01-08-2016, 02:56 PM
|
عضو مهم
|
|
تاريخ التسجيل: Feb 2008
الدولة: الرياض
المشاركات: 257
معدل تقييم المستوى: 33
|
|
|
تجربتي في _ سباكة وكهرباء وحدادة وقريباً ان شاء الله في الميكانيكا
السلام عليكم ورحمه الله وبركاته
من هنا وهناك ، حبيت اعرض لكم ما شفته خلال 5 سنوات في التجارة وفي التعامل مع الناس ومع العمال والمحلات ، ومن واقع تجربتي ومعايشتي للمحلات والتجارب طول هالمدة . حبيت اعرض لكم تجربتي اللي اقول ان شاء الله تكون فايدة للي يبغى يدخل المجال هذا ، فايدة للي يبغى يضرب حساب للامور الصغيرة وانها هي اهم من الامور الكبيرة ،
فالحمد لله على كل حال ولله ما اخذ ولله ما اعطى
ملاحظة : انا لست تاجر وانما اريد ان ادخل التجارة ...
وباخذ الموضوع وانا اكتب كنوع من السوالف والسرد للي صار وكنت اتوقعه واللي حدث فعلاً ، وبحكم اني شمالي تبي تصير سالفتي طويلة ،
وانا اتكتب الان هذه التجربة ما اقول ان تجربتي انتهت ، رغم خسارتي في المال والوقت ، لاني متفائل جدا ان شاء الله ، ولكن الاهم من كل شيء استفدت الشيء الكثير من المهن والحرفة والمهارة
" الفشل لابد منه اذا اردت النجاح "
بداية ابي اعرفكم بنفسي وعن الحال قبل كل شيء ، والسبب في هذا وهو معرفة الدافع وراء دخولي هذا العالم الصعب لكنه الغير مستحيل .
انا الحمد لله موظف في احد الجهات من 8 سنوات تقريباً ، طبعاً ماني رسمي ، ولله الحمد ماشي بعملي ولا فيه مشكلة ودوام عملي من الساعه 8 صباحا الى الساعة 4 العصر ، وخلال هذه السنوات مريت بتجارب ومشاكل خلتني افكر ان اكبر خطأ لاي شخص انه يفكر بالوظيفة قبل ما يفكر بالتجارة ، وانا اعتبرها غلطة والمشكلة في الغلطة اني لازم استمر فيها الين ما اصححها .
المهم في طبيعة الوظائف اهم ما يبحثون عن الموظف اللي يحضر وينصرف على اوقات الدوام ، بغض النظر عن انجازاته ، يعني الوظائف كلها حضور وانصراف حتى لو ما تشتغل او تنجز او يبتكر ، المهم حضورك وانصرافك .
الحقيقة مافيه شيء اسمة تطوير عندنا او ابداع ، ولما اعرض فكرة فيها تطوير للعمل للاسف اسويها ، واحفر عليها وبالاخير ما تطبق وهذي صارت معي اكثر من مرة هذي مشكلة . وصارت في نفسي وكل يوم اشوف شيء في العمل يخليني افكر الف مرة اني افصل منه وهي ( ان ابداعي اخليه لي ، وان أي فكرة جديدة اطبقها بسرعة قبل ما يسبقني فيها احد)
ولاجل ما قلت هذا اللي خلى الاجانب يتفوقون علينا بـ100سنة قدام بسبب النقطة هذي ، عندك فكرة طبقها واذا ما نجحت نساعدك لتطبيقها ، واذا بالاخير فشلت دور لنا فكرة عشان نطبقها جميع . هذا مبدا الشركات والمؤسسات اللي تطور نفسها .
هذا المبداً غير موجود نهائياً ولا شفته ولاجله افكر بالتجارة لاجل تطبيق الافكار بالدرجة الاولى ومن ثم الربح منها بغض النظر أي نوع المشروع (سباكة كهرباء مطبخ الكترونيات أي مجال )
وعشان هالنظرة فكرت في التجارة بحيث ان مافيه احد يوقف في وجهي اذا شفت شي جديد ، وما يخطر في بالي من جديد اجربه واطبقة واسويه حتى لو انا لحالي .
وهنا فكرت كثير في دخولي التجارة بس ماكنت اعرف وش ابدا فيه ، ولا عندي فكرة عن أي شي . ولا عندي راس مال نهائياً . مع اني قدمت على جميع المؤسسات الحكومية والاهلية لكن للاسف رفضوا جميعهم ...
المهم وبعد تفكير جت عيني على شنطة عندي في البيت حاطها حتى وقت اللزوم ، وكان عليها غبار ، نفضتها وكان فيها عدة سباكة وكهرباء ، ، وانا كنت من زمان اشتغل في السباكة والكهرباء بنفسي قبل ما افكر ادخل هذا المجال ، وكنت اصلح أي شيء يخرب واي تمديد للكهرباء اسوية يعني الحمد لله اشتري المواد خام من المحلات واصلح في البيت
ومن هنا جت فكرة اني اشتغل سباك او كهربائي بحكم معرفتي للامور هذي والخفيفة والسريعة ، فعندي اشتغل أي شغلة قدامي مهما كانت ولا اعتبرها عيب دام عن طريقها اعرف شيء جديد فيها . وفيها دخل مادي .
وبعد ماصار لي موقف مع احد العمال الباكستنيين ، شريت عدة بقيمة 500 ريـال تقريباً مع اني نص اللي شريته ما احتاجة لكن مخلية لطوارئ
المهم جبت العدة وقعدت اتعلم على مواصير البيت وعلى الكهرب وطبعاً انفجر الكهرب 3 مرات فيني ومرة باهلي غير مواصير السباكة اللي اعدمتها ، واللي زاد الطين بلة البيت اللي ساكنة ايجار ، بس قلت ما يهم اللي يقعد يصير لي الحين او اسويه الحين راح اجني ثمارة بعدين
يعني ماني مقاول كهربائي او سباكة لكن الحمد لله من 5 سنوات لا دخل عندي ولا أي عامل الا للضرورة القصوى ولله الحمد
المهم بعد ما عرفت الشغلة صرت ادور أي واحد عنده ماصورة خربانه تحتاج تصليح او فيش او كهرب ومن هالامور ، وكان وقتها اشتغل مجانا لوجة الله على اساس اني اوصل للي ابيه واني اتعرف على المشاكل في هذا المجال ، لكن المفاجاة وبعد فترة طلع ان ربعنا يقدرون الاجانب في هذا المجال ، مع ملاحظة انهم يستغلونهم استغلال ما يعلم فيه الا رب العالمين ، والاشد والامر ان ربعنا يدرون بالشيء هذا قبل ما يروحون لهم ، لكن يعتبرونهم ارحم من أي سعودي يدخل بيتهم لاي سبب . وهنا المشكلة
المهم وبعد ما فهمت وبحثت لقيت اساسا ان السعودي غير مرحب فيه حتى بديرته ، ان جيت للوظايف تلقى الاولوية للأجنبي ، ان جيت للمشاريع تلقى الاولوية للمقاولين الاجانب ، وقس على ذلك كل شيء ، فما بالك لو سعودي يدخل بيت عشان يصلح ماصورة او يمدد كهرب ، حتى بعض السعوديين اذا سافروا للخارج كانهم مايعرفون بعض . فكيف هنا
المهم قلت ما يخالف دام دعوى ربعنا كذا اجل بدور لي على شيء ثاني ، وبحثت عن شي غيره ، وبعد بحث وانا ادور في المهن لقيت فيها مهنة حلوة واكثر الشباب يحبونها الا وهي تجهيز السيارات للبر . يعني فكرتي كانت مثل محلات الكشتات وتجهيز الرحلات وغير كذا
ومن هنا طبيت في بحر وانا ما اعرف اسبح ، سويت مجازفة على نفسي لكن اعتبرها جس نبض للناس مع انها بالاول والاخير خسارة لي بس سويتها قلت لعل في نهاية الطريق في خير
اسوي شيء احسن من اللي ما يسوي ، امشي في طريق احسن من اللي ما يمشي ، حتى لو كان الطريق خطأ
المهم قبل كل شيء سويت دراسة جدوى كاملة لمشروع معين ، واللي ساعدني احد الاشخاص جزاه الله خير بحكم انه يسوي دراسات جدوى للمشاريع ، وفهمت طريقة دراسات الجدوى وبعد ما سويتها طلع المبلغ الاجمالي تقريباً 750 الف ريـال .
طبعاً المبلغ ما جا عبث الا اني سعيت في مواقع الانترنت ورحت ادور على المحلات لنفس النشاط في 3 مدن وكنت اجمع السلبيات والايجابيات والاسعار بكامل تفاصيل كل شيء ، الين ما طلع المبلغ اللي ذكرته .
المبلغ مبالغ فيه جداً جداً على محل لنشاط في السيارات ، ولكن كنت مقسم المبلغ وكنت مركز على جانب اساسي في الزبون وهي اني لا انظر الى كم في مخباته (جيبه) بل انظر الى شيء ثاني في الزبون ، ولا كنت راح ادخل بالمبلغ كله كامل ، قاسمه الى فئات واحتياطات ومخطط للمبلغ وين يروح وين يجي ...... الى اخ شي
وعشان الشيء هذا ، ثلث المبلغ حاطه لشراء اشياء مهمة للزبون ، وفيه اشياء تقدم مجانية وفيه وفيه وفيه ... يعني بعد ما يجي أي شخص عندي في المحل اقول ان شاء الله انه 7000% انه يرجع للمحل حتى لو ما يبي يصلح سيارته بس يبغى يتفرج ، لاسباب معينة
المهم مر الوقت ولا لقيت احد يمول هذا المبلغ مع اني اعلنت في المنتديات والجرايد وكل مكان ، ولا بقى الا دار المسنين اعلن فيها بس ، فنقصته الى النص يعني الى 350 الف ، ومع هذا ما لقيت احد يمول ، فنقصت النص الى النص يعني الى 150 الف ، ومع هذا مالقيت ، الا بالاخير لقيت دراسة الجدوى تطلع لي ان الاجمالي وهو 30 الف . طبعاً شلت اشياء وحطيت اشياء ، وهنا قلت انا اولى بها من غيري يشاركني مع ان كل شيء علي . مع العلم ان حولت فكرة التجارة مثل فكرة شركة cat للمعدات لكن في نفس المجال والنشاط
ومن هنا بدت تعاملي مع الجمهور والتجارة مع اني ماني ملزوم بمحل ، واعني اني اشوف لي مكان اصلح فيه واعدل ولا استاجر محل بحكم ماعندي قدره عليه ، ولا لقيت مكان الا الاستراحة ، المهم جمعت مبلغ وقدره وفتحت حسابات اجتماعية وصرت انشر واسوي دعاية ، وكنت متفائل جدا ، والحمد لله بدت الناس تجي وكنت اشتغل عند الاستراحة رغم اني خسرت نص المبلغ اللي جمعته
المهم الحمد لله مشت الامور لكن انصدمت في اول عائق لي ، وهي الوظيفة ، كنت اروح الدوام من الساعة 8 الى الساعة 4 ، وبعدها اطلع للبيت الين الساعة 8 . فمن 8 الى الساعة 12 اكون فاضي ومتفرغ . ، وهنا المشكلة ان الناس ماهي فاضية تجيك على مزاجك او الوقت اللي يناسبك . الناس تبي الوقت اللي يناسبها هي
مع العلم ان كل يوم يجيني شخص يقول ابيك تصلح لي كذا او تسوي في سيارتي كذا وانا ما اقدر اقولهم الا ان شاء الله ،
وهنا بديت اشوف ان الامور بدت تصعب علي مع الوقت ، والشغلة يبي لها تفرغ كامل ، ولا كنت اقتنع نهائيا بشيء اسمه عامل ، او اجيب عمال ، لان ما يحك جلدك الا ظفرك ، اذا الشغلة ماهو انت اللي تسويها بيدك او لا تجيب احد يسويها لك . والا قال لي اكثر من شخص عن العمال لكن غير مقتنع نهائياً بالعمال . مع ان اكثر من شخص قالي فكرة العامل لكن رافض شيء اسمه عامل
فمن هنا صعبت وجت في نفسي كيف لو افصل من الوظيفة لمدة سنة عشان اتفرغ لمشروعي وهنا المغامرة اللي مابغيت اسويها ، المشكلة الاكبر وهي من وين براتب طول هالمدة ، او مبلغ يمشي اموري طول الفترة وامور اهلي ، والمدة هذي ما تدري ان المشروع ينجح او يفشل ولهذا لازم تامن لنفسك دخل عشان اذا نجح المشروع تستمر فيه واذا ما نجح ترجع لوظيفتك وهنا وقتها ماتكون خسرت أي شيء .
ونصحني اكثر من شخص مثل ما قلت اني اجيب عمال مع اني كنت ارفض الفكرة اساسا وهي العمال لان الشغلة انا ابي اشتغل بنفسي ولا احتاج عمالة حتى لو هي صعبة ، وان احتجت عامل فيكون احتياجه لمساعدتي في بعض الاشياء البسيطة مو كل الشغل ،
وقدمت على جميع مؤسسات الحكومية والاهلية اللي تعطي قروض سواء تخطر في بالك او اللي ماخطرت في بالك وكلهم اجمعوا على الرفض . والسبب الوظيفة . حتى البنوك لازم ضمانات
والحمد لله مع انه صار لي اسم عند الناس اللي الي حولي وصار يعرفوني بامور السيارات لكن الى الان لم اوصل للي ابيه ، لكن ينقصني المبلغ عشان اقدر افتح لي محل وامن نفسي لمدة سنة الى نجاح او فشل المشروع . وهنا قدمت على كل المؤسسات مثل ما قلت لكنهم رفضوا .
ووالا جا شخص وقالي وش رايك نفتح محل كهرباء سيارات وقال علي كل شيء لكن ما فتحت الموضوع بكامل بتفاصيلة ، بحكم ان نجاح او فشل المشروع اعتبره انا يعتمد على صاحب المشروع اذا موجود او لا ....
وهنا عائقي الثاني وهو المبلغ ، فالاول هو الوظيفة وان ماعندي وقت للتفرغ ، واذا تفرغت فكيف امن نفسي لمدة سنة بحكم انها تجارة ، مع مبلغ المحل نفسه .
ومن هنا حولت وقلت خلن اصير حداد على الاقل لان الحديد يبي له وقت في التفصيل وان تسليم الطلب ما يكون في نفس اليوم ، ومو شرط يكون عندك محل لو تفصله بالشارع مافيه مشكلة . فخليتها على الحديد ، وقلت يمكن فرصة
وبعد ما عرفت الحدادة شريت حديد وعدد حديد للقص والتلحيم وكل شيء ولا لقيت انسب مكان اسوي حديد وتفصيل الا في الاستراحة (استراحتنا انا والشباب) ، ولا فيه مكان عندي احطه بحكم اني مستاجر ، فخليته بالاستراحة ، والاستراحة هذي كلها من معارف وناس تقرب لي ، ومع الوقت اكتشفت ان عندي ازمة في الشغل وهي الوقت ، فالمشكلة فيه ناس معي دوامها ماهو ثابت والاغلب منهم كذا ، فيجون تعبانين وينامون على طول في الاستراحة ولا لهم سكن الا الاستراحة ، وهذي المشكلة , المشكلة اني اوقف شغل الين اضمن ان مافيه احد نايم بحكم ان قص الحديد مزعج جدا ، ولو كنت في احسن مكان معزول راح يصحيك صوت مكينة قص الحديد فما بالكم بالقص . ومن هنا صرت اتصيد اوقاتهم ، فصارت الشغلة بدل ما تاخذ يومين تاخذ اسبوعين او ثلاثة بسبب اخويانا . ومن هنا فكرت ان الناس ماهي صابرة عشان اخلص .
وهنا مشكلة الحديد ، فالكهرباء الناس ما راح تجيك اذا فضيت والحديد راح تزعج العالم بالقص ، وهنا رجعت للمشكلة حقتي وانها مازالت قائمة واني اعيش بدائرة مغلقة حتى مع الحديد ، الا وهي المحل ، المحل يبي له تفرغ ، والتفرغ لازم افصل من الوظيفة ، واذا فصلت لازم امن نفسي لمدة سنة ، وهنا مشكلتي والدوامة .
ومن هنا ومع الوقت قصرت على تجارتي وخليتها على نفسي بحكم اني مكتف مع اكثر من جهة ، فصرت اشتغل لنفسي في كل شيء تعلمته ،سواء كانت سباكة والا كهرباء منزل وسيارات او حدادة ، مع اني جت فترة اشتغلت مقاول وابني لكن هذي من فترة طويلة ,
فجت في بالي شغلة ثانية وجديدة وهي الجوالات . والجوالات فيها خير والحمد لله ، فقررت اشتغل في الجوالات ، ولا تستغرب من ان أي فكرة او شغله احب اشتغلها ، بسبب شيء واحد وهو ان وقتي ما ابيه يضيع من دون فايدة ومن دون ما اتعلم شيء جديد مهما كان ، وهنا كنت ابي دورة صيانة جوال مثل الدورات اللي تعطيها وزارة العمل والدعم اللي صار لسعوديين ، فقلت فرصة نحول على الجوالات دام ان ايجار المحل 2000 ريـال بالشهر فهي بسيطة لو ادفعها من راتبي ،
واول امر فكرت فيه اني ادخل دورة صيانة الجوال المقدمة من الجهات الرسمية ، المفاجاة وهي انهم رفضوا بسبب اني موظف ومع الوقت جا في بالي اللي صار لي مع المهن وخذاني الاحباط بما انا عليه حتى لو افتح محل جوالات لازم تفرغ ...
. وبعدها جت في بالي مطبخ بحكم ان راح يكون تواجدي في المطبخ لساعات معينة ، وهالامر قلت ما يخالف لو اشتغل طباخ ، المهنة مافيه اجمل منها اذا كنت هاويها ، السبب لان الشيء اذا حبيته راح تبدع فيه . وللاسف ان طلع تكاليف المطبخ فوق طاقتي حتى لو كان مثل طريقة الاسر المنتجة . مع اني جمعت معلومات عن طبخات شعبية لكن بافكار جديدة (جريش قرصان رز احمر رز اصفر رز ابيض رز حراق الى اخر شيء من الطبخات اللي فيها افكار جديدة ، والمكرونه العادية والمكرونه بالجبن والمكرونه بالزعفران والمكرونه الحراق والمكرونه الهندية .....الخ .
، لكن الصعوبة في نهاية الفكرة وهي التكاليف .
ومن هنا تعلقت بالتجارة بين اشياء كذا ومجالات كثيرة وكلها فيها خير مهما كان نشاطها ، طبعاً كل المهن اللي سردتها كنت افكر اني انا ازاولها بنفسي من دون عماله او عمال . لان لو كنت راعي حلال وعندي عمال ما يعرفون وش شغلهم راح يضيع الحلال ،. وحتى اذا كنت راعي حلال والعمال محترفين لكن ماكنت عندهم راح الحلال يضيع ، فكلا الامرين نتيجتهم وحدة ، وهذا انا ما ابيه . فاعتماد شغلي راح يكون بالاول والاخير علي فقط .
وهنا جمعت كل المشاكل اللي تواجهني في الشغل وكل المشاكل اللي تواجهني مع الناس ، ولخصتها باهم شيء الا وهو التفرغ التام للعمل بالدرجة الاولى ، مهما كان العمل بقالة او حلاق ، والثاني راس المال .
فاللي شفته ان البقالة اللي جنب بيتنا هي نفسها البقالة اللي في اخر الشارع ، مافيه شيء يختلف عن بقالة والثانية لا عن طريق المنتجات ولا عن طريق التسويق ولا حتى عن طريق العمال وترتيب البضاعة ولا حتى وقت العمل ، السبب ماهو في العمال السبب لان الشخص لو تفرغ لعمله او نشاطة لازم 100% يتميز عن غيره بنفس النشاط ، مهما كان .
وقس الشيء هذا على جميع الانشطة اللي تشوفها في الشارع ، فلو راح أي شخص لاي محل حلاق مغسلة سيارات مغسلة ملابس محل حلويات كل المحلات اللي تشتغل في نفس المجال نفس الطريقة ونفس العمال مع انهم يكسبون والله يزيدهم ، لكن جميع المحلات هذي لو يفتح محل كبير يضرب سوقهم من اول يوم ،
وهنا يجي دورك في النشاط , وهذا اللي كنت ابي اوصل له بكل شغلاتي اللي اشتغلتهن ، وان محد يقدر ينافسني مهما كان كبر المحل او صغرة باذن الله . بسبب تواجدي في المحل 24 ساعة . بحكم
لكن في نهاية المشوار وانا امشي في المجال هذا استفدت شي ، صحيح اني خسرت خساير لكن كلها ولله الحمد على نفسي ، والاهم ان كل الشغلات اللي جربتها اقدر ازاولها ولا احتاج الى أي عامل مهما كان متمرس في شغله ، وانا اعتبر ما صار هو مثل الشهادة ، فالواحد اذا راح يتوظف راح ينظرون الى شهادته ودوراته ، وانا في المهن اللي تعلمتها اعتبرها مثل الدورات والشهادات ،
لكن باقي لي مجال واحد وهو لازم في كل الاحوال اني اجربه وادري اني بخسر فيه وهو الميكانيكا ، لكن هالمرة على نفسي ، يعني ما راح ادخله كتجارة لكن راح ادخله كفايدة لي بالدرجة الاولى واستثمار للوقت . وان شاء الله الله يكتب لي ولكم الخير في أي مكان واي مجال .
والله يوفق الجميع لما يحبه ويرضاه .
|
العرض العادي
