وين الهنوف اللي خذت قلبي وقفّت للشمال
ترد لي قلبي علي وكثر الله خيرها


لو انها ما ولّعتني كان للضيق احتمال
أصبر وأضمّد جرح قلبي والعوض في غيرها


مير البلا من قلبي اللي خلفها شد الرحال
من وين ماقفّت يقفّي بي ويتبع سيرها


كم قيل لي لاتبني احلامك على جرفٍ هيال
لكنّ نفسي ليّنت راسي ودقّت زيرها


طاوعتها ياليتني طاوعت وافين الخصال
قدّام أذوق المر والحسرات من تقصيرها


راع الهوى ماله دوا يشتال حملٍ مايشال
وأنا المحبه بيّنت في حالتي تأثيرها


أغوص في بحر العنا واطلع على روس الجبال
وضلوع صدري كل ماتطري يرفرف طيرها


من عقبها ضاقت علي افْجوجها والليل طال
حالي كسيره والهنوف الغايبه تجبيرها


واقف على باب الرجا وارقب مخاييل الوصال
عل وعسى والروح في حكم الولي تدبيرها


ليت الهنوف اللي خذت قلبي وقفّت للشمال
ترد لي قلبي علي وكثر الله خيرها