|
مشروع مساج علاجي يدخل اكثر من 3000 ريال باليوم !!
السلام عليكم ورحمة الله وبركاته اخواني .. مالكم بالطويلة .. امس كنت في محل مساج متخصص في العلاج الطبيعي لآلام الظهر وعروق الجسم المهم انه اخذ مني 300 ريال على الجلسة الواحدة للعلاج ! والمحل مزحوم .. وانا جالس في الانتظار جلست اقلب وأحك راسي : قلت اللحين اخذ مني 300 ريال .. وفي الانتظار اكثر من 5 اشخاص .. هذا واحنا مابين المغرب للعشاء .. طيب ووقت الصباح والعصر وبعد العشاء .. كم بيدخل هالمحل ؟؟ مع ان المحل فتحة واحدة بس دورين .. واطلع طال عمرك الجوال وأفتح الحاسبة : واكتب 300 ريال × 10 اشخاص في اليوم فقط = 3000 ريال باليوم !!! والله انجنيت .. واضرب الـ 3000 في 30 يوم طلعلي = 90,000 ريال بالشهر !!! ياولد تقوله صادق ! والمشكلة ان المحل يعني بالكثير فيه 8 عمالة اندونيسيين واثنين استقبال قلت طيب كم رواتب هالعمالة ؟ اكيد 1500 ريال في الشهر لكل عامل .. يعني 50 ريال في اليوم خمسين ريال في اليوم × 10 عمال = 500 ريال في اليوم × 30 يوم = 15,000 ريال رواتب عمالة بالشهر طيب والايجار ! قلت يمكن على هالمحل ياخذ 50 الف بالسنة يعني 4166 ريال بالشهر يعني 138 ريال باليوم قلت طيب اكيد له امور تشغيليه واشياء ثانية قلت خلنا نحط 3000 ريال بالشهر يعني 100 ريال باليوم فواتير ما فواتير قلت خلها 1000 ريال بالشهر يعني 33 ريال باليوم ياولد خلنا نحسب الصافي بالشهر : رواتب : 15 الف ريال ايجار : 4166 ريال امور تشغيلية : 3000 ريال فواتير : 1000 ريال المجموع : 23,166 ريال شهري مصروفات طيب قلنا يدخل بالشهر 90,000 ريال يعني ننقص المصروفات = 66,800 ريال بالشهر صافي ربح !! يعني ربح صافي : 800,000 ريال سنوي من 10 زباين فقط بواقع 300 ريال من كل واحد !! هو صدق ولا انا غلطان .. ترى بديت انلحس .. وكم راس مال هالمشروع للي يبي يفتح :) |
رد: مشروع مساج علاجي يدخل اكثر من 3000 ريال باليوم !!
والله البلد فيها خير
بس حنا يالسعوديين متخلفين و مرضى ونروح نركض ورى هالوظائف الي ما فيها خير عشان هالمعاش الي ينزل آخر الشهر و ضحكو علينا وسموه الراتب يعني بس يعيشك يومك والأجانب لاعبين في هالبلد تقول بلدهم بس هالمحل وين وفي أي مدينه كأن أسعاره مبالغ فيها جدا |
رد: مشروع مساج علاجي يدخل اكثر من 3000 ريال باليوم !!
يا اخواني محلات المساج والعلاج الطبيعي لاحظت انتشرت بشكل واسع كل حي فيه محليين او ثلاث والسبب لان الاقبال عليه ب الملاييين ؟خل العلاج الطبيعي ع جنب بتكلم عن المساج والبخار لا يقل الدخل الشهري اقل شي 80 الف . أنت عندك ناس ب دورات عسكريه يطلعون كل خميس اول مايفكر فيه اللي هو البخار وتنظيف الجسم من الكرف؟ واسعارهم مع البخار اقل شي 300 وعليك الحساب . ف مشروع المساج ناجح بشكل محد يتوقع .
|
رد: مشروع مساج علاجي يدخل اكثر من 3000 ريال باليوم !!
ماشاء الله تبارك الله فعلا كلامك واقعي قبل فتره كنت انتظار قرابه الساعتنين ووعليه زحمه
لاكن كل الكلام هذا نختصره بين قوسين ( عندك امكانيه ) انك تفتح مثل هالمشروع يبيله مصاريف عااليه وعدد عمال ما يقل عن 5 وايضا المكان يبيله تجهيز كامل وبعد يبيلك علاجات وادويه والموقع اهم شي وبعد كذا نقول الله يبارك لك نصيحه للجميع ... احلم على قدك ولا تطالع السما ... لان واجهت ناس كانو متعلقين بمشاريع وتفاجئو بتكلفتها العاليه |
رد: مشروع مساج علاجي يدخل اكثر من 3000 ريال باليوم !!
مافي شي مستحيل ونا اخوك
|
رد: مشروع مساج علاجي يدخل اكثر من 3000 ريال باليوم !!
اقتباس:
لا حلم ولا حاجة .. اللي يبي يشتغل بيجيه الرزق واللحين فيه جهات دعم من بنك تسليف وريادة وغيرها تعطي من 50 الى 300 الف ريال دعم للمشاريع بأقساط ميسرة وبدون فوائد .. او الدخول شراكة مع اشخاص مستثمرين لتكوين راس المال .. والمصاريف كتبتها فوق تقريبي ... يعني لو تسوي دراسة جدوى للمشروع بيطلع لك المصاريف والامور التشغيلية والاصول الثابتة من ديكورات ومواد وانوار وغيرها .. وكل شيء بدراسة الجدوى الاقتصادية والمالية بيطلع لك بالملي تكلفة المشروع ... مافي شيء مستحيل المهم هو البدء بالعمل بس والله اذا جلسة مساج وعلاج بـ 300 ريال شيء طيب ومتوفر عند الجميع ولو قنا ان بيجيك زباين كل يوم 15 زبون فقط بتدخل 135,000 ريال بالشهر قبل خصم المصروفات يعني لو قلت بيكلفك المشروع 500,000 ريال راح تدخل راس مالك في ظرف سنة بس المهم هو العمل في المشروع بنفسك وتديره بنفسك وبتشوف خير والله الفكرة براسي بس مدري عن الاشتراطات الصحية فيه وطريقة فتحه وهذي يبيلها دراسة جدوى ويبيلها جلسة اسبوع بكاس شاهي بالنعناع .. :) .. |
اقتباس:
انصحك تطلب دراسه جدوى من موقع موثق ومعتمد مثل موقع كيف ابدا وتواصل معهم واطلب دراسه الجدوى تقرا دراسه الجدوى ومعك الشاهي دوش وعلى البحر واذا والله شفت انها مناسبه لك تروح على طول البلديه وتشوف وش شروطهم عندك البلديه الدفاع المدني بعدها سلمك الله تروح تبحث عن المكان والموقع المناسب او خذ دراسه الجدوى وقدمها على معهد رياده او بنك التسليف او صندوق المئويه بشرط اذا كان ما يكلف اكثر من 300الف وفقك الله اخوي وعقبال ما نسمع انك فتحت |
رد: مشروع مساج علاجي يدخل اكثر من 3000 ريال باليوم !!
بنك التسليف والجهات التمويلية لا توافق على المشاريع المعتمدة على الاجانب 80% يريدون مشاريع يعمل بها السعودي
|
رد: مشروع مساج علاجي يدخل اكثر من 3000 ريال باليوم !!
اقتباس:
دراسة الجدوى لحالها عمل ونزول للسوق وسؤال ودراسة مالية للمشروع بالكامل واللي يعتمد على دراسة الجدوى من المكاتب فهذا اول فشل للمشروع .. لأن اللي نزل للسوق وشاف الاسعار والمواقع والاشتراطات والايجار والاستقدام وغيرها من الامور اللي تنحط في دراسة الجدوى الاقتصادية والفنية غير انك تاخذها جاهزة من مكتب ماشاف المشروع واموره .. لأن الموقع للمشروع لحالة يبيله دراسة والدخل اليومي يبيله دراسة والتسويق للمشروع والمبيعات كل هالامور يبيلها دراسة لإعادة رأس المال وتشغيل المشروع .. والبنوك وريادة لو ما عطوك دعم وفلوس .. تقدر تدخل شراكة مع مستثمرين من رجال اعمال او زملاء بعد عملك لدراسة الجدوى .. واللي يقول لازم سعوديين .. نوظف سعوديين وش فيها .. فيه مثلا الاستقبال او المسوقين او المعقبين وغيرها من الوظائف المناسبة للسعودي ورواتبهم تنحط في دراسة الجدوى المالية بعد .. اما سعودي بيسوي مساج ما أظن :) هذا غير انك انت بتشتغل على مشروعك وتكون ضمن السعوديين وتطلع من (قفص الوظيفة) الى الحرية المالية والادارية الله يسهل الامور ... |
رد: مشروع مساج علاجي يدخل اكثر من 3000 ريال باليوم !!
والله مشروع جدا" جميل وممتاز بماء تعنيه الكلمه
بس الكلام كم يكلف راس مال من أ الى ال ي |
| الساعة الآن 01:38 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين