ممكن انسان/انسانه عنده تجربة في الحياة وفاهم
 

يا ليت احد يساعدني
انا مرشح للمقابلة على وظيفة المرتبة الرابعة في وزارة العمل
وجتني وظيفة في شركة كبيرة مدرجة في السوق براتب خمسة الاف ريال

علما ان ما معي الا ثانوية عامة واشوف انو اكمال تعليمي الجامعي صعب في الوقت الحالي اخذ ايش تراني محتار مدري

خصوصا وانا ذكي وتقديري في الثانوي امتياز مع مرتبة الشرف ولغتي الانجليزية ممتازة جدا بس عمري وصل الثلاثين

يا ليت احد فاهم جدا وكبير في العمر وعنده تجربة ينصحني او يتكلم معي في هالموضوع الله يجعل في كلامه البركة والخير

وسلام والاجر عند الله


الاخوان الشباب والشابات والجميع ترى فيه استطلاع فوق شاركوني الراي فضلا لا امرا

انا اشوف الوظيفة الحكومة افضل خاصه ان المرتبه الرابعة راتبه تقريبااا 5000 الاف ريال نفس الشركة .بس الحكومية اضمن لك ولمستقبلك .
بالتوفيق

هل فكرت في دوام الشركات 9 ساعات
الحكومة يا اخي افضل تقدر تربي عيالك

تـــوكل على الله واقبل الحكــومية التعينات الوظيفية شغالة ما توقف
واجازات رسمية من غير مــا احد يذلك اذا تبي تـاخذها
الفــرصه ما تتكرر القطاع الخاص تعب وبطئ قوي بتعين الوظيفي ويمكن تظل على مكــانك حتى تستقيل
واستخير ياخوي
الله يوفقك

الامان الوظيفي في القطاع العام
اما الشركات عقد متى ما انتهى احتمال يجددون لك واحتمال لا

وعليكم السلام ورحمة الله وبركاته

نصيحتي لك :-

أقبل الوظيفة الحكومية
+
أكمل تعليمك بكالريوس بقسم يفيدك بوظيفتك واذا ماتقدر تكمل انتظام
كمل أنتساب
أو بالدراسة عن بعد ( http://seu.edu.sa/ )
وهذا بعد ماتترسم في وظيقتك الحكومية.
وفقك الله.

الله يجزاكم خير جميعا، انا بصراحة اعزب وما عندي نية زواج مو لاني ما ابي بس لاني اخاف من الجنس الاخر مدري ليش ههههههه
بس سبحان الله عندي زي المرض اخاف من البنات من كنت صغير
فيعني ما راح يهمني عدد ساعات الدوام في القطاع الخاص

لكن على كلامك توكلنا على الله وماراح اوقع مع الشركة بانتظار الحكومية والله يشفيني وجميع مرضى المسلمين واقدر اتزوج ويصير عندي عيال

مشكورين ياللي مريتو والله يجعل في كلامكم الخير والبركة وفي موازين حسناتكم

الحكومه افضل بلامنازع لانه لايوجد مقارنه والله يوفقك

الوظيفة الحكوميييييييه وانت مغمض
وبالمساء تقدر تلتحق بوظيفة في القطاع الخاص وهذا الشي ماتعارضة التأمينات

الله يكتب لك اللي فيه الخير وييسره لك حيث ماكان

الحكومي ولاتشاور أحد

أولاما ومدام فيريرو وام عادل الله يجزاكم خير ويحفظكم ويبارك فيكم

ياأخي هذا سؤال وضيفه حكوميه مايبلها كلام أفضل من الشركات والأجانب

الله يكتب لك الخير ان شاء الله

كل واحد منا بينصحك بناءاً على تجربته الخاصه

ما لك الا حل واحد

الاستخارة
الاستخارة
الاستخارة

واعلم ان مهما كتبه الله لك سوى كان الحكومه او الخاص

فرب العالمين لا يرد لك الا الخير

ان ذهبت لاحد المسارين...ستواجه احدى الحالتين
الاولى إن كانت متعبه وفيها صعاب ما كتبها الله لك الا اختبارا لك والبلاء نعمه من الله
الثانيه أن امورك تمشي وتتيسر بشكل ما تتصوره وهذا اختبار من الله هل انت عبد شكور ام ستغرك الدنيا




بالتوفيق

ورزقك الله بالذريه الصالحه والمال الحلال

الله يجزاكم خير على النصائح والظاهر ايوه راح اجرب الاستشاري النفسي والله يكتب اللي فيه الخير

حكومي ولا تفكر بغيره

الف الف شكر لكل اللي ردو وعقبو وللاخ طفران واتمنى اقفال الموضوع بعد هذا الرد
خلاص شوركم وهداية الله حكومي حكومي
بس عاد اسمي يننزل بالاول ههههههههه

الحكومي أفضل وبعد فترة يكون عندك خبرة وظيفية وبعد فترة يكون فيه إعلان عن وظائف حكومية ماتقبل إلا بالمسابقة الوظيفية للي عندهم خبرة .. وتقدم عليها (طبعا تكون بمرتبة أعلى من وظيفتك الحالية).


توكل على الله والحكومي أفضل. بس مايمنع تروح المقابلة تبعت الحكومي وبنفس الوقت للخاص بحيث لو ماحصلت الحكومي لأي سبب تكون سويت مقابلة الخاص.



وبخصوص الزواج البنات مايخوفون أبدًا .. وفكر تاخذ أصغر من عمرك تكون صغيرونه ماتخوفك. بالتوفيق.

مرحبا اخوي من تجربه القطاع الخاص رواتبه مغرية وممكن تلقى براتب 10 الاف لكن يفصلونك بيوم وبدون اي مبرر هذا غير احساس بعدم الامان وهو اهم شي

الحكومي دوام اقل -اجازات اكثر- تضمن العلاوات -اماااااان غير انك ممكن تكمل دراستك او تطور نفسك بدبلومات او دورات من معاهد قوية مثل معهد الادارة .

استخير وتوكل على ربي وبشرنا بمباشرتك للعمل فيها