الفقر وعدم وجود السيارة من اسباب عطالتي
 

انا خريج ثانوي من 5 سنوات دخلت كلية التقنية وطلعت منها بسبب بتقولون عنه تافه لأنكم ماعشتوه وهو عدم وجود مواصلات ماكان عندي سيارة حاولت اضغط على نفسي واقول بتغلب على الظروف لكن النفسية تتعب من الفقر ومن الذل للتكاسي ومن الأيام اللي تمر وانا ادبر فيها فلوس التكسي من امي اللي ماعندها شي(ابوي متوفي) اتعب اذا شفتها تاخذ من خالتي وانا توني بادي الدراسة فقررت اسحب ملفي لأني ما اقدر اتحمل هالوضع
مرت سنتين وانا عاطل وابحث عن عمل دخلت وظيفة براتب 2700 كنت آخذ سيارة عمي اللي عايش معي بنفس البيت لأنه مايشتغل لكن يحتاجها بعض الأيام وكنت ماأداوم في بعض الأيام عشانه وبعض الأيام يقولي انه مايحتاجها وانا ادري انه يحتاجها بس اضحك عليه واقوله ان اخوياي يحضروني وماراح يخصمون من راتبي لأني استحي آخذها وعلى هالحال إلين جاني انذار وقررت اطلع بكرامتي لأني مفصول مفصول
وألحين السنة الخامسة من البطالة وعمي الثاني شرا له سيارة جديدة وعطاني سيارته موديلها في التسعين وابتلشت فيها كل يوم اصلح فيها كل شي فيها خربان
تعععععبت من الفقر دايم اقول ابي ادخل وظيفة عشان اقسط سيارة بس مااااافيه
السيارة شي اساسي بحياتي ومالي حيلة في بلد النفط والله حرام اقل شي نبيه مصروف شهري لكل عاطل لكن لا حياة لمن تنادي
حاسين بالقهر اللي احسه كل يوم؟
حاسين الحسرة اللي كل صبح لما تشوف الناس رايحين دواماتهم وانت تحس نفسك عالة مالك اي فايدة ؟

تكفون اللي فاهم في التقسيط والقروض اقدر آخذ قرض من اي جهة وانا عاطل ؟

الله يرزقك ويوفقك طيب ليش ما تشتغل بالعثيم وبنده او هرفي رواتبهم حلوه
وتحاول تجمع فلوس وبنفس الوقت سجل جامعه انتساب

مع احترامي لكلامك يالغالي لكن الشغل موجود في كل مكان لو تروح للمطعم او المقهى اللي جنب بيتك
وظفوك عندهم براتب لا يقل عن 3000 الاف لين تقدر تطلع لك سيارة ثم شوف لك شركة كويسة اشتغل فيها وضبت امورك واذا تبي تكمل دراستك اشتغل وادرس انتساب منها يجيك مصروف شهري ودراستك ماشية
وكذا تكون ضربت عصفورين بحجر انك اشتغلت واخذت خبرة وكملت دراستك الجامعية بنفس الوقت وموضوع السيارة انا عارف انه صعب لاني مريت بالموقف هذا كنت اروح دوامي بتكسي واتفق مع راعي التكسي اخر
الشهر اسدده كان التكسي ياخذ كل راتبي لكن الحمد لله صبرت و دبرت عمري وطلعت لي سيارة اقساط

عسى الله ان يفرج همك ويسر امرك

ان شاء الله يمشيلك حافز
واستفد منه باي شغلة لو تشتري بضاعة وتبدا فيها
الله يوفقك ويرزقك من واسع فضله امين

انت لك خمس سنوات عاطل احمد ربك ...

انا عاطل من 12 سنه لكن املي بالله كبير

الشغل موجود في كل مكان.

نزل لك حافز؟ وش سويت فيه؟ نصه تقدر تشتري سيارة تمشي الحال.

+

عندك بنده والعثيم والتميمي وهرفي والمراكز التجارية بشكل عام فيها وظائف. ورواتب حلوووووة.


اطلع على اقسام التوظيف التابعة لمنطقتك الموجودة بالموقع.

+

تابع قسم الوظائف المدنية تعرض فيها وظائف بمسابقات وظيفية يكون المطلوب مؤهل ثانوية عامة على المرتبة الرابعة.


أنت توكل على الله. ولا تنسى الصدقة+ دعاء الوالدة. والله يوفقك.

الله يرزقك من سابع سماء " والله والله والله اني عشت معناتك بس الفرق انا كان لي هدف وضغطت على نفسي قسم بالله ما ابالغ لو اقولك انذليت العدم شييين عدم وجود المادة شين والحمد لله ضغطت على نفسي لين حققت طموحي وانا الان خريج من كلية ممتازه ولله الحمد ، اللي ابي اوصله لك لاتيأس ابدا وكافح الحياه هذي كفاح .. والله يوفقنا وياك يارب " على فكرة انا الى الان ماعندي سياره

ليش ما تراجع مركز طاقات يدور لك وظيفه
يجيبولك شركات راتبها يمشي وضعك
وبعدين شركه اقل من اربع الاف لا تشتغل فيها

بقولك شي مامريت بها المر الا ان الله بيرزقك رزق عظيم ياذن الله وبنتفتح بوجهك علبه ببسي هههه امزح بتنفتح الدنيا بوجهك وربي بيسعدك بس عشان تذوق حلاوه الدنيا لابد تعرف مرارتها والا ماراح تعرف الفرق بين الطعمين
الله له حكمه في الامر ممكن عشان يكشف لك وجيه ناس لو كنت غني ماعرفتهم علي حقيقتهم \
اغلب اللي قصصهم مثلك وربي بعد سنين عذاب استيئسو من الفرج جاهم فوق ماتمنو بس انت اصبر
وبعطيك كلمات مفعولها سحرررري تكثر اي شي حتي الفلوس وكل خير وحلا ل بعد
اشكر الله
اشكره علي كل نعمه
لا تقول من غير نفس الحمدالله
استشعر الشكر بنعمه كل نعمه نعمة الشوف والسمع وانك بكامل قوتك وعافيتك مو طايح لاي احد تنتظره يغيرلك او يوكلك او يقربلك شي الحمدالله يارب انت احسن من غير ك قل يارب لك الحمد فضلتني علي كثييييير من خلقك
قل يارب لك الحمد والشكر علي هالسياره لو مافضلك يارب ماحصلت عليها
اشكر واشكر واشكر كثيييير كثر النعم عليك
الله يقول لان شكرتم لازيدنكم
حتي لو بجيبك ريال قل يارب لك الحمد والشكر انا احسن من غيري
قل يارب لك الشكر علي اني خلصت الثانوي انا احسن من غير ي
وغيره كثير وربي لو اخذت مفتاح الشكر هذا واستمريت عليه كل ماطاحت عينك علي اي نعمه اشكره مع تركالمحرمات فيهي سبب بقطع الرزق مايمر شهر الا مبشرنا وداعيلنا باذن الله والله يفرجها لك

ياخوك 1- راجع اقرب مكتب عمل
2-التقنية اكيد يعطون مكافأة
والله يرزقك من واسع فضله وييسر لك