أبناء المطلقات
 

السلام عليكم
أستاذ محمد دخلت على لائحة الضمان وإلى الآن موجود قرار أسقاط أبناء المطلقات بعد سنتين يعني هل راح يسقطون أبناء المطلقات فعلا يعني ماتراجعوا عن هالقرار الظالم ؟
لأن كنت أحسب أنهم تراجعوا بعد المطالبات وخايفه يتم أسقاطهم ونرجع للمعاناه من جديد ياليت اذا تعرف شئ تعلمنا وش صار على هالموضوع

ياربي،، كل مااحاول انسى الموضوع تذكروني فيه
يختي خليها ع ربك الامل في الله كبيرر والشعب واقف معنا ومااحد راح يرضاها علينا صدقيني بتقوم الدنيا وتقعد لو اسقطو عيالنا
هونيها وتهون

الله يعين نفس افكارك انا الله يرزقنا ويسخر لنا الرزق ويسخر لنا عباده
من وين نصرف عليهم اذا قطعوا ضمان عيالنا ؟؟
حسبي الله ونعم الوكيل

والله انه نظام مجحف بجد ربي يسخر لكم واولادكم كل اللي يسعدكم

عن تجربه شخصيه مع بناتي اسقطوهم السنه اللي فاتت وارسلت ايميل للوزير شرحت فيه اني مطلقه ومن وين اصرف ووقتها كنت على وشك اتخرج لاني ادرس عن بعد ويبي لي وقت ادور وظيفه و و و والله انهم ردوا علي في اقل من ثلاث ايام بضم بناتي معي بالضمان لمده سنه زياده من جهه واتصال من طاقات من جهه ثانيه عشان البحث عن وظيفه ..صحيح للحين ما لقيت وظيفه بس لا تشيلين هم انتي سوي اللي عليك لو بمطالبات لاي جهه واتركي كل امرك لله رب العالمين يدبرها ويسخر لك ..

رد: أبناء المطلقات
 

بصراحة منطقيا من واجب دامه عايش يصرف على ابناءه لكن اذا كان فقير او مريض او مفقود فهذي استثناءات لازم الضمان يراعونهم ولا يسقطونهم

صحيح واجب على الأب شرعا لكن اذا كان الأب بالضمان في مثل حالتي وشلون يسقطونهم من الأم ويضيفونهم مع الأب من الأولى أنهم مايسقطونهم من الأم
والنفقه كم راح تكون اذا كان موظف بسيط مثلا 150 لكل طفل او 300 ماراح تغطي مصاريف الأبناء من دراسه ومن أكل وشرب هذا في حالة الأب راتبه قليل ماراح يستفيدون الا في حالة الأب راتبه عالي وبذا الزمن كل شي نار والله مافيه عدل ومراعاة لأبناء المطلقات لازم يمرمطون المطلقات وابنائهم عشنا مرتاحين من المشاكل سنين ثم نرجع للمشاكل والظلم والقهر حسبي الله وكفى

رد: أبناء المطلقات
 

والله ياأم لمى ماودي اضيق خلقك لكن وش أسوي هالموضوع كابوس لازم يشوفون لنا حل من الظلم بعد كل السنوات نرجع للمشاكل والله صعب

الله يفرجها علينا اجمعين قدمي عليه في المحكمة يصير يعطيك مستحقات ابناءك كاملة اللي تنزلهم من الضمان مو على كيفه ياخذها

الآن أبنائي معي بالضمان أنا خايفه اذا طبقوا القرار يسقطونهم ويضيفونهم مع أبوهم بالضمان وأرجع للمرمطه للمحاكم والمشاكل والمشكله أن أبوهم مو صاحي مجنون وراعي مشاكل واذا رفعت قضيه أطالب بنصيب أبنائي راح يسبب لنا مشاكل وعدة مرات تهجم علينا وفكنا الله منه لكن بعد هالقرار الظالم راح نرجع للمشاكل والمرمطه والتهديد من جديد هو بالضمان خلاص يخلونهم معي ليه هالظلم وأكيد هذا اللي فكرت فيه أني أطالب بنصيب أبنائي لكن متأكده راح أتعرض للمشاكل من جديد وأن شاء الله مايتم تطبيق هالنظام لأنه بيتسبب بمشاكل كثيره لمثل حالتي طليقي راعي مشاكل ويتعاطى وأنا خايفه منه الله يرفع الظلم عني وعن جميع الأمهات المطلقات وأبنائهم اللي زي حالتي