حلول البطالة Unemployment Solutions - الاجانب اخذوا وظيفتي الاولى - والثانية - مشكلتي مع التدريب المنتهي بالتوظيف في مكان شهير

بسم الله الرحمن الرحيم

السلام عليكم ورحمة الله وبركاته

انا قصتي ببدأها لكم من بعد تخرجي من معهد الاداره (وبتفوق)

في البداية انتظرت كأي خريج لفرصة وظيفية مناسبة, وبعد 3 اشهر من التخرج ألتحقت ببرنامج تدريب منتهي بالتوظيف في مستشفى مرموق ومشهور جداً في الرياض,

عموماً درست في البداية مبادئ اللغة الإنجليزية إلى أن أختبرت الـ IELTS اللي كان إلزامي لإكمال التدريب كون التدريب مُقدم من جهتين بنظام تعاوني (تدريب مشترك) بين المستشفى وكلية أجنبية (كندية)

خلصت دراسة اللغة وأجتزت إختبار الـ IELTS بدرجة 6.5 وهي فوق الدرجة المطلوبة لإكمال البرنامج ولله الحمد,

بعد ذلك اكملت الدراسة في نفس البرنامج ولما قربنا نتخرج من البرنامج اللي كانت مدته 15 شهر, قالوا لنا اننا احتمال ماننقبل كلنا بسبب عجز ميزانية المستشفى في ذاك الوقت (2015-2016) واننا احتمال بس نخلص التدريب التعاوني ونطلع من المستشفى بدون اي وظيفة رغم وعدهم السابق بوجود وظيفه,

بعد ذالك في منتصف 2016 جا مدير التدريب وتكلم معنا انهم راح يوظفون الأغلبية بنسبة 95% يعني احتمال شخص او اثنين بس مايتوظفوا وهذا شي مستحيل حدوثه بسبب الحاجه الماسه لشغل الوظيفة اللي احنا تم تدريبنا عليها وهي قريبه جداً من كونها (سكرتير)

عطونا ملخص بالمميزات والراتب اللي راح نستلمه بعد توقيع عقد الوظيفه معهم, وبعد مده خلصنا الدراسه وبدينا التطبيق العملي في نفس المستشفى وكانت مدته 4 اشهر,

في خلال هذي الفتره اتممت التدريب بنجاح وبمستوى متوسط إلى ممتاز, بعد ماخلصت التدريب جلسنا حوالي الشهر في اجازة وكلمونا المستشفى على اساس فيه ادارات من المستشفى نفسه تبغى توظفنا كلنا ولازم كل ادارة تعمل مقابله على حِدى عشان تختار مننا الأنسب لشغل وظيفة سكرتير في اقسامهم,

بعد المقابلات طلبوا مننا إدارة التدريب إننا نحدد الإدارات اللي نبغى نتوظف فيها بينما في الواقع الإدارات أرسلت خطابات رسميه لإدارة التدريب بإسم كل شخص يبغونه يتوظف عندهم وتاريخ مباشرته العمل معهم, انا اخترت قطاع كبير بالمستشفى كوني شفته الأنسب لي, وفي نفس الأسبوع ارسلوا لنا عشان نحضر إدارة التدريب ونوقع على تعهد الوظيفه اننا مانترك الوظيفه إلا بعد مرور سنه وكذا,

عموماً كتبت اسم القطاع اللي اخترته ووقعت واخذت نسخه من الورقه واعطيتهم الأصل, بعد ذالك رحنا للقطاع واخذنا جوله هناك على الادارات اللي محتاجه لتخصصنا, انا و عدة اشخاص من الزملاء, بعد ماخلصنا الجولة قال لنا الشخص المسؤول عننا ان الاختيار مفتوح بس انا تحديداً كان فيه إدارة تبغاني اتوظف عندها, طبعاً وافقت كونهم هم اللي اختاروني وكوني شفتها عن قرب وارتحت للموظفين اللي في هالادارة, وطبعاً وقتها كنا 5 اشخاص, وكان فيه شاغر بنفس العدد 5 اشخاص,

داومنا احنا الـ 5 في هالقطاع على اساس اننا بنوقع العقد مع المستشفى بشكل رسمي بعد اسبوع,

مر الأسبوع الأول, ولا شفنا عقد, الأسبوع الثاني, ولا شفنا عقد, انا هنا رحت للمسؤول عننا في هالقطاع وقلت له متى بوقع عقدي وترى انا مسؤول عن عائلة وكذا, قال لي لاتهتم بكره تعال كلمني, اليوم الثاني سألت عنه قالوا لي انه طالع اجازة, عموماً مشيتها قلت يمكن عنده طارئ, مر الاسبوع الثالث واحنا من اول اسبوع في تواصل مستمر مع ادارة المستشفى العليا كوننا معينين في قطاع حساس وبخطاب رسمي, وقتها طبعاً مابعد يعلنوا ميزانية السعودية الجديدة, بعد الاسبوع الرابع اعلنت الميزانية الجديدة وتم الرد على القطاع بعدم توظيف اي احد مننا بإستثناء شخص واحد, وللعلم انا كنت بتوظف مكان وحده اجنبية, علمتني كل شي يخص الوظيفة من إلى, ولكن انصدمت في اليوم قبل الاخير بوصول مذكرة داخلية إلى مدير الاداره يفيد بتوظيف موظفه سابقه (أجنبية) رغم ان عقدها منتهي وما بعد تجدده, عموماً اسررتها في نفسي وحاولت افهم من المدربة حقتي عن الموضوع بدون ما أبين لها إني عارف انهم رح يوظفوا وحده اجنبيه بدلها وبدالي انا,

عموماً مااطيل عليكم الموضوع كله ان فيه اجنبية اشتغلت مكاني, وانا اشتغلت شهر بدون عقد رسمي للوظيفه على اساس اني اتوظف مكان اجنبيه سابقه, ومشت لي مكافئة تدريب مو راتب موظف رغم اني داومت دوام الموظف الكامل وإلتزمت الإلتزام الكامل بالدوام,

الموضوع هذا طبعاً من شهر سبتمبر 2016 وكل مره ادخل المنتدى اتردد اكتبه او لا, ولكن اتراجع, هالمره ماادري ليش كتبته يمكن عشان افيدكم, او ممكن عشان احد يفيدني,

عموماً انا والاشخاص الآخرين اللي مالقوا لهم وظائف في هالمستشفى حصلت لنا مقابلات أخرى في نفس المستشفى
يوعدوننا فيها أنهم راح يوظفوننا احنا واحنا لنا الأولوية على الاجانب والسعوديين كذالك لو حصلت فرص جديدة على نفس المستوى الوظيفي ونفس المسمى, وفي نهاية 2016 سويت مقابله مع ادارة في المستشفى انا وشخص آخر وتمت افادتي انهم وظفوا عليها شخص ثالث ماسوى المقابله وكان برضو (اجنبيه)

هذي فرصتي الوظيفية الاولى, والثانية, في نفس المكان, وماتوظفت فيها,

بعد مرور السنه هذي اللي جلست فيها عاطل عن العمل

الآن انا اشتغل في شركة شبه جديدة في الخبر, كـ مساعد إداري لقسم الموارد البشرية,

الآن انا مو مهتم اني ماتوظفت بالمستشفى بس التلاعب اللي صار فينا من القطاع, ومن المستشفى بشكل رئيس, ابغى اعرف ماله رادع؟
المشكله لو اني سكت, كثير من الناس رح يتوهقوا بسبب هالمستشفى خاصه اني حصلت على عرض وظيفي من ارامكو وقت اللي كنت اتدرب هناك ولكن بسبب توقيعي على تعهد بإعادة مبلغ المكافئة اللي تم صرفه لي, ماقدرت اروح ارامكو خاصه اني مو مقتدر مادياً,
المشكلة الثانية لو اني تكلمت, المستشفى ممكن يعرف ويسووا لي فيها انهم شريفين وسين وجيم,

خلاصة الموضوع اني صرت مااخاف شي بسبب المشكلة الكبيرة اللي حصلت وبسبب جلستي في البيت لمدة سنة كنت فيها راح اجن بسبب ضياع فرص ذهبية علي والحين انا في وظيفة عاديه واكثر من عاديه بعد

اللي ابغى اوصله لكم ياجماعة الخير, لاتعتمدوا كلام احد, ولا تثقوا بالتدريب المنتهي بالتوظيف, زي ماشفتوا انا تدربت وجبت درجات عاليه في المعهد وفي المستشفى ومتخرج بعد على مرتبة الشرف ولكن

الشكوى لله,

والله يكتب لي ولكم اللي فيه الخير وآسف على الإطالة وعارف فيه كلام كثير مو مفهوم لكن لو نسقته انتم انفسكم راح تتضايقون لأن قلوب المواطنين على بعض مهما صار

ملاحظة: اعتذر عن تقديم اسم المنشأة اللي قدمت التدريب المنتهي بالتوظيف و او اي شيء له علاقه فيها لما فيه من مشاكل لي شخصياً ولإدارة المنتدى ثانياً

ولكم تحيتي