|
التجاره الالكترونية
السلام عليكم ورحمة الله وبركاته
شباب ممكن احد يفيدني في التجاره الالكترونيه ابغى ادخل هالمجال او هالمغامره ابي دراسه من الصفر الى التوب من يقدر يساعدني واكون له من الشاكرين او احد يعرف في هالامور يمكن ندخل شراكه اعتقد اخوي ((محمود //او// حمود)) القرني عنده معلومات كثيره لممارسته هالشغله الممتازه |
انـآ بعد ودي أدخل في هالموضوع .. وحـآب معلومـآت تفصيلية عن الموضوع ..
ارجو التوآصل معي أخ سـآلم .. ممكن ندخل في هالمشروع مع بعض .. :) في انتظـآر الاخوآن وتجاربهمٍـ .. |
[align=center]
فتح متجر الكتروني فكرة حلوة ومربحة اذا كانت مدروسة صح وايضا اذا كان المنتج المعروض مميز والخدمات سريعة وآمنة انا ايضا ابحث عن معلومات تفصيلية عن هذا المشروع! المشكلة في البيع والشراء عن طريق النت في بلادنا العربية هو عدم ضمان الحقوق ولا توجد قوانين كثيرة تقاضي الطرف الذي يخالف شروط البيع او الشراء اما في امريكا بكل سهولة ممكن تقاضي صاحب الموقع او الزبون اذا كان معك الحق [/align] |
التجارة الالكترونية مجالات وليست مجال
وش المجال اللي تجيده او اللي تستهويه حتى تقدر تدخل للتجارة الالكترونية من خلاله ؟ تقدر حتى الفواكه تبيعه من خلال النت ويعتبر ضمن التجارة الالكترونية على سبيل المثال في تجربة لبعض الشباب مشروع إلكتروني ناجح وحقق مردود اكثر من ممتاز لهم متجر مانجو جازان جات فكرته من تغريده في تويتر ونفذوا المشروع والله وفقهم ونجحوا ممكن تقرأ قصتهم من هنا http://www.mangojazan.com/store/inde...formation_id=4 اللي حبيت اوصله لك ان التجارة الالكترونية مجالات واسعه وعلى وحسب توجهك واستهواك تقدر تدخل للتجارة منه يعني انت لك خبره في البرمجة تقدر تبرمج تطبيقات للاجهزة الذكيه وتبيعها من خلال النت يعني انت لك خبره بيع التجزئة تقدر تشتر بضاعه ملابس - إلكترونيات إلخ ...... وتبيعها عن طريق مواقع التواصل الاجتماعي تويتر انستغرام فيس بوك واتس اب وغيرها .. اما انك تبحث عن الدخول في التجاره الالكترونية بشكل عام بدون تحديد مجال او تملك افكار تطبقها او توجه او استهوى لشيء معين راح يضيع وقت في البحث على الفاضي بدون فائده تجنيها حدد هدفك من بدري ثم ابدا في العمل عليه لا تهتم بالمعرفه كثير المعرفه تجي مع العمل على سبيل المثال : انا ابغى ابيع جوالات عن طريق النت وش اسوي ؟ اول شيء اشوف وش الجدوى من مشروعي هذا اكيد فيه منافسين لي كثير لانه مشروع تقليدي ابدا ابحث اشوف اسعارهم كيف كيف خدمتهم كيف يوصلون البضاعه للعملاء وكم يستغرقون هل اسعارهم منافسه للسوق هل يتفاعلون مع اسئلة العملاء والا ساحبين عليهم هل التوصيل عندهم سريع ولا يطول هل طرق الدفع عندهم متاحه وش اللي ماهو متاح عنهم هل العملاء يشتكون من شيء في تعاملهم مع هولاء المنافسين والكثير والكثير ابدا هنا انا ألعب على الفارق حتى اتميز عن المنافسين وادخل المجال واقدر اسوق خدمه غير موجوده عند غيري حتى الزبون يقدر يتعامل معي بعد ماعرف كل شيء اشوف هل في جدوى من مشروعي اذا فيه جدوى واقدر ادخل المجال وانافس ليش لا ادخل وبعدين ابدا في تجهيز الاشياء متجر وحسابات في مواقع التواصل واذا حاب يكون شغلي رسمي ميه بالميه طلع سجل تجاري وتفتح حسابات بنكيه باسم المتجر وو ألخ من الاجراءات الرسميه حتى يوثقون الزبائن فيني بعد ماخلص من ذا كله ابدا في استيراد بضاعه بسيطه وعاد ابدا اسوقها واكسب عملاء ليس مهم الربح الكبير في بداية المشروع الاهم كسب عملاء في البدايه ارضى بالقليل الدائم اذا كسبت زبون واحد من هذا الزبون يجونك زبائن اهم شيء في البدايه التركيز على توفير خدمه مميزه وحسس الزبون انك تهتم به حتى تكسبه وفوق هذا لا تهمل التسويق التسويق التسويق هو لب كل السالفه يعني ركز عليه وحط كل ثقلك فيه المشروع بدون تسويق كشجرة بلا اوراق اهتم بهذا الجانب وابحث عن طرق جديده للتسويق مو عيب انك تقتبس افكار تسويقيه من غيرك وتطورها بما يخدم مشروعك وايضا لا تنسى شيء مهم جدا في التجاره الالكترونية اذا ماكان مشروعك يواكب التطور التكنولوجي السريع صدقني راح تفشل لو ان مشروعك يحمل افضل فكره وافضل خدمه وافضل سعر الخ .... ان شاء الله اني قدرت افيدك لو بقليل موفق |
بالتوفيق لكم كلكم
التجارة الإلكترونية اكيد مجالها واااااااسع بس انت حدد وجهتك وش تبي تبيع ؟ مو على طول تفتح متجر اول شي سوّق منتجك عبر تويتر انستقرام حراج مستعمل والمنتديات هنا بتعرف وش التجارة الإلكترونية وبتكون مارستها فعلا وفيه متاجر مالها موقع خاص انطلقت من الانستقرام وتويتر او تحط البضاعة في توقيعك في المنتديات شد حيلك وسوّق الكتروني وهذي هي التجارة الإلكترونية وان شاء الله تكبر تجارتك وتفتح لك متجر خاص .. وكمان ترى التجارة مو شرط بضاعه وتبيعها يعني مثلا شوف فيه حسابات في تويتر متابعينها كثير مثل هاشتاق السعودية صار الحساب تجاري يرتوت ب 1000 ريال وفيه حسابات شخصية مغرده اعرفها ترتوت ب 250 للاسبوع فيه مصممين ومصممات استفادوا من مواهبهم في التصميم وفيه اللي يعملون بحوث وبوربوينت انت اختار لك مجال والله يوفقك وانا كمان في طريقي للتجارة الإلكترونية وأطلبكم كل اللي يقرا كلامي انكم تدعون لي ان الله يبارك لي ويوفقني في خطوتي التجارية الأولى وإياكم اجمعين |
بس انا ابغى واحد معي ندخل المغامره سوا
لاني ما اعرف فيها شي حتى لو ادفع انا ثلاثة ارباع المبلغ المهم اني ادخل واعرف الشغله لي مشاريع عده باءت بالفشل لكن عندي احساس بإذن الله اني سأجد ظالتي بها المشروع وشكراً لكل من شارك وشاهد |
اخوي على الاقل اذكر نبذه بسيطه عنك وش مؤهلات وش خبرتك
وش تجاربك السابقه وش اللي تعرفه وش اللي ماتعرفه وش اسباب فشلك في تجاربك السابقه ؟ السالفه ماهي سالفة راس مال وادفع وخلاص تبي تسوي مشروع وينجح في ناس بدت بمشاريع إلكترونية بالملايين وفشلت وفي ناس بدت بمشاريع براس مال اقل من القليل ونجحت الفرق بين الاول والثاني هو العمل والابتكار وحب الشغله وهو سر نجاح المشاريع الالكترونية شيء ماتحبه مستحيل تبتكر وتعمل فيه بجد وتطوره لكن شيء تحبه راح يصبح شغلك الشاغل وايضا تأكد انك لحالك صعب عليك تنجز تحتاج تكون فريق عمل حتى تتسع النظره في المشروع وتتنوع الخبرات وتتنوع الكفاءات وتتنوع الاعمال .. ألخ يعني انت تعرف برمجه وهذا يعرف في التسويق وهذا يعرف المفاوضه وو الخ .. انا واثق انك راح تنجح لانك بعد عدة تجارب الى الان عندك طموح وعندك اصرار انك تنجح ولزلت تبحث النور في الظلام وما يئست اطرح مؤهلاتك في الموضوع اطرح تجاربك اطرح خبراتك كثير شباب هنا يجون يدورون نفس اللي انت تدوره ممكن تحصل شاب يملك نفس مؤهلاتك وخبراتك وتجاربك وتتفقون على انك تبدون مشروع مع بعض وتطرحون لبعض افكاركم حتى تطلعون بفكرة مشروع تبدون فيه هي دايم البدايه صعبه اذا تجاوزت البدايه انت في الطريق الصحيح |
هلا اخواني واشكر كل من شاارك
في موضوعي واشكر كل من انتقدني وكل من حفزني بالنسبه لسؤالك اخوي حرف جر انا واعوذ بالله من كلمة انا مؤهلي دبلوم حاسب خبرتي تكاد محدوده عالانترنت تجربتي السابقه بمحل خضار لكن كان الموقع هو سبب الخساره ومن بعدها كرهت شي اسمه مشروع خضار ادري انكم كلكم تخالفوني الراي تعلمت من التجارب السابقه ان الفشل مرحله وليست نهاية الحياه وان الحياه بالانجاز وبالتقدم اذا فشلت سأقوم من جديد واذا فشلت سأرجع بإراده من حديد اكره اليأس والتحطيم الا من اعدائي او من اعداء النجاح فهو يزيدني اصرار ومثابره للقيام بعمل ااااخر الباب مفتوح لشركاء النجاح بالافكار وبالماده وشكراً لكم |
اخوي انا اقدر اوفر لك بضاعه ممتازه ومميزه بحيث ما يكون في السوق مثلها وباسعار ممتازه اذا حبيت تواصل معي عالخاص وحتى لو ما حبيت تغامر بمبلغ كبير تقدر تبدا بالف ريال
|
| الساعة الآن 11:25 AM |
Powered by vBulletin Version 3.8.9
Copyright ©2000 - 2026, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين