المركز اللي اشتغل فيه قفلوا
 

السلام عليكم ورحمه الله
وأخيرا استعدت كلمه المرور وقدرت اكتب
انا من سنه و4 شهور وانا ااشتغل في المركز (نادي رياضي نسائي )
من اول ماااشتغلت ماعطونا عقد ولاسجلونا في التأمينات
وافقت ولاقلت شي وسبق حطيت مشاركات مره أقول بتركهم مره بكمل وفي اللي قال كيف تشتغلين بدون عقد
المهم والموضوع الحين جتهم مفتشه من وزاره العمل قبل يمكن 3 أسابيع وعرفت ان مافي عقود
(عامله الكفي ماعندها تصريح عاملات النظافه مو على كفاله النادي حنا ماعندنا عقود وعندنا أجانب حتى الاداريه سوريه وتقول وقعوني وبصموني والمفروض عليهم غرامه 20 الف عشاني )
المهم جت المديره قالت بوقعكم عقد كذا بس قدام مكتب العمل وبكره اوقعكم عقد ثاني على مزاجي !!!!
قلت طيب في نسخه من هالعقد قالت لالا ولانسخه ولا شي
سكتنا
عقبها باسبوع يمكن جاهم تهديد من البلديه انه بيغلقون المحل مالم تدفع المستحقات اللي عليهم
المهم يوم الخميس 16 أغسطس كان اخر يوم في المركز كتبو للمشتركات في الانستجرام ولنا حنا بعد قالو انه بيسوون ترميم كامل للمكان وتعديل للديكورات ولا قالو للمشتركات متى العوده قالو انه سنوافيكم بتاريخ العوده
قالت المديره بالقروب لنا يوم الجمعه بنات ترى النادي بيقفل بحدود الشهرين وللأسف مانقدر ندفع لكم رواتب هالشهرين ردت وحده من البنات انه العطل منكم المفروض الرواتب تندفع قالت النادي مو مطلع لاراس المال ولاحتى رواتبكم !!!!!!!!!!!
قالت لنا راح تستلمون راتب 16 يوم من أغسطس فقط وقالت لها وحده من البنات اقولكم من الحين احتمال مااكمل معكم واطلع
انا من الحين جالسه ادور وظيفه
تتوقعون الكلام هذا منطقي كيف مفلسين او شبه مفلسين يعني وبيسوون ترميم كامل وديكورات
مشاكلهم مع البلديه ومكتب العمل اعتقد انه قفلو المكان ؟ بس مايبون يعلموننا عشان يخافون نفضحهم قدام المشتركات ؟
يعني ممكن يكونون سكرو تماما ومايبون يقوولون لنا انا مو عارفه وش بيصير مايهم ولااظن اني برجع لان بعد حركتهم هذي مافي امان حتى راتب ال16 يوم هذي مو عارفه متى بيعطوننا إياها هل هو هالايام ولا بعد الشهرين ولايكذبون علينا
تكفون لاتقسون علي بس كل ماجيت اتركهم سبحان الله يردني شي واهلي يهاوشوني اللي يقول على كرسي وبراد ووظيفه مريحه جدا مافيها شغل وتتمرنين وتنبسيطن وتاخذين راتب وتشوفين بنات بسنك
وابوي دايم يقول اللي عنده وظيفه يعظ عليها ومدري وش واحيانا اكتب استقاله واقطعها
يعني لاتقولون انتي اللي وثقتي فيهم
مو عارفه تتوقعون يكذبون علينا ؟
انا لان هذي تجربه العمل الأولى وتوني صغيره ولاعندي خبرات في الحياه فمو عارفه كيف اتصرف

رد: المركز اللي اشتغل فيه قفلوا
 

السلام عليكم ورحمه الله

اختي اولا ماشاء الله عليكي قدرتي تستحملي تقعدي معاهم الفترة هذه كلها

بيئة العمل في النادي اللي شغاله فيه سيئه جدا جدا جدا جدا للأسف

لاتحطمي نفسك بنفسك عشانها باللي لايردها من نادي

دوري على اي وظيفة ثانية وباذن الله بتحصلي البيئة اللي تحترمك كموظفة عندها وترتاحي معاهم

هذا النادي للأسف إدارته سيئة لاتحترم موظفيها وعليها مخالفات كثيرة, لاتتلفين اعصابك عشانهم

ابحثي عن غيرهم ومجرد ماتحصلين ولا حتى تقدمين استقاله لأن حسب مافهمت إنهم حتى في التأمينات ماهم مسجلينكم

ربي يوفقك وتحصلين العمل والبيئة النظيفه اللي تقدري تبدعين فيها

رد: المركز اللي اشتغل فيه قفلوا
 

ههههههه
مدري وش أقول لك
بس صرت أحاول اتحاشى ارد عليك
ولا عمرك اخذتي برأي احد بالموقع

شكلك من النوع البكاي الشكاي

قلنا لك مليون مرة اشتكي و خلي فيه اثبات انك موظفه عندهم عشان يدفعوا لك
حق التأمينات
راتب تقاعدي لك
و ميزة ثانيه تاخذي ساند رواتب 12 شهر اذا استغنوا عنك بدون سبب مشروع

لو انك اختي كان خضيتك شوي يمكن تفهمي

اول واكبر وغلط تكملي معاهم بدون عقد

تقدري تكملي بدون عقد لكن اثبتي انك موظفة
ما يحق لهم يوقفوا الراتب بحجة ديكور و ترميم

خلاص وقع الفاس فالراس

الان توجهي انتي واللي معاك لوزارة العمل و التأمينات الاجتماعية
عشان تاخذوا حقوقكم

رد: المركز اللي اشتغل فيه قفلوا
 

هلا والله وكل عام وانت بخير
الله يسعدك انت ماقصرت معي بس مثل ماقلت ياان احد يوقف بوجهي يايردني شي وكنت صراحه محتاجه الشغل ومحتاجه مصروف مع ان حالتنا الماديه مره كويسه اللهم لك الحمد بس الراتب هذا مصروف جيب لي
على العموم اذا ابيهم بسجلوني بالتامينات باثر رجعي ؟ طيب انا قد اخذت حافز واستلمت منه 10 دفعات وباقي لي دفعتين
لو شكيتهم وطلبت انهم يسجلوني بالتامينات بيبين عندهم اني قد استلمت حافز ؟ ويكون في عقوبه لي او شي اني كنت موظفه واخذ حافز ؟ ولاماله دخل مب ذنبي انهم ماسجلوني ؟
بعدين راتب 16 يوم من اغسطس المفروض يعطونا اياه هالايام يعني يقولون داومو يوم كذا ونعطيكم رواتبكم ولا بعد مايفتحون بعد هالشهرين ؟

رد: المركز اللي اشتغل فيه قفلوا
 

انتي مو مسجلة في التأمينات من الاول وذا ماجالك مسج انه في لك رقم اشتراك في التامينات مافية شي يضمن حقكم ولا حتى عقد والتامينت مالها دخل بحافز
شكل سالفة الترميم حجة يبعدونكم والله العالم انه ماراح تشوفونهم مرة ثانيه
صارت لي هذي السالفة مع اني مشتغلة بعقد وتأمينات ولاني كنت اشتغل بالاداره كنت اسمع المديرة تقول (ليتني ماسجلتهم بالتامينات )هذا اللي ضمن لنا الشهور اللي اشتغلنا فيها
وازيدك من الشعر بيت مااستلمت رواتب 5 شهور مو شهرين واسرقت مبلغدعم الموارد البشريه لكل الموظفات ...ولحد الان ما حصل لها شي غير وقف خدمات ومنع من السفر وجااااااري الانتظار
وكنت مثلك اول وظيفة بقطاع خاص حسبي الله عليهم