|
التوصيل وتنوع أفكاره .. أبسط الطرق لبدء مشروع مصغر وغير مكلف
فيه فكرة جميلة جدا لاحظتها لبعض الشباب والأخوات في مواقع التواصل خاصة ( أنستغرام وتويتر ) الفكرة مايبغالها راس مال كبير ولا شروط حكومية معقدة عشان تبدأ وهي ( التوصيل ) .. لا أقصد هنا المشاوير الخاصة والتوصيل .. بل أعني ( توصيل سلع أو بضاعة معينة ) يطلبها منك شخص ويحول لك حقها لتقوم أنت بشرائها وإيصالها إليه في مقره . يمكن بعضكم إلى الآن يتهاون بأساس الفكرة لأنه ماخذ لها صورة تقليدية .. بس الأذكياء من أبنائنا وبناتنا طلعوا بأمور جديدة وذكية في خدمات التوصيل فتحت لهم بابا للكسب وجني الأرباح لايستهان به .. فمثلا : 1- توصيل وجبات البيك من جدة للرياض :) : نعم حقيقة.. والشباب اللي بدأوها بتويتر قبل سنة هم اليوم يعلنون عن وظائف مندوبين توصيل إضافيين فالرياض واسعة والشغل مردودة مجزي . طريقتهم يشحنون بالطيران كراتين تحتوي على وجبات البيك .. على حسب الطلب اللي عندهم لأنك لازم تحجز قبل الوجبة بأربعة أيام أقل شي ولازم ( 100 ريال ) فأعلى .. يضيفون على سعر الوجبة 5 ريال ويوصلونها للعميل .. والوجبات اللي مايستلمها صاحبها أو تزيد عندهم يبسطون بها قدام المولات ويعلنون بتويتر ( آخر خمسة مسحب اللي بيلحق عليها فنحن أمام مركز غرناطة ) وتعاااااال شف الطلبات والتسابق للشراء والحجز :court: http://im84.gulfup.com/XYaVZp.jpg 2- توصيل قطع الأثاث البسيطة : طاولات وتحف وأطقم مطبخ وخزفيات .. الخ من الأسواق العالمية مثل إيكيا وهوم سنتر وساكو ... واللي يقدم الخدمة هذي ياخذ بعضهم إلى 30% من قيمة الطلب . بعضنا بيقول ليش مايروح هو ياخذها بنفسه !! أغلب اللي يطلب الأثاث والإكسسوارات هم من النساء .. وغير كذا فحتى نحن الرجال نتعاجز عن بعض المشاوير البعيدة لاتذكرنا الزحمة ودوشة الراس غير ارتباطاتنا .. والأهم من هذا كله أن اللي يقوم بالتوصيل يصير خبير بتوقيت التخفيضات والعروض واختيار القطع اللي تجذب الطلب فيقوم يعرضها بحسابه في الأنستغرام ويستغل الإقبال اللي بيصير عليها .. وبعض النساء بالأنستقرام صارت تفهم بالأثاث وقيمته حتى أصبحت بنفسها تشتري الأطقم والمواعين وتعرضها في بيتها ثم تبيعها بمكسب جيد http://scontent-a.cdninstagram.com/h...96994803_a.jpg 3- توصيل الورود والهدايا :) .. عاد هنا لازم تكون أنيق ومكشخ شوي .. أجل بتروح توصل ورد وشوكلاته على وانيت غمارة وداق بنت البكار هههههههه بنات ونساء تفننوا بالتنسيق وتشكيل الهدايا وتزيينها ويوصلها أحد أقاربهم للشخص المعني بالهدية .. أنا شفت شغل راقي بالمجال هذا أفخم من أي محلات تجارية .. وبالمناسبات أملك تلاقي حجز 4- فيه خدمة جميلة قامت بها أحد منتسبات تويتر وطلبتها بنفسي .. مالها علاقة بالتوصيل لكن بما أنها توصلك لباب البيت فسأعتبرها كذلك .. الأخت هذي لها ثنتين خوات وعملوا خدمة جميييييييييلة وهي ( عمل حفلات للأطفال ) يعني زي حفلات النجاح أو المناسبات العائلية أو حفلات الترفيه .. يجون للمقر ويملأونه بالونات ونجوم وألوان زاهية ويعملون برنامج ومسابقات للأطفال ووحدة منهم تلبس لباس كامل على شكل شخصية كرتونية ويخلون الحفلة آخر انبساط .. ويابلاش كانوا يقدمونها أيام النتائج المدرسية والأعياد بسعر 600 ريال .. والحجز من أسبوع للثاني يبدع شبابنا في مثل هذه المشاريع الذكية والأفكار التجارية اللي تفتح لهم باب خير وتحضهم على العمل والسعي ..