رأيكم في مشروع ( شالية ) استراحة تأجير
 

السلام عليكم ورحمة الله وبركاته



رأيكم يهمني في مشروع شاليه للأيجار على شكل استراحة قسمين رجال ونساء ومسبح خاص لكل قسم ومسطحات خضراء وألعاب أطفال


الموقع موجود على شارع رئيسي المساحة 1560 م شارع 60 غرب + شارع 20 شرق


رايكم يهمني جداً الله يوفقكم ,,,

اللي فهمته ان فيه استراحه او شاليه جاهزه وانت حاب تستأجرها صح؟

طيب وين موقعها وهل هي جديدة او قديمة وكم قيمة الايجار

لا يا عزيزي . . . انا عندي الارضين املكهم وابغى ابني عليهم الشاليه



السؤال هل المشروع مجدي أم ؟


كم التكلفة المتوقعة للمشروع ؟


هل هناك دراسة جدوى له مرت على أحدكم ؟


العائد المادي يستاهل الدخول في مثل هالمشروع ؟


اللي عنده فكرة أفضل يفيدنا ويفيد الاخوه . . .


أو اللي عنده مخطط للشالية أو يعرف مصمم ممتاز يفيدنا في هالموضوع


وفقكم الله . . . تأكدوا أن من شاور الناس شاركهم عقولهم

اذا الديره اللي انت فيها منطقه عسكريه يعني فيها عسكر وطلاب جامعه وهيك انصحك بمشروع شقق العزاب فيها خير واحسب بكم تأجر الغرفة والصاله بالشهر واحسب يا حسابه
وفيه تصاميم عماير بالرياض خاصة بالعزاب شيء خرافي وفيها افكار حلوه مثلاً مغسلة ملابس داخل العمارة خاصة بسكان العمارة تخدم العزابي الكسلان و و و اشياء كثيره ابداع بصراحه
والله يرزقنا ويرزقك

مشروع جدا ممتاز ماشاء الله

حلو استمر وانا اخوك وتوكل على الله

بالتوفيق لك وللجميع يارب

ممكن تزودنا بمعلومات اكثر من ناحية التصميم وعدد الغرف والتكلفة ومدى جدوى المشروع وفقك الله

من ناحية التصميم فيه تصاميم كثيره وعلى قد فلوسك كثير والا قليل وممكن ادلك على عمارة عزاب بالرياض تروح وتشوف كيف تصميمها
ومن ناحية التكلفة وجدوى المشروع هذي انت وشطارتك السوق يعتمد على حاجتين اساسيه عرض وطلب
اسئل نفسك قبل تبدأ في اي مشروع
هل العرض اكثر من الطلب او العكس ؟!
روح شوف عماير العزاب بالمدينة اللي فيها الارض هل هي فل او فاضية وكم معدل ايجاراتهم وهل هي تعتبر كافية وهل الموظفين العزاب كثير وهل فيه طلب متزايد وهل موقع الارض مناسب لمثل هالشيء
لانه العزاب يعانون من هالشيء حتى بالمدن الكبيره فمابالك في المدن اللي بدت في نشأه اما معمارية او سكانيه او تجاريه وحتى المدن اللي تم فيها بناء جامعات جديده مثلاً في الباحة تستاجر شقة عزاب خايسه وقديمه وبسعرها تقدر تستاجر فيه شقة بالرياض وجديده وذلك بسبب انه الطلب اكثر من العرض بينما بالرياض الفترة الاخيرة في اغلب المناطق اللي فيه صار العرض والطلب متساوي تقريباً واصبح الفرق في المميزات والخدمات التي تقدمها كل عماره على حده وصار هذا هو التنافس اللي يجذب
وهذي مجرد افكار اطرحها لك ولاني مقاول ولا شيء ولا لي خبره بالبناء وتكاليفه
واسئل الله التوفيق لي ولك

الله يجزاك خير ما قصرت