[align=center]سللللام علييكم


يا اخوان مشكلتي بالمختصر هي اني بعد عطاله لمده ماهي بسيطه لقيت وظيفه عسكرية مريحة وراتبها حلو والدوام الحمد لله مريح .. مشكلتي تبدا بعد الدوام لمن اروح للسكن انا متعين في الرياض واهلي والديره بعيده .. انا هنا ماعرف احد الا قليل مررره اجلس لحالي باليومين والثلاث ما اسولف مع احد مافيه احد عرفه بديت اتعب نفسيا والرياض كرهتها خايسه ومستحيل انسجم مابغاه ماني مرتااااااح ومستحيل القا نقل لو بعد 20 سنه .. المشكله اني خطبت ويتزوج قريب.. يا اخوان انا افكر من جد في ترك العمل لانه غير انه مافيه وظايف مع العلم .. عملي كاعسكري يمنعي من الالتحاق بي وظيفه ثانيه اقصد حكومية لازم افصل ثمن اقدم من جديد وهذي صعبه.. واهلي يمكن يكرهوني ويقلبون علي وبتتشوه صورتي بشكل كبير ووتصير مشاكل كثير ماعندهم الااصبر اصبر وهذا رزقك ولاحد حاس بالنار الي الي واطيها .. عطوني حل الله يسهل اموركم ويفرج على من فرج لي وش اسوي انا كل يوم اسوا من الي قبله والنفسيه في دحديره .. امانه لاحد يقول لي تزوج وجب عيالك للرياض لاني مبغاااااااه .. لو اقدم في شركات راح يقبلوني ؟؟ وش اسوي ..[/align]

وعليكم السلام ورحمه الله وبركاته
والله ياعزيزي تعوذ من ابليس واجلس على الوظيفة
لانه الحين 2012 ووظائف بالقوة صارت تجي ..
عليك بصبر .. لانه لو فصلت راح تجلس لمدة طويله
بدون وظيفة والا تجلس ع شركات براتب لا يقل عن 3500
وانت عارف الحين بزمن غلا معيشه .. من عقار من مواد غذائيه .. الخ
انا اقول اصبر وعليك بالاستغفار ..
الله يوفقك ويرزقك ويسهل آمورك

[align=center][/align]الله يوفقك وإذا بتسمع نصيحتي اصبر الدنيا ياخوك ماهي على الكيف الناس مثلك

إن طاعك الزمن ولا طعة ولا تتذمر ولاشيء صدقني كلها فترة بسيطة وتتاقلم وحاول اذا كان عندك

اقارب في الرياض تزورهم وتسير عليهم أو اشغل وقتك بشيء مفيد مثل المشي والرياضه ولا سجل

في نادي رياضي

أجل وش تقول عن المغترب وهو يدرس لحالة والله اننا في نعمة وخير بس نبي الراحة وحاول تسيطر على

النفس والهوى ترى الهوى والنفس أمارة بالسوء

والله يوفقك في دينك ودنياك

تقبل مروري ,,,,,,,,,

بتتعود على الرياض

انا نفس الشي في الرياض عزوبي في البداية كرهتها

الحين تعودت

طيب و ليش ما تبغا تسكن بعد الزواج في الرياض
حل جدا مناسب بتكون لك أسرتك و بتتأقلم

و إن شاء الله رمضان جااي كثر فيه من الدعاء و خصوصا قبل الإفطار لأنه وقت إجابه
و عليكك بالأستغفار و إن شاء الله تتسهل أمورك

الله يعينك اخووووي انا تقريبن زيك اخااااف اقدم في العسكرررريه وياجي تعييني بالرياض وانا اكره ذي المدينه كره العماء انا مقد جيتها بس ما اوطن اسمها بس عليك بصبر واذا انت مثلن في الامن العام تقدر تداقش واحد في حرس الحدود او الوطني او القاعده شف لك واحد وظيفه اقل منك عشان يووووافق يداقشك فااااهم علي ولا اوظح اكثر

جزاكم الله خير وماقصرتو يا اخوان على الردود الطيبه ..

يا لبى الرياض، يا حبيبتي يالرياض ، اموت في الرياض ، والله لو خيروني بين قصر فيه 100 جارية في لوس انجلوس ولا شقة في منفوحة في الرياض ، والله ثم والله لاختار شقة منفوحة اللي بالرياض، حبيبتي يالرياض
يا رجال تعوذ من ابليس وكان تبي تصير خويي ارسل لي على الخاص اخوك عاطل وفاضي ليلي نهار ونهاري ليل ، وبونسك وبعلمك على الرياض وكل احياءها وقطاعاتها ووين تروح ووين تمشى ،
والرياض فيها كل اصناف وقبايل السعودية غير عن الاجانب اللي يوصلون 3 ملايين بالراحة ، اكيد اكيد ان لك ربع وجماعة بالرياض ، يخوي اذا انت بدوي كل خميس وجمعة بتلقى لك قلطة في ذالعروس يما للميزاني يما للقرقاح يما لشعرا العتبان وهلم جرا من فطاحلة الشعرا
واذا انت حضري باخذك على احلى كفيات التحلية وروق هناك وبتتعرف على شباب يونسونك
واذا انت مطوع لا تفوت المحاضرات الدينية اللي لكبار العلماء في الاسبوع بتلقى ثلاث اربع ، كبار العلماء اتكلم مودعاة صغار ، كبار العلماء الله يطيب ايامهم ويسعدهم دنيا واخرة سعة صدر وراحة بال
واذا بدا الدوري لا تفوت ولا مبارة زعيمي كنت ام عالمي
نسيت الاسواق نسيت المنتزهات ، الحين مسموح للعزاب تدخل وراسك مرفوعة وعيونك بعيون السكرتي ما يقول لك ولا كلمة
اشتر سيكل من الانواع الطيبة 500 ريال وحولها ولا تخلي حي من احياء الرياض الا لفلف فيه وناسة ورياضة خصوصا لا بدا الجو بالبراد
عندي لك حلول واجد
بس انتو يا عيال المحافظات سبحان الله ما تقنعون الا بديركم مدري وش لاقينن فيها

اشترك في نادي صحي وقت اللياقة وطقتها ، اشترك في نادي لتعليم الكاراتية ، كل هذي مداخل لتكوين صداقات ، بس احذر من اللي مهومب من ثوبك عشان فيه ناس ما يخافون الله ويطيحون الناس في البلاوي والمنكرات خصوصا لا عرفو انك عزوبي وبلحالك

ياحليله مالقي حد يسولف معه وبيترك عمله !!!!!!!!!!! عليك بعجائز الديرة وقهوة الصباااااح لاتفوتك


الحمد لله الذي فضلني على كثييييييييييييييييييييراً من خلقهِ