فكرة مشروع من العامل الاجنبي ؟؟
 

السلام عليكم

موضوعي هو كان رد على أحد الأخوان في موضوع طرحه أن معه مبلغ من المال وطرح عليه سوري فتح محل فلافل وقبله شخص آخر كان معه مبلغ من المال وطرح عليه مصري فتح حلاق

وكان هذا ردي هو السبب في اني اجعله في موضع خاص افضل :


مع احترامي مازال مسلسل اقناع العامل الأجنبي للسعودي بالعمل في مجال كذا وكذا مستمر قبل فترة احد الاخوان اقنعه عامل مصري بفتح حلاق ويجيب اخوانه وانت الآن يقنعك سوري بمحل فلافل ،، انا مو معترضه على هذه الأعمال لكن ليش يستطيع العمال اقناعكم بسرعة وسهولة ،، بغض النظر عن كلامهم ولا نقصد دائماً التشكيك بكلامهم لكن انت معك مبلغ 60 الف ممكن تعطي نفسك خيارات ثم تبحث انت بنفسك سواء بالنت او خلال جولات ميدانية تقصلها الى ان تصل للمشروع اللي تقنع نفسك فيه ،،
عذراً اخوي دائماً انصدم من اللي يعرضون مواضيع ان معهم فلوس وبكل سهولة يقنعهم أي احد بكل شيء ،،
اما بالنسبة لكلام السوري انه خلال شهرين تطلع 50 الف هل انت اخذت جولة ميدانية في مطاعم بيع الفلافل وهل انت تشوف كل الناس تحب هذه الوجبة فيه ناس من سنوات ما ذاقوها مع انهم كانوا يحبونها كثير قبل بس دخلت وجبات كثيرة في السوق خفت من طلب الناس على الفلافل
رجاءً رجاءً للسعوديين الأجانب عندهم خلفية عن السوق اكثر منا ما قلنا شيء لكن ليس كل شيء يكون لهم
الأفكار صارت منهم والعمل منهم والإدارة هم ووكل شيء وش بقى للسعودي ،، حتى فكرة مشروع خاص فيك(اقصد السعودي) لعمرك كله مو قادر تفكر ؟؟

فيه مشكلة بس مين القادر يشخصها ويعطي حلول ،،،

اعتذر ان كان في كلامي شيء غلط بس متفاجأه وزعلانه انا مو قادرين حتى نتعلم من أخطاء بعضنا

هذا الشيء اللي فعلا ودي افهمه كم مرة اسمع ان سعودي انصب عليه كنت أتوقع أنها أخبار ملفقه من الصحافة


هل السبب ان السعودي ظل سنوات مغيب عن السوق وفجأه بدأ يكتشفه أم اننا خرجنا أجيال بدون هوايات ودعم لمواهبهم لين لقينا هذا الحال ؟؟؟

مع ان السعوديين دائماً في تعلقاتهم في الصحف وغيرها يسبون الأجانب ولكن بالمال يسلمونهم الخيط والمخيط

الدلع والترف انتج لنا ناس زي كذا ..

الاستراحه والخمول سبب من السباب عزوف الشباب عن العمل وحب الراحة ولو تلاحظ بموقع حراج كثير ناس يبحثون عن عمال يفتحوا لهم محلات وياجرو عليهم وبكره يقول الاجنبي اكلنا كلها من ظهر العمال

في الوقت الحالي المهن والحرف تطورت وصارت هي اللي طلع فلوس ،، ما عادت الحرف والمهن القديمة اللي يتأفف من المواطنين غير مرغوبة يعني في الوقت الحاضر أصحاب الحرف والمهن هم اللي يستطيعون يكونون ثروة

أتذكر لما كنت في البكالوريس جت مرة تقريباً كبيرة شوي بالعمر وعرضت منتجاتها في السوق الخيري في الجامعة كانت عبارة عن السدو ولكن سوته شنط صغيرة جداً للجوالات واكسسوارات كان شغلها راقي مع انه شعبي كذلك طلعت وحدة بالتلفزيون تسوي كذا واستطاعت انها تصرف على ابناءها من المهنة ،،

كذلك (الرسم )واللي الأن أصبحت هي فعلاً رائجة ،، قبل فترة انتشر في الاخبار عن ضابط سعودي نحات ورسام بيعت واحدة من منحوتاته في دبي بمليون ،، وفعلاً تستحق كانت جميلة جداً
وهذا الخبر عنه http://sabq.org/2SHfde

يعني كون طبيب ولكن رسام ،، مثل لما تكون أيضاً البنت معلمة او في أي مهنة ولكن لديها حرفة او صنعة

احس الشيء اللي راح يقضي على البطالة في السعودية هي الحرف والمهن لازم يكون للشخص صنعة ،، كالرسم والخياطة والحدادة و النجارة للأسف المهن للرجال اكثر بكثير من مهن النساء (النجارة ) رائعة جداً لو تعلموها شباب وافتحوا لهم منجرة والتصميم من عندهم ،، احد الاخوان كان منزل رابط عن هذه المهنة شيء خيال وأفكار روعة

كذلك السباكة يعني لو اعتمدنا على العمالة و سافر العامل الجيد عندك لبلده من يغطي مكانه ؟؟ اكيد بتتورط عشان كذا بعض المحلات والمطاعم أحيانا ً نحس يتغير انتاجهم او يقل جودته او تروح النكهة اللي كانت تميزهم

بيض الله وجهك

للرفع

الله المستعان

انا من الناس الي يجوني اجناس يعرضو علي انهم يسوون مشاريع باسمي المشكله يجيك عامل ويقول انا اعطيك 50 الف واكثر ونسوي مشروع ويقول انت جالس في البيت اعطيك كل شهر 1000 ريال غير وقت التجديد والتعقيب يعطيني مبلغ ووو الكثير من الاغراءات طبعا عن نفسي ارفض اسلم احد الخيط والمخيط
لاكن البعض هداه الله ما يدري ان بعضها عوقبها وخيمة

هذه هي المشكلة والا كيف تغادر ال 160 مليار سنويا الى الخارج.مصيبتنا في ضعفنا وكسلنا ووجود الطفيليين اهل ال 1000 وال 500 ريال وهم من كبار المجرمبن في حق اقتصادنا الوطني.كتاجر حاربونا العمالة بسلاح أبناء واخوتنا (الاسم)

عني انا .. راضي ادخل معي شخص شريك بالمجهود بشرط انه مبدع فيه يفيدني واستفيد منه .. مافيها شي ان الواحد يتعلم وبعدين لكل حادث حديث

غالبية الاشخاص اللي يسلمون مالهم لاشخاص اخرين لغرض التجاره والاستفاده هؤلاء يخافون من الخسارة لانهم مبتدئين وخائفين تضيع رؤس اموالهم عشان كذا يبون يستفيدون بأقل الخسائر

صحيح انه غلط اني اسلم مالي لشخص مجهول وهو اللي يتصرف فيه على كيفه .. ولكن افضل ان الشخص يكون مع العامل ويتواجد معه بأستمرار ليتعلم الصنعه خصوصا اذا كان العامل مبدع ولديه خبرة كبيرة .. ( لا تعطيني سمكه ولكن علمني كيف اصطاد )