|
احتاج مساعده
السلام عليكم
حابه مساعدة اصحاب الخبره فيه حرمه من جيرانا متزوجه وماشاءالله ابنائها عددهم 10 الاغلب يدرسون غير العاطلين المهم زوجها عنده راتب تقاعدي ويستلم مبلغ شهري من الضمان الاجتماعي لكن زوجته هذي ماهي محصله ولاشي منه لا مصروف لها ولا لعيالها متزوج غيرها وقاعد عند زوجته الثانيه ولا يسئل عن ام عيالها ابد شبه هاجرها وهي ماعندها دخل تصرف منه ابد وهي تقعد الايام هي وعيالها الوجبه الوحيده اللي ياكلونها هي العشاء والحمدلله خفايف من اللي تجيها من جيرانها هي تسئل تقول اقدر اروح للضمان اخذ مواد غذائيه مثل رز وزيت ودجاج وحليب يعني هي ماتبي فلوس تبي اكل لعيالها اقل شي ممكن الضمان يساعدونها بهذا الشي والا لا او اذا ممكن اذا تعرفون مكاتب خيريه ممكن تعطيها مواد غذائيه لان حالتها تكسر الخاطر بصراحه وحبيت اساعدها ياليت اللي يعرف شي لايبخل بالمساعده |
اتوقع تقدر الله يرزقها ياررررب
|
خليها تقدم على الجمعيه الخيريه الله يسهل امرها
|
والله الرجال الي مايصرف على عياله مجوعهم وهو عايش فرقاه خيرررر الافضل تطلب الطلاق منه وبصك الطلاق تقدر تقدم على الضمان لانو زوجها ياخذ حقها وحق عيالها من الضمان ويعطيه لزوجته الثانيه وهم اولى فيه وعلى فكره اذا مهجوره بنفس الضمان قسم للمهجورات خليها تراجعهم وتشوف لها حل الله يفرجها عليهم ويحنن قلب ابوهم
|
هي طلبت الطلاق ورفض
|
السلام. عليكم ورحمه الله وبركاته
تطلب خلع من المحكمة. وتطلب صك وكاله لعيالها علاشان تنتهي منه ويجيها ضمان لها ولعيالها |
هلا فيك اختي اذا هي بجده خليها تتواصل معي انا شغال في الشؤؤؤؤؤون الاجتماعيه وان شالله نساعده في تامين ما تحتاجه
|
لا هي ماهي من جده هي من الرياض اذا تعرف احد ممكن انه يساعدها بالرياض ماتقصر
الله يجزاك خير |
الحرمه اللي اقول لكم عنها تطلقت من زوجها الظالم بس المشكله رفض يروح للمحكمه ويطلع لها صك طلاق
والحرمه محتاجه تاكل هي وعيالها والحين اللي زاد الطين بله طلعها من البيت وهي اللحين بمساعده الجيران واهل الخير جمعوا لها واستاجروا لها شقه تعيش فيها هي وعيالها هي تبي تعرف وين تروح ومين يقدر يساعدها حرام والله يكسرون الخاطر يبون اقلها مواد غذائية على مايحن عليها ويطلع لها صك طلاق |
علموني باسم جمعية ممكن انها تروح وتطلب مواد غذائية منها
|
ياليت احد يعبر موضوعي وياخذه من باب الجد
|
وعليكم السلام ورحمة الله وبركاته حياك الله في البدايه جزاك الله كل خير على حرصك على تلمس حاجة جارتك المحتاجه للعون ونسأل الله بمنه وكرمه أن يجعل لها من كل هم فرجاً ومن كل ضيق مخرجاً ويرزقها من واسع فضله ومن حيث لا تحتسب . حسبنا الله ونعم الوكيل والله شي محزن .. نعوذ بالله من قسوة القلوب .. نسي المسكين عندما تسلط وتجبر وعرض قوته على تلك الضعيفه ان هناك من هو اقوى منه وهو الله ذو الجبروت والعزه تبارك وتعالى . لن يكون طليقها حريصاً على الصك مادام سيؤثر على مقدار اعانة الضمان التي يستلمها حالياً باسمها وسيستمر في الاستفاده من ضمان الابناء . وزارة الشئون الاجتماعيه تعتني بالامور الانسانيه فأتمنى التواصل معها وعرض المشكله بأدق تفاصيلها مع عدم نسيان كيف استطاع طليقها الاستفاده من الضمان وحرمانهم منه مع ذكر اسمه ورقم سجله المدني حتى يتم البحث من قبل الوزاره عن وضعه .. لا تنسوا ذكر كيف كانت معاناتها وهي في عصمته وكيف صار حالها الآن مع ذكر معلومات جارتك وكيفية التواصل معها على البريد الالكتروني info@mosa-d.gov.sa اذا كانت تود الحصول على الصك للتقديم على الضمان او اي جهة اخرى فمن الضروري ان تتقدم للمحكمة بطلب اثبات طلاقها وسيوجه لطليقها طلب بالحضور.. وعليها بالصبر حتى موعد الجلسة ويلزمها احضار شهود الطلاق في حال انكر .. وسينهي موضوعها من اول جلسة ان شاء الله .. يجب ان لا تستسلم ولتطالب بحقها . ستحتاج بعد ذلك لكي يستفيد ابنائها من الضمان لصك اعاله من المحكمه او اقرار ذوي العصبه في مكتب الضمان . قَالَ صَلَّى اللَّهُ عَلَيْهِ وَسَلَّمَ: ( مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا، نَفَّسَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ. وَمَنْ يَسَّرَ عَلَى مُعْسِرٍ، يَسَّرَ اللَّهُ عَلَيْهِ فِي الدُّنْيَا وَالْآخِرَةِ وَمَنْ سَتَرَ مُسْلِمًا، سَتَرَهُ اللَّهُ فِي الدُّنْيَا وَالْآخِرَةِ وَاللَّهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ ) . اتمنى من الجميع استشعار هذا الحديث الشريف والوقوف مع اختنا بأي وسيله كانت ولا تنسوا بأن رمضان قد اقترب .. نسأل الله بمنه وكرمه ان يبلغناه ويرزقنا فيه حسن العمل وان يتقبله منا .. كما اسأله ان يصلح حال اختنا ويهدي طليقها ويفتح على قلبه وينير بصيرته . نعتذر لك ولها عن اي تقصير . تحياتي لك |
| الساعة الآن 07:45 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين