|
مطعمي قارب على التقبيل ابغى رايكم
السلام عليكم
في البداية أحب أشكركم على مواضيعكم حيث انها هي السبب الرئيسي الي حمسني أفتح مطعم. عشان توضح الصورة أكثر الشركاء في المطعم هم ثلاثه انا وصاحبي وشريكنا السوري كل واحد منا دفع 150 الف الا السوري دفع 100الف يعني المجموع 400 الف. المطعم عبارة عن شاورما,مشويات,بروستد,فطائر وعصيرات أجار المطعم ب 100 الف في السنة. تجهيز المطعم أخذ سنة كاملة مع رخصة المحل. عدد العمال 13 وقلصناهم بعد اول شهر الى 9. رواتبهم شهريا 23 الف. اجار سكنهم 20 الف سنويا. إدراة المطعم والمشتريات مسكها السوري بس بدون مايداوم يعني يشرف عليهم كل يوم او يوم ورا يوم وابنه كان المحاسب براتب 4500 الإفتتاح كان قبل رمضان بأسبوع تقريبا وكانت المبيعات 1900 يوميا بعد مادخل رمضان قلت المبيعات الى 400 في اليوم واحيانا اقل كنا متوقعين الدخل يكون ضعيف في رمضان بس مو بالشكل هذا بعد رمضان اضطرينا ندفع انا وزميلي رواتب العمال الي هم 13 ثم قلصناهم شهر 10 كان الدخل مايتجاوز 700 يوميا واضطرينا للمره الثانية انا وزميلي ندفع رواتبهم وخوينا السوري مامعه شي. شهر 11 ماقدرت نقس الشي دفعنا انا وزميلي رواتبهم الشهرين الاخيره كانت المبيعات مابين 900 الى 1100 واحيانا في الويكند توصل 1400 بس الشهرين الاخيره ماقدرنا نعطيهم الرواتب بحكم المشتريات. طبعا انا ماكان عندي خبره في المطاعم ولا ادري من وين يشترون المواد الغذائية للمطعم بعد ماشفت الفواتير انصدمت ان كل الأغراض تاكون من بنده او كارفور او العثيم والمشروبات يشتريها المحاسب بالحبات احيانا , تخيلوا يعني يشتري 15 حبة بيبسي 10 سفن...الخ سألته عن النقطه قال مافيه فايدة بس عشان اذا طلب الزبون يكون موجود عندنا :cry::cry: كلمت السوري أكثر من مره لكن لاحياة لمن تنادي تخيلوا المشتريات يوميا ماتقل عن 500 ريال والمبيعات تكون 700 او 800 واحيانا اقل الي لازم ندفعها الحين 1- 100 الف اجار السنة هذي سته شهور راحت وداخلين في سته شهور جديدة 2- شقة العمال 10 الف 3 رواتب العمال لمدة شهرين مايقارب 43 الف كلمت صاحبي وقلت له لازم نقلص العمال ونشوف اداراة جديدة يكون موجود في المحل دائما ونراجع المشتريات لأني سمعت ان الربوه وعتيقة يبيعون بأسعار رخيصة؟ قبل لا انسى سوينا مره عرض للشاورما خصم 50% لمدة يومين ووصلت المبيعات 2700 بس اليوم الثالث رجعت ل 900:confused: المعذرة الموضوع مو مرتب بس افكاري تلخبطت والله صرت ماعاد انوم الليل كل يوم افكر وش بنسوي جاني أرق وأكفر أقبل قبل لا أتكبد خسائر إضافة! أتمنى ماتحرموني من نصايحكم الله يجزاكم خير |
رد: مطعمي قارب على التقبيل ابغى رايكم
اقتباس:
شئ طبيعي اخي السوق يمر بركود قوي ومنها المطاعم وشوف كثرة المطاعم لتقبيل لان اغلبها لم تستطيع تغطية التكاليف التشغيل بسبب انخفاض المبيعات وباقي لم تتطبق الرسوم ماذا سيحصل اول شئ تسويه حاول تقليص العمالة الى الحد الادنى الذي لا يؤثر على المطعم وشوف كم مبيعاتك من الشاورما مثلا تبيع 20 كيلو سوي 20 كيلو عشان تخفف الهدر بعضهم يسوي 50 ومايبيع غير 20 او 30 والباقي يرمى فلازم تخفف الهدر في المواد الغذائية وتراقب الكميات من بروستد ومشويات الشئ لازم تكلم المالك يخفض لك الايجار الكثير من الملاك رضخو وخفضو الايجارات اعرف لك مطعم كان ايجاره 50 الف ونزله الى 30 الف المواد الغذائية حاول تنزل كل 3 ايام او توكل احد العمالة ينزل الجملة ويشتري وعندك عتيقة والربوة والعزيزية ارخصهم وشوف اخوي يمكن الركود يستمر الى 3 سنوات لان فيه ضرائب ورفع الدعم عن الطاقة وفرض الرسوم على العمالة المهنية وهذه كفيلة بضرب المنشأت الصغيرة لانها بتزيد عليها تكاليف وفي المقابل انخفاض المبيعات بالتوفيق اخي الكريم |
رد: مطعمي قارب على التقبيل ابغى رايكم
عليكم السلام ورحمة الله
استاذي الفاضل المفروض السوري يدفع نفس حصتكم بحكم ان دوامه غير منتظم ومعيّن ولده براتب شهري والمشتريات اذا من بنده وغيره هذا باب الخسارة الواضح المطاعم يشترون اغراضهم من الجملة ويتطلعون للعروض في المغرية في العثيم وغيره من المحلات الآن وبأسرع وقت يجب تغيير ادارة المطعم الى واحد نبيه وحريص ويجب عليكم متابعة المطعم انتم كشركاء ويجب تقسيم وقت المتابعة بالتناوب بينكم ياراعين الحلال. وبما انكم جلستوا سنة كاملة في تجهيز المحل المفروض تتابعون مبيعات المطعم أول بأول على الاقل لمدة ستة أشهر. هذا حلالكم وان ما حرصتوا عليه ما اظن فيه غيركم بيحرص عليه. الله يكون بعونكم اسمح لي كنت مندفع بالرد ولكن من باب حرصي عليكم |
رد: مطعمي قارب على التقبيل ابغى رايكم
اقتباس:
بكلم المالك اليوم اذا ينقص لنا من الأجار. اليوم ان شاء الله بمر الربوه وأقارن بالأسعار الله يعطيك العافيه ويجزاك الف خير |
رد: مطعمي قارب على التقبيل ابغى رايكم
اقتباس:
من اليوم ان شاء الله بروح للربوه واشوف الأسعار واتقضى بنفسي الين احصل ادارة كويسه الله يكتب اجرك |
رد: مطعمي قارب على التقبيل ابغى رايكم
اقتباس:
عوضكم الله خيرا مما ذهب عليكم .. أتشرف بتواصلك معي علي الجوال : 0551818680 من بعد الساعة التاسعة مساء في أي يوم تحب داخل أيام الاسبوع . لدي استبيان أريد مناقشته معك ... طبعا إن كنت ترى ذلك مناسبا لك .. فإنا في الخدمة . |
رد: مطعمي قارب على التقبيل ابغى رايكم
خذ اجازه من دوامك
داوم بالمحل ابعد المحاسب السوري ابو 4500 وجيب لك محاسب ب1500 قلص العماله اللي تحتاجه عليك بالاعلانات والعروض مثلا شاورمتين وواحد هديه مشترياتك بالجمله وانا اخوك مهب من بنده والعثيم وهنا خسارتك هات مدير مطعم اي جنسيه غير المعلمين والمحاسب راحع حساباتك ومصروفاتك والكميات اللي ترمى قلصها زد اصناف بالمطعم المحاسب غلط يكون ولد شريكك وبهذا الراتب العالي الشغل مافيه مجاملات حمس العماله بطريقه بونص حسب انتاجهم وحسب كل واحد وابداعه بصنفه ومبيعات صنفه حط توصيل طلبات وتواصل مع هنقرستيشن ومرسول لاضافة المطعم بالتطبيقات اكسب الزبون عب ثلاجات محلك الزبون اذا شاف الثلاجات فاضيه يقول مطعك مش حالك ومايرجع واذا تبي اديره لكم راسلني تحيتي |
رد: مطعمي قارب على التقبيل ابغى رايكم
اقتباس:
|
رد: مطعمي قارب على التقبيل ابغى رايكم
اقتباس:
الي انا افكر فيه الحين هو تقليص العمالة الى 5 اقل شي حتى اقدر اوفيهم رواتبهم بالنسبة للأصناف كل فترة ازيد صنف الى صنفين واسوي بانر عليها اتمنى اني احمسهم واعطيهم بونص بس المشكلة مافيه دخل اغلب الشغل الي يجنا من الطلابات كم مره كلمت هانقرستيشن ومرسول ويقولون بنتوصل معك ولا شفت شي! كيف بتكون إدارتك وخطتك للمطعم؟ هل أدرت مطعم سابقا؟ |
رد: مطعمي قارب على التقبيل ابغى رايكم
بلاك من السوري ☺
اول خطوه لازم تسويها تراقب المحل بنفسك ووضع كاميرات مراقبه .. وتقليص راتب المدير كبير ابو 4500 الى 1500 او 1800 .. ونصيحة مجرب ومن واقع إنتبه من الثقه العمياء ومثل ماقالو الاخوان كل التجاره وحتى الإلكترونية فيها ركود مو طبيعي .. ان شاء الله انها شدة وتزول .. والله يعوضك |
| الساعة الآن 11:20 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين