .. قلت و لا يهمك .. شباب فرضـًا قال لي مثلا مواصير و هالأشيـاء .. وش المفترض يكون معي من البداية ..؟ يعني سجل تجاري و الا رخصة عمل و هل الشحن انا اتكفل به و الا وش السالفة .. يعني ما ابي اقف عنده و اصير ما عندي سالفة .. يحقرني قلت بشوف وش عنده و لانه قال يمكن اربطك بناس ثانين قلت اوكي .. وش نصيحتكم |
انا عندي صديق عزيز لي شغال بالمقاولات وعنده محل سباكة وادوات بناء ممكن اخليك توواصل معه وهو عنده سجل استيراد وتصدير
اذا لك رغبه ارسلي جوالك على الخاص |
هلا اخوي هذي فرصتك اما تاخذ نسبة عليها او النص بانص لن كل شي بيصير باسمك في السعودية
ترى عندي سجل مؤسسة بيع التجزئة في اجهزة اتكييف والتبريد وقطع غيرها وصيانتها اذا بيفيدك انا جاهز |
اخوي انا عندي سجل تجاري شامل كل شي
|
توجد فتاوى عن البيع بالتصريف أتمنى تطلع عليها
|
وعليكم السلام ورحمة الله وبركاته
أخي الحبيب مقبل على الدنيا , اولا أسأل الله لك التوفيق والنجاح في دراستك وان يردك سالما غانما , وهذا مايجب عليك التركيز عليه قبل كل شيء ولا تدع الافكار التجارية تشغلك عن الهدف الذي تحملت الغربة من أجله , وهذا لايمنع طبعا من البحث عن الفرص وأشجعك على ذلك لكن كهدف ثانوي في الوقت الحاضر. طرحك غير محدد وغير واضح ولايمكن الاجابة عليه بدقة لكن سأجيبك عن الاسئلة المحددة وسأحاول توجيهك الى مايجب فعله قدر المستطاع والبركة في الاخوان والاخوات كلهم أكثر مني معرفة ومايقصرون ان شاء الله . بخصوص سؤاليك : 1- هل يجب أن يكون عندي سجل تجاري؟ أي سجل؟ نعم يجب ان يكون لديك سجل تجاري وترخيص لمؤسستك أو مكتبك التجاري ومعرضك وهذا أمر أساسي لعقد إتفاقات الشراكة والوكالات التجارية بأنواعها , والموضوع بسيط في أساسياته فالسجل والتراخيص كلها تستخرج في يومين أو ثلاثة أو ربما يوم واحد وفقا لجهوزيتك واكتمال أوراقك وتوقيت التقديم . 2- هل لازم يكون لها مقر المؤسسة مثلا؟ طبعا ضروري , والسجل وحده ممكن يطلعه لك أي مكتب تعقيب بدون مايكون عندك محل (بعقد إيجار وهمي ) لكن لكي تقوم بأي نشاط فعلي ( إستقدام , توقيع عقود, عقد شراكات , إستيراد وتصدير , أخذ وكالات ...إلخ ) فلازم يكون لك عنوان وموقع محدد عشان تستخرج ترخيص , واصلا لو ماكان كان هذا مطلوب رسميا فانت تحتاجه عمليا والا كيف تمارس عملك وتستقبل عملائك وتراسل الشركات والمصانع بدون مايكون لك إسم تجاري وأرقام هاتف وفاكس ومقر وعنوان واضح ؟ طبعا تحتاج , لكن لعلمك مو بالضرورة يكون موقع كبير وسكرتاريا وموظفين وبوابات ووو...زي اللي نشوفه بالتلفزيون لا , أحيانا كل اللي تحتاجه مكتب 30 متر في أحد مجمعات المكاتب أو شقة في عمارة تجارية او حتى محل على شارع تجاري لا تقل عن 25 متر مربع وهو شرط للمؤسسات وأغلب المحلات اليوم ضعف هالمساحة لعلمك وكل هذي أشياء بسيطة يمكن ماتكلفك مع الديكور والاثاث 10 آلاف ريال حسب رغبتك +الايجار طبعا وهذا ايضا حسب الموقع والمساحة , بالاضافة الى مستودع إذا كان نشاطك إستيراد بضائع وفي مثل وضعك ممكن تستأجر جزء في مستودع كبير أوفر لك طبعا ويكفيك , واذا كانت البضاعة من النوع اللي يحتاج لعرض دائم أمام الزبائن فتحتاج أيضا الى معرض وبهالحالة أنصح باخذ فتحة كبيرة أو أكثر على شارع رئيسي وتكون معرض ومكتب بنفس الوقت وكل هالاشياء يحكمها نوع النشاط ونوع اليضاعة وحجمها وما الى ذلك , وهذه كلها خطوات اولية والشرح والتفصيل فيها يطول ولا اريد إلاطالة أكثر من ذلك ولكن... كل هذا الكلام سابق لأوانه...وقد كتبته لأني مررت بتجربتك واعرف مالافكار التي تدور برأسك ويختلط أكبرها بأصغرها ...فحبيت بس أريحك من التفكير في بعض الامور الصغيرة واوضحها لك كي ترتاح منها أما الأهم من ذلك كله وهو ... الفكرة نفسها التي طرحتها ...