تجربتي في الشراء من المواقع الصينيه
 

السلام عليكم و رحمة الله


كتبت تعليق قبل فتره في وحده من المواضيع ان لي تجربة شراء من المواقع الصينيه و بيعها في الانستقرام
جاني استفسارات عن التفاصيل ، و اشوف ان بدل ما ارد ع الخاص ، اعرضها في موضوع لتعم الفائده و لعل احد يستفيد من تجربتي و يعطيني دعوه في هالايام الفضيله ، ي رب :h

نخش في الموضوع
انا كان لي تجربة شراء من المواقع الصينيه و بالاخص علي اكسبرس ..
و كنت ابيعها في الانستقرام
كنت اشتري بلايز شوزات اكسسوارات فساتين و اللزي منه ..

كنت اعرض المنتجات الموجوده في الموقع الصيني و احط السعر .. تجي الزبونه تطلب مني بعض المنتجات و انا اروح اشتريها لها و توصل الطلبيه بعد 3 اسابيع تقريبا و اسلمها لها ..
هذي كانت التجربه بالضبط و كانت مليانه اخطاء ..

اولا .. لما اطلب الطلبيه لزبونه .. احيانا الطلب يطول ما يوصل بسرعه بسبب مشاكل مع شركات الشحن و مع الجمارك ..
هنا مين يسكت لي البنات .. ي حراميه يالنصابه سرقتي فلوسنا ما وصلنا شي .. و كمية دعاوي الله لا يوريكم
ولما يوصلها الطلبيه تجلس ساعه تعتذر و سامحيني على كلامي السيء ..
وش عقبه .. عقب ما حطمتي ام امي :(


الان بكتب الطريقه الصحيحه للبدء بهالمشروع اللي اشوف انه مربح بدرجه كبيره بإذن الله

اللي تبي تخوض التجربه لا تسوي مثلي تعرض المنتج ثم تطلبها لزبونه
لا .. خوذي مبلغ خن نقول 500 ريال يكفي .. و اشتري من الموقع الصيني .. و لما توصل لك البضاعه
عاد ابدي صوريها تصوير احترافي و اعرضيها
لان فيه بعض البناات يخافون لا توصل لهم الطلبيه مختلفه عن اللي بالصوره في الموقع يعني ما تكون بنفس الجوده ..
و لما تصورينها انتي بنفسك .. هنا الزبونه تتطمن ..

الشي الثاني .. انصح بالبلايز و الفساتين و الاكسسوارات فقط فقط فقط ..

لان الشوزات اكرمكم الله لما تشترينها تندبل سعرها بعد الشحن مره و نص .. يعني ما استفدتي شي
السبب هو في وزنها .. هو اللي يزيد من تكلفة شحنها ..
مع اني كنت ملاحظه ان الطلب ع الشوزات اكثر بكثيييير من الباقي ..
الشوزات في المواقع الصينيه جميله حيل و تجذب البنات كثير ..
الا اذا ناويه تتجارين بها و تغلين سعرها ف على راحتك .. انا اشوف الا فضل ان تبدأين بالاسهل و الارخص ثم اذا كسبتي ابدأي بالتوسع و اشملي الشوزات بعد ..


عندك البلايز و الاكسسوارات مره رخيصه يعني مبلغ بسيط 500 ريال بتجيب لك كميه كبيره من البضاعه
بعض البلايز مثلا .. تشترينها ب 25 ريال + 5 ريال قيمة الشحن تصير 30 ريال
و تبيعينها على 120 ريال او 150 ريال

يعني لو تبدين براس مال 500 ريال + تقريبا 200 ريال قيمة الشحن و تبدين تبيعين القطعه ب 150 ريال
احسبي اول بضاعه كم جابت لك

اللي بعده .. البضاعه اللي بعدها .. كل اللي كسبتيه من البضاعه الاولى ارجعي اشتري بها طلبيه جديده وبعد ما توصلك .. ابدأي اعرضيها و بيعيها

يعني التسليم لزبونه خلال يومين بالكثر عبر شركات الشحن


انا كنت اتعامل مع وسيط علي اكسبرس ..
لان لهم مكتب بالصين و كذا تضمنين ان تجار المصانع الصينيه ما يلعبون عليك اذا عرفوا انك زبونه مو صينيه زي ما صار مع بعض العرب ..


هذي كانت تجربتي .. ادري اني تحمست و كتبت بالتفصيل الممل ..

بس كان بالنسبه لي تجربه سيئه بسبب الاخطاء اللي وقعت فيها و وضحتها لكن بالموضوع
انا استمريت تقريبا 5 شهور ثم وقفت ..

خلااااااص لا عادت من تجربه عقب الدعاوي اللي صارت لي بسبب تأخر بعض البضايع :(

يعني انتي لا تبيعين الا الين توصل لك البضاعه و تصير امام عينك وقتها توكلي على الله ..

اتمنى اشوف دعوه حلوه لاني حاليا قاعده اجهز لمشروع جديد بعيد كل البعد عن الملابس و خلافها :h:h

الله يووفقك ويفتحها عليك

اكيد الكل بيستفيد من التفاصيل اللي ذكرتيها

وهذا من طيب اصلك وحبك للخير

اي صح نسيت اتكلم عن جودة المنتجات ..

البلايز و الفساتين .. جدا عاديه يعني ممكن تخرب بعد كم غسله ..
عادي صينيه و معروف الصينيه مو ماركه كويسه ..


لكن الشووووووووووزاااات
جميله جدا جدا و مهما كديتيها ما تخرب

الى درجة اني غامرت مره و حطيت الشوز في الغساله و حطيت عليها شوية كلوركس :p
عادي اضحي بها
لكن تفاجأت لما طلعتها و كأنها جديده توني شاريتها .. لا تقطعت ولا شي

امين ي رب ، و يسعدك

السلام عليكم ورحمة الله وبركاته


من فتاوى الشيخ الشنقيطي حفظه الله
هل يجوز عرض البضاعة للبيع قبل امتلاكها ؟

الجواب :

نهي النبي صلى الله عليه وسلم عن بيع الإنسان لما لا يملك كما في حديث السنن عن حكيم بن حزام رضي الله عنه أنه سأل النبي صلى الله عليه وسلم أن الرجل يأتيه ويسأله الشيء ليس عنده فيعلمه ويبيعه عليه ثم يذهب فيشتري ويعطيه إياه فقال صلى الله عليه وسلم له : (( لا تبع ما ليس عندك )) لا يجوز للانسان أن يبيع ما لم يملكه حتى يملكه ، فمن شرط صحة البيع أن تكون مالكاً لما تبيع .

والأصل في ذلك : قوله-تعالى- : { يَا أَيُّهَا الَّذِينَ آمَنُوا لا تَأْكُلُوا أَمْوَالَكُمْ بَيْنَكُمْ بِالْبَاطِلِ إِلاَّ أَنْ تَكُونَ تِجَارَةً عَنْ تَرَاضٍ مِنْكُمْ } قيل { أَمْوَالَكُمْ } يعني أموال أخوانكم كما قال : { فَسَلِّمُوا عَلَى أَنْفُسِكُمْ }(2) يعني على أخوانكم يعني على إخوانكم ، فالشاهد من هذا أن من شرط صحة البيع الملكية ، فالذي يبيع ما لا يملك وهو ليس بوكيل وليس له ولاية لم يصح بيعه إلا في مسألة بيع الفضولي إذا أجازة المالك الحقيقي ، أما الأصل فإنه لا يصح هذا البيع ولا يجوز لك هذا البيع ؛ لأنه يشتمل على أخذ الربح وأنت لم تضمن الخسارة وهذا من الظلم وقد نهي النبي صلى الله عليه وسلم عن ربح ما لم يضمن وقال كما في حديث عائشة في السنن (( الخراج بالضمان )) فلا يجوز لأحد أن يبيع سلعة لم يملكها بعد ، والله - تعالى - أعلم .

الله يوفقك يانزف السحاب ويرزقك من حيث لاتحتسبي
اذا ممكن اعطيني رقم الوسيط اللي تعاملتي معه ولك الف شكر

الله يوفقك
بس ممكن تعطينا موقع الوسيط

ربي يوفقك ويسهلك امرك يارب

الله يوفقك فحياتك و مشروعك الجديد،
#للفائدة في محل دايم اشتري منه وبضاعته أجود وارخص من اللي جنبه ويوم سألته قال لي عمي يروح بنفسه يشتري البضاعة من الصين وتركيا.

انا كنت اشتري من السوق التنين و ابيع ب مواقع البيع ( مستعمل - حراج )

و كنت اطلع ارباح بشكل خيالي لكن اغلب البضاعه كانت ممنوعه مثل الصاعق و الليزر و رذاذ الفلفل

بس كنت ابيعه بسعر دبل 300% ل رخصه بسوق التنين كنت اشتري صاعه ب 70 و سعره بالسعودية من 400 الى 600

وكنت ابيعها ب 400 ريال و كان الطلب عليه ما يوقف من جميع مناطق المملكة