مـجـرد فـضـفـضـه . . . ! !
 

السلام عليكم رحمة الله وبركاته
صباح/مساء .... الخير << كل واحد حسب توقيته

انا شاب وشابَ راسه عمري 24 من القصيم عاطل لي ست سنوات تدرون ليش لاني الشاب الوحيد بالعائله
ابوي اصيب بمرض نفسي وعمري تقريبا 17 خليت الدراسه من ذاك الوقت بديت اروحبه واجيبه
يعني علاجات و مشائخ يقرون عليه ايضا كنت اقضي حوائج اهلي مثل مواعيد مستشفى سوق
توصيل للمدارس ويوم وصل عمري 24 واثر الاوضاع كله مدبره و موليه طبعا اخذت ثانوي ليلي انتساب
جيت ادور وظيفه بالقصيم لاني صعب اترك اهلي واروح ديره ثانيه لان مالهم بعد الله الا انا
ما لقيت الا دوامين وانا بصراحه اغلب اهلي عندهم مواعيد بالمستشفيات مثل الوالده
فيها كلسترول ولي اخت عيونه لك عليهن لازم كل شهرين مراجعه و الثانيه فيها قلب
يعني لو توظفت << ودققلي على لو توظفت ما يمديك تدخل الدوام الا مستاذن
تبي توصل الوالده مشوار والا تبي تجيب البنات من الكليه والا من المدرسه
يعني راحت علي كل احلامي البنت اللي انا حاط عيني عليه وراحت و المناصب اللي
كنت احلم فيها وراحت الى درجة ان النوم من عيني راح كل نومي راح هواجيس ما يمدي
اغمض عيني الا ماذن الفجر مرهـ انسدحت على المنام بنام ما جاني النوم قمت رحت المطبخ
بشرب ماء اناظر بريق الشاهي مسكته قعدت احكه قلت اغديه يطلع الجني حق المصباح السحري
اللي يقولون عنه يوم قعدت شوي اسولف على روحي اقول شكلي انهبلت لا والله موب شكلي الا اكيد .
الحين ليلي كله على هالنت لما صارت عيوني حمر حول تفضخ والا ماسك القلم وقاعد اكتب
قصائد وكل القصائد اشكي بهن الحال .
اخوياي كلهم ما شاء الله عليهم كملوا دراستهم والي راح يدرس برا واللي الحين مدرس والا موظف
و فيه كم واحد تزوج ما شاء الله عليهم وعسى االله يرزقهم وييسر عليهم دنياء واخرهـ .
وانا حاط ايدي على خدي و انتظر معجزة مره اقول يبي يجي الوليد بن طلال ويصكن مع الجبهه
بعشر ملايين ومرهـ اقول بريق هالشاهي يبي يبيض جني علاء الدين .
ولاكن الاكيد هي ردد ( ياليل ما اطولك )
قررت افتح مشروع رحت صندوق المئويه كم مرهـ ابي قرض ببدا مشروع قابلوني بالمماطله مرهـ يقولون جب لبن
العصفور و مرهـ يقولون احلب التيس .
دخلت على شخصيه بارزهـ طبعا بعد عناء كبير و مماطله شكيتله الحال وقلتله بالحرف الواحد ( ابي دعم مابي عطيه وان
شاء الله اكون عند حسن ثقتك بي ) كتبلي ورقه سكرتيرهـ اللي بجنبه مكتوب عليه فئة ( د )
رحت وانا اناظر الورقه واقول ( فورجت وجاك يا مهنى ما تمنى ) .
رحت لشباك صغير صافين عليه الناس صفيت يوم جاء دوري عطاني الف ريال والالف ريال اقدر
اتسلفها من اقرب صديق لي وانا طالع لقيت شويب ( شايب ) يمشي بعصا معه ولدهـ قلت لولدهـ ليش جاي
قال اخوي محكوم عليه قصاص ومطلوب ديه خمس ملايين قلت بقلبي ( مصائب قَوُم عند قومٍ فوائدُ )
طلعت الالف ريال اللي اخذته وعطيته منها خمسميه وقلت عسى الله يفك اسر اخوك ومشيت .
والقصص و المحاولات كثيره وكلها تروح هبا منثورا
و ياشباب ترا الموضوع مجرد فضفضه و ادري ان الحال من بعضه
وقلت اشكي لكم الحال باللغه العاميه لانه اقرب للقلوب والله ييسر على الجميع و يرزقهم من الرزق الحلال .

ودمتم بالف صحه وعافيه

الله يشفي والديك واخياتك ويخليك لهم
ونعم فيك من شاب والله يكثر من امثالك.
الله يرزقك ويوفقك

تصدق لو كل عضو عاطل كتب فضفضة
والله لتقول انك بجنة
واسئل الله يفتحها عليك من اوسع ابوابة
ويفرج همك

صادق هي فضفضه لان وقت الجد مالنا إلا الله الكريم نلتجي اليه ونبث حزننا ونشكوى ضعفنا
ولك دعوه طيبه صادقه من جميع الاعضاء والزوار دعوة أخ\أخت في ظهر الغيب
ربي يفتح لك أوسع أبوابه ويرزقك من حيث لاتحتسب ويعطيك حتى يرضيك آمين

الله يفرجها عليك ويرزقك من واسع فضله
ان شاءالله تعبك ماراح يضيع وصدقني ان ربي راح يكرمك ويفرجها عليك بسبب برك بأهلك
بس نصيحتي لك .. كمل دراستك الجامعيه انتساب في أي تخصص مطلوب ...
وترى كثير الي درسوا انتساب وتيسرت لهم
قبل لا تروح عليك فعلا ... الشهاده هي الي راح تساعدك فعليا حتى لو طال الوقت

يارب ياكريم ... فرح قلبه واشرح صدره ويسير أمره وارزقه من حيث لا يحتسب رزقا حلالا طيبا مباركا فيه
اللهم آميــــن

فلها وربك يحلها..!

الله يفرجها عليك ياغالي

والله أخوي كنت اشوف حالتي محزنه بعد ماقريت اللي كتبته انا بنعمه ولله الحمد

كل مايضيق صدرك تعال واكتب هنا لانك راح ترتااح هذا متنفسك الوحيد

وجعل الله يفرجها لك في هذا الليله ويكتب لك الرزق من سابع سمااء ياارب

اسأل الله العلي القدير ان يفرج همك ويرزقك عاجلا غير اجل
الله يفرجها علينا
وبدال الهواجيس انصحك تصلي قيام الليل وتستغفر وربك مايخيب عبد استغفر له ودعاه