وظائف شركة الخرّيف || المشي بجميع الاتجاهات ( أحداث وظيفه بالصدفه)
 

السلام عليكم ورحمة الله وبركاته

أولا أحب أنوه ان شركة الخريف للبترول محتاجين وظايف للمهندسين و الفنيين و وظائف أخرى التفاصيل في الرابط ..

http://www.alkhorayefhr.com/new/jobs/jobs.php

ثانيا حاب ادردش معاكم بخصوص الوظيفه اللي ولله الحمد حصلت عليها بالصدفه بتوفيق من الله ..
أعرفكم بنفسي .. انا مهندس ميكانيكي خريج من جامعه تعتبر من العشر الاوائل على أمريكا في مجال الهندسه .. و معدلي ولله الحمد فوق الثلاث و عندي تقريبا 9 شهادات تدريب و شهاده لغه .. و لغتي و لله الحمد بيرفكت ..

و طبعا ك خريج فرش الخبره -----> صفر مع مرتبه الشرفه و هذا شي طبيعي
لكن خريج فرش وماعنده واسطه ------> ينطق زي الكلب لين يخلصون اصحاب الواسطات ثم يلتفتون لك

للأسف عندنا في السعوديه و اعتقد العالم العربي برمته ينظرون للواسطه في البدايه حتى لو كان المعدل ابو كلب و المتقدم مخه فاضي! .. و الكفاءات ينظر لها بعد اصحاب البشوت و الواسطات .... أقول للأسف!

ندخل في صلب الموضوع .. انا اول ما رجعت من امريكا وانا شغال تقديم على الشركات الكبيره و الصغيره .. الشركات الصغيره يتصلون لكن الشركات الكبيره (مشغولين مع اصحاب الواسطات وانا ما عندي واسطه ) المهم في يوم من الايام اتصل علي صاحبي قالي عندي مقابله في شركة الخريف للبترول تخاويني بكره؟ قلت قدام وانا بعد عندي مقابله في شركة بناء للخرسانه المتقدمه ..

صاحبي خريج معاي من نفس الجامعه و نفس التخصص و نفس المعدل و لغتنا كلنا بيرفكت يعني اللي يبي يوظف واحد مننا يغمض عيونه و يختار هههههههههه نفس الكفاءه و الشهادات و لله الحمد .. المهم ان صاحبي كانت مقابلته مع شركة الخريف للبترول الساعه 9 الصبح وانا مقابلتي مع شركة بناء للخرسانه الساعه 11 و الشركتين حول بعض .. فقلت نخلص من مقابلة صاحبي ثم نروح لمقابلتي .. المهم دخلنا شركة الخريف للبترول الاستقبال كان متواضع جدا .. جلسنا مع مهندس فلبيني (على اساس ان المقابله لصاحبي وانا بس جاي معاه كذا) اول ما قرر يبدأ المقابله قلت للمهندس الفلبيني .. انا بطلع اخليكم تاخذون راحتكم .. قالي أجلس ماعندك مشكله .. قلت فرصه اشوف مقابلتهم لاني بقدم عليهم .. المهم المقابله كانت تكنكال الفلبيني جلس يسأل صاحبي اساله تقنيه بحته .. و أختبره في أدوات قياس هندسيه و رسومات هندسيه .. المهم الفبلبيني سأل صاحبي سؤال وصاحبي يحاول حل السؤال بأداة القياس اللي معاه .. تأخر شوي .. فقلت خل اشغل الفلبيني عن صاحبي علشان ياخذ راحته و لين يوصل للحل .. المهم خشيت في عين الفلبيني و قعدت اساله عن شركتهم و كذا .. المهم قالي شكلك مهندس ليه ما تقدم عندنا قلت له بقدم بس مو الحين عندي مقابله بعد ساعتين في شركه ثانيه .. عااااد الحين بدى شغل الماركتنق ههههه الفلبيني بدى يسوّق لشركتهم حنا افضل منهم و نبي سعوديين يشتغلون عندنا و كذا قلت له خلاص بعطيك اوراقي .. قالي الاوراق تسلمها بعد المقابله!!!!!! وش رايك أسوي لك المقابله الان مع خويك و بس تخلص المقابله تجيب اوراقك .. قلت اوكي .. المهم ان صاحبي ولله الحمد حل السؤال الموجه له ياحبي له ههههههه اول مره اشوف مقابله بالشكل ذا .. انا و صاحبي جالسين و الفلبيني يسألني واجاوب ثم يسأل صاحبي و يجاوب .. إنبسط مننا الفلبيني و قال بعد شوي الجنرال منجر يبي يقابلكم .. انا نقزت جبت أواراقي من السياره .. وعطيتها المدير العام .. رجعنا للمهندس الفلبيني نسولف و نضحك معاه و قال انا عطيتكم تقييم إيجيابي عند المدير العام .. شوي و جانا المدير .. جلس معانا في مكتب الفلبيني و قاله طالما انك قابلتهم سوى انا بقابلهم سوى!! المهم قام يسألنا عن مشاريع التخرج ووو بالاخير قال قبلتكم و قعد يمدح فينا و كذا .. و بعدين قال ابي منكم إلتزام بالعمل .. قلنا لهم قبل لا نعطيك التزاماتنا نبي نعرف العرض الوظيفي .. المدير رد علينا 4000 !!! انصدمنا بصراحه حتى ان صاحبي سأله 4000 دولار ولا ريال؟؟؟ المهم طلعنا أبدينا عدم رضانا على العرض الوظيفي الا على دخول موظف مدير السيفتي و اخذنا لمكتبه الله يذكره بالخير .. قال انهضم حقكم وانتم ما شاء الله اوفر كواليفايد لكن انصحكم انكم تروحون لمدير الموارد البشريه في مدينة الخبر و تتكلمون معاه .. المهم طلعنا من شركة الخريف للبترول (المصنع) و اتجهنا لشارع كله شركات بترول ما اعرف اسم الشارع لكن موقع الشركات بجنب مجمع طابا .. المهم بعد ما خلصنا تقديم قلت لصاحبي وشرايك نروح لمدير الموارد البشريه لان مكتب إدارة شركة الخريف للبترول على نفس الشارع تقريبا .. قدام؟ قدام .. رحنا لمدير التوظيف و اول ما جلسنا قال ياخي الوظيفه هذي مو لكم هذي وظيفه مشغل وانتم مهندسين و اعتذر للخطا الحاصل بسبب احد موظفين ال HR و قال انا اضبط وضعكم .. المهم قبل يومين اتصل على مدير التوظيف و قالي تعال ابي اقابلك .. رحت له ثاني يوم (مع العلم ما اتصلوا على صاحبي) و اول ما جلست عطاني العرض الوظيفي فوق 11 الف بالاضافه لتأمين صحي لي وللعائله و لله الحمد وقعت و سألت عن وضع صاحبي قالي المصنع اللي قابلتوا فيه اختاروك انت لانك من سكان الجبيل (قايلكم صعبه المقارنه بيننا كفاءة صاحبي مطابقه لكفاءتي و لله الحمد ).. لكن تم اختياري لاني كاتب بالسي في اني من سكان الجبيل .. سالته وش صار على صاحبي .. قالي مدير التوظيف هذا الطلب حقه موجود على الطاوله (وراني اياه) و نبي نتواصل معاه بخصوص العمل في الفيلد .. الحمد لله على كل حال صحيح ان كان ودنا نتوظف سوا ..

المهم طلعت من مكتب مدير الموارد البشريه وانا موقع على الوظيفه ... و على طووووووووول رحت على فندق بارك انن سويت مقابله مع شركه PTC silicon (ماعندي وقت هههههه ما اطوف شي .. العمل بمبدأ المشي في جميع الاتجاهات ) المهم ترحيبهم كان رائع .. بوفيه غدا و بعدها مقابله كانت مع ثلاث موظفين واحد سعودي و اثنين كوريين .. سويت المقابله و لله الحمد على اكمل واجه و قلت لهم تراي موقع عقد قبل شوي (أحس السعودي يقول هذا ماله امان ههههههههههههه) انبسطوا و قاموا يسألوني عن شركة الخريف للبترول و عن راتبهم ( حسيت ان هالشركات مثل البنات الضراير ههههه ) المهم عدت المقابله على خير ..

خلاصه الموضوع حاول المشي في جميع الاتجاهات ولا تحتقر عرض و حاول النقاش فيه يمكن فيه خطا و نقاشك هو سبب لحل المشكله .. اللي ماعنده واسطه مثلي و مثل صاحبي لا ينتظر الشركات الكبيره لانها تطول و غالبا تحتاج واسطه علشان تمشي امورك بسرعه!!!!!!!

ملاحظه هامه .. عادتا الخريج الجديد يجلس تقريبا ما بين شهرين الى ست او سبع شهور إنتظار رد الشركات الكبرى .. نصيحتي حاول تشتغل الفتره هذي في شركه صغيره تطقطق لك كم قرش و بنفس الوقت تحتك بطبيعه عمل بالاضافه اذا صارت معاك مقابله و دروا انك شغال حاليا يكون افضل ..

في النهايه الحمد لله على كل شي .. الوظيفه كانت لصاحبي لكن كلن له نصيبه .. و صاحبي ما طافه شي .. بيتواصلون معاه في موقع ثاني ان شاء الله .. و الله ولي التوفيق ..

بارك الله فيك

و أتمنى للجميع التوفيق

الهاجر

الله يوفقكم

بارك الله فيك

الله يوفقك يابطل والي حصل شي يستاهله الف مبروك الوظيفة ماشاء الله

ممتاز ... امشى في جميع الأتجاهات وأبدأ من الصفر (الصفر أبد من الشركات الصغيرة) جميعاً ننظر لشركات الكبيرة ومثل ما تكرمت الشركات الكبيرة تأخذ وقت طويل في الإجراءات وتطلب خبرات

الباحث عن العمل عندما يعمل بالشركة الصغيرة سوف يحتك ببيئة العمل وبيعرف طبيعة الوظائف بشكل أوسع وأكبر وعند التقديم على شركات أخرى سوف ترتفع قيمته في السوق بعكس لما يكون عاطل.

بالتوفيق لك وإلى خويك

صحيح أنا اؤيدك ع هذه النقطه وعسى ربي يوفقك ويوفقنا جميع للأفضل دائما

وفي المقابلات يتحمسون للمتقدم اذا كان على راس عمل حتى لو كانت الشركه الشغال فيها

مو ذاك الزود

ويكفي أن الواحد يكتسب خبره ومهارات عمليه وقوة شخصيه واسلوب جيد في التحاور والاخذ والعطاء

جزاك الله خير


الله يوفقك انت وخويك


وكل مجتهد نصيب