حلول البطالة Unemployment Solutions - ♒ ♒ بسكت وسرِّي ساجنه في حناياي ♒ ♒

تعبت من ممشى على غير مشهاي
وتعبت من صبرٍ على غير غايه
طاحت عزومي لين قلّت نواياي
وابعدت من مبداي صوب النهايه
مغير اهوجس واضرب الراي بالراي
واثر المغربل ما يخلصه رايه
الوقت ذا هو بطبعه وأنا إياي
انا صدوق وذا زمان الدعايه
ياللهْ تعاونّي على كبر بلواي
وياللهْ تقدِّيني طريق الهدايه
اشكي من الماضي وخوفي من الجاي
ولي في ملمات اليالي ذرايه
لوني عرفت دواي ماخفت من داي
وآخرة طبّك يالطبيب الوقايه
سبحان من يعرف مقاسيم دنياي
في صفحةٍ ما تنعرض للقرايه
اذا غدى وقتي جزوعٍ من احكاي
ادوي بهاجوسي على كل نايه
فلا كسرني هاجسي صوب مركاي
فآية جبرني نخوة دموعي آيه
وان شفت همي ما نقص من تشكواي
اخترت من نطح الهموم القفايه
وقتٍ غدا كنّه عليْ اكبر عداي
يفرح عليّ مجمعين الوشايه
صادفت صكات الزمن فاول صباي
وصادمت قد شيبي بعرض المرايه
آعدِّ غلطاتي واحسبْ خطاياي
لا نيب مندلٍ ولا نيب تايه
آيسْ وتيبس عقب مايس شفاياي
وآمِلْ وبعض آمال قلبي غوايه
لا آسوم انا وجهي ولا آمد يمناي
ثنتين تحسب للمذله لدايه
بلقي هموم الليالي مقفّاي
لين اقلب اخر صفحةٍ للروايه
برضى بمقسومي على طية رشاي
لا عاد لي شفٍ ولالي هوايه
مالي جدى الا ونيني ودعواي
وعناية الله ما وراها عنايه
بسكت وسرِّي ساجنه في حناياي
ألين تروي المقبلات الحكايه