بخصوص مغاسل الملابس
 

السلام عليكم ورحمة الله وبركاته

أسعد الله اوقاتكم بكل خير

ي جماعة عندي استفسار بخصوص مغاسل الملابس والبطانيات والمفارش ... إلخ
انتوا عارفين كيف منتشره بشكل كبير جدا في الاحياء والشوراع الرئيسية وعند مداخل الاحياء .
وهذا إن دل فهو مشروع ناجح والمردود المالي يعتبر ممتاز جدا
ولكن لو جينا لملاك المغاسل 99.99% منهم مقبلها على العمال اللي يعملون بالمغسلة !!

عندي كم سؤال محيرني من فتره ولازم نفك ((الشفره)) المعقده تجاه هذه العادة والتي بلا شك انها مضره بأقتصادنا بشكل كبير جدا


ماهو سبب عزوف المستثمرين بمجال المغاسل عن الجرد والمراقبة اليومية ؟؟
لماذا رضي المستثمر بمبلغ لا يتجاوز 4000 ريال في الشهر وترك الأموال الطائلة لغيره ؟؟

وعلى فكره بعضهم عنده اكثر من 6 و7 و8 مغاسل !
ومع ذلك مقبلها للعماله !
بالرغم من ان المنافسه في مجال المغاسل قوي وسهل
لايوجد منافسين كبار بالمملكة كاملة إلا اثنين ,,, الجبر والرهدن

واعتقد لو ان الارباح قليله ماكان شفنا الرهدن والجبر بينهم تنافس على الخدمة وكثرة انتشار الفروع
ولو قلنا ان الجرد صعب ماكان الرهدن والجبر اصبحوا شركات عملاقة ورائدة !!
وشركة الرهدن الان مشاء الله عليها وسعت من نشاطها واصبحت منتجه لصابون الملابس :Thumbs:

ملاحظة بسيطة ي جماعة : لما اروح لأقرب مغسلة و أكوي مستعجل ثوب وشماغ خلال دقيقتين يكسب 4 ريال
يعني بالساعة كم يطلع ؟؟
وبنهاية اليوم كم المبلغ اللي يقفل عليه ؟؟
ي جماعة اعتقد والله أعلم ان مشروع المغسله هو المشروع (ابو الذهب) لكن صاحب المغسله جاز له التسدح والتبطح
والنوم ونهاية الشهر مبلغ مقطوع ولا يدري عن اجار ولا فاتورة
ولكن ع قول المثل : ياغافل لك الله .

اتمنى ابداء الرأي منكم
وآسف على الاطالة ... والسلام عليكم .

رد: بخصوص مغاسل الملابس
 

نفس السؤال

رد: بخصوص مغاسل الملابس
 

مشكلة العمالة عندنا انهم يخسرون عمداً صاحب الحلال وما يشتغلون بذمة وضمير
علشان يضطر يقتنع بالقليل .. بعدها يمسكونها هم وتشوف الشغل الصح
المفترض يكون فيه حل جذري للمشكلة هذي
وصعب على المالك يتابع المحل خصوصا اذا عنده اكثر من فرع

فعلا لابد لحل جذري
ولكن لو قلنا مثل ماذكرت صعب على المالك بالمتابعة
ماكان شفنا الرهدن والجبر بالقمه 👍

رد: بخصوص مغاسل الملابس
 

هذولا شركات قوية والوضع مختلف
احنا نتكلم عن الأفراد .. اللي يفتح محل بتحويشة العمر

اتوقع واحد من الحلول ان يمسك المحل ( هندي ) مثلاُ
ويكون هو المدير وله نسبة من الأرباح غير راتبه .. وهو اللي يختار العمالة ويجيبهم
وبكذا نضمن ان العمالة بيكون عليهم رقابة من المدير وغير كذا ولائهم له يكون اقوى

ما اعتقد ان فيه فرق كبير بين الأفراد والشركات الكبيرة ي صاحبي
النشاط نفس النشاط بس الفرق بالرقابة .
بالنسبة لفكرة انك تضع مدير تعتبر جيدة نوعا ما
ولكن الخوف ان يكون حاميها حراميها.

رد: بخصوص مغاسل الملابس
 

الفرق في القوة المادية
الشركة ممكن توفر بسهولة برنامج محاسبي للفواتير يحميها
وغير كذا عندها مبلغ قوي تستند عليه في الأزمات .. مثال ( ترحيل وطرد اي عامل مخالف وإستقدام بديل)

المواطن حده دفتر فواتير ممكن العامل يطبع مثله ويشتغل عليه
واستقدامه مكلف وترحيله واستقدام بديل مكلف أكثر

كلام جميل
بس تعليقا على البرامج المحاسبية اعتقد ان
اصبحت رخيصة مقارنة بالسابق والسبب يعود لكثرة مسوقين
هذه البرامج .
اما بالنسبة لمشاكل العماله فهي وارده حتى مع السواقين
الخادمات
إذا اردت ترحيل عامل،،، مكتب العمل يتيح لك استخراج
تأشيرة اخرى (بديلة)بكل يسر وانت عارف اصبحت المعاملات
اكترونية وخففت الكثير من العناء من ما كنا عليه السابق .
وايضا انت ذكرت انها (ازمات) والأزمات إذا وضعنها
عائق ننوم ازين واريح.
وفيه ملاحظه بسيطه بالنسبة لليد العاملة اغلب العمالة
المتعارف عليها هي باكستان بنقلاديش اليمن هذولا طال عمرك
ان جو يشتغلون معك اعرف انك راح تقبل المغسله
وانت عارف السبب يسمعون الخطط من نفس جنسهم ويطبقها عليك
وهناك ايدي عامله ممتازة جدا
والأغلبية متغاظي عنها وهي إندونيسيا و الفلبين
واللي يقولك مايعرفون قله انت اللي ماتعرف شي.
ولا تنسى تعامل المدير مع موظفه وهذي تلعب دور كبير في
الإنتاجية واحترام قوانين المنشأة.
واختم بحقيقة لابد الجميع يعرفها وهي
ان العمالة الغير مسلمة هم اوفى وأصدق وأمناء
وهذا من تجارب اغلب من لديهم عمالة
(مع الأسف هذا واقع)

رد: بخصوص مغاسل الملابس
 

انا اشوف فواتير مع كاميرا مع يعني رقابة شوي صارمة وان شاء الله يمشي الحال
مع تفهيم العامل بوجود السرقة يتم تسفيرة نهائياً

رد: بخصوص مغاسل الملابس
 

اتفق معك يا اخ عبدالله بما ذكرت
المشكلة تقع اولاً على صاحب المحل في اول دخل يكون الدخل قليل كما هو متعراف عليه ولكن بعده يكون الدخل ممتاز والارباح عاليه ضاحب المحل يعطي العامل راتب قليل والبعض الاخر يؤخر راتب العمل لشهر الآخر بدعوى انه لا يوجد لديه مال فطبيعي العامل يسرق والبعض يطفش الزبائن سواء بالتأخير المتعمد أو بالاهمال ، اتذكر قصة سمعتها أن احد الاشخاص فتح له بقالة ويقول كل ما ادخل على العامل يجده عابس الوجه ويرفع صوته على الزبائن فكان الارباح تقل كل شهر ، فقبل المحل على العامل يقول فلما جاء الى البقالة واذا بالعمال ابتسامته تشوفها من بعيد
العمال الان اصبحوا لا يعملون في الراتب فأغلبهم عندما تقول له راتب يرفض يُريد صاحب المحل هو من يأخذ راتب عنده !!!
الاخ سلطان ذكر الكامير نعم الكاميرا مهمه جداً وايضاً الجرد لا بد من مسألت العمل وفي حال كان هناك دخل جيد اعطي العامل فوك راتبه 100 او 200 رايال او اجمعها له خلال 6 شهور واعطه 1200 ريال
من الافضل ان تكون هناك زيارات مفاجأة وفي حال انك شكيت انه يسرق ارسل له اي احد من اصدقاك ودعه يشتري او يكوي ملابس ثم فاجأة بالزيارة ، من الافضل ايضاً ان يكون العمال لا يعرفون بعض