حلول البطالة Unemployment Solutions - تجربتي مع التكافل التعاوني..

السلام عليكم ورحمة الله وبركاته

شباب انا لقيت اعلان من عضو اسمه التكافل التعاوني..

بصراحة لقيت ردود كثيرة عليه واستفسارات كثيرة وحبيت اطرح هالموضوع ليستفيد منه الجميع وان شاء الله تستفيدوا..

انا قدمت ع واحدة من البنوك اللي عندها هالخدمة وبصراحة كنت متردد بس الظروف خلتني اقبل الوظيفة واقدم لها..

بداية طلبوا السيرة الذاتية وزبطتها ورحت لحد مقرها بجدة وقابلت موظف واعطيته السيرة الذاتية واعطاني موعد بعد اسبوع اقابل رئيس وحدة يسوي معاي مقابلة شخصية..

وسويت مقابلة شخصية وكلها اسئلة عاديى بس انا فاجأني بسؤال:

قال لي كم تطمح يكون راتبك!!؟؟
قلت له والله امنيتي يكون 10000 ريال وقلته وانا اضحك واسوي فيها انكت:d

قال والله الصراحة اللي طموحه 10000 ريال ما ينفع يشتغل عندنا:Looking:
انصدمت وتلبكت وكمل كلامه وقال احنا عندنا مرتبات عالية جدا مقارنه بباقي الوظائف بس لاني حاس انك فعلا محتاج الوظيفة راح اقبلك..

طبعا اشترطوا علي ما يكون علي اي بلاك ليست في الاتصالات والا موبايلي ويكون عندي سيارة شخصية..

وقبل العمل فيه دورة البيع الاساسية ومدتها اسبوعين دخلتها ونجحت فيها بالمرتبة الاولى:rolleyes:

لما نزلنا لسوق العمل كانت الوظيفة عبارة عن:

تجمع ارقام ناس موظفين وخصوصا ذوي الدخل العالي وتتصل عليهم وتحدد معاهم موعد تروح لهم لحد البيت او العمل وتشرح لهم الخدمة المقدمة اللي هي التكافل التعاوني واذا وافق ع الخدمة تخلص واراقه ولك عمولة على حسب اشتراكه..

في البداية حسيت الشغلة صعبة جدا جدا لان فيها احراجات كثيرة..

بس والله مع الزمن تعودت عليها وحبيت هالشغلة بس لاني اغلب اللي اعرفهم حافين ومنتفين ماقدرت ابيع للبنك شي:d وقدمت استقالة منها :d

كان في نفس وحدتي اللي اشتغلت فيها موظف خلال شهر جاب اشتراك واحد بس واستلم راتبه في نفس الشهر طبعا بعد ما صدر العقد للمشترك.. استلم راتب 1500 ريال + عمولة 18000 ريال يعني استلم خلال شهر ومن عميل واحد فقط 19500 ريال

طبعا قبل ما امشي كنت بفرع مكة وفي نهاية 2008م كان الفرع بالمرتبة الاولى على مستوى المملكة من ناحية الاشتراكات..

يعني الشغلة حلوة للي يجتهد فيها..

وتحياتي لكل الشباب اللي فيها ومدراء وحدتي بجدةومكة وان شاء الله في يوم اكون عميل عندكم
:d

واي استفسار انا تحت امركم