|
رأيكم ومشورتكم تهمني في مشروعي التجاري الجديد
السلام عليكم ورحمة الله وبركاته مساؤكم عطر أخواني وأخواتي أعضاء منتديات "حلول البطالة" المتميزون دوماً قررت أخيراً دخول مجال العمل الحر من خلال فكرة فتح مشروع تجاري بمشاركة أحد الأصدقاء.. عبارة عن محل أبو (5) ريالات متنوع البضاعة من ملابس, وتحف, وأواني منزلية, وغيرها.. يعني كل شيء بخمس ريالات فقط.. وأرى أن فكرة المشروع جيدة.. ولكني لا أعلم عن مدى نجاحها وربحيتها؟ وقد حصلت محل جاهز إيجاره الشهري: (2500) ريال. ومساحة المحل الإجمالية: (300) متر مربع. فكرة المشروع: هي الوحيدة بالمدينة اللي أسكنها والقرى المجاورة لها. لكني متخوف من خسارة المشروع وعدم نجاحه... لذلك حبيت أستفسر وأستشيركم عن النقاط التالية: 1- كم تتوقعون "رأس المال" المطلوب لمثل هذا المشروع؟ 2- كم تكلف قيمة "البضاعة" لهذا المشروع؟ 3- أفضل محلات بيع الجملة وأرخصها؟ 4- بالنسبة للديكور (الرفوف) كم سعرها إذا قلنا أنها على ثلاث جهات, وأربع في الوسط؟ 5- هل يستحق مثل هذا المشروع المغامرة وخوض التجربة؟ أرجو من أصحاب الخبرة والتجربة إيضاح وإجابة على التساؤلات.. ومساعدتي في التوجيه والمشورة عن كل مايتعلق في المشروع الذي أوضحته لكم.. ولكم مني خالص الدعاء بالتوفيق والنجاح في حياتكم أجمعين,,, |
موفق بإذن الله ... لك مني أجمل تحية .
|
الاجار في الشهر 2500
والله اشوفه كثييير وراح تطير 10 الف ريال في الاجار وانت مافتحت المحل هذا من غير المصاريف الثانيه بلديه والتجاره ومكتب الخدمات والاغراض وتجهيزات فكر وحسب حسبتك زين موفق خير |
اخوي باعطيك الراي باختصار
طبعا انت محتاج تشتري بضاعتك بسعر الجمله لاتتجاوز 3 ريال عشان تبيع 5 ريال فلنقل ان ريال يروح ايجار وراتب عامل ومصاريف نقل وريال مكسبك لو تبي 6 الا ف ريال صافي شهريا لا بد تبيع 200 قطعه يوميا فهل تقدر تبيع 200 قطعه يوميا وكلها من من بضاعتك ام 5 ريال اشوف انها صعبه الا اذا كان هناك كثافه سكانيه وحركه قويه على المحل لذا يفضل ان تريح بالك وتترك المحل باسم محل تنزيلات كل شي بعشره وكل شي ب 15 ويكون قسم 10 وقسم 15 معنا كذا كانك بعت ثلاث قطع من 5 اذا الزبون شراء منك قطعه 15 انا عملت الفكراه زماااااااان قبل انتشاره واستاجرت عدة محلات جنب بعض وكل محل كان ب 15 الف ريال سنويا ووزعتها كالتالي محلين فتحتها على بعض وسميتها كل شي 10 ريال محلين فتحتها على بعض وسميتها كل شي 15-20 ومحل خصصته للقماش النسائي المتر 10 ريال فقط والحمد لله نجحت كلها اشتغلتها فتراة سنتين وقبلتها بسعر حلو |
اقتباس:
وربي يوفقك.. لك مني فكرة ديزاين أعطر التحايا,,, |
مشروع حلو
لاكن الإئجار بياخذ نصف الارباح لانه غالي |
اقتباس:
الإجار فعلاً كثير لكنه مناسب لموقع ومساحة المحل...... شكراً كيلو ذهب على مداخلتك,,, |
اقتباس:
واستفدت من تعليقك كثيراً لكن بما أنك صاحب تجربة سابقة في هذا المجال.. أود أسألك: أفضل محلات بيع الجملة في الرياض أم في جدة؟ وكم تتوقع تكلفة البضاعة في البداية؟ شاكر لك متابعتك وتعاونك.. ولك مني أعطر وأعذب التحايا,,, |
اقتباس:
حياك ومشكور أخي رجل اعمال مبتدى على إبداء رأيك |
اقتباس:
اذا من جده اشتر من جده واذا من الرياض اشتر من الرياض لان بضاعتك راسمالها قليل فلاتحمل نفسك تكاليف سفر ونقل اهم شي سر النجاح هو (لابد من التركيز على زيادة الاصناف بدلا من الاكثار من صنف واحد ) بدل ماتشتري 10 كراتين كاسات يجب ان تشتري كرتون كاسات شاي وكرتون كاسات ماء وكرتون اصناف اخرى اي تشتري عشر اصناف ومن اسرار النجاح (البحث عن اصناف واشكال مقلده وحديثه وذات الوان جذابه للنظر ) ومن الاسرار (يكون المحل فيه كماليات وملتزمات ضروريه ) فالزبون يدخل عندك يبحث عن ملتزمات هو جايك عشانها ويفاجاء بكماليات حلواه فيشتريها |
لكن اذا تبي نصحيتي
دام المحل كبير وموقعه زين ياليت تفتحه محل كماليات ومفروشات خفيفه كالاسره الحديد والمفارش والمخاد والشراشف والبطانيت والاواني المنزليه الضروريه واللوح والزهور وتسمي المحل مثلا (مركز تخفضيات 0000 لبيع اللوازم المنزليه ) هذا المحل لو توفقت في ادارته ممتاز جدا ومجال الربح عالي واذا شفت السحب عندك زااد ممكن تجيب كونتينر بضائع حديثه من الصين وانت متطمن انك بتصرف البضاعه في محلك |
الله يوفقك
ولاتنسى الإستخارهـ |
اقتباس:
يانسينا الله يعطيك العافية على إهتمامك ومساعدتك لي بهذه المعلومات وبالنسبة لأسرار النجاح التي ذكرتها هي مهمة .. وجديرة بالاهتمام والأخذ بها.... ولك مني جزيل الشكر,,, |
اقتباس:
فكرة جداً ممتازة لكن مثل هذا المحل متوفر .. وبحاجة إلى رأس مال كبير وعندك جلب البضاعة من الصين تبي متابعة وسفر حتى تضمن عدم التعرض للنصب وأشكرك مرة أخي يا يانسينا على إهتمامك ومتابعتك,,, |
اقتباس:
اللهم آمين وأسأل الله أن يوفقك يا فكرة ديزاين وكل الشكر لك على إهتمامك,,, |
اهم شي موقعه دام مافي منافسين خلي محلك قريب سوق جميع مافي المدينة وحوليها يجون لسوق هذاء
الايجار غالي والمساحه قليله مقارنه بالايجار |
اقتباس:
موقعه ممتاز وأشكرك أخي قريب التخرج على إبداء رأيك بالموضوع,,, |
اقتباس:
هلا بك اخوي اخوي مساحة المحل 300 يعني مو اقل من 100 الف بضاعة فاذا بتجيب بضاعة المحل من خارج المملكة من دبي مثلا او الصين توكل على الله اما اذا من السعودية فانصحك لا تغامر لان القطعة اللي سعرها 0.25 ريال برى هنا مو اقل من 1.75 موفق اخوي |
اقتباس:
بيض الله وجهك اناالسعودي على النصيحة بس سمعت أنه فيه محلات بجده تبيع بالجملة وأسعارها رخيصة وأيضاً عن طريق الميناء أرخص كثير.. لكن ماعندي معلومات عن بيع الميناء,,, |
اقتباس:
هلا بك اخوي منصور اخوي صدقت فيه محلات بالمينا وباب شريف والخاسكية بجدة تبيع بسعر الجملة لا كن اخوي اولا اغلب هذي البضائع اما استوكات مخزنة او فائض عن الحاجة ناهيك عن ان الاسعار لك عليها شوي غير كذا اخوي بتتعب في تجميع البضاعة اواني خردوات عدة وايضا اخوي الجودة خذها مني صفر يعنمي جودة ما فيه لاكن من خارج المملكة انت تتطب وتختار وتنقي وعلى كيفك والجودة قدام عينك والجودة اللي تناسبك اخوي خذها بالنسبة للجمارك من الامارات رخيص جدا لان الجمرك مخفض بين دول الخليج ومحدد بنسبة وانصحك بسوق التنين اما من الصين الجمرك لك عليه لاكن الميزة ان بضايعك تكون جديدة يعني انتاج نفس السنة في البداية انصحك تجيب بضاعتك من الخارج وبعدين شف النتيجة وبعدين اخوي ترى الامر بسيط ومو بها التعقيد اللي تتصورة موفق اخوي |
اقتباس:
مرحباً بك أخوي أناالسعودي أشكرك على النصيحة والظاهر أن ما ذكرته عن رداءة البضاعة الداخلية شيء صحيح لكن المشكلة أن السفر إلى الصين والإمارات يحتاج فراغ وإجازة وواحد ملم وعارف بالأسواق هناك مرة أخرى أشكرك وأدعو لك بالتوفيق,,, |
| الساعة الآن 01:41 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين