حلول البطالة Unemployment Solutions - ♒♒ دلـــيـــــل الـطـهـــــاره ♒♒

حلول البطالة Unemployment Solutions (https://www.btalah.com/index.php)

- الشعر والنثر (https://www.btalah.com/f28.html)

♒♒ دلـــيـــــل الـطـهـــــاره ♒♒

بدري عليك اللوم ياضايق البال
قلبك تحمّل ضيقته وانكساره

مايفرح بحزنك سوى ناس عذال
والا الرفيق يذوق مثلك مراره

هيا كذا الدنيا سهالات واهوال
تاره تبسّم لك وتبكيك تاره

فيها بشر عانت لاجل تبني اجيال
واشخاص عاشت لاجل تبني عماره

ريّح اركابك جامل الناس واحتال
على شعورك لاتبين دماره

وسرّك لو انْ تكشفه صار جوال
الناس تبغى الاكشنه والاثاره

ماكل حزنٍ يسكن القلب ينقال
بكره يدُور اسمك على كل حاره

ولا انته بأول شخص قالوا بالامثال
النار دايم مبتداها شراره

اضحك بوجه اعداك في كل الاحوال
لاجوك مقصودين سو استداره

خٙلّك مع المحتال غامض ومحتال
ومع طرقته دامه مجاريك..جاره

لو قال كيف الحال جاوبه بالحال
وضّح له انّك مبتهج بالزياره

ولا راح .. ما يمنع لٙوِ اتْجرّ موال
جرة غريبٍ ودّه بْشوف داره

وش تنتظر من ناس ماعندها اشغال
ناسٍ تحسب انّ المغثّه شطاره

وبعض المصايب تفرز اشكال واشكال
تظهر بها الرديان واهل النّعاره

ولو تشخل اللي يعرفونك بمشخال
تقول ٱنا أطيبْ بِشر عن جداره

تشوف فزعة شخص ماهو على البال
واللي تهقوابه يسوق اعتذاره

واللي توقِّف له مواقيف الابطال
يقعد ويشْمٙت فيك خلف الستاره

اياك والحقران في بعض الازوال
وترى الشكل ماهو دليل الطهاره

وماكل رجالٍ لبس بشت رجال
كم واحدٍ ماهو بيدينه قراره

واللي يجيك وللثقيلات شيّال
هو اللي يفخر فيه بشت الاماره

عليك باللي يلحق القول بافعال
والا الردِّي خلّه وجنّب مساره

انشهد انّه ماكذب واحدٍ قال
من لايعدك ربح .. عدّه خساره