[[إستيراد منتجات صناعية , مواد بناء ]] ؟؟!! اتمنى لو عطيتنا اي معلومة واضحة لكي نعرف على الاقل في أي اتجاه نبحث..لكن المشكلة انك أنت نفسك مانت عارف حتى وش نوع البضاعة او المعدات اللي ذكرها صاحبك الامريكي والمفروض يكون هذا أول شي تسأله عنه واستغرب كيف يدور حوار تجاري بهالطريقة ...يتجااوز أساس الشراكة وهو نوع البضاعة ويتحدث عن كيفية التعامل هل هو على التصريف أو كاش أو ..؟؟ غريب بصراحة !! وبما انك بعيد عن عالم البزنس مثل ما تقول فما الومك وهذا شي عادي لكن أستغرب منه هو كرجل اعمال كيف يعرض عليك التعامل معه ويقفز مباشرة ليحدثك عن طريقة الدفع ولايوضح لك وش هي بضاعته ؟؟ بصراحة أستغرب بشدة !! [COLOR="rgb(139, 0, 0)"]عموما...[/COLOR] لايجب ان نستبق الاحداث لكن يجب ان تحذر من التوقيع على أي أوراق على الاطلاق مهما كانت المغريات وتأكد أن عملك كوكيل أو موزع يبدأ من هنا من وطنك وليس من هناك , وكذلك أحذرك من الثقة الزائدة في التعامل سواء مع هذا أو غيره وحتى في العروض اللي ممكن تجيك من هنا من بلدك وللإختصار أقترح عليك الخطوات التالية : 1- لابد أنه أعطاك كرت عمله ومؤكد ستجد فيه موقع شركته الالكتروني , إدخله واعرف منتجاتهم بالتحديد ومنها يمكن أن تعرف مبدئيا مدى قابلية سوقنا لهذه المنتجات وفرصتها فيه وتقارن بينهم وبين منافسيهم 2- أرسل إيميل إستفسار للقسم التجاري في السفارة السعودية بواشنطن ضع فيه اسم شركة صاحبك واطلب معلومات عن الشركة وهل هي مسجلة ورسمية وسليمة من كافة النواحي ووضعها وو..الخ وأعتقد ماراح يقصرون وان حبيت انا مستعد أجيب لك خبرها 100% بدون السفارة , واذا ماعرفت موقعهم اتصل على الرجل واسأله الان مافيها شي . 3- اذا جاء موعدك مع الرجل قبل تعرف وضع الشركة لاتخلفه ولاتتهرب بل حافظ على الموعد واطلب منه معلومات عن المنتجات وكتلوجات وصور اذا ماكانت موجودة على موقعهم [[[وألأسعار]]] ..أهم شي الاسعار ولو كانت مبدئية...واطلب منه فرصة لدراسة المنتجات ومقارنتها بمثيلاتها في سوقنا , وترى مافيها شي مو عيب ابدا انك تصارح الرجل بانك لاتعلم الكثير عن التجارة لأنهم مايفكرون بطريقتنا هذولا ناس عمليين ما تهمهم الاسماء والمظاهر اللي يهمهم هو ماتستطيع عمله في الواقع والمردود اللي بيحصلون عليه من وراك , والامريكان بالذات من اكثر الشعوب سرعة وعملانيةوسهولة في التعامل التجاري بالذات , لكن لازم تطمنه بأنك راح تعمل وتعتمد على إستشارات متخصصين في السوق وتستثمر معه وفقا لرؤية واضحة وبهالطريقة ماراح يكون فيه اي إشكال إن شاء الله وتذكر أخي الحبيب أن الاهم في الموضوع كله هو البضاعة نفسها ( النوع,السعر,الجودة ) هذي هي الاشياء اللي تحدد نجاح أي منتج في السوق فإذا كانت منتجات صاحبك جيدة وعليها طلب كبير وسعرها منافس تأكد انها بتنجح بتوفيق الله اولا ثم مع الجهد والمثابرة حتى لو لم يكن هناك تسهيلات من جهة المورد ـ البيع على التصريف ـ مع ان هذا مفيد جدا ومكسب لشخص مبتدئ ولايملك رأس مال , لكن إذا كانت هذه المنتجات لاتملك عناصر قوية للمنافسة فلا انصحك بإستيرادها مهما كانت التسهيلات وهذا الكلام كله أقوله لك عن تجارب وليس تجربة واحدة . * كيف تتم صياغة عقد الشراكة بينكم وما هي أفضل طريقة ؟ * كيف تقدر تحدد الشروط المناسبة لك ولاتضع على نفسك شروط ثقيلة ؟ * كيف تقوم بتوثيقه قانونيا ؟ * من اين تبدأ بهذه الخطوات وأين تنتهي ؟ * من الذي يمكن أن يساعدك للقيام بكل ماسبق ؟ الجواب / لا تشغل نفسك بالتفكير في هذا الان لأنه لم يأتي وقته بعد أسأل الله لك التوفيق أخي العزيز وتأكد أني وجميع إخوتك هنا لن تنردد في مساعدتك أبدا بإذن الله بس... لاتستعجل الامور رجاء...وبشرنا وش صار معك |
| الساعة الآن 06:33 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين