10-05-2015, 04:50 PM
|
عضو نشيط
|
|
تاريخ التسجيل: Jul 2011
المشاركات: 139
معدل تقييم المستوى: 26
|
|
( من لاغبر شاربه مادسمه )
مثل يختصر عليك جميع التساؤلات عن بذل الاسباب والمرجلة فالحياة الدنيا
يوم من الايام قبل مااتوظف
جلست عند جدي رحمة الله عليه
وكنت اتمنا سيارة معينه وكنت اردد عنده (ياليت هالسيارة عندي أو لي )!
فجاني رد منه رحمه الله قطع علي جميع الاماني وادخل في مخي حب الحركة وبذل الاسباب وحب التفاني
قال لي ( انت ولد ومتعافي ) اي اني استطيع جلب هالسيارة اذا اردت ذلك ولايعجزك ذلك اذا تفانيت وتعبت وتمرجلت
الله يرحمة ويدخله الجنة فعلا كبار السن ماخلوا شي يفيدنا الا قالوه
هذا استطراد اخر
بعد فترة تحسن راتبي الى الا فضل قليلا
وصار عندي راس مال بسيط
وكنت من عشاق روائح العود(البخور)
وناوي ابيع فيه
ويوم من الايام نزلت اتمشى في سوق المعيقلية بالرياض
وكنت اسمع ان مبيعات جملة العود عندهم
وامر المحلات واسأل
ودخلت محل ولقيت فيه حضرمي مطوع وكان بشوش ارتاح لي وارتحت له
وفتحنا مجال بيع العود
قال لي بالحرف الواحد اغلب اللي يجي السوق نوع معدل او ممزوج والاصلي صار نادر
واذا هو موجود له زباينه الخاصيين
قلت له انا ناوي ابيع
قال بتفتح محل ؟
قلت لا المحل صعب علي
اباخذ لي طاولة وابي ابيع عند المساجد بعد كل صلاة
وصرت اخذ منه على نص كيلو 18 او 19 اوقية (بخور يجمل مثل مايقولون ) ريحته مقبوله جدا
طبعا اشتري درزن علب بلاستيك بقيمة عشر ريال فيه عشرين علبه
واروح لبيتي اجهز العود واحطها في العلب وابدا من بعد صلاة العصر الى صلاة العشا
يتخلل هالشي بعض التعب من شيل الطاولة وترتيب علب العود على الطاولة واشعال الجمر
لكن مع الايام ومع المكاسب تنسى هالتعب واكسب من النص الكيلو المباع 120 ريال
واحيانا تبيع البضاعه كلها في يوم واحد واحيانا في ثلاث ايام كـ حد اقصى .
(من المواقف اللي ماانساها في بيع العود )
1_ شخص جاني عند المسجد وقال لي اقسم بالله ان البيت مليان من البخور والعطورات
لكن علشانك سعودي ابشتري البضاعة كلها
2_ امام احد المساجد بعد ان شرا مني اوقتين طلب مني كيلو من نفس العود للمسجد
وفعلا شريته له واخذت حقي كامل مع الربح .
3_ مع احد كبار السن وولده معه طلب كبير السن تخفيض قيمة الاوقية الى سعر لافايده منه ابدا واعتذرت منه وقلت السعر هذا مافيه فايده ولكن ابعطيك اوقية براس مالها والثانية بسعري انا قال لي انتم تنصبون على الناس !! قلت مانصبت على احد انا رجال اترزق الله وهذا سعري ولده كان يسمع كلامنا . بعد ماراح كبير السن جاني ولده يتعذر عن اللي صار من ابوه قلت ابد ماصار الا الزين وشرا مني الولد اوقتين بسعري انا
عموما اي شي لازم تتعب فيه حتى توصل مبتغاك وسعة الصدر مع الزباين من اهم ركايز الربح
وللحديث بقية
اخوكم ماجد
|