وفي النهاية كما قال عليه السلام «ما أكل العبد طعاما أحب إلى الله من كد يده ومن بات كالا من عمله بات مغفورا له» |
أفكار جميله يعطيك العافية
|
العفو عمنا رايق .. وأنت أجمل
|
جزاك الله خير
فعلا التوصيل الآن تجارة من غير رأس مال للشباب اللي يحبون يدخلون عالم التجارة يكفي وجود سيارة فقط وتنجح وحدة من قريباتي تشتغل في التجارة من المنزل ويوصل لها شاب سعودي كل مشوار بـ ٣٠ ريال واحبانا يطلع خمسة مشاوير في اليوم واحيانا اقل واحبانا اكثر وعليك الحساب شهريا واعرف سورية تطبخ وتبيع وزوجها يوصل وسعر المشوار حسب المسافة وتكسب هي وهو واعرف شاب سعودي يشتغل في التوصيل والتخليص التعقيب يقول احيانا اعتذر عن بعض الطلبات من كثرتها التجارة اكثر ما تحتاج له الارادة والعزم والجدية وحسن التعامل مع الناس والمرونة في السعر وبعدها تتسهل الامور |
البلد مليانة خير .. بس سبحان الله طبعنا متقارب .. نحب الإتكالية ونتعايب المهن ونعيش بلا تخطيط ونقنع بالفتات واستعباد الراتب .. نجيد اختلاق الأعذار وعايشين بستر الله تعالى ولو حدث لنا لاسمح الله ظرف قاهر لأصبح الكثير زي اللي نشوفهم بالجرايد يناشدون العلاج أو فزعات أهل الخير .
أعود لكم بصورة لأحد الأخوات بالانستغرام ( الله يرزقها ) صورتها من جوال زوجتي وهي تعتذر لعميلاتها عن التأخير وتوريهم عدد الطلبات بالواتس .. قولوا ماشاء الله http://im50.gulfup.com/BvueKL.jpg |
اقتباس:
وش تجارتها؟ |
مرحبا
التوصيل فيه فايده كبيره يعني مربح لكنه مزعج ! أنا كنت أوصل طلبات - بضايع بنات اشتري واوصل واشحن - زبايني كانوا بنات فقط بس الشهاده لله كل اللي تعاملت معاهن محترمات ، تعامل معاي بنات من جميع مدن المملكه لكن بصراحه اشطرهم الحساويات :tsfiq: وحده من البنات من الاحساء تعاملت معاي بمبالغ بعشرات الالوف !!!!! بسبب الشغله هذي تعرفت اكثر على التجارة وتعرفت على المصانع واماكن بيع الجمله وغيره المهم ما اريد اطول عليكم :Thumbs: المشروع مربح لكن اللي يريد يدخله لازم يعرف انه بيربح لكن بينحاس فوق تحت انا كنت اطلع الفجر من البيت ولا ارجع الا بالليل ايام مايكون فيها شغل وايام مشغول مره وكنت اطلع شهريا" 7000 ريال تقريبا" ميزة المشروع انه بدون رأس مال ومشكلته انه ارتباط أتمنى لكم التوفيق |
افكـأر حلـوه , وخصوصـأ اللي ماعنده رأس المال
يعطيك العافيه خألد |
اقتباس:
تشتري للعملاء من إيكيا وتوصل لهم لحد الباب ب 30% من قيمة المشتريات |
اقتباس:
|
| الساعة الآن 06:03 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين