|
محبط جدآ والوظيفة دمرتني نفسياً الحل تكفووون
السلام عليكم أخوتي الكرام انا خريج ثانوي وعمري حالياً 27 وللأسف قصتي مثل قصة ناس كثير ما بقى مكان ما بحثت فية عن وظيفة ودايم اغلب الشركات يقولون لي حط ملفك ونتصل عليك الخ بعدها صرت مجبور اني اشتغل في وظيفة حارس امن بحكم انها الوظيفة الوحيده الي متوفرة على مدار السنة والحمد لله على كل حال للأسف من اول يوم شغل كنت واقف قدام البوابة ويجي رجال معه ابنة ولده صغير بالعمر ممكن 14 سنة تقريباُ الا واسمع ابوة يقول للولد ادرس وتعلم واجتهد لا تصير مثل هذا حارس تحت الشمس ادرس وارفع راس اهلك بعدها طاح وووجهي وضاق صدري مررة احس بكلمتة هذي انة جرحني بس مو اي جرح احسها علقة واكلتها زي الهم ونزل علي فجأة ! دوام طويل وراتب قليل وناس تحتقرني ليل نهار لدرجة اني صرت اكذب اذا سئلني احد زملائي بشر عساك توظفت اقول لا لسى خوفاُ من سخريتهم وضحهكم من مهنة حاس امن المصيبة الحقيقية حتى ابوي يقولي الناس تزوجت واعرست وانت الله يخلف عليك حارس سائت نفسيتي بدرجة كبيرة بعدها تركت الشغل اتمنى الزواج بس للأسف ما لقيت الوظيفة الي تشجع وتعين بعد الله على الزواج تكفون الي عنده حل او طريقة اتوظف وظيفة جيدة مثل اتوظف في البنوك او اي وظيفة ادارية تعيني على الزواج لا يقصر معي لأني تعبت بجد انا مؤهلي ثانوية ومعي دورة حاسب 3 شهور تكفون ابي مشورتكم ودعواتي لكم بالتوفيق والسعاده يارب |
دارس ثانوية ودورة حاسب 3شهور,
لا تستمع للتعليقات المحبطة من بعض الناس, غيرك ماكمل الابتدائية اوالمتوسطة وماسك منصب عالي في بعض الشركات, فلاتستهين بشهادتك, أشتغل في أي مكان ثاني غير حارس امن مثلا كاشير في الاسواق الكبيرة مثل التميمي او العثيم وبنده او مطاعم وجبات سريعة ماكدو, كودو, احتمال كبير يحطونك مسؤول فرع خصوصا انه عندك دورة حاسب, حاول تاخذ خبرة وبتكون احسن بواجد من غيرك, محاسب او بائع بسنتر بوينت, سيتي ماكس, محلات الملابس مثل الحكير....,الخ. كلهم يوظفون بثانوي واقل بعد. حسبي الله على من يحطم في الناس بتعليقاته الساخرة التافهة. ولايهمونك ولايهمك كلام الناس. |
أخي مساعد
انا اعرف أشخاص كثيرين بشهادة الكفاءة المتوسطة وحتى الابتدائية ويعملون بوظائف التعقيب ودخلهم الشهري فوق ال 10 الاف ريال ووظيفة التعقيب سهل الحصول عليها في الشركات والمؤسسات وغيرها |
لا تسمع للناس وانا اخوكك انا كنت متوظف كول سنتر الناس ما ترحمكك لو بخطا حتى بعض الناس يهزكك يوم تكلمه معليكك منهم الناس تتكلم وهم ما يدرون وانت رجال فيك خير كثير و انا اخوك اهم شي اهم شي انك لا تسمع للناس قال الله تعالى (( وإن تطع أكثر من في الأرض يضلوك عن سبيل الله إن يتبعون إلا الظن وإن هم إلا يخرصون )) توظف ولا عليكك من احد الله يرزقكك ان شاء الله
|
ياخوي ثق في نفسك ولا تكون حساس ، ايش فيها حآرس الامن أصلا ؟! وماشاء الله عندك شهادة غيرك ماعنده .. ومثل ماقالوا لك الاخوان ابحث وراح تجد لكن لا تجلس كذا بدون وظيفة خلك بوظيفتك لحد ما تلاقي افضل منها ، وكمان سجل عن بعد ادارة او انجلش حتمر السنوات بسرعة فيه ناس واصلين لنهاية الثلاثين وتوهم يكملون دراسة مب عيب ياخوي ،، ، ربي يكتب لك الخير .. موفق
|
والله حنا ياالجامعيين ماحصلنا شغل لنا سنين عطاله ويقولون فيه شغل حراس امن باالجامعات وطالبين مؤهل جامعي واختبرت ويارب سترك اتمنی الوظيفه بااللي هيبه اهم شي يعدل برنامج نومي ويطعمني من هاالفقر اللي عايشينه
|
انت حساس بزيادة يا عزيزي ...( رضى الناس غاية لا تدرك )
في ناس معهم دبلوم وبكالوريوس بعد وجالسين في بيوتهم ما حصلو من يوظفهم لانهم ما عندهم خبرة انت احسن منهم لانك كافحت واشتغلت ورضيت بالقليل وفي ناس معاهم ثانوية وماسكين مناصب ما يوصلها ولا الجامعي بسبب الخبرة الي عندهم الشهادة بالحالها مو كل شي وانا اخوك والشهادة الثانوية تعتبر شهادة وفي كثير يتمنوها وتلاقي وظايف كثيرة افضل من حارس امن وتقدر تاخذ الجامعة بالانتساب وتصير امورك زي الحلاوة بالرغم اني لا اعيب وظيفة حارس الامن بحد ذاتها وآسف على الاطالة |
[align=center]
قدم على الجامعات كل سنه لاتستلم حتى لو انتساب انت متوظف وعاز نفسك مهما كانت وظيفتك غيرك عاطل واهله يصرفون عليك ولاتتضايق من كلام الناس قدم على هرفي سمعت رواتبهم حلوه فوق ال 5000 قدم في اي مكان واذا ماعجبتك الوظيفه اتركها لكن انت المستفيد بتكون اكتسبت خبره هذي الخبره بتساعدك انك تتوظف بوظيفه احسن انت مو مره كبير قداك مشوار طويل لا تفقد الامل انا لما كنت بالجامعه كانو معي بنات متزوجات نهايه الثلاثينات مع ان عندهم مسؤليه وبيت لكن ماستسلمو وقدم على برنامج ساعد هو مثل جداره وظائف حكوميه للي مؤهلاتهم ثانوي بالتوفيق لي ولك وللجميع ان شاءالله [/align] |
أصبر وماصبركـ الا بالله
. |
بالعكس انت رجال ومعتمد على نفسك
صدقني الشغل ماهو عيب شوف أنا جامعي واشتغل حارس أمن أهم شي الواحد لا يفكر في كلام الناس ... يعني الناس راح تعطيك فلوس ماعندهم غير الكلام ... فكر في نفسك وأهتم في مستقبلك وقدم على الوظايف الاداريه ترى يطلبون الثانوي .... اهم شي فكر في نفسك وماعليك من كلام الناس صدقني لو تسمع كلام الناس راح تعب أكثر ... تؤكل على ربك وأنظر الأشياء الايجابيه في حياتك انا اشوفك انك رجال يكفي انك تصرف على نفسك وغيرك معتمد على ابوه لا تفكر في كل كلمه وحط هالشيء في بالك أنك افضل من غيرك بالتوفيق |
| الساعة الآن 12:40 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين