|
حلمت و تعبت ...
بسم الله الرحمن الرحيم ..
كل ما يكبر الانسان تصغر حاجات كثيره فعقله كان معتبرها شي كبيررررر بالنسبه له انا زي اي بنت عندي احلام كبيره وكثيره شي منها صرت احسو ابعد من المستحيل وشي اي شخص مقتدر يقدر يحققها وببساطه .. كل ما اتقدمت فالعمر تقل وتتلاشى احلامي اختنقت في كثير من اللحظات حسيت اني عاجزه عن تقديم ابسط الاشياء لمن حولي حتى الابتسامه كانت ما تفارق وجهي الآن بصعوبه ابتسم وعيوني تدمع انا لساتني فالعشرينات لكن تفكيري وعقليتي صارت فالستينات كبرت وصرت افكر فالماديات المستحيله ... تعبت اضحك على حالي وانا وضعي ما تغير فيه شي سنين عدت وانا نفس حالتي بل زاد تعقيدا والحمدلله على كل حال اصعب شي لما تكون انت مصدر السعاده لاشخاص والآن انت النكد والالم والحزن لهم نفسيتي تعبت بسبب اني اجامل واجامل على حساب نفسي والأن وصلت لوضع صعب اني اجامل فيه حتى نفسي .. عاجزه جدااا والفقر دمرني ودمر احلامي و مستقبلي حتى دراسه او دوررات استفيد منها ما قدرت ادرس بسبب الظروف والفقر اكره اطلب من شخص وانا اعلم انو محتاج اكثر مني فاضطر اكبت كل رغباتي وابتلعها و اقووول ما انكتبت ليا سبحان الله ساعات تجيني قوه واتحمل وساعات طول الليل ابكي وبالساعات من شده قهري .. خلاص تعبت من الانتظار وعرفت انو ما راح يتغير شي ف وضعي بس نفسي ترجع ابتسامتي وحيوتي معد ابغى افكر فالدراسه والفلوس والمستقبل لأني جالسه اتعذب تحت مخدتي كل يوم و عالفاضي ما راح اطول شي ... والحمدلله على كل حال مجرد فضفضه لأني اختنقت وماعندي احد احكيلو عن اللي بداخلي ... |
حبيبتي واختي في الله
احلامنا اللي بالصغر كنا نشوفها شي عظيم وكبير ونتمنى نكبر لجل نحققها ولما نكبر نلاقي ان احلامنا حتى وان كانت يسيره وسهله لكن صعب تحقيقها بسبب الظروف اللي تحيط فينا وصرنا نتنازل عن الاحلام بحجة الاولى والاهم فيها .لحد ماتتقلص الاحلام شيئا فشيئا حبيبتي امر المسلم كله خير لما ننظر للامور من زاويه مغلفه ومن ثقب صغير شعور يبعث في انفسنا الالم وشعور بالنقص وشعور بعدم الاكتمال كباقي من هم في عمرتس ونغلق ع انفسنا الظلام وما نسمح للامل واشعة الشمس في التسلل لحياتنا حبيبتي امر المسلم كله خير وربي صرف عنتس الامور هذي كلها لان اكيد فيها خير وربي كاتب لتس الخير والرزق لكن يبي منتس الصبر يبي يشوف عبده كيف صبور وكيف يلح بالدعاء وكيف يتقرب له وماينساه بوقت الرخا وبوقت الشده الانسان لازم يطلع من القوقعه اللي عايش فيها يفتش في نفسه اكيد وحتما راح يﻻقي حاجه تفيده حاجه يفيد نفسه ويفيد غيره والابتسامه ماتطلع منتس الا باقتناع ابتسمي كون رب العالمين وعد عباده الصابرين ابتسمي ان بكرا اجمل بإذن الله ابتسمي انتس ولله الحمد بصحه وعافيه وانتس ماتشكين من شي ابتسمي في امور كثيره بحياتس تلزمتس ع الابتسامه فكري فيها وتمعني في اللي حولتس وجود الوالدين والاهل نعمه تستحق الابتسامه امور كثيره لما تفكري فيها راح تقتنعين من نفستس ان الابتسامه واجبه حتى بوجود المعوقات اللي تحيل بينتس وبين تحقيق احلامتس ومتطلباتس بكرا اجمل لتس باذن الله الزمي الاذكار والقران ابحثي عن نفستس في نفستس وكوني لتس من الشي اللي تحبينه وتتقنينه مهنه او عمل يسعدتس ويسعد اللي حولتس ويرزقتس منه اياتس تحزنين حبيبتي ابتسمي وثقتس بالله ويقينتس الكامل فيه استغفري ورددي دايم ( لا اله الا انت سبحانك اني كنت من الظالمين ) اسعدي نفستس بنفستس لجل تسعدين تللي حولتس سعادتس احيانا تكون سبب في اسعاد الغير وحنا هنا خواتس مابه شك احترامي حبيبتي :w |
قبل ذي بدء اتفق كثيراً على ما اوردته اخيتي بنت قحطان بالاضافة ليش كل هاليأس ونكك يحمل الامل بالاضافة إلى أنكـِ لازلتِ في مقتبل العمر ولا زالت الحياة امامك إن شاء الله حافلة بالسعادة اخيتي كل شخص منا كانت لدية حلم بل أحلام وهدف يتمنى الوصول إليه وليس كل هؤلاء الاشخاص حققو أحلامهم و وصلوا لما كانو يريدون قد تطول المدة لتحقيق حلمنا لذلك نحتاج إلى الصبر و عدم اليأس إبتسمي و كوني على إستمرار في مصدر السعادة لكـِ ولمن يحيطون بكـِ فالحياة مليئة بالمتغيرات إيجاباً وسلباً ومن يريد أن يحقق اهدافه و أحلامه عليه بالتمسك بتحقيق هدفه مهما واجهتة من عقبات هناك مقولة عليكـِ التقيد بها هي ( أيّما شيء تحلم به فأنت تستطيع تحقيقه ) إذاً هنا نحتاج إلى الثقة بالنفس والعمل في السعي خلف هذا الحلم نصيحة اعتبري هالمرحلة ( إستراحة محارب ) هناك حلول كثيرة فقط واصلي السعي خلف احلامك ولا تيأسي وقبل كل ما ذكرت تذكري و اُمني بأن ( القسمه والارزاق بيد الله سبحانه وتعالي ) و إلزمي الاستغفار يقول تعالى في محكم التنزيل ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً & يُرْسِلِ السَّمَاء عَلَيْكُم مِّدْرَاراً & وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً ) اسأل الله جلّ في علاه بأن يحقق لكـِ وللجميع أحلامكم تحيتي |
بنتن لقحطان ..
الله يسعد قلبك كلامك لطيف ومثل البلسم على قلبي كل حرف كتبتيه انت صدقتي فيه واوافقك عليه لأن كل ما ذكرتيه كنت اقوله لنفسي واصبرها واصبر من حولي بس حالياً انا واصله لمرحله وجعت قلبي انا الآن جدا ضعيفه وهشه دمعتي معد اتحكم بيها ما عمري بكيت عند احد .. و حتى احلامي معد ابغاها هيا سبب الامي وتعاستي بعد ما كنت ابتسم من اجلها الآن اكره حتى اتخيلها بس ابغى ارجع زي ما كنت .. اشكرك مره ثانيه اختي الغاليه اعطيتيني من وقتك اسئل الله لك التوفيق والسداد في الدارين ... جريح شعور .. جزاك الله كل خير ردك جميل ومريح للقلب الله يبارك فيك ويعطيك حتى يرضيك اسمي مملوء بالتفاؤل لأن انا كذا وشخصيتي كذا من صغري عندي امل وطموح وثقه ويقين بربنا لكن حاليا ما ادري ايش اللي أمر فيه شي متعب جداَ انا مني عارفه نفسي ليش وصلت لذي المرحله والحمدله على كل حال.... |
الله يسر امرك ويفرج همك ويفك ضيقتك ويفتح ابواب الخير بوجهك .. الكل لابد يعاني من شي والنفوس ضاقت ولكن رجائنا بالله سبحانه مايخيب مهما اشتدت علينا الضيقات ..
وتذكري .. كل ما اشتدت الاوضاع وزادت الضيقات .. كل مايقرب الفرج اكثر واكثر اكثري من الدعاء وخلي املك بالله كبير .. وقولي معي : يافارج الهم .. وياكاشف الغم .. فرج همي ، ويسر امري ، وارحم ضعفي وقلة حيلتي ، وارزقني من حيث لا احتسب يارب العالمين .. الله يفرجها علينا وعليك يارب ويسر امرنا وامرك ويفتح لك ابواب الخير والسعاده وراحه البال ويشرح صدرك .. |
اشكرك اخي الفاضل وجزاك ربي خير الجزاء ..
والله ييسر امورنا جميعاً ويبعد عننا الضيق والاحزان .. ربنا كريم .. |
يافارج الهم .. وياكاشف الغم .. فرج همي ، ويسر امري ، وارحم ضعفي وقلة حيلتي ، وارزقني من حيث لا احتسب يارب العالمين ..
دعاء رائع اشكرك .. |
اقتباس:
تعقيب بسيط التعب اللي تتكلمين عنه إجعليه وقتي ليس إلا بإاردتكـِ بطموحكـِ بعزيمتكـِ لا تستلمين طالما ترغبين بتحقيق حلمك اقتباس:
إعملي مدونه أو بموضوعك هذا إجعليه متنفس لكـِ |
مساء النور والورد
اللي عندك يمكن اكتئاب وهذا يجي اغلب اوكل البشر ويمكن لا يمكن سبب اللي حولك او يمكن انتي ولاتزعلين بتكفخني ههههه تبين نصيحتي اعتبري العمر مجرد رقم شوفي العجيز مريم نور عمرها ٨٤ وتقول احس عمري ٣٥ وتسولف الى الان في سوالف تدخل مخ وفي لا بس حافظت على نفسها هذا مغزى وادري مجتمع هو سبب انهم يحسسون البنت اذا كبرت خلاص عجزت مجتمع مريض ماعليك منه وكبرتي خير ياطير انك بصحه جيده ومحافظه علی نفسك الف حمد وشكر بسلامتهم هم وتفكيرهم ساعدي نفسك بكل ماتقدرين انك تطلعين من هل دوامه الفقر كلنا فقراء مهو بس انتي توظفي بيصير وضعك افضل شغلي مخك ادخلي قسم مشاريع وافكار في افكار بسيطه وماتكلف وتقولين عاجزه حبيبتي في معاقين وهم بكراسيهم ماقالو حنا عاجزين ونفسيتهم تهبل وعايشين حياتهم الوظايف ياكثرها الحين اذا توظفتي اقلها تطلعين من عند مخدتك تابعي قسم توظيف هنا ا و اذا كنتي بالرياض روحي مكتب عصر الاريبيه للتوظيف او تلقينهم بتويتر او اقرب موارد بشريه وفي اشياء بالحياه ماتحتاج فلوس منها الضحك زيارة الناس الايجابين او حتكاك فيهم اقلها تكلمينهم لاين مجانا وفي اشياء بين ايدينا وحنا مو مقدرينها نعم لاتعد ولاتحصى التنفس النظر الاهل انك تنامين ب امان الاكل حبي الحياة وانبسطي حطيلك جدول يومي بجوالك وطبقيه تقربك الى الله اهم شيء تابعي باليوتيوب ابراهيم الفقي وغيره من ايجابين حملي كتب اراده وغيرها اكتبي باليوتيوب فيلم السر نصه صدق ونصه خبال هههههه وفي كتاب لهم المهم قسمي يومك للعنايه ببشرتك وشعرك لو ب اشياء من مطبخ بتلقين خلطات بالنت لين تدوخين سوي رياضه كيجل وسكوات وكثري قراءه وزيدي المعرفه تعلمي لغه اذا والدينك عايشين خصصي وقت لسوالف معهم اذا يمدي اقلها اطلعو للحديقه حاولي تستمتعين ب اقل اشياء واهم شيء الوظيفه اوتجاره صغيره تبدين فيها ضيفي بسنابك |
المشاهير اقصد الناس اللي نستفيد منهم
امثال نوف الفيصل هل بنت تتكلم تتكلم عن ايجابيه والمعرفه استفدت منها وعبدالله المغلوث وامانب العجلان وعمر العريفي وماجد الصباح في قائمه ماتحضرني الان ضيفي او حاوطي نفسك فقط بالايجابيين ولي تحسين راح يغيرونك للأفضل وفي وظايف كثير ماتحتاج ذيك دراسه وتقولين اجامل واجامل منتي مجبوره تجاملين مع انه الكلمه طيبه حسنه بس مو علی حساب نفسك نصيحه عطي نفسك الأولويه بكل شيء اذا ماحبيتي نفسك ماراح تقدرين تحبين اللي حولك اما طول ليل تبكين لاتحملين نفسك مالاطاقة لها بعدين تلومين الفقر بكل شيء مو معقوله الحزن والقهر والنظ يخرب البشره وشعر ويزيد الأمراض وليش هذا كله وتری اسولف معك لأنك كنك تتكلمين معي قبل كم سنه بالنسبه لدراسه كملتها علی كبر وهذاني ادرس وعمر 29 هذا العمر فقط بالميلاديه داخليا احس عمري اممم 20 او 17 هههههه واكرر القراءه ثم القراءه كل ماقريتي اكثر تتغير نظرتك للحياة وتشغلين مخك شيء اخير اذا حسيتي نفسك ماقدرتي مافيها شيء تروحين لدكتور نفسي اقلها تسولفين معه ومو ضروري الناس تعرف فقط اي احد مقرب منك اذا محتاجه اي مساعده الخاص مفتوح مع اني انسانه بسيطه وخبله شوي ههههه ومو متخصصه بس يمكن اقدر افيدك ويفضل تتواصلين طبعاً مع احد مختص يرتب لك حياتك وانتي بعد لحالك تقدرين وهذا اللي سويته انا من كم سنه الحمدلله تعبت من كتابه اهم شيء خليك معانا بالمنتدى اتمنی موضوعك جاي يكون انك انسانه تغيرتي ومبسووطه وحابه الحياة وخلاص ماعاد تلومين الفقر اكتبي بجوجل (ومانحن الانتيجة) بس كذا اكتبي بيطلع لك كلام ايجابي كثير،،،،،،،،،،،،،، او الطب النبوي وسيرة انبياء وعن كل شي وفي اضطراب هرمونات يسبب مشاكل بنفسيه المهم اللي ابيك تعرفينه مهو بس انتي كذا الاغلب مرينا بهل نفسيه عادي حبي نفسك بكل حالاتها وساعديها ادري كلامي ملخبط بس خذي منه المفيد الله يحفظك ويريح بالك وطبعآ بنتن لقحطان كلامك رائع صورت شاشه عشان اقراءه اكثر من مره👏🏼 |
| الساعة الآن 10:02 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين