حار الطبيب بعلتي يا عمي
 

لشاعر الوطن خلف بن هذال العتيبي

حار الطبيب بعلتي يا عمي
يقول انـا مـاداوي العشاقـه
انا المريض الهايـم المهتمـي
وأخذت من بحر الحزون الحاقه
وانا المولع في خفيف الدمـي
اللي نحف حدب الضلوع فراقه
ليت الهبايب جت بريحه يمـي
وأفتح بصدري للحبيّب طاقـه
اليا طلب منـي كـلام ٍ تمـي
واليا طلبت الهرج منه شفاقـه
واليا بغيت الكتب ماني عمـي
كم دفتر ٍ فاضي مليت أوراقـه
اسجل اسمه بالقلم فـي كمـي
هذي سلوم العالـم المشتاقـه
ياورد ما تسمح أشمك شمـي
واذوق من زهر الغصون ذواقه
من حبكم دمع العيـون يجمـي
جمة بحور ٍ للخشـب صفاقـه
الحال من ظبي الخلا منسمـي
اللي جوابـه مثـل در الناقـه
ابوه ياناشد عنه خـال أمـي
عليه من ساق الحمامة ساقـه
السر في قلبه يضمه ضمي
يخشونه اللي للحكي سراقه
غصن ٍ وتوه من حياضه زمي
يفوق بأوصافه وحسن اخلاقه

رد: حار الطبيب بعلتي يا عمي
 

من حبكم دمع العيـون يجمـي
جمة بحور ٍ للخشـب صفاقـه
الحال من ظبي الخلا منسمـي
اللي جوابـه مثـل در الناقـه

صح لسانك وصح لسان الشاعر
تحياتي