|
البيوت مليانة بنات
البيوت مليانة بنات هذة الكلمة اسمعها بستمرار سمعتها قديما وحديثا اذا الواحد نوى انة يتزوج قالو لة البنات كثار وفي ناس يبون يزوجون اي احد وفي فئة من الناس مايبغون مهر اوبالاصح المهر معقول ولاشروط لديهم الخ من المغريات لاكن للاسف الواقع مخالف لهاذا الكلام لما يتقدم الواحد لفتاة تظهرالشروط القاصمة الي تبي مهر عالي والي تبي القاعة الفلانية والي تركز على شكل العريس والوزن والطول غير كذا الاب يبي يكون راتب المتقدم عالي او يبي وظيفتة مرموقة الواحد تقدم لكذا عائلة لاكن للاسف كلهم بنفس المشكلة لدرجة ان احد الاصدقاء حكي لقصة امام مسجد كان يخطب بالناس عن العنوسة وقال في خطبتة يجب على الاب ان يراعي المتقدم لبنتة ويسهل امرة وماان انتهت الخطبة حتى زار شاب الامام في بيتة لطلب يد احد بناتة ورد علية الشيخ بن كلام المسجد في المسجد ورفض الشاب فاابي اعرف هل نحن مجتمع متناقض ؟؟؟؟؟؟؟ |
والله العنوسه اكبر اسبابها البطاله وعدم الثقه بالنفس
وكثرة الفتن الناس صارت مفتونه مايبيون شي تقليدي يبون زي الي يطلع بالسينما والافلام والمسلاسلات وهذا مستحيل بس استطاع الغز الفكري ان يزرع هذي الافكار بالعقل بالباطن لخوفه من نهوض المجتمع |
البيوت مليآنه بنآت مع أحترامي للعنوان والمضمون ،
هذي الكلمات المفروض انها انقرضت وانتهت طلعت مع اجيال قديمه في بيئات جاهليه المفروض الجيل الحالي يتكرم عن هذه الكلمات ويتركها تنقرض لا ان يحفظها ويتداولها الشي الثاني وش المشكله لمي تكون البنات مليآنه بيوت!!!! من البديهي أن البيوت مليآنه بنات واولاد وين المشكله!! وكأن البنات جالسين عاله او جالسين علي رؤؤس أبائهم الشي الثالث الموضوع سطحي وهوا مشكله فرعيه موب رئيسيه ، اذا كان يقصد الزواج بكلمه البيوت مليآنه بيت ف المشكله الاساسيه ليست في غلاء المهور كما يدعون المشكله الاساسيه هيا البطاله وقله الوظائف وهذه المشكله لا احد يستطيع حلها الا صاحب سلطه ليضع الحلول الجذريه . |
موفق بإذن الله ... لك مني أجمل تحية .
|
Y بسم الله الرحمن الرحيم
اقتباس:
|
اخي الكريم شوف اخر احصائيه لسكان اللمملكه
بلغ عدد الذكور من بين المواطنين السعوديين ( 173ر527ر9 ) تسعة ملايين وخمسمائة وسبعة وعشرين ألفاً ومائة وثلاثة وسبعين فرداً أي ما نسبته ( 9ر50 في المائة ) خمسون وتسعة من عشرة في المائة من مجموع عدد المواطنين . وبلغ عدد الإناث ( 403ر180ر9 ) تسعة ملايين ومائة وثمانين ألفاً وأربعمائة وثلاث مواطنات أي ما نسبته ( 1 ر 49 في المائة ) تسعة وأربعون وواحد من عشرة في المائة من عدد المواطنين . من قال البنات اكثر من رجال وش اجل سبب العنوسه سببهااللي يتعاطى مخدرات واللي له علاقات محرمه وسفر للخارج واللي عاطل عن العمل موقادر ع تكاليف الزواج واللي يتزوج من خارج السعوديه والشكوى الله انتم دوروا زييين دوروا ع عوائل المتواضعه وانصحكم بالعاطلات ابعدوا عن بنات اللي بالثانوي واللي بالجامعه بيكون لها شروط وطلبات كثيره اما العاطله تحس بمعانتكم وتقدركم للاسف اغلب شباب اذا يبي يتقدمون ع بنات يدرسن واكيد بيلقون منهم شرووط وشكرا والله يفرج همكم ويكتب اللي به خير لكم |
يا اخي الكريم مستحيل تجي تخطب
وتبيها بدون مهر والا مهر قليل اولا الاسعار تحكمها كيف العروسه بتجهز نفسها ثانيا لو فرضنا وافقت واللي اعرفهم وكثير وافقو ورضو بالمهر بالاخر رجعت لبيت اهلها ذليله ليش ترخصون ببنات الناس لا ويقولون بعض الازواج ان صار بينهم مشاكل قعد يعايرها بقل مهرها ياخي الكر يم >> من واقع تجربت من حولها الخطاء واللهي مشترك بين الشباب والشابات والاهالي احيان يجونك بنات مايعجبهم العجب ولا الصيام برجب واحيان يجيك شباب مستهتر ومو كفو يفتح بيت واحيان الاهل مايساعدون ما اقول الا الله يزوجنا ويستر علينا والا مانبي الا الاحترام والاستقرار |
لا كل واحد يوزع بناته على الصاحي والطاحي علشان يرضون حضرت جناب بعض الخلق
ترى في فئات مو همها المهر .. فيه أمور ثانية تعيقها .. أجل هي وقفت على المهر !! وخير يا طير تمتلي بنات .. هذا قضاء ربي .. نوقف النسل عشان ما تمتلي البيوت هذا اللي خطب في المسجد مثل ما ذكرت مو مسالة تناقض ..بنته ما تهون عليه بالبساطة هذي والا لي جا الصدق انقلب 180 درجة |
من ناحية المهور المفروض يتوحد المهر من الدوله
وحتى انتوا يالشباب فيكم حقكم يعني لاتلقون اللوم على البنات بس يجيك واحد يطلب مواصفات عارضة ازياء ابي شعرها طويل ناعم حرير يهفهف ابي عيونها واسعه كحيله ناعسه ابي خشمها واقف سلة سيف ابي شفايفها ورديه صغيره وفيها غمازات يمين ويسار وابي جسمها رشيق ومدري وشو ومدري وشو استانستوا صح ؟ :d يعني المفروض هنا الواحد يكون متوسط في كل شي والبساااااااااطه حلوه في كل شي والله تستاجر قاعه بمبلغ وقدره والذبايح كم حبه وشوف المبلغ كم والفاكهه والشعبيات والبوفيه والمشروبات والتوزيعات ووووو ........يكفي وجع قلب ترا الناس تجي تاكل وتملا بطونها ولافكرت فيك ولافكرت كم ريال دين على ظهرك :eek: تياسرووووووووووا في كل شي:b اهم شي اخلاق الرجال وش مع ربه ثم مع الناس صلاته كيف؟ تعامله مع اهله كيف ؟ وللبنت نفس الشي هنا المهم |
ماادري كأن البنات قاعدين على قلوبهم هههه
تدري ليه مليانه لانكم يامدمن يا صايع وضايع واللي ماشي حاله ماهو لاقي يتوظف وفوق هذا يتشرط يبي مثل الفنانه الفلانيه والمغنيه اللي مدري كيف شكلها واللي عمره فوق30 او 35 يبي وحده عمرها 15 قال ايش اربيها على كيفي مادرى ان بنات هاليومين يربون بلد ههههه المجتمع كله متخلف مع احترامي لايجي احد ينط بوجهي انا اشتغلت بمستشفى وشفت ناس اشكال الوان من اعلى طبقه لادناها كلهم مثل بعض الا من رحم ربي للاسف حنا مجتمع اخر شي نفكر فيه الاخلاق والاسلوب يربون الطفل على الاكل والشرب اهم شي ولازم تصير متين عشان تكون حلوو وسليم هههه اما كيف يعلمونه يتعامل مع الناس اخر اهتماماتهم بالذات الاولاد كل اللي نزرعه فيهم انا ومن بعدي الطوفان عشان كذا يكبر واهم شي نفسه وسيارته وكشخته وبس ولما يتزوج يحسب انه جايب شغاله وشاريها بفلوسه حتى لو الموضوع تافه يعاند ويرفض بس ليثبت انه الرجال اللي كلمته ماشيه ,, وقدام عيني صارت اكثر من مره بالمستشفى يشتم زوجته قدام الناس وبصوت عالي وقلة حياء لو اني مكانها وربي ماارجع معه لااروح لبيت اهلي بتاكسي مدري يحسبوها قوه او رجوله كرهوني في الزواج ههههه بعد هذا كله لاتسال ليه البيوت مليانه اجلس معززه في بيت اهلي احسن من هالاشكال |
| الساعة الآن 12:34 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين