من أفضل المشاريع لرأس المال المحدود أقل من ٥٠٠٠ ريال
 

السلام عليكم

هذا أول موضوع لي و أحب أفيد الشباب الطموح الي رأس مالهم قليل بطريقة تأسيس مشروع لهم. و في هذا الموضوع بأركز على المشاريع الالكترونيه بس.

المهم بسم الله نبدأ:

أولا و قبل كل شئ الفكرة هي الأساس بدون فكرة ما عندك مشروع و أحب أعطيكم في هذا الموضوع أمثله واقعيه و بأذكر تجربتي الشخصيه عشان يسهل فهم الموضوع.

فكرتي كانت عمل موقع إختصار روابط. طبعا من الأشياء المهمه مره أنك تسوي بحث كامل مهما كان الموضوع بسيط. انا اخذ مني دراسة الموضوع تقريبا اسبوع و خلالها قارنت بين المواقع المشابهه و الميزات و العيوب. و على فكره ركز دائما على فكرة أعجبتك حتى لو ما كانت جديده. التقليد حلو بس لازم تسوي بعض التعديلات على التقليد و يكون فيها لمساتك و افكارك الخاصه. مثلا موقعي لاختصار الروابط حرصت اني اتميز عن المنافسين اني اكون بدون اعلانات و اقدم خدمة الإحصاءات للروابط و ايضا خدمة الباركود و خدمة مشاركة الروابط في الشبكات الإجتماعيه. اهم شئ اني اتميز عن غيري و الناس اذواق ممكن احد يعجبه فكرتك و تكسب سوق.

نجي للخطوه الثاينه و هي البحث عن اسم نطاق او دومين عن طريق
www.godaddy.com
و غيرها كثير مثل
www.domain.com

و الاسم احرص انه يكون سهل و له علاقة بنفس النشاط لأن الدومين يعتبر مثل السجل التجاري و العلامة التجارية. انا عن نفسي جلست ابحث لمدة ٣ ايام الين لقيت لي اسم يدل على النشاط و سهل الحفظ و لكن كان انجليزي لاني كنت استهدف المواقع الاجنبيه بشكل عام و هذا هو نطاقي:
http://xurls.co

بعد كذا ندور على إستضافه و الي تعتبر إستئجار محل لنشاطك التجاري و موجود مواقع إستضافه مجانيه كثيره مثل
www.3jelly.com
و غيرها كثير

و انصح تبدأ فيها دائما حاول تقلل من مصاريفك في البدايه و بعد ما تحصل على الإستضافه أربطها بالدومين الي شريته. انا ما عندي خلفيه عاليه في التقنيه و لكني ابحث كثير فالي عنده سؤال كيف يشتري دومين و كيف ياخذ استضافه لا يتردد و يسوي مثل الي سويته و يسأل الأخ
www.google.com

بعدين نروح ندور عن سكربت للموقع و تقدر تدور بمواقع عربيه عن سكربتات للبيع و السكربت يعتبر زي المعدات و الأجهزة لمحلك التجاري طبعا السكربت هو برنامج يشتغل على موقعك مثلا موقعي بحثت عن سكربت اختصار روابط و اشتريته طبعا بعض السكربتات مجانيه.
مثال على موقع سكربتات و طبعا فيه غيرها كثير
http://www.galileofeed.com/

اذا حاب تبدأ بالتدرج و تجرب و اذا مره مقتدر ماديا تقدر تطلب برمجه خاصه فيك عن طريق مطورين المواقع.

و احب اذكر لكم موقع خاص يساعد اذا تبي احد يبرمج لك او يصمم لك و يسوي لك دعايه و تسويق و الى آخره و الموقع هو و فيه مواقع كثيره مشابهه بس هذا الي يحضرني الحين
www.*******.com
https://a3malcom.com/

بعد كذا يبقالك تعديلات بسيطه و استايلات و الي يعتبر كأنه ديكورات لمحلك و ممكن تحتاج ترجمه اذا كان سركبتك مو عربي المهم بعد ما تاخذ السكربت تركبه في استضافتك و زي ما قلت الي ما يعرف كيف ترى مو صعبه حتى انا ما عندي سالفه بالمواضيع هذي بس ممكن تقرا التعليمات للتركيب و اذا مره خربت معاك و ما عرفت تقدر تستخدم مواقع خدمات زي
www.*******.com
https://a3malcom.com/

و يركبونها لك عاد قبل ما تبدأ تنشر موقعك و تخبر اخوياك لازم تجرب موقعك بنفسك و تتاكد ان ما فيه مشاكل ابد.

لا تسنى التسويق. و كل موقع له طريقة بالتسويق بعضها ما يضبط الا بالشبكات الاجتماعيه و بعضها بالاعلانات و بعضها عن طريق معارف و غيرها محد ادرى بموقعك الا انت.

و اخيرا اقدم نصايح مهمه للجميع:

- ركز على الفكره و زي ما قلت التقليد زين بس سو لك طابع خاص.
- لا تستعجل ابد على الارباح و حط في بالك اقل شئ سنه ما تدخل ولا هلله.
- فيسبوك بدأ بفكره مجانيه و ما عنده خطه للارباح و بعدين بدت تطلع لهم طرق الكسب من موقعهم. سو نفس الشئ ركز على موقعك و بعدين طريقة الربح يفتح الله توك جديد.
- لا تستهينون بالمواقع الالكترونيه فيسبوك بدأ بأقل من ٥ آلاف ريال و الحين كل يعرف انه بالمليارات.
- تويتر كان قبل فيسبوك ب ١٣ سنه و توه اشتهر و صار ازين من فيسبوك فلا تستعجل على رزقك.
- دائما خل التكاليف منخفضه قد ما تقدر و حاول تبدأ بالأشياء المجانيه.
- ما في شئ سهل حتى المشاريع الاكترونيه يبغالها شغل و متابعه.
- دايم اعتمد على نفسك لو ما عرفت شئ و خل سلاحك www.google.com و ابحث و تعلم من المنتديات الي فيها قسام تطوير المواقع.

ولا تنسى انت من يدير الموقع لا تعتمد على أحد.

اي استفسار ولا فزعه انا حاضر بس يا ليت تكون لام بالموضوع كامل قبل السؤال.

كتب الموضوع نفر ما يعرف يسوي موقع بس حب يتعلم و ضبطت معاه و للمعلوميه خذا مني الموقع ٣ اسابيع عشان اسويه هذا و هو طفسه.

متوسط التكاليف السنويه:
دومين 50-100
استضافه 100-500
سكربت 100 - 1000
تصميم و تعديل و تعريب 100 - 500
اعلانات 500 - 1500
تطوير و دعم 500-1000

المجموع من ١٥٠٠ الى ٥٠٠٠ ريال

بالتوفيق للطموحين

تقصد فتح منتدى
؟؟؟؟؟؟

منتدى و غير منتدى

شكلك ما قريت الموضوع :d

اخي الكريم
وجهة نضري
ان المنتديات خفة
خاصة المنتديات لاتي لا يس لها هدف
الامنتديات التي لها هدف
مثل تسوق
بطاله
اخبار
البقيه
اتجه الى التويتر والفيس بوك
(( وسائل الاتصال الحديثه ))

ارجع و اقول لك اقرا الموضوع

الله يهديك ما جبت طاري المنتديات الموضوع عام بخصوص المشاريع الالكترونيه

الله يعطيك العافية ... موضوووووع ممتاز

وتسويق ممتاز ... (:

يعطيك العافيه .. مع اني مافهمت وش تقصد الا من رجعت لقوقل وعرفت وشهو موقع اختصار الروابط ..

لكن سؤالي هو ... انت وش بتستفيد من هالموقع ..؟؟؟؟
هل فيه مثلا مساحات اعلانيه للتاجير بموقعك ؟؟؟

اتمنى تفيدنا من ناحية ربحك من الموقع

سلمت اناملك ...

ممكن تكون الفكرة كويسة بس ما احسها تدر ارباح على قدر الخسارة اللي تخسرها في بدايته وممكن تربح وممكن لا

عجبني الموضوع وكل شي جديد علي يعطيك العافيه