السلام عليكم
بسالكم انا مره هالايام احس بتعب من دوامي لي فتره اتصبر استلمت الشغل ب6 مايو يعني تو ماكملت شهرين في البدايه كان مريح وعادي مدري شفيني من بعد هالاجازه واناتعبانه مره جسمي طايح وضيقه صدر لدرجه الصياح الشديد وتعالجت قبل ومازلت وكل فتره اتعب وهالايام عندي عذري الشرعي فصاير متجمع كل شي علي كرهت الدوام 8 ساعات على الكرسي من 2 الى 10 الليل غير انه ارتباط مررره ولااقدر اروح لشي وارفه عن نفسي وفي شي لاحظته البنت اللي معي قالتلهم اول مااشتغلنا بيتي بعيد فمااوصل الا متاخر فبغير وقتي قالولها خلاص من 1 الى 9 وبرمضان كنت اطلع 1 ونص وهي تطلع 12 بحكم بيتها بعيد واشوف بعضهم يستاذن وعادي وانا اليوم مره تعبانه واتصلت قالت مافي احد لان حقت الصباح ماخذه اجازه والمسائي اللي معي ماسكه الصباحي وضغطت نفسي ورحت
المهم انا قلت لاهلي يمكن ادرس او اشتغل شي ثاني عطاني ابوي نظره وقال ولااشتغلتي بمكان بعيد واتفقتي مع سواق الزياده اللي براتب بتروح للسواق لان حنا ماعندنا سواق وابوي يودين لانه قريب
ابوي ماهمه الا القرب والقرب قلت يمكن مااكمل قالت امي اضمني شي اول بعدين اطلعي اخاف تتحسفين
اختي قالت نفس الكلام بعدين قالت خلاص اذا ماتبغين مو لازم كلمتها الساعه 8 ودوامي ينتهي 10 قلت شكلي بطلع خلاص بس اسالي ابوي وكلمته قال الله يعيننا عليك
انا احس ان فيني خلل مدري لاني اتعالج ولا ضعيفه اراده ولاكسوله وملوله مدري وش منه كان ودي اثبت لاهلي اني تحسنت لما تعالجت واني بتغير بس شكلي من سيىء الى اسواء
حياتي تمشي بدون هدف بدون انجاز ودي اصير شي بحياتي ولانيب قادره
السؤال اضغط على نفسي واشتغل ؟ ولامو لازم اضغط نفسي واطاوع نفسي واسوي اللي يريحني ؟ تفشلت من ابوي لما قال الله يعيننا عليك احس اني اتعبتهم
اتعبتهم كثير من ثالث ثانوي احتست وتعالجت ونزل مستواي ولاجبت نسبه ودخلت تخصص محد يرغبه الجغرافيا ولاله مجالات بعدين وانا ادرس تركت الجامعه سنتين ثم رحعت اكمل وشهادتي الحين بالدرج مو مستفيده منها بشي
ابوي قال الله اكبر عاد شتسوين انتي على كرسي وبراد وش يقولون اللي بالحد الجنوبي هذاهم صابرين وانتي تقولين كذا

عليكم السلام

كلام ابوك عين العقل والمفروض ما تاخذين راي احد الا والديك عشانهم هم الاكثر حرص عليك

وخلك على العمل الحالي واصبري واكثري من قرآة القرآن وان شاء الله تتحسن امورك

وبعد ما تحسين نفسيتك صارت احسن ابحثي عن عمل افضل

الله يوفقك

__________________
ومن يعمل من الصالحات وهو مؤمن فلا يخاف ظلما ولا هضما

خليك بشغلك نصيحة وربي شهادات وخبرات وماني محصلة عمل يقبلني
ياشيخه جت على مواعيد الدوام ياستي عوافي .. المهم انك ترتاحي بعملك والترفيه عندك الويكند
رفهي عن نفسك لين تشبعي

الله يفرج همك وكلام فضل عين الصواب

سبحان الله وانا اقرا كلامك مثل الي صارلي بالضبط


لقيت وظيفه بمستشفى معروف جنب بيتنا والدوام كان من 2 الظهر الى 10

الوقت عجزت اتقبله ويسرق يومك كامل ولما بغيت استقيل ابوي تضايق مني وكان مايبيني استقيل

استقلت بعد 4 اسابيع فقط ووجدت وظيفه قريبه نسبيا من البيت بدوام صباحي ثابت والحين صارلي معهم 7 شهور

نصيحتي سوي الي مقتنعه فيه وترى محد حاس بوضعك اكثر منك

ثقتك في نفسك ارفعيها دائماً باكلام الايجابي عن نفسك قبل النوم للعقل الباطن وجهي رسائل ايجابية انا سعيده لان الله اعطاني كذا وكذا ادعي الله دعاء تفريج الكرب ومهما تضايقتي اقرائي القرآن
استخيري في البقاء واستخيري في الترك
ولو الترك خير ابحثي عن عمل وانت على راس العمل الان ارسلي وتقابلي مقابلات شخصية ثم استقيلي إذا اردتي .
واحسبي الخسائر:
المبلغ الذي تقدري تستغني عنه من راتبك لو الوظيفة بعيدة - والراحة النفسية ستفقد مع السائق لان المحرم رحمة من الله للنساء - وهل ستجدي في الوظيفة الجديدة راحة أو لا عند التقديم على اي وظيفة استفسري عن المكان كويس لان بعض الاشغال بلاء.

الله يشفيك يارب ...توكلي على رب العالمين ...الان الناس تبي خبره حتى لو حارس امن قال تعال ومعاك خبره
تصبري على الاقل 3 شهور

وا ابحثي عن دوام اخر قريب من البيت نظام شفتات 4 مساء و 4 صباح ...قبل ماتفكري تستقيلي

كمان اشربي كوب قهوه نسبرسو على وقت المغرب او نسكافيه يعطي طاقه

والنعمة الثانيه
انت من كلامك غير متزوجه ولا عندك مسئوليه اطفال
فانعمة انك تشتغلي ..ولا فية احد فوق راسك يقولك لا تدومي ولا تاخرتي

مناهل احب اقولك البلا مب فيك
البلا في الجو المحيط ونوع العمل والدراسه

اولا وظيفه بدوام من 2-10 كثير على اي شخص له خبره بالدوام ويتحمل الضغوط. وانتي اول وظيفه لك وهذا ساعات العمل اكيد صدمه. دوري لك عمل ساعات احسن

الشي الثاني
يمكن انتي طموحه ونشيطه وعندك افكار ولكن نوع الدوام وروتينه الممل يقتل كل النشاط مايخليك تحسين بالانجاز والانتصار لما تحققين شي صعب

انا ماقدر اقبل وظيفه ممله وان حصل واشتغلت وظيفه ممله بشوف لي بزنس خاص افرغ فيه طاقاتي

وش ميولك بالحياة وش تبدعين فيه

كل انسان عنده طاقات وقدرات لو مايفرغها ويشغل مخه يجيه اكتئاب

السلام عليكم ورحمة الله وبركاته ,,,

أختي الفاضله

في كل أنسان يوجد لديه طاقة داخليه والعقل متى ما أستوعب هذا الشيء هو يقرر يا نعم أو لا ...

بحاول أشرح ع قدر المستطاع يمكن يفيدك مثل ما أفادني بشكل كبير بحياتي ..

أنا يمكن مثلك مريت بكذا تجربة سببت لي أزمات وليس أزمة واحدة وكل أزمة أقوى من الثانية , أتت فترات طحت مريض بسبب الضغوطات هذا واحد وبسبب الطاقات السلبية اللي حولي يعني مثلا أنتي طموحه وتبينها للناس يجلسون يحطمونك إلين تغيري فكركك وبكذا لا ترتاحين ولا شيء وترجع عليك بالسلب طبعا مو في كل شيء يكون سلبي أحيانا إيجابي وواضح عليك طلع سلبي أكثر ماهو إيجابي ..

المهم ما عليك من الكلام الكثير أنا جلست مرة مع غريب لا أعرفه ولا يعرفني كذا فجأة شايفني محتاس ومو في الدنيا يعني عقلي صاير خارج عن الحياة أفكر في شغالات كثيرة ..

قال لي وراك تفكر وايش شاغل فكرك مدري كذا قلت له اللي عندي قال لي بس هذا !!!

قلت وليه هذا سهل وبسيط قال أي

قلت بالله كيف ما فهمت قال لي بأختصار شديد أنت فيك طاقة داخليه وذا الطاقة جالسه تشتغل معك بشكل سلبي متى ما شغلته بشكل إيجابي بتتغير حياتك 180 درجة

قلت هم ما فهمت أبي شرح يوضح فكرتكك ؟

قال ببساطة أمور حياتك آخذها بشكل إيجابي يعني لا تجلس تفكر في شيء وتقول بيصير معي كذا وكذا بشكل سلبي خليه إيجابي

يعني لما أقرر أكمل دراسة خلاص أحط في بالي أني بكون ناجح ..

لما أقرر أتوظف أخليه أني بنجح في عملي ..

بالمختصر لا تحطي في بالك شيء وواضعه في بالك فشلها لأنك بتفشلي فشل ذريع ..

حطي في بالك النجاح وأنك تستطيعي الأستمرار وكذا

ع العموم موضوعك يحتاج جلسه كذا لوحدك في الليل قبل النوم مع صلاة الليل وقراءة القرآن بتشوفي أمورك تتحسن بأذن الله

أعتذر ع الإطالة

وفق الله الجميع

حاولي تجلسين مع شخص ترتاحين له وقولي له اللي بقلبك وراح ترتاحين

وفيه شي مهم اللي هو شغلي القران الكريم دائما واستغفري وراح تتغير حياتك باذن الله واسالي مجرب