دورة امن المنشات عام 1437
السلام عليكم أتمنى أي احد عنده معلومه عن دورة امن المنشات وهل هي قريبه من الصاعقه على حسب الكلام المتداول تفاصيل الدورة للي جربوها ياليت تفيدونا |
رد: دورة امن المنشات عام 1437
أنا متخرج قبل 5 أشهر من مركز الشرقيه الدورة كلها هروله و لياقه و حركات عسكرية و مرتين أو 3 تطلعون ترمون بالجلوك و الكلاش و رشاش g36 و الشرشور بس
مركز مكه أرحم بكثير من مركز الشرقيه مدربين الشرقيه لحوج و تعاملهم وصخ لكن الدورة خذها فله لا تبزوط و لا تنظبط مره بزوط على الخفيف ، و التعب و الله منسي هذا حنا تعبنا و كرفنا و الحمد لله هالحين مرتاحين و ترا الدوره فيه لاحظات و مواقف حلوه و فيها نفسيه اكيد لكن فلها و اختر الأخويا مطانيخ و بتعدي الأيام وهذا تقرير أنا كتبته يوم فتح تسجيلكم بتلقا كل شي فيه https://www.btalah.com/t661625.html |
رد: دورة امن المنشات عام 1437
الله يعطيك العافيه يامخاوي الذيب
بسألكم فيه مغسله بمركز مكه وهل يسمحوا ادخل مرهم شد العضلات وكيف الميز بمركز مكه |
رد: دورة امن المنشات عام 1437
أنا من دورة الشرقيه و مكه ما أعرف عنها شي
بس بال 45 يوم كل يوم جمعه يجيكم باكستاني راع مغسله يشيل ملابس الي يبي يغسل طبعا بفلوس بس نصيحه كثر الملابس معك أقل شي خذ 7 بدل رياضيه و درزن شرابات و هافات قطنيه و خذ معك صابون تايد 5 أو 6 حبات وغسل بنفسك لأن غسيلهم معفن يغسلها مع ملابس العالم و تجيك مروحه الصابون يمديك تزبن فيه دخان ادعسه بالسياره وزبن و نصيحه خذ معك قفل لأن الحراميه واجد بالدوره حتى الزنوبه و انت بكرامه يسرقونها و الجوتي خذ طبي أفضل لك و كعبه طويل لأن بالحركات العسكرية تضربون الأرض بقوه و يورم الكعب و بعضهم تنكسر رجله مرهم آلام وشد العضلات مهم جدا لأنك بتعاني أول 10 أيام تشددات عضليه الميز حق مكه يمدحونه أخوياي الي اخذو الدوره هناك إذا أنت جندي أول 100% بتاخذ الدورة بالشرقيه أهم شي لا تدخل المركز الا وبجيبك أقل شي 1000 ريال لأنك بتحتاج فلوس هناك زيارة الأقارب بعد ما تكمل 23 يوم بالمركز و أي سؤال ثاني أنا جاهز |
رد: دورة امن المنشات عام 1437
بخصوص التايد والغسيل يعني يسمحون لي اغسل ملابسي عادي بس حوسة نشر الغسيل والسرقه هناك على كيفك
وبخصوص القفل مسموح اني ادخله معي ولا لبشه وبخصوص الجزمه وانت بكرامه انت تقول خذها كعب عالي وهم محددين لازم تكون طبيه وسطحها مستوي محتار وش اخذ بالضبط السؤال الأخير دورتنا بتكون عن التدخل السريع هل تقارن بالصاعقه ! |
رد: دورة امن المنشات عام 1437
تغسل بأي وقت بيدك انشرها في الغرفه عند وضع النوم مع الصبح تنشف أنا كنت أغسل يومين قبل النوم
القفل مسموح الجزمه على راحتك تاخذ طبيه أو لا ، أو كعب عالى أو منخفض ، أنا شريت جزمه ( الحذاء الرياضي ) كعبها صغير و الله لا يوريك 45 يوم مورمه رجلي ، أنا أقصد الي كعبها عالي يعني مرتفعه عن الأرض و مستويه التدخل السريع ما تقارن بالصاعقه و لا حولها أنت ماعليك من المسميات الدوره تافه ما فيها فايده كل 9 أشهر تتمرن على الحركات العسكريه تحيه و الهروله و المشاه فقط ما تفيدك بعد التخرج أما التخصص يعطونك يومين تعليم رمايه فقط ماعليك من الأسم |
الساعة الآن 10:44 